ભારત સરકારનું સૂક્ષ્મ, લઘુ અને મધ્યમ ઉદ્યોગ મંત્રાલય 19 જૂન 2026ના રોજ ઉત્તર પ્રદેશના આગ્રા ખાતે “સ્થિતિસ્થાપકતા, નવીનતા, સહયોગ અને ટકાઉપણું માટે નિર્માણ” ના મુખ્ય વિષય હેઠળ પ્રથમ બ્રિક્સ MSME ફોરમ અને ત્રીજી SME વર્કિંગ ગ્રુપ બેઠકની યજમાની કરશે.

આ પ્રથમ બ્રિક્સ MSME ફોરમ બેઠક વૈશ્વિક MSME ઇકોસિસ્ટમને મજબૂત કરવા, ટકાઉપણું પ્રોત્સાહિત કરવા અને આંતરરાષ્ટ્રીય સહયોગ વધારવા અંગે ચર્ચા-વિચારણા કરવા માટે બ્રિક્સ સભ્ય અને બ્રિક્સ ભાગીદાર દેશોના નીતિનિર્માતાઓ, ઉદ્યોગ અગ્રણીઓ, ઉદ્યોગસાહસિકો અને અન્ય મુખ્ય હિસ્સેદારોને એક મંચ પર લાવશે, જેમાં બ્રાઝિલ, ચીન, ઇજિપ્ત, ઇથોપિયા, ઇન્ડોનેશિયા, ઇરાન, રશિયા, સાઉદી અરેબિયા, દક્ષિણ આફ્રિકા, યુએઈ, બેલારુસ, બોલિવિયા, ક્યુબા, કઝાકિસ્તાન, મલેશિયા, નાઇજીરિયા, થાઇલેન્ડ, યુગાન્ડા, ઉઝબેકિસ્તાન, વિયેતનામ અને ભારત સામેલ છે.

ભારતનું MSME ક્ષેત્ર: આર્થિક વૃદ્ધિ અને વૈશ્વિક સ્પર્ધાત્મકતાને વેગ આપવો

ભારતનું MSME ક્ષેત્ર, જે 8.6 કરોડથી વધુ સાહસો ધરાવે છે, તે દેશની આર્થિક વૃદ્ધિ અને વિકાસનો આધારસ્તંભ બનીને ઉભરી આવ્યું છે. આ ક્ષેત્ર રાષ્ટ્રીય GDPમાં 31.1 ટકાથી વધુ યોગદાન આપે છે, ઉત્પાદન આઉટપુટ (મેન્યુફેક્ચરિંગ આઉટપુટ) માં 35.4 ટકા હિસ્સો ધરાવે છે અને ભારતના કુલ નિકાસમાં 48.58 ટકાથી વધુ યોગદાન આપે છે, જ્યારે દેશભરમાં મોટા પાયે રોજગારીની તકો ઊભી કરે છે.

આ આંકડાઓની પાછળ આકાંક્ષા, નવીનતા, સ્થિતિસ્થાપકતા અને ઉદ્યોગસાહસિકતાની લાખો વાર્તાઓ રહેલી છે. પરંપરાગત કારીગરો અને ગ્રામીણ ઉદ્યોગોથી લઈને અદ્યતન ઉત્પાદન એકમો અને ટેકનોલોજી આધારિત વ્યવસાયો સુધી, ભારતનું MSME ક્ષેત્ર આપણી અર્થવ્યવસ્થાની સાચી વિવિધતા અને શક્તિનું પ્રતિનિધિત્વ કરે છે.

બ્રિક્સ દેશો ભવિષ્ય માટે સજ્જ MSME ઇકોસિસ્ટમ પર ચર્ચા-વિચારણા કરશે

આ દિવસભરનો કાર્યક્રમ MSME શ્રેષ્ઠતા દર્શાવતા એક પ્રદર્શનના ઉદ્ઘાટન સાથે શરૂ થશે, ત્યારબાદ બ્રિક્સ સભ્યોની ત્રીજી SME વર્કિંગ ગ્રુપ બેઠક યોજાશે જેનો મુખ્ય વિષય “બિલ્ડીંગ MSME ઈકોસિસ્ટમ-સસ્ટેઈનેબલ રુટ્સ ટુ ગ્લોબલ રુટ્સ” રહેશે.

આ સાથે જ, બ્રિક્સ સભ્યોના ખાનગી ક્ષેત્રના હિસ્સેદારો (ઇન્ડસ્ટ્રી એસોસિએશન્સ) ‘MSME માટે ફાઇનાન્સ સુધી પહોંચ’, ‘MSME માટે ટેકનોલોજી એક્સેસ’ અને ‘ટકાઉપણું-કેન્દ્રિત MSME નો વિકાસ’ જેવા વિષયો પર ચર્ચા-વિચારણા કરશે.

આ ફોરમમાં બ્રિક્સ દેશોના વરિષ્ઠ સરકારી અધિકારીઓ અને પ્રતિનિધિઓ હાજરી આપશે, જેઓ સ્થિતિસ્થાપક અને ભવિષ્ય માટે સજ્જ MSME ઇકોસિસ્ટમને પ્રોત્સાહન આપવા માટે શ્રેષ્ઠ પદ્ધતિઓ, નીતિગત અનુભવો અને સફળ કેસ સ્ટડીઝ શેર કરશે.

બ્રિક્સ SME ફોરમ બ્રિક્સ દેશો વચ્ચે સહયોગ મજબૂત કરશે અને સાથે જ MSMEના વિકાસ અને વૈશ્વિક સ્પર્ધાત્મકતાને ટેકો આપવા માટે સહયોગી વાતાવરણ ઉભું કરશે તેવી અપેક્ષા છે. તે સહભાગી દેશોને જ્ઞાનનું આદાનપ્રદાન કરવા, ઉભરી રહેલી તકોને ઓળખવા અને ભાગીદારી બનાવવા માટેની તક પણ પૂરી પાડશે, જે સર્વસમાવેશક અને ટકાઉ આર્થિક વિકાસમાં યોગદાન આપશે.

બ્રિક્સ MSME ફોરમ એ MSME ને સશક્ત બનાવવા અને વધુને વધુ પરસ્પર જોડાયેલા વૈશ્વિક અર્થતંત્રમાં આર્થિક સ્થિતિસ્થાપકતા, નવીનતા અને ટકાઉ વિકાસના મુખ્ય ચાલક બળ તરીકે સ્થાપિત કરવા માટે બ્રિક્સ દેશોની સામૂહિક પ્રતિબદ્ધતા દર્શાવે છે.

SM/BS/GP