અરુણાચલ પ્રદેશમાં આવેલા વિનાશક પૂરની વચ્ચે, કેન્દ્રીય કૃષિ અને ખેડૂત કલ્યાણ તેમજ ગ્રામીણ વિકાસ મંત્રી શ્રી શિવરાજ સિંહ ચૌહાણે, કેન્દ્રીય મંત્રી શ્રી કિરેન રિજીજુ અને મુખ્યમંત્રી શ્રી પેમા ખાંડુ સાથે મળીને નુકસાનીનું મૂલ્યાંકન કરવા માટે અસરગ્રસ્ત વિસ્તારોનું વ્યાપક હવાઈ અને ગ્રાઉન્ડ (જમીની) નિરીક્ષણ કર્યું હતું.

આ મુલાકાત દરમિયાન, શ્રી ચૌહાણે પૂર પ્રભાવિત પરિવારોની મુલાકાત લીધી હતી, તેમની સાથે વ્યક્તિગત રીતે વાતચીત કરી હતી અને તેમને તમામ સંભવિત સહાયની ખાતરી આપી હતી. તેમણે જણાવ્યું હતું કે પ્રધાનમંત્રી શ્રી નરેન્દ્ર મોદીના નેતૃત્વ અને માર્ગદર્શન હેઠળ કેન્દ્ર અને રાજ્ય બંને સરકારો આ મુશ્કેલ સમયમાં અરુણાચલ પ્રદેશના લોકોની સાથે મજબૂતીથી ઉભી છે.

કેન્દ્રીય મંત્રીએ આપત્તિથી પ્રભાવિત ગામોની માર્ગ દ્વારા મુસાફરી કરતા પહેલા કેયી પાન્યોર (Keyi Panyor) જિલ્લા સહિત અનેક પૂર પ્રભાવિત વિસ્તારોનું હવાઈ સર્વેક્ષણ કર્યું હતું. તેમણે અસરગ્રસ્ત રહેવાસીઓ સાથે સીધો સંવાદ કર્યો, તેમની ચિંતાઓ સાંભળી અને તેઓ જે પડકારોનો સામનો કરી રહ્યા છે તેની સમીક્ષા કરી હતી.

અસરગ્રસ્ત પરિવારોને મળતી વખતે ભાવુક થઈને બોલતા શ્રી ચૌહાણે જણાવ્યું હતું કે દુઃખ વહેંચવાથી હળવું થાય છે અને સંકટના સમયે એકબીજાની પડખે ઊભા રહેવું એ જ માનવતાનો સાચો સાર છે. ખાસ કરીને મહિલાઓ સાથે વાતચીત કરતા તેમણે તેમને ખાતરી આપી હતી કે તેઓ એકલા નથી અને કેન્દ્ર તેમજ રાજ્ય બંને સરકારો દરેક પગલે તેમની સાથે ઉભી રહેશે.

તેમણે જાહેરાત કરી હતી કે પૂરના નુકસાનનું વ્યાપક મૂલ્યાંકન કરવામાં આવશે. જે પરિવારોના ઘરો ધોવાઈ ગયા છે તેમના માટે નવા ઘરોનું નિર્માણ કરવામાં આવશે, જ્યારે યોગ્ય વળતર સુનિશ્ચિત કરવા માટે કૃષિ ક્ષેત્રો, નુકસાન પામેલા પાક અને પશુધનના નુકસાનનું પણ મૂલ્યાંકન કરવામાં આવશે. અસરગ્રસ્ત પરિવારોને અનાજ અને આવશ્યક ચીજવસ્તુઓના રૂપમાં તાત્કાલિક રાહત પહેલેથી જ પૂરી પાડવામાં આવી રહી છે.

શ્રી ચૌહાણે જણાવ્યું હતું કે પ્રધાનમંત્રી શ્રી નરેન્દ્ર મોદી વ્યક્તિગત રીતે આ પરિસ્થિતિ અંગે ચિંતિત છે અને તેમણે અસરગ્રસ્ત લોકોને તમામ સંભવિત સહાય પૂરી પાડવા નિર્દેશ આપ્યો છે. આ નિર્દેશોને અનુરૂપ, કેન્દ્ર સરકાર રાહત અને પુનર્વસન કામગીરી હાથ ધરવા માટે રાજ્ય સરકાર સાથે મળીને નજીકથી કામ કરી રહી છે.

મુલાકાત દરમિયાન, કેન્દ્રીય મંત્રીએ સ્થાનિક રહેવાસીઓ દ્વારા દર્શાવવામાં આવેલી અદ્ભુત સામુદાયિક ભાવનાની પણ પ્રશંસા કરી હતી. તેઓ પૂરથી ક્ષતિગ્રસ્ત થયેલા રસ્તાના સમારકામમાં અને નદીના પાણી ગામમાં ફરી પ્રવેશતા અટકાવવા માટે પ્રોટેક્શન વોલ (સુરક્ષા દિવાલ) ના નિર્માણમાં ગ્રામજનો સાથે જોડાયા હતા.

