ریلوے سگنلنگ نظام کی جدیدکاری اور آپریشنل تحفظ کو مزید مضبوط بنانے کی جانب ایک اہم قدم اٹھاتے ہوئے، بھارتی ریلوے نے جنوب مشرقی وسطی ریلوے (ایس ای سی آر ) کے رائے پور ڈویژن کے درگ–تاڑوکی سیکشن کے 13 ریلوے اسٹیشنوں پر 226 کروڑ روپے کی لاگت سے الیکٹرانک انٹرلاکنگ(ای آئی) نظام کی تنصیب کی منظوری دے دی ہے۔

اس منصوبے کے تحت 13 اسٹیشنوں پر موجود پینل انٹرلاکنگ (پی آئی) نظام کو جدید الیکٹرانک انٹرلاکنگ (ای آئی) سے تبدیل کیا جائے گا، جس کے نتیجے میں ٹرینوں کی آمد و رفت مزید محفوظ، قابلِ اعتماد اور جدید ٹیکنالوجی پر مبنی انداز میں انجام دی جا سکے گی۔

سگنلنگ انفراسٹرکچر کی جدیدکاری

منظور شدہ منصوبے کے تحت رائے پور ڈویژن کے درگ–تاڑوکی سیکشن میں درج ذیل اسٹیشنوں پر الیکٹرانک انٹرلاکنگ نظام کی تنصیب کی جائے گی:

• مرودہ (ایم ایکس اے)
• رسمہ( آر ایس اے)
• گنڈردیہی(جی ڈی زیڈ)
• لاتابور (ایل بی او)
• بالود (بی ایکس اے)
• کُسومکاسا (کے وائی ایس)
• ڈلّی راج ہرا (ڈی آر زیڈ)
• گُدُم (جی یو ڈی ایم)
• بھانوپرتاپ پور (بی پی ٹی پی)
• کیوٹی (کے ای ٹی آئی)
• انتاگڑھ (اے اے جی ایچ)
• تاڑوکی(ٹی ڈی او کے)
• رائے پور اسٹور ڈپو (آر ایس ڈی)

پینل انٹرلاکنگ سے الیکٹرانک انٹرلاکنگ میں منتقلی سے اس اہم سیکشن میں سگنلنگ نظام کی نمایاں جدیدکاری ممکن ہوگی، جس کے نتیجے میں آپریشنل لچک میں اضافہ اور نظام کی قابلِ اعتماد کارکردگی مزید بہتر ہو جائے گی۔

محفوظ، تیز رفتار اور زیادہ قابلِ اعتماد ٹرین آپریشنز

الیکٹرانک انٹرلاکنگ ایک جدید ترین سگنلنگ ٹیکنالوجی ہے جو روٹ سیٹنگ اور سگنلنگ کے نظام کو خودکار بناتی ہے اور اس میں جدید حفاظتی خصوصیات شامل ہوتی ہیں۔ اس اپ گریڈ شدہ نظام سے آپریشنل کارکردگی میں بہتری آئے گی، سگنلنگ کی خرابی کے امکانات کم ہوں گے اور کسی بھی خلل کی صورت میں نظام کی بحالی زیادہ تیزی سے ممکن ہو سکے گی۔

یہ منصوبہ ٹرین آپریشنز کی حفاظت اور قابلِ اعتماد کارکردگی کو بہتر بنانے، وقت کی پابندی میں اضافہ کرنے اور جنوب مشرقی وسطی ریلوے نیٹ ورک پر بڑھتی ہوئی مسافر اور مال بردار ٹریفک کو سنبھالنے کے لیے ایک مضبوط تکنیکی بنیاد فراہم کرنے میں معاون ہوگا۔

یہ منظوری بھارتی ریلوے کے اُس جاری پروگرام کا حصہ ہے جس کے تحت پورے قومی نیٹ ورک میں جدید ٹیکنالوجی کے ذریعے سگنلنگ نظام کی مرحلہ وار جدید کاری کی جا رہی ہے، تاکہ محفوظ، اسمارٹ اور زیادہ مؤثر ریلوے آپریشنز کو یقینی بنایا جا سکے۔

**********

ش ح۔۔ ت ف۔ ر ب

U-9412