ਮਿਸ਼ਨ ਓਲੰਪਿਕ ਸੈੱਲ (ਐੱਮਓਸੀ) ਨੇ ਆਪਣੀ 174ਵੀਂ ਬੈਠਕ ਵਿੱਚ ਆਇਚੀ-ਨਾਗੋਯਾ ਵਿੱਚ ਹੋਣ ਵਾਲੀਆਂ 2026 ਏਸ਼ੀਆਈ ਖੇਡਾਂ ਅਤੇ ਹੋਰ ਆਗਾਮੀ ਪ੍ਰਤੀਯੋਗਤਾਵਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਕਈ ਰੋਵਰਸ ਨੂੰ ਟਾਰਗੇਟ ਓਲੰਪਿਕ ਪੋਡੀਅਮ ਸਕੀਮ (ਟੀਓਪੀਐੱਸ) ਦੇ ਡਿਵੈਲਪਮੈਂਟ ਗਰੁੱਪ ਵਿੱਚ ਸ਼ਾਮਲ ਕੀਤਾ ਹੈ। ਇਹ ਸੂਚੀ ਸਾਲਾਨਾ ਰਾਸ਼ਟਰੀ ਚੋਣ ਟ੍ਰਾਇਲਸ ਅਤੇ ਭਾਰਤੀ ਰੋਇੰਗ ਮਹਾਸੰਘ ਵੱਲੋਂ ਕਰੂ ਦੀ ਅੰਤਿਮ ਚੋਣ ਦੀ ਪ੍ਰਕਿਰਿਆ ਪੂਰੀ ਹੋਣ ਤੋਂ ਬਾਅਦ ਤਿਆਰ ਕੀਤੀ ਗਈ ਹੈ।

ਛੇ ਵੱਖ-ਵੱਖ ਬੋਟ ਸ਼੍ਰੇਣੀਆਂ ਵਿੱਚ ਹੁਣ ਕੁੱਲ 22 ਰੋਵਰਸ ਟਾਪਸ (ਟੀਓਪੀਐੱਸ) ਡਿਵੈਲਪਮੈਂਟ ਗਰੁੱਪ ਦਾ ਹਿੱਸਾ ਹਨ। ਇਹ ਕਰੂ ਹੁਣ ਰੋਇੰਗ ਦੀਆਂ ਪ੍ਰਮੁੱਖ ਅੰਤਰਰਾਸ਼ਟਰੀ ਪ੍ਰਤੀਯੋਗਤਾਵਾਂ ਦੀ ਤਿਆਰੀ ਕਰੇਗਾ, ਜਿਸ ਵਿੱਚ ਏਸ਼ੀਆਈ ਖੇਡਾਂ ਅਤੇ ਵਰਲਡ ਕੱਪ ਸਰਕਟ ਸ਼ਾਮਲ ਹਨ। ਸ਼ਾਮਲ ਕੀਤੇ ਗਏ ਪ੍ਰਮੁੱਖ ਨਾਵਾਂ ਵਿੱਚ ਪੈਰਿਸ 2024 ਦੇ ਓਲੰਪੀਅਨ ਬਲਰਾਜ ਪੰਵਾਰ, ਏਸ਼ੀਆਈ ਖੇਡਾਂ 2022 ਦੇ ਚਾਂਦੀ ਦਾ ਤਗਮਾ ਜੇਤੂ ਅਰਵਿੰਦ ਸਿੰਘ ਅਤੇ ਏਸ਼ੀਆਈ ਖੇਡਾਂ 2022 ਦੇ ਦੋਹਰੇ ਤਗਮਾ ਜੇਤੂ ਜਸਵਿੰਦਰ ਸਿੰਘ ਤੇ ਹੋਰ ਖਿਡਾਰੀ ਸ਼ਾਮਲ ਹਨ।

ਇਨ੍ਹਾਂ 22 ਰੋਵਰਸ ਨੂੰ ਵੱਖ-ਵੱਖ ਨੌਕਾ ਸਮੂਹਾਂ ਵਿੱਚ ਵੰਡਿਆ ਗਿਆ ਹੈ, ਜਿਨ੍ਹਾਂ ਵਿੱਚ ਪੁਰਸ਼ ਸਿੰਗਲ ਸਕਲਸ (ਐੱਮ1ਐਕਸ), ਪੁਰਸ਼ ਡਬਲ ਸਕਲਸ (ਐੱਮ2ਐਕਸ), ਪੁਰਸ਼ ਕੁਆਡਰਪਲ ਸਕਲਸ (ਐੱਮ4ਐਕਸ), ਲਾਈਟਵੇਟ ਪੁਰਸ਼ ਡਬਲ ਸਕਲਸ (ਐੱਲਐੱਮ2ਐਕਸ), ਪੁਰਸ਼ ਕੌਕਸਡ ਏਟ (ਐੱਮ4-) ਅਤੇ ਮਹਿਲਾ ਕੌਕਸਲੇਸ ਫੋਰਸ (ਡਬਲਯੂ4-) ਸ਼ਾਮਲ ਹਨ। ਜਿੱਥੇ ਇੱਕ ਪਾਸੇ ਚੁਣੇ ਗਏ ਜ਼ਿਆਦਾਤਰ ਐਥਲੀਟਾਂ ਨੂੰ ਏਸ਼ੀਆਈ ਖੇਡਾਂ 2026 ਚੱਕਰ 'ਤੇ ਸਿੱਧਾ ਧਿਆਨ ਕੇਂਦਰਿਤ ਕਰਦੇ ਹੋਏ ਤਿਆਰ ਕੀਤਾ ਜਾ ਰਿਹਾ ਹੈ, ਉੱਥੇ ਹੀ ਦੂਜੇ ਪਾਸੇ ਕੁਝ ਟੀਮਾਂ ਭਾਰਤ ਦੇ ਵਿਆਪਕ ਅੰਤਰਰਾਸ਼ਟਰੀ ਵਿਕਾਸ ਮਾਰਗ ਦਾ ਵੀ ਹਿੱਸਾ ਹਨ, ਜਿਨ੍ਹਾਂ ਦਾ ਟੀਚਾ ਭਵਿੱਖ ਦੀਆਂ ਪ੍ਰਤੀਯੋਗਤਾਵਾਂ ਹਨ, ਜਿਵੇਂ ਕਿ ਸਾਲ 2030 ਵਿੱਚ ਭਾਰਤ ਵਿੱਚ ਕਰਵਾਈਆਂ ਜਾਣ ਵਾਲੀਆਂ ਰਾਸ਼ਟਰਮੰਡਲ ਖੇਡਾਂ।

