કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે આજે મહારાષ્ટ્રના કોલ્હાપુરમાં આયોજિત ‘ધન્યવાદ સભા’ને મુખ્ય અતિથિ તરીકે સંબોધિત કરી હતી. આ કાર્યક્રમમાં મહારાષ્ટ્રના મુખ્યમંત્રી શ્રી દેવેન્દ્ર ફડણવીસ, ઉપમુખ્યમંત્રી શ્રી એકનાથ શિંદે અને અન્ય કેટલાક મહાનુભાવો ઉપસ્થિત રહ્યા હતા.

આ પ્રસંગે શ્રી અમિત શાહે જણાવ્યું હતું કે છેલ્લા 12 વર્ષમાં, જ્યારથી નરેન્દ્ર મોદીજી દેશના પ્રધાનમંત્રી બન્યા છે, ત્યારથી આપણા નેતા શ્રી નરેન્દ્ર મોદીજીએ એવા ઘણા કાર્યો સફળતાપૂર્વક પૂર્ણ કર્યા છે જે અગાઉ અશક્ય માનવામાં આવતા હતા. ભગવાન શ્રી રામની કૃપાથી નરેન્દ્ર મોદીજી 2014 માં પ્રધાનમંત્રી બન્યા અને આજે અયોધ્યામાં એક ભવ્ય અને દિવ્ય રામ મંદિર તેની ભવ્યતા સાથે અડીખમ ઊભું છે. આ સાથે કાશી વિશ્વનાથ કોરિડોરનું નિર્માણ કરવામાં આવ્યું છે અને કેદારનાથ ધામ તથા બદરીનાથ ધામનું પુનઃનિર્માણ કરવામાં આવ્યું છે. સોમનાથ મંદિરને ફરી એકવાર સુવર્ણથી સુશોભિત કરવામાં આવી રહ્યું છે. મા કામાખ્યાનો કોરિડોર બની રહ્યો છે અને હવે અંબાબાઈ મહાલક્ષ્મી મંદિરના કોરિડોરના નિર્માણનું કામ પણ શરૂ થઈ ગયું છે. તેમણે કહ્યું કે “વિકાસ ભી, વિરાસત ભી” ના મંત્ર હેઠળ દેશભરમાં સાંસ્કૃતિક પુનરુત્થાન થઈ રહ્યું છે. શ્રી શાહે જણાવ્યું હતું કે મહારાષ્ટ્રમાં તમામ જ્યોતિર્લિંગ અને શક્તિપીઠ મંદિરોનું પુનઃનિર્માણ અને પુનર્વિકાસ ચાલી રહ્યો છે, જે આપણા બધા માટે ખૂબ જ ગર્વની બાબત છે.

કેન્દ્રીય ગૃહ મંત્રી અને સહકારિતા મંત્રીએ જણાવ્યું હતું કે આ 12 વર્ષમાં અંબાબાઈ મહાલક્ષ્મી મંદિરમાં જીર્ણોદ્ધાર અને કોરિડોર નિર્માણ કાર્યની શરૂઆત પણ ઘણી મહત્વપૂર્ણ સિદ્ધિઓમાંની એક છે. પ્રધાનમંત્રી શ્રી નરેન્દ્ર મોદીજીના નેતૃત્વમાં ભાષાઓના સંરક્ષણ, સંસ્કૃતિના પ્રવર્ધન અને દેશની સરહદોની સુરક્ષા જેવા ક્ષેત્રોમાં માત્ર કામ શરૂ કરવા માટે જ નહીં, પરંતુ આ પહેલોને અડગ ગતિ સાથે તેના તાર્કિક અંત સુધી પહોંચાડવા માટે સતત પ્રયાસો કરવામાં આવ્યા છે. અંબાબાઈ મહાલક્ષ્મી મંદિર કોરિડોરના નિર્માણની શરૂઆત કરીને મહારાષ્ટ્રમાં ધર્મના શાસન અને સાંસ્કૃતિક જાગૃતિને ફરી એકવાર નવી ઊંચાઈ આપવામાં આવી છે.

શ્રી અમિત શાહે જણાવ્યું હતું કે તાજેતરમાં જ નરેન્દ્ર મોદીજીએ સૌથી લાંબો સમય સેવા આપનારા ચૂંટાયેલા પ્રધાનમંત્રી બનવાનો નવો રેકોર્ડ બનાવ્યો છે. જ્યારે સ્વતંત્ર ભારતનો ઇતિહાસ લખાશે, ત્યારે આ 12 વર્ષ ભારતના વિકાસ, સાંસ્કૃતિક પુનરુત્થાન, સુરક્ષિત ભારતના નિર્માણ અને વૈશ્વિક મંચ પર ભારતની પ્રતિષ્ઠા તથા સન્માનના ઉત્થાનના વર્ષો તરીકે નોંધવામાં આવશે. મોદીજીના નેતૃત્વ હેઠળના આ 12 વર્ષમાં, અમારી સરકારોએ સોમનાથથી લઈને ગંગાસાગર સુધી — દેશભરના લોકોનો ટેકો, વિશ્વાસ અને આત્મવિશ્વાસ સંપાદિત કર્યો છે. શ્રી શાહે વધુમાં જણાવ્યું હતું કે બંગાળની સરહદો પરથી થતી ઘૂસણખોરીને સંપૂર્ણપણે રોકવામાં જ નહીં આવે, પરંતુ દેશભરના એક-એક ઘૂસણખોરને ઓળખીને એક-એક કરીને બહાર કાઢવામાં આવશે, આ દેશ કોઈ ધર્મશાળા નથી.

