કોલસા મંત્રાલયે કોલસા બ્લોક ફાળવણી ધારકોને વધુ નાણાંકીય સુગમતા પૂરી પાડવા અને કોલસા ક્ષેત્રમાં વ્યાપાર કરવાની સરળતાને વધુ મજબૂત કરવા માટે એક મહત્વપૂર્ણ સુધારાની શરૂઆત કરી છે. કોલસા બ્લોક ફાળવણી (સુધારા) નિયમો, 2026 દ્વારા, મંત્રાલયે ખાણ અને ખનિજ (વિકાસ અને નિયમન) અધિનિયમ, 1957 (MMDR Act) હેઠળ ફાળવવામાં આવેલા કોલસા બ્લોક્સ માટે પરફોર્મન્સ બેંક ગેરેંટી (PBGs) ના સ્થાને ઇન્સ્યોરન્સ સ્યોરિટી બોન્ડ્સ (ISBs) ના ઉપયોગને મંજૂરી આપી છે.

સુધારેલું માળખું કોલસા બ્લોક ફાળવણી ધારકોને તેમની કામગીરી સુરક્ષાની જવાબદારીઓ પૂરી કરવા માટે પરફોર્મન્સ બેંક ગેરેંટી અને ઇન્સ્યોરન્સ સ્યોરિટી બોન્ડ વચ્ચે પસંદગી કરવાની મંજૂરી આપે છે. આ સુવિધા હાલના ફાળવણી ધારકોને પણ વિસ્તૃત કરવામાં આવી છે, જેનાથી તેઓ નિર્ધારિત શરતો અનુસાર અગાઉથી રજૂ કરાયેલી પરફોર્મન્સ બેંક ગેરેંટીને ઇન્સ્યોરન્સ સ્યોરિટી બોન્ડ સાથે બદલી શકશે.

આ પગલાંથી પરંપરાગત બેંક ગેરેંટી વ્યવસ્થાઓ સાથે સંકળાયેલા નાણાંકીય બોજ હળવો થવાની અને કોલસા બ્લોક ફાળવણી ધારકોને ખાણ વિકાસ તથા ઓપરેશનલ પ્રવૃત્તિઓ માટે તેમની મૂડીનો વધુ કાર્યક્ષમ રીતે ઉપયોગ કરવા સક્ષમ બનાવવાની અપેક્ષા છે. તે નાણાંકીય સાધનોની પહોંચ સુધારવામાં પણ મદદ કરશે અને સાથે જ એ બાબત પણ સુનિશ્ચિત કરશે કે યોગ્ય પરફોર્મન્સ સિક્યોરિટી મિકેનિઝમ દ્વારા સરકારના હિતો સંપૂર્ણપણે સુરક્ષિત રહે.

કોલસા બ્લોક ફાળવણી (સુધારા) નિયમો, 2026 ભારતની ગેઝેટમાં તારીખ 22 જૂન, 2026 ના રોજ G.S.R 508(E) દ્વારા પ્રકાશિત કરવામાં આવ્યાં છે અને તેને વેબ લિંક https://egazette.gov.in/(S(lymuax4zcvs2ntquyuz4zhzb))/ViewPDF.aspx પર જોઈ શકાય છે.

ઇન્સ્યોરન્સ સ્યોરિટી બોન્ડની આ સુવિધા શરૂઆતમાં MMDR અધિનિયમ હેઠળ ફાળવવામાં આવેલા કોલસા બ્લોક માટે શરૂ કરવામાં આવશે. મંત્રાલય કોલ માઇન્સ (સ્પેશિયલ પ્રોવિઝન્સ) એક્ટ, 2015 હેઠળ ફાળવવામાં આવેલા કોલસા બ્લોક્સ માટે પણ આ જોગવાઈનો વિસ્તાર કરવાની પ્રક્રિયા હાથ ધરશે.

આ પહેલ કોલસા મંત્રાલયના નિયમનકારી સુધારાઓ પરના સતત ધ્યાન કેન્દ્રિત કરવાને પ્રતિબિંબિત કરે છે જે રોકાણને પ્રોત્સાહિત કરે છે, કોલસા બ્લોક્સના સમયસર સંચાલનને ટેકો આપે છે અને દેશમાં કોમર્શિયલ કોલસાના માઇનિંગ માટે વધુ પારદર્શક, કાર્યક્ષમ અને રોકાણકાર-અનુકૂળ ઇકોસિસ્ટમ બનાવે છે.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com