ਕਈ ਭਾਰਤੀ ਰੋਵਰਸ ਨੂੰ ਟਾਪਸ ਡਿਵੈਲਪਮੈਂਟ ਗਰੁੱਪ ਵਿੱਚ ਸ਼ਾਮਲ ਕਰਨਾ, ਵਿਅਕਤੀਗਤ ਤਗਮੇ ਜਿੱਤਣ ਦੀਆਂ ਸੰਭਾਵਨਾਵਾਂ 'ਤੇ ਧਿਆਨ ਕੇਂਦਰਿਤ ਕਰਨ ਦੀ ਬਜਾਏ, ਵੱਖ-ਵੱਖ ਨੌਕਾ ਸ਼੍ਰੇਣੀਆਂ ਵਿੱਚ ਸਥਾਈ ਸਮਰੱਥਾ ਵਿਕਸਿਤ ਕਰਨ ਦਾ ਇੱਕ ਹੋਰ ਯਤਨ ਹੈ। ਸਾਲ 2030 ਵਿੱਚ ਭਾਰਤ ਰਾਸ਼ਟਰਮੰਡਲ ਖੇਡਾਂ ਦੇ ਸ਼ਤਾਬਦੀ ਸੰਸਕਰਣ ਦੀ ਮੇਜ਼ਬਾਨੀ ਕਰਨ ਜਾ ਰਿਹਾ ਹੈ। ਅਜਿਹੇ ਵਿੱਚ ਰੋਇੰਗ ਦੇ ਬੁਨਿਆਦੀ ਢਾਂਚੇ ਅਤੇ ਟੀਮ ਨੂੰ ਮਜ਼ਬੂਤ ਕਰਨਾ ਬਹੁਤ ਮਹੱਤਵਪੂਰਨ ਹੈ। ਰੋਇੰਗ ਨੂੰ 1986 ਵਿੱਚ ਐਡਿਨਬਰਗ ਵਿੱਚ ਹੋਈਆਂ ਰਾਸ਼ਟਰਮੰਡਲ ਖੇਡਾਂ ਤੋਂ ਬਾਅਦ ਖੇਡਾਂ ਵਿੱਚ ਸ਼ਾਮਲ ਨਹੀਂ ਕੀਤਾ ਗਿਆ ਹੈ, ਪਰ ਸ਼ਤਾਬਦੀ ਸੰਸਕਰਣ ਵਿੱਚ ਇਸ ਦੀ ਵਾਪਸੀ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ।

ਟਾਪਸ  ਡਿਵੈਲਪਮੈਂਟ ਗਰੁੱਪ ਵਿੱਚ ਸ਼ਾਮਲ ਰੋਵਰਸ ਦੀ ਪੂਰੀ ਸੂਚੀ:

• ਪੁਰਸ਼ ਸਿੰਗਲ ਸਕਲਸ - ਅਰਵਿੰਦ ਸਿੰਘ

• ਪੁਰਸ਼ ਡਬਲ ਸਕਲਸ – ਨਵਦੀਪ ਸਿੰਘ, ਕੁਲਵਿੰਦਰ ਸਿੰਘ

• ਪੁਰਸ਼ ਕੁਆਡਰਪਲ ਸਕਲਸ - ਬਲਰਾਜ ਪੰਵਾਰ, ਸਤਨਾਮ ਸਿੰਘ, ਜਕਾਰ ਖਾਨ, ਸਲਮਾਨ ਖਾਨ

• ਲਾਈਟਵੇਟ ਪੁਰਸ਼ ਡਬਲ ਸਕਲਸ - ਲਕਸ਼ੈ, ਉੱਜਵਲ ਕੁਮਾਰ ਸਿੰਘ

• ਪੁਰਸ਼ ਕੌਕਸਡ ਏਟ - ਜਸਵਿੰਦਰ ਸਿੰਘ, ਨਿਤਿਨ ਕੁਮਾਰ, ਬਾਬੂਲਾਲ ਯਾਦਵ, ਯੋਗੇਸ਼ ਕੁਮਾਰ, ਘੁਰਡੇ ਵਿਪੁਲ ਸਤੀਸ਼, ਸੌਰਵ ਕੁਮਾਰ, ਇਕਬਾਲ ਸਿੰਘ, ਸੰਨੀ ਕੁਮਾਰ, ਧਨੰਜੈ ਉੱਤਮ ਪਾਂਡੇ

• ਮਹਿਲਾ ਕੌਕਸਲੇਸ ਫੋਰਸ - ਗੁਰਬਾਣੀ ਕੌਰ, ਪੂਨਮ, ਟੈਂਡੇਨਥੋਈ, ਅਲੀਨਾ ਐਂਟੋ

************

ਆਯੁਸ਼ਮਾਨ ਕੁਮਾਰ