ముఖానికీ, కనుపాప విధానాలకు సంబంధించిన బయోమెట్రిక్ ఎస్‌డీకే బెంచ్‌మార్కింగ్ పోటీ విజేతలను భారత విశిష్ట గుర్తింపు ప్రాధికార సంస్థ (యూఐడీఏఐ) హైదరాబాద్‌లోని ఇంటర్‌నేషనల్ ఇన్ఫర్మేషన్ టెక్నాలజీ ఇనిస్టిట్యూట్ (ఐఐఐటీ హైదరాబాద్) సహకారంతో సోమవారం నాడు సత్కరించింది.

ఫింగర్‌ప్రింట్ పోటీ విజయవంతం అయిన నేపథ్యంలో, యూఐడీఏఐ 2025 డిసెంబరు, 2026 ఫిబ్రవరి మధ్య కాలంలో ముఖం, కనుపాప వయసు తేడాపై పోటీలను నిర్వహించింది. ముఖం, కంటిపాప పోటీల్లో పాల్గొనడానికి మొత్తం 531 సంస్థలు ముందుకు వచ్చి నమోదు ప్రక్రియను పూర్తి చేశాయి.

సమగ్ర పరీక్షలు, పనితీరును పరిశీలించిన తరువాత, ముఖాకృతి పోటీలో అగ్రస్థానాన్ని స్లొవేకియాకు చెందిన ఇన్నొవేట్రిక్స్ చేజిక్కించుకొంది. తరువాతి స్థానాలలో అమెరికాకు చెందిన ఐడీబీఐఓ, లిథువేనియాకు చెందిన న్యూరోటెక్నాలజీ నిలిచాయి. ఇదే విధంగా ఐరిస్ ఛాలెంజ్‌లో ప్రథమ స్థానాన్ని ఐడీబీఐఓ దక్కించుకుంది. తరువాతి స్థానాలలో న్యూరోటెక్నాలజీ, ఇన్నొవేట్రిక్స్ నిలిచాయి.

ఈ పోటీలో విజేతలే కాకుండా పర్ఫియోస్, ఊరూ సంస్థలతోపాటు ఐఐఐటీ హైదరాబాద్ సహా అనేక భారతీయ కంపెనీలు, విద్యాసంస్థలు కూడా పాల్గొన్నాయి.

దేశీయ బయోమెట్రిక్ ఎస్‌డీకే సంబంధిత పరిష్కారాలను రూపొందించే, బయోమెట్రిక్ పరిశోధనలను ప్రోత్సహించే దిశగా యూఐడీఏఐ చేస్తున్న నిరంతర ప్రయత్నాల్లో ఈ కార్యక్రమం ఓ భాగం. భారత్‌తో పాటు ఇతర దేశాలకు చెందిన అగ్రగామి సాంకేతిక సేవా ప్రదాతలకూ, పరిశోధన సంస్థలకూ చెందిన ఉన్నత పనితీరును కనబరిచే 1:1 ముఖం, కనుపాపలతో పోలిక కలిగిన పరిష్కారాల్ని గుర్