راجیہ سبھا کے نائب صدر جناب ہری ونش نے آج علی گڑھ مسلم یونیورسٹی (اے ایم یو) میں باوقار سر سید احمد خاں میموریل لیکچر ”معاشرتی تبدیلی میں ٹکنالوجی کا کردار: ایک بھارتی نقطہ نظر“ کے موضوع پر پیش کیا۔ یہ لیکچر سر سید اکیڈمی، اے ایم یو کے ذریعے اس کی سالانہ میموریل لیکچر سلسلے کے حصے کے طور پر منعقد کیا گیا تھا، جو سر سید احمد خاں کے ورثے کے لیے وقف ہے۔

ایک معزز مجمع سے خطاب کرتے ہوئے، جس میں ماہرین تعلیم، طلبا، محققین اور عوام دانشور شامل تھے، جناب ہری ونش نے سر سید احمد خاں کے اصلاحی وژن سے مماثلت پیش کرتے ہوئے زور دے کر کہا کہ قومی ترقی کے لیے جدید علم اور سائنسی مزاج کو اپنانا ضروری ہے۔ انھوں نے مختلف ممالک اور ادوار سے دلچسپ مثالیں پیش کرتے ہوئے عالمی سطح پر معاشروں کی تشکیل میں ٹکنالوجی کے تبدیلی لانے والے کردار پر زور دیا۔

نائب صدر نے زور دیا کہ اگرچہ ٹکنالوجی معاشرتی تبدیلی کا ایک طاقتور ذریعہ ہے، لیکن اس کے فوائد معاشرے کے تمام طبقوں تک پہنچنے چاہئیں۔ انھوں نے ڈیجیٹل تقسیم کو ختم کرنے اور یہ یقینی بنانے پر زور دیا کہ تکنیکی جدت طرازی بھارت کی سماجی اور ثقافتی حقائق میں جڑی رہے۔

عصرِ حاضر کے بھارتی معاشرے کی طرف توجہ مبذول کراتے ہوئے، انھوں نے روشنی ڈالی کہ کس طرح 2014 کے بعد نئی ٹکنالوجیوں کے استعمال نے سماجی شمولیت کو تیز کیا، تعلیم اور صحت کی سہولیات تک رسائی کو بڑھایا، جمہوری شرکت کو مضبوط کیا، اور بھارت میں معاشی تفویضِ اختیارات کے لیے نئے مواقع پیدا کیے۔

انھوں نے موجودہ حکومت کے ذریعے ابھرتی ہوئی ٹکنالوجیوں، جن میں مصنوعی ذہانت اور ڈیجیٹل پلیٹ فارم شامل ہیں، کو بروئے کار لانے کے لیے کی جانے والی کوششوں، اسکیموں اور پروگراموں پر زور دیا، اس طرح کہ اس نے نہ صرف مساوات، شفافیت، احتساب اور انسانی بہبود کو فروغ دیا ہے بلکہ ایک طرح سے خود ٹکنالوجی کو بھی جمہوری بنا دیا ہے۔

اس سے قبل، اے ایم یو حکام اور سر سید اکیڈمی نے مہمانِ خصوصی کا استقبال کیا اور سر سید احمد خاں کے جدید تعلیم کو سماجی اصلاح سے جوڑنے کے وژن کی مسلسل اہمیت پر زور دیا۔ اس تقریب میں یونیورسٹی برادری کے ارکان اور مدعو مہمانوں کی پرجوش شرکت دیکھنے کو ملی۔

سر سید احمد خاں میموریل لیکچر اے ایم یو کے اہم ترین فکری فورمز میں سے ایک ہے، جو قومی اہمیت اور سماجی اصلاح کے مسائل پر مکالمے کو فروغ دیتا ہے۔

***

(ش ح - ع ا)

U.No. 8777

(रिलीज़ आईडी: 2274293) आगंतुक पटल : 8