ڈیجیٹل انڈیا بھاشنی ڈویژن (ڈی آئی بی ڈی) نے محکمۂ انتظامی اصلاحات و عوامی شکایات (ڈی اے آر پی جی)، حکومتِ ہند، اور حکومتِ راجستھان کے اشتراک سے منعقدہ قومی ای۔گورننس کانفرنس 2026  (این سی ای جی) میں بھرپور انداز میں شرکت کی۔ بھاشنی نے براہِ راست عملی مظاہروں، کثیر لسانی مصنوعی ذہانت پر مبنی حل اور باہمی تعامل پر مبنی تجربات کے ذریعے یہ دکھایا کہ زبانی مصنوعی ذہانت کس طرح ڈیجیٹل حکمرانی کو زیادہ جامع، قابلِ رسائی اور عوامی ضروریات سے ہم آہنگ بنا رہی ہے۔

بھاشنی کے نمائشی اسٹال پر مندوبین نے تقریر اور متن کے براہِ راست ترجمے، آواز پر مبنی مصنوعی ذہانت کی خدمات، شرتھ لکھ، بھاشا دان اور سنو سوترا— جو بھارت کا پہلا دستی کثیر لسانی ایج مصنوعی ذہانت آلہ ہے — کے عملی مظاہروں کے ذریعے پلیٹ فارم کی بنیادی صلاحیتوں کا مشاہدہ کیا۔ شرکاء نے بھاشنی سے تقویت یافتہ عوامی حکمرانی کے مختلف عملی استعمالات، جن میں سی پی جی آر اے ایم ایس، نیائے سیتو، آروگیہ وانی، سبھا سار اور یووا سارتھی شامل ہیں، کا بھی تجربہ کیا۔ ان مثالوں نے واضح کیا کہ کثیر لسانی مصنوعی ذہانت مختلف زبانوں میں عوامی خدمات تک آسان، مؤثر اور بلا رکاوٹ رسائی کو ممکن بنا رہی ہے۔

نمائشی اسٹال پر بھاشا دان میں بھی شرکاء نے بھرپور جوش و خروش سے حصہ لیا۔ یہ بھاشنی کی زبانی اعداد و شمار جمع کرنے کی قومی عوامی شراکت داری مہم ہے۔ زائرین نے مختلف بھارتی زبانوں کے زبانی اعداد و شمار میں اپنا تعاون کیا، ان کی توثیق کی، اور بھارت کے کثیر لسانی مصنوعی ذہانت کے نظام کو مضبوط بنانے میں اپنی خدمات کے اعتراف کے طور پر ڈیجیٹل شرکت کا سرٹیفکیٹ حاصل کیا۔ کانفرنس کے دوران بھاشنی نے راجستھان لینگویج ماڈل ٹریننگ ہیکاتھون کا بھی آغاز کیا۔ اس اقدام کا مقصد مارواڑی، میواڑی، ڈھونڈھاری، ہاڑوتی، میواتی اور باگری جیسی راجستھان کی علاقائی زبانوں کے لیے معیاری زبانی اعداد و شمار تیار کرکے مصنوعی ذہانت کے زبانی ماڈلز کو مزید مضبوط بنانا ہے۔

کانفرنس کی ایک اور نمایاں خصوصیت شرتھ لکھ کا استعمال تھا، جو بھاشنی کا مصنوعی ذہانت سے تقویت یافتہ تقریر کو فوری طور پر متن میں تبدیل کرنے والا نظام ہے۔ اسے کانفرنس کے دوران متعدد مرکزی اور ذیلی اجلاسوں میں استعمال کیا گیا۔ شرتھ لکھ نے مختلف تکنیکی اجلاسوں کے دوران تقریر کو براہِ راست تحریری متن میں تبدیل کرنے اور اس کا فوری ترجمہ فراہم کرنے کی سہولت مہیا کی، جس سے یہ واضح ہوا کہ مصنوعی ذہانت پر مبنی زبانی ٹیکنالوجی بڑے عوامی اجتماعات میں معلومات تک رسائی کو کس قدر آسان اور مؤثر بنا سکتی ہے۔

بھاشنی کے نمائشی اسٹال کا دورہ راجستھان کے وزیر اعلیٰ جناب بھجن لال شرما، حکومتِ راجستھان کے اطلاعاتی ٹیکنالوجی و مواصلات کے وزیر جناب راجیہ وردھن راٹھور، سینئر سرکاری حکام اور ملک بھر سے آئے ہوئے ممتاز مندوبین نے کیا۔ انہوں نے بھاشنی کی کثیر لسانی مصنوعی ذہانت پر مبنی خدمات کا مشاہدہ کیا اور عوامی خدمات کی فراہمی کو زیادہ مؤثر، جامع اور آسان بنانے کی اس کی صلاحیت کو سراہا۔