કેન્દ્રીય ગૃહ મંત્રીએ કહ્યું કે, પ્રધાનમંત્રી શ્રી નરેન્દ્ર મોદીજીના નેતૃત્વમાં ભારતની સુરક્ષા સુનિશ્ચિત કરવાની સાથે દરેક ક્ષેત્રમાં અભૂતપૂર્વ કામ થયું છે — પછી તે ગ્રામીણ વિકાસ હોય, શહેરી વિકાસ હોય, ખેતીને સમૃદ્ધ બનાવવા માટે સહકાર મંત્રાલયની સ્થાપના હોય, શહેરી આયોજન (અર્બન પ્લાનિંગ) માટે નવા ધોરણો સ્થાપિત કરવા હોય કે પછી પીએલઆઈ (PLI) સ્કીમ દ્વારા ભારતને વૈશ્વિક મેન્યુફેક્ચરિંગ હબ બનાવવાનું હોય. તેમણે એમ પણ કહ્યું કે સેમિકન્ડક્ટર્સ, ક્વોન્ટમ એન્જિનિયરિંગ, સોફ્ટવેર, ડેટા સેન્ટર્સ અને નવા યુગની ટેકનોલોજી જેવા ક્ષેત્રોમાં ભારતને નવી ઊંચાઈઓ પર લઈ જવા માટે એક નક્કર શરૂઆત કરવામાં આવી છે. પ્રધાનમંત્રી શ્રી નરેન્દ્ર મોદીજીના નેતૃત્વમાં આપણે ચંદ્રના દક્ષિણ ધ્રુવ પર ચંદ્રયાન-3 ને સફળતાપૂર્વક ઉતાર્યું અને ‘શિવ શક્તિ પોઇન્ટ’ સ્થાપિત કર્યો, જેનાથી તમામ ભારતીયોના હૃદય ગર્વ અને આનંદથી ભરાઈ ગયા.

કેન્દ્રીય ગૃહ મંત્રી શ્રી અમિત શાહે જણાવ્યું હતું કે કોલ્હાપુરમાં પવિત્ર કરવીર પ્રદેશના માતા અંબાબાઈ મહાલક્ષ્મી મંદિરમાં, જ્યાં માતાજી સેંકડો વર્ષોથી બિરાજમાન છે, તેના જીર્ણોદ્ધાર અને વિકાસ માટે મહારાષ્ટ્ર સરકાર દ્વારા મહત્વપૂર્ણ કાર્ય શરૂ કરવામાં આવ્યું છે. રાજ્ય સરકાર કરવીર નગરમાં શ્રી અંબાબાઈ મહાલક્ષ્મી મંદિરનો જીર્ણોદ્ધાર અને ટેમ્પલ કોરિડોરનું નિર્માણ કરી રહી છે. આ પ્રોજેક્ટનો કુલ ખર્ચ ₹1,500 કરોડ છે અને તેને 28,000 ચોરસ મીટરથી વધુ જમીન પર વિકસાવવામાં આવશે. તેમણે જણાવ્યું હતું કે 7મી સદીમાં સ્થપાયેલા આ પ્રાચીન મંદિરના પુનર્વિકાસ દરમિયાન, પુરાતત્વ વિભાગની સલાહથી આસપાસના આશરે 41 નાના-મોટા મંદિરોના સંરક્ષણ પર વિશેષ ધ્યાન આપવામાં આવી રહ્યું છે. મંદિર સંકુલ એઆઈ (AI) આધારિત સુરક્ષા કેમેરા, એલઈડી (LED) લાઇટિંગ ડેકોરેશન, આઉટડોર ગેલેરી, હેરિટેજ વૉકવે, લાઇટ એન્ડ સાઉન્ડ શો, મલ્ટિપર્પઝ હોલ, અન્નછત્ર, પોલીસ સ્ટેશન અને હેરિટેજ ચોક સહિતની આધુનિક સુવિધાઓ અને સંપૂર્ણ યાત્રાળુ સુવિધાઓથી સજ્જ હશે. શ્રી શાહે ઉમેર્યું હતું કે આ પ્રોજેક્ટ પૂર્ણ થતાં જ કોલ્હાપુરમાં આવેલું આ પવિત્ર તીર્થસ્થળ છ મહિનામાં સંપૂર્ણ વિકસિત આધ્યાત્મિક સ્થળમાં પરિવર્તિત થઈ જશે. આનાથી અંબાબાઈ માતાના લાખો ભક્તોમાં માત્ર ભક્તિની જ્યોત જ ફરી પ્રજ્વલિત નહીં થાય, પરંતુ કોલ્હાપુર અને મહારાષ્ટ્રના સમૃદ્ધ સાંસ્કૃતિક વારસાને જાળવવાની અને પ્રોત્સાહન આપવાની તક પણ મળશે, જે ખાસ કરીને યુવા પેઢીને પ્રેરણા આપશે. તેમણે ઉમેર્યું હતું કે ₹1,500 કરોડ એ કોઈ મોટી રકમ નથી કારણ કે આવા પવિત્ર સ્થળો — જ્યાં આપણો ઇતિહાસ, આસ્થા અને સંસ્કૃતિ વસે છે — તેનો વિકાસ અને મહિમા તમામ ભારતીયો માટે પ્રેરણા સ્ત્રોત છે.

SM/JY/JD