حیاتیاتی تنوع ایکٹ 2002 کے تحت بھارت کے رسائی اور منافع کی منصفانہ تقسیم (اے بی ایس) نظام نے اب تک 266 کروڑ روپے سے زائد کی رقم جمع کی ہے، جبکہ تقریباً 145 کروڑ روپے مستحقین میں تقسیم کیے جا چکے ہیں۔ یہ نظام حیاتیاتی وسائل اور ان سے وابستہ روایتی معلومات کے استعمال سے حاصل ہونے والے فوائد کی منصفانہ تقسیم کو یقینی بنانے میں بھارت کی عالمی قیادت کو ظاہر کرتا ہے۔

نیشنل بایو ڈائیورسٹی اتھارٹی (این بی اے) نے 2008 سے اب تک اے بی ایس نظام کے تحت 266 کروڑ روپے سے زائد حاصل کیے ہیں، جن میں مالی سال 2025-26 کے دوران 21.26 کروڑ روپے شامل ہیں۔ اوسطاً سالانہ 14.75 کروڑ روپے کی وصولی اس بات کی عکاس ہے کہ صنعتوں کی شمولیت اور قواعد کی پابندی میں مسلسل اضافہ ہو رہا ہے۔

حیاتیاتی تنوع ایکٹ 2002 کے تحت حیاتیاتی وسائل کے استعمال سے حاصل ہونے والے فوائد مقامی برادریوں، بایو ڈائیورسٹی مینجمنٹ کمیٹیوں (بی ایم سیز)، کسانوں، روایتی علم رکھنے والوں اور حیاتیاتی تنوع کے دیگر محافظوں کے ساتھ شیئر کیے جاتے ہیں۔

اے بی ایس نظام کے نفاذ کے بعد سے این بی اے تقریباً 145 کروڑ روپے بطور منافع تقسیم کر چکا ہے، جن میں سے 78 کروڑ روپے صرف مالی سال 2025-26 میں تقسیم کیے گئے۔

یہ فوائد 23 ریاستوں اور 4 مرکز کے زیر انتظام علاقوں کی 10,500 سے زائد بایو ڈائیورسٹی مینجمنٹ کمیٹیوں، 230 سے زائد کسانوں، چھ ریاستی محکمہ جنگلات اور مختلف اداروں تک پہنچے ہیں۔ اس نظام کے تحت ریڈ سینڈرز سے متعلق چھ تحقیقی منصوبوں کی بھی معاونت کی گئی ہے۔

اے بی ایس نظام اس بات کو یقینی بناتا ہے کہ حیاتیاتی وسائل اور ان سے وابستہ روایتی معلومات کے استعمال سے حاصل ہونے والے فوائد مقامی برادریوں، کسانوں اور دیگر مستحقین میں منصفانہ انداز میں تقسیم ہوں۔ یہ نظام حیاتیاتی تنوع کے تحفظ، اس کے پائیدار استعمال اور دیہی سطح پر روزگار کے فروغ میں بھی مددگار ثابت ہو رہا ہے۔

اس نظام کے تحت حاصل ہونے والے فوائد مختلف حیاتیاتی وسائل جیسے ریڈ سینڈرز، طبی اور خوشبودار پودوں، بیجوں، مویشیاتی جینیاتی وسائل، خام جڑی بوٹیوں، حیاتی کیمیائی اجزا اور خرد نامیوں کے استعمال سے حاصل ہوئے ہیں۔

شعبہ وار تجزیے کے مطابق ریڈ سینڈرز (پٹیروکارپس سینٹالینس) سے 120 کروڑ روپے (45 فیصد) حاصل ہوئے، جبکہ بیجوں کے شعبے سے 84.61 کروڑ روپے (32.3 فیصد) وصول ہوئے۔ دواسازی اور آیوش شعبے نے 36.61 کروڑ روپے (13.8 فیصد) کا حصہ ڈالا۔ ان تینوں شعبوں کا مجموعی حصہ کل وصول شدہ رقم کا تقریباً 91 فیصد بنتا ہے۔

اہم شراکت دار اداروں میں پایونیر اوورسیز کارپوریشن، نونہیمز انڈیا پرائیویٹ لمیٹڈ، ایسٹ ویسٹ سیڈز انڈیا، سوانا سیڈز، ٹاٹا کیمیکلز، سنگینٹا، ہمالیہ ویلنیس کمپنی، ڈابر انڈیا، آرگینک انڈیا، لارس لیبز، ایم وے انڈیا، سینرجیا لائف سائنسز، نووزائمز ساؤتھ ایشیا، اکے نیچرل انگریڈینٹس، والیگرو بایو سائنسز، لوریال انڈیا، ایڈوانسڈ انزائمز، انڈین آئل کارپوریشن، سیلاب ایس اے، بی اے ایس ایف بیوٹی کیئر سلوشنز فرانس اور تمام کارپوریشن شامل ہیں۔

حیاتیاتی تنوع قواعد 2024 کے مطابق این بی اے اے بی ایس فنڈ کا 85 سے 90 فیصد متعلقہ ریاستی بایو ڈائیورسٹی بورڈز کو منتقل کرتا ہے تاکہ وہ اسے مستحقین میں تقسیم کر سکیں۔

مقامی سطح پر ان فنڈز کو حیاتیاتی تنوع کے تحفظ، قدرتی مساکن کی بحالی، عوامی حیاتیاتی رجسٹروں کی تیاری و تجدید، روایتی علم کی دستاویز بندی، طبی پودوں کے پارکوں اور کمیونٹی جین بینکوں کے قیام، صلاحیت سازی کے پروگراموں اور دیہی و قبائلی برادریوں کے لیے پائیدار روزگار کے منصوبوں پر خرچ کیا جا رہا ہے۔

266 کروڑ روپے سے زائد کی وصولی اور 145 کروڑ روپے کی تقسیم کے ساتھ بھارت کا اے بی ایس نظام حیاتیاتی تنوع کے تحفظ کو عوامی فلاح و بہبود سے جوڑنے کا ایک عالمی سطح پر تسلیم شدہ ماڈل بن چکا ہے۔ یہ نظام ناگویا پروٹوکول، قومی حیاتیاتی تنوع حکمت عملی و ایکشن پلان (2024-2030) اور کنمنگ-مونٹریال عالمی حیاتیاتی تنوع فریم ورک کے اہداف، خصوصاً منصفانہ منافع کی تقسیم سے متعلق ہدف 13 کے حصول میں بھی اہم کردار ادا کر رہا ہے۔

 

************

 

 

ش ح ۔   م  د ۔  م  ص

(U :  8946)

(रिलीज़ आईडी: 2275835) आगंतुक पटल : 16