سڑک نقل و حمل اور شاہراہوں کے مرکزی وزیر جناب نتن گڈکری نے آج کہا کہ ڈاکٹر بابا صاحب امبیڈکر بین الاقوامی ہوائی اڈہ، ناگپور کی جدید کاری اور توسیع ، رابطے کو بڑھا کر ، سرمایہ کاری کو راغب کرکے ، روزگار پیدا کرکے اور پورے ودربھ میں صنعتی ترقی کو فروغ دے کر وسطی بھارت  کے اقتصادی منظر نامے کو نمایاں طور پر مضبوط کرے گا۔

جناب گڈکری سرکاری ونجی شراکتداری (پی پی پی) ماڈل کے تحت جی ایم آر گروپ کو ناگپور کے ڈاکٹر بابا صاحب امبیڈکر بین الاقوامی ہوائی اڈے کی باضابطہ حوالگی کی تقریب سے خطاب کر رہے تھے ۔ اس تقریب میں شہری ہوابازی کے مرکزی وزیر جناب کے رام موہن نائیڈو ، مہاراشٹر کے وزیر اعلی جناب دیویندر فڈنویس ، رام ٹیک سے ممبر پارلیمنٹ شیام کمار بروے ، راجیہ سبھا کے ایم پی جناب پرفل پٹیل اور محترمہ مایا آئونیٹ نے شرکت کی ۔

بھارت  کے جغرافیائی مرکز میں ناگپور کے اسٹریٹجک مقام پر روشنی ڈالتے ہوئے جناب گڈکری نے کہا کہ یہ شہر تیزی سے تجارت ، لاجسٹکس ، مینوفیکچرنگ ، کامرس اور نقل وحمل کے کثیر ماڈل کے ایک بڑے مرکز کے طور پر ابھر رہا ہے ۔ انہوں نے کہا کہ ہوائی اڈے کی توسیع اور جدید کاری وسطی بھارت  میں اقتصادی ترقی کے کلیدی محرک کے طور پر ناگپور کی پوزیشن کو مزید مضبوط کرے گی ۔
مرکزی وزیر نے زور دے کر کہا کہ اپ گریڈ شدہ بین الاقوامی ہوائی اڈہ ودربھ خطے میں سیاحت ، کانکنی ، زراعت اور برآمدات پر مبنی صنعتوں کی ترقی کو تیز کرنے میں تبدیلی لانے والا کردار ادا کرے گا ۔ انہوں نے کہا کہ ہوا بازی کے بہتر بنیادی ڈھانچے اور رابطے سے مسافروں اور کارگو کی زیادہ سے زیادہ نقل و حرکت میں سہولت ملے گی ، اس طرح علاقائی ترقی میں مدد ملے گی اور کاروبار کے نئے مواقع پیدا ہوں گے۔

جناب گڈکری نے شہری ہوابازی کی وزارت پر زور دیا کہ وہ ناگپور سے سنگاپور اور دبئی جیسے بڑے عالمی مقامات کے لیے براہ راست بین الاقوامی پرواز کے رابطے کی سہولت فراہم کرے ۔ انہوں نے کہا کہ اس طرح کے رابطے سے تجارت ، سیاحت ، سرمایہ کاری اور کاروباری تبادلوں کو فروغ ملے گا ، جبکہ عالمی منڈیوں کے ساتھ ناگپور کے انضمام میں اضافہ ہوگا۔

مقامی مصنوعات اور ثقافت کو فروغ دینے کی اہمیت پر زور دیتے ہوئے ، جناب گڈکری نے ہوائی اڈے پر ناگپور کی مشہور اورنج برفی اور دیگر علاقائی خصوصیات کی نمائش کرنے کا مشورہ دیا ، جس سے مقامی کاروباریوں کو زیادہ سے زیادہ اپنی چیزوں کی نمائش کا موقع ملے گااور ودربھ کی ثقافتی شناخت کو تقویت ملے گی۔

جناب گڈکری نے جناب کے رام موہن نائیڈو اور جناب دیویندر فڈنویس کے ساتھ مل کر ڈاکٹر بابا صاحب امبیڈکر بین الاقوامی ہوائی اڈے کے نئے لوگو کی نقاب کشائی کی ، جو ہوائی اڈے کے ترقیاتی سفر میں ایک نئے باب کی علامت ہے ۔

********

ش ح ۔  م ع۔  ت ا

U. No.9182