کانفرنس کے موقع پر ڈیجیٹل انڈیا بھاشنی ڈویژن (ڈی آئی بی ڈی) کے چیف ایگزیکٹو آفیسر جناب امیتابھ ناگ نے سرمایہ کاروں کے اجلاس میں بھی شرکت کی۔ انہوں نے راجستھان کے معزز وزیر اعلیٰ سے ریاست میں کثیر لسانی مصنوعی ذہانت اور زبانی ٹیکنالوجی کے فروغ کے بارے میں تبادلۂ خیال کیا۔ اس گفتگو کا محور زبان کو اولین ترجیح دینے والی اختراعات کے ذریعے جامع ڈیجیٹل طرزِ حکمرانی کو مزید مضبوط بنانا تھا۔

ڈیجیٹل انڈیا بھاشنی ڈویژن کے چیف ایگزیکٹو آفیسر جناب امیتابھ ناگ نے کہا: ’’اگر مصنوعی ذہانت کو واقعی ہر شہری کی خدمت کرنی ہے تو اسے ان زبانوں کو سمجھنا ہوگا جو لوگ اپنی روزمرہ زندگی میں بولتے ہیں۔ ہر زبانی تعاون، ہر توثیق شدہ اعداد و شمار کا مجموعہ اور ہر نیا عملی استعمال ہمیں ایسی مصنوعی ذہانت کی تشکیل کے مزید قریب لے جاتا ہے جو زیادہ جامع، زیادہ نمائندہ اور ہر ایک کے لیے زیادہ قابلِ رسائی ہو۔‘‘

این سی ای جی 2026 میں بھاشنی کی شرکت نے اس عزم کو مزید تقویت دی کہ کثیر لسانی ڈیجیٹل عوامی بنیادی ڈھانچے کو فروغ دے کر حکومتوں اور اداروں کو یہ قابل بنایا جائے کہ وہ شہریوں کو ان کی پسندیدہ زبانوں میں خدمات فراہم کریں۔ جدید مصنوعی ذہانت پر مبنی حل، عوامی شراکت سے زبانی اعداد و شمار کی تیاری اور قابلِ توسیع زبانی ٹیکنالوجی کے ذریعے بھاشنی مسلسل اس ویژن کو آگے بڑھا رہی ہے کہ ڈیجیٹل بھارت میں زبان کبھی بھی اچھی حکمرانی کی راہ میں رکاوٹ نہ بنے۔

ڈیجیٹل انڈیا بھاشنی ڈویژن (ڈی آئی بی ڈی) کے بارے میں

الیکٹرانکس اور اطلاعاتی ٹیکنالوجی کی وزارت میتری کے تحت ڈیجیٹل انڈیا کارپوریشن (ڈی آئی سی) کا ڈیجیٹل انڈیا بھاشنی ڈویژن (ڈی آئی بی ڈی) مصنوعی ذہانت سے تقویت یافتہ کثیر لسانی ڈیجیٹل شمولیت اور زبانی ٹیکنالوجی کے فروغ کے لیے بھارت کا قومی اقدام ہے۔ قومی مرکز برائے زبانی ٹیکنالوجی (این ایچ ایل ٹی) کے ذریعے بھاشنی بھارتی زبانوں میں تقریر اور متن پر مبنی مصنوعی ذہانت کی قابلِ توسیع خدمات فراہم کرتی ہے، جن سے حکمرانی، عوامی ڈیجیٹل پلیٹ فارم اور مختلف ادارے مستفید ہوتے ہیں۔

اس وقت بھاشنی 800 سے زائد سرکاری ویب سائٹس کو خدمات فراہم کر رہی ہے، روزانہ دو کروڑ سے زیادہ مصنوعی ذہانت پر مبنی تجزیاتی عمل انجام دیتی ہے، جبکہ اب تک آٹھ ارب سے زائد مجموعی مصنوعی ذہانت پر مبنی تجزیے مکمل کیے جا چکے ہیں۔ یہ پلیٹ فارم 36 بھارتی تحریری زبانوں، 23 بھارتی صوتی زبانوں اور 35 بین الاقوامی زبانوں کی معاونت کرتا ہے، جبکہ قدرتی زبان کی پروسیسنگ (این ایل پی) سے متعلق 20 سے زائد خصوصی خدمات بھی فراہم کرتا ہے۔ اس طرح بھاشنی کثیر لسانی مصنوعی ذہانت میں اختراع کو فروغ دینے اور بھارت کے ڈیجیٹل عوامی بنیادی ڈھانچے کو مزید مستحکم بنانے میں اہم کردار ادا کر رہی ہے۔

******

ش ح۔ ش ا ر۔ ول

Uno-9486

(रिलीज़ आईडी: 2280537) आगंतुक पटल : 12