આ પહેલને પ્રેરણાદાયી ગણાવતા શ્રી ચૌહાણે કહ્યું કે પૂરે વ્યાપક વિનાશ વેર્યો છે અને નુકસાનનું મૂલ્યાંકન હજુ પણ ચાલી રહ્યું છે, ત્યારે સૌથી પ્રશંસનીય બાબત એ છે કે સ્થાનિક સમુદાયોએ સરકારી હસ્તક્ષેપની રાહ જોયા વિના આ સંકટનો સામનો કરવા માટે સ્વૈચ્છિક રીતે આગળ આવ્યા છે.

તેમણે નોંધ્યું હતું કે ગ્રામજનોએ તેમના ગામને વધુ પૂરથી બચાવવા માટે કોઈ પણ ઔપચારિક મંજૂરીઓ અથવા વહીવટી અંદાજોની રાહ જોયા વિના પ્રોટેક્શન વોલનું નિર્માણ હાથ ધર્યું હતું. સામૂહિક જવાબદારીની આ ભાવનાને સલામ કરતા તેમણે કહ્યું કે જ્યારે સમાજ જાગૃત, સંયુક્ત અને સક્રિય રહે છે, ત્યારે સામૂહિક પ્રયાસો દ્વારા ઘણા મોટા પડકારો પર વિજય મેળવી શકાય છે. તેમણે લોકોને ખાતરી આપી હતી કે સરકાર પોતાની જવાબદારીઓ સંપૂર્ણ ઇમાનદારી સાથે નિભાવશે અને અસરકારક રાહત તેમજ પુનર્વસન સુનિશ્ચિત કરવામાં કોઈ કસર છોડશે નહીં.

કેન્દ્રીય મંત્રીએ વધુમાં જણાવ્યું હતું કે પ્રધાનમંત્રી નરેન્દ્ર મોદી અને મુખ્યમંત્રી પેમા ખાંડુના નેતૃત્વમાં કેન્દ્ર અને રાજ્ય બંને સરકારો અત્યંત તાકીદ સાથે કામ કરી રહી છે. પ્રધાનમંત્રીના માર્ગદર્શન હેઠળ, કેન્દ્ર સરકાર અસરગ્રસ્ત વિસ્તારોમાં વહેલી તકે સામાન્ય સ્થિતિ પુનઃસ્થાપિત કરવા માટે તમામ સંભવિત સહાય કરશે.

દિવસની શરૂઆતમાં, શ્રી ચૌહાણે ઇટાનગરના રાજભવન ખાતે અરુણાચલ પ્રદેશના રાજ્યપાલ લેફ્ટનન્ટ જનરલ (નિવૃત્ત) કે.ટી. પરનાઈકની સૌજન્ય મુલાકાત લીધી હતી, જ્યાં તેમણે ચાલી રહેલી રાહત કામગીરી અંગે પણ ચર્ચા કરી હતી. સરકાર અને સમાજના સંયુક્ત પ્રયાસોમાં વિશ્વાસ વ્યક્ત કરતા શ્રી ચૌહાણે જણાવ્યું હતું કે રાજ્ય વર્તમાન સંકટમાંથી ટૂંક સમયમાં બહાર આવી જશે અને ઉમેર્યું કે, "સાથે મળીને, આપણે આ મુશ્કેલ તબક્કાને પાર કરીશું, અને અરુણાચલ ફરીથી હસતું થશે."

પૂર પ્રભાવિત વિસ્તારોની તેમની મુલાકાત બાદ, શ્રી શિવરાજ સિંહ ચૌહાણે મંગળવારે મોડી રાત્રે ઇટાનગરમાં મુખ્યમંત્રી શ્રી પેમા ખાંડુ, કેન્દ્રીય મંત્રી શ્રી કિરેન રિજીજુ અને વરિષ્ઠ અધિકારીઓ સાથે ઉચ્ચ સ્તરીય સમીક્ષા બેઠકની અધ્યક્ષતા કરી હતી.

બેઠકમાં રાહત અને પુનર્વસન પ્રયાસોની વિગતવાર સમીક્ષા કરવામાં આવી હતી અને દરેક અસરગ્રસ્ત પરિવાર સુધી તાત્કાલિક સહાય પહોંચે, નુકસાનના મૂલ્યાંકનને ઝડપી બનાવવામાં આવે અને પુનર્વસનના પગલાંને વેગ આપવામાં આવે તે સુનિશ્ચિત કરવા માટે જરૂરી નિર્દેશો જારી કરવામાં આવ્યા હતા. શ્રી ચૌહાણે ભારપૂર્વક જણાવ્યું હતું કે રાહત કામગીરીમાં કોઈપણ સ્તરે શિથિલતા ન હોવી જોઈએ અને સામાન્ય જનજીવન વહેલી તકે પુનઃસ્થાપિત કરવા માટે કેન્દ્ર અને રાજ્ય સરકારો વચ્ચે ગાઢ સંકલન માટે આહવાન કર્યું હતું.

બેઠક બાદ મીડિયા સાથે વાતચીત કરતા શ્રી ચૌહાણે જણાવ્યું હતું કે તેઓ અને કેન્દ્રીય મંત્રી શ્રી કિરેન રિજીજુ પ્રધાનમંત્રી શ્રી નરેન્દ્ર મોદીના નિર્દેશ પર ભારે વરસાદથી ઉદ્ભવેલી પરિસ્થિતિનું મૂલ્યાંકન કરવા અને રાજ્ય સરકાર સાથે સંકલન કરીને અસરકારક પ્રતિભાવ સુનિશ્ચિત કરવા માટે અરુણાચલ પ્રદેશની મુલાકાતે આવ્યા હતા.

તેમણે જણાવ્યું હતું કે પ્રતિનિધિમંડળે નુકસાનનું પ્રત્યક્ષ મૂલ્યાંકન કરવા અને ગ્રાઉન્ડ પરિસ્થિતિને સમજવા માટે અસરગ્રસ્ત રહેવાસીઓ સાથે સીધો સંવાદ કરવા પ્રભાવિત વિસ્તારોમાં માર્ગ દ્વારા મુસાફરી કરી હતી. પરિસ્થિતિને ગંભીર અને પડકારજનક ગણાવતા, શ્રી ચૌહાણે તેમ છતાં રાજ્ય સરકારની પ્રશંસા કરી હતી કે તેમણે ઝડપી પ્રતિભાવ આપ્યો અને રાહત તેમજ બચાવ કામગીરી અસરકારક રીતે હાથ ધરી, જેણે માનવ જીવનના નુકસાનને ઓછું કરવામાં મદદ કરી છે.

કેન્દ્રીય મંત્રીએ જણાવ્યું હતું કે અસંખ્ય સ્થળોએ રસ્તા, પુલ, વીજળીનું ઇન્ફ્રાસ્ટ્રક્ચર અને કોમ્યુનિકેશન નેટવર્ક ગંભીર રીતે પ્રભાવિત થયા છે. પાક નાશ પામ્યો છે, ઘરો ધોવાઈ ગયા છે અને પશુધનના નુકસાનના પણ અહેવાલ છે.

તેમણે સમજાવ્યું કે હાલમાં બે મોરચે કામગીરી હાથ ધરવામાં આવી રહી છે: પ્રથમ, અસરગ્રસ્ત લોકોને અનાજ, દવાઓ, પીવાનું પાણી અને અન્ય આવશ્યક સેવાઓ પૂરી પાડીને તાત્કાલિક રાહત સુનિશ્ચિત કરવી; અને બીજું, વ્યાપક લાંબા ગાળાની પુનર્વસન યોજના ઘડવા માટે વિગતવાર મૂલ્યાંકન હાથ ધરવું.

શ્રી ચૌહાણે માહિતી આપી હતી કે મુખ્યમંત્રીએ પ્રારંભિક અહેવાલ સુપરત કર્યો છે, જ્યારે વિગતવાર મૂલ્યાંકન અહેવાલ પૂર્ણ થયા બાદ કેન્દ્ર સરકારને મોકલવામાં આવશે. તેમણે ઉમેર્યું હતું કે પ્રધાનમંત્રી શ્રી નરેન્દ્ર મોદી અને કેન્દ્રીય ગૃહમંત્રીને પરિસ્થિતિથી સંપૂર્ણ માહિતગાર કરવામાં આવશે, અને કેન્દ્ર સરકાર તમામ સંભવિત સહાય કરશે. તેમણે વિશ્વાસ વ્યક્ત કર્યો હતો કે કેન્દ્ર અને રાજ્યના સંયુક્ત પ્રયાસો વહેલી તકે સામાન્ય સ્થિતિ પુનઃસ્થાપિત કરશે અને ભવિષ્યમાં આવી કુદરતી આપત્તિઓનું વધુ સારી રીતે સંચાલન કરવા માટે વૈજ્ઞાનિક તેમજ લાંબા ગાળાના ઉકેલો પર પણ કામ કરશે.

SM/IJ/JD