നാളെ 12-ാമത് അന്താരാഷ്ട്ര യോഗാ ദിനത്തിൽ (ഐഡിവൈ), രാജ്യത്തെ ഏറ്റവും വലിയ ആരോഗ്യ-രോഗപ്രതിരോധ പൊതുആഘോഷങ്ങളിലൊന്നിന് ചരിത്രപ്രസിദ്ധമായ ജവഹർലാൽ നെഹ്‌റു സ്റ്റേഡിയം സാക്ഷ്യം വഹിക്കും. "ആരോഗ്യകരമായ വാർദ്ധക്യത്തിന് യോഗ" എന്ന പ്രമേയത്തിൽ നടക്കുന്ന കൂട്ടായ യോഗാ സെഷനിൽ കേന്ദ്ര കായിക-യുവജനകാര്യ, തൊഴിൽ മന്ത്രി ഡോ. മൻസുഖ് മാണ്ഡവ്യയും പ്രശസ്ത നടനും ഫിറ്റ്‌നസ് പ്രചാരകനുമായ അക്ഷയ് കുമാറും 3000-ത്തോളം ആളുകൾക്കൊപ്പം പങ്കെടുക്കും.

കായിക മന്ത്രാലയത്തിൻ്റെ നേതൃത്വത്തിൽ സ്പോർട്സ് അതോറിറ്റി ഓഫ് ഇന്ത്യയുടെ എല്ലാ റീജണൽ സെൻ്ററുകൾ, നാഷണൽ സെൻ്റർ ഓഫ് എക്സലൻസ്, സായ് ട്രെയിനിംഗ് സെൻ്ററുകൾ, ഖേലോ ഇന്ത്യ സ്ഥാപനങ്ങൾ എന്നിവിടങ്ങളിൽ ഒരേ സമയം യോഗാ സെഷനുകൾ സംഘടിപ്പിച്ചുകൊണ്ട് ഈ ദിനം രാജ്യത്തുടനീളം ആഘോഷിക്കും. 15,000-ത്തിലധികം പേർ ഇതിൽ പങ്കാളികളാകുമെന്നാണ് പ്രതീക്ഷിക്കുന്നത്. പുറമെ, നാഷണൽ സ്‌പോർട്സ് ഫെഡറേഷനുകൾ, സംസ്ഥാന കായിക വകുപ്പുകൾ, സ്പോർട്സ് സർവ്വകലാശാലകൾ എന്നിവരും ഒരേസമയം പരിപാടികൾ സംഘടിപ്പിക്കും. യോഗയെ കൂടുതൽ മുന്നോട്ട് കൊണ്ടുപോകുന്നതിനായി കായികരംഗത്തെ മുഴുവൻ സംവിധാനങ്ങളും കൈകോർക്കുന്ന ഒരു വേദി കൂടിയായി ഇത് മാറും.

"ബഹുമാനപ്പെട്ട നമ്മുടെ പ്രധാനമന്ത്രി നരേന്ദ്ര മോദിയുടെ നിർദ്ദേശത്തെ തുടർന്ന് 2014-ൽ ഐക്യരാഷ്ട്രസഭ ജൂൺ 21 അന്താരാഷ്ട്ര യോഗാ ദിനമായി പ്രഖ്യാപിച്ചതു മുതൽ, ഈ വാർഷികാചരണം ശാരീരികവും മാനസികവും ആത്മീയവുമായ ആരോഗ്യത്തിൻ്റെ ആഗോള ആഘോഷമായി വളർന്നു കഴിഞ്ഞു," ഡോ. മൻസുഖ് മാണ്ഡവ്യ പറഞ്ഞു. "ഈ ദിനം വിവിധ ഭൂഖണ്ഡങ്ങളിലുള്ള ദശലക്ഷക്കണക്കിന് യോഗാഭ്യാസികളെയാണ് ഒന്നിപ്പിക്കുന്നത്. യോഗ ഭൂമിശാസ്ത്രപരമായ അതിരുകൾ ഭേദിച്ച് ഒരു ആഗോള പ്രതിഭാസമായി മാറിയിരിക്കുന്നു."

ദേശീയ തലസ്ഥാനത്ത് നടക്കുന്ന പ്രധാന 'ഫിറ്റ് ഇന്ത്യ' പരിപാടിയിൽ 3000-ത്തോളം ആളുകൾ ഒത്തുചേരുമെന്നാണ് പ്രതീക്ഷിക്കുന്നത്. ഫിറ്റ്‌നസ് പ്രേമികൾക്കും സെലിബ്രിറ്റികൾക്കുമിടയിൽ യോഗ ജനകീയമാക്കുന്നതിൽ നിർണായക പങ്കുവഹിച്ച പ്രശസ്ത യോഗാ പരിശീലക അൻഷുക പർവാനി നയിക്കുന്ന പ്രത്യേക യോഗാ സെഷനും ഈ പരിപാടിയുടെ ഭാഗമായി ഉണ്ടായിരിക്കും.

ഞായറാഴ്ച നടക്കുന്ന ആഘോഷം കായികതാരങ്ങൾ, വിദ്യാർത്ഥികൾ, മുതിർന്ന പൗരന്മാർ, ഫിറ്റ്‌നസ് പ്രേമികൾ, യോഗാഭ്യാസികൾ, കുടുംബങ്ങൾ എന്നിവരെയെല്ലാം ഒന്നിപ്പിച്ചുകൊണ്ട് യോഗയുടെ പരിവർത്തന ശക്തിയുടെ ഒരു കൂട്ടായ പ്രകടനമായി മാറും.

ജൂൺ 21-ന് നടക്കുന്ന 12-ാമത് അന്താരാഷ്ട്ര യോഗാദിനത്തിൻ്റെ ആഗോള ആഘോഷങ്ങളിൽ 180-ലധികം രാജ്യങ്ങളിൽ നിന്നുള്ള ദശലക്ഷക്കണക്കിന് ആളുകൾ പങ്കാളികളാകുമെന്നാണ് പ്രതീക്ഷിക്കുന്നത്.

കഴിഞ്ഞ ദശകത്തിൽ, ഇന്ത്യ മുൻകൈ എടുത്തതിലൂടെ ലോകത്തിലെ തന്നെ ഏറ്റവും വലിയ ആരോഗ്യ മുന്നേറ്റങ്ങളിലൊന്നായി അന്താരാഷ്ട്ര യോഗാദിനം മാറിക്കഴിഞ്ഞു. സമഗ്രമായ ആരോഗ്യവും രോഗപ്രതിരോധവും ആഘോഷിക്കാനായി വിവിധ ഭൂഖണ്ഡങ്ങളിലെ രാഷ്ട്രങ്ങൾ ഒന്നിക്കുമ്പോൾ, 'ഫിറ്റ് ഇന്ത്യ സൺഡേയ്‌സ് ഓൺ സൈക്കിൾ', യോഗാ ദിനം തുടങ്ങിയ പദ്ധതികൾ ആഗോള സമൂഹത്തിന് കൂടുതൽ ആരോഗ്യകരവും സജീവവും സുസ്ഥിരവുമായ ജീവിതരീതി പ്രോത്സാഹിപ്പിക്കുന്നതിൽ രാജ്യത്തിൻ്റെ നേതൃത്വത്തെ കൂടുതൽ ശക്തമാക്കുന്നു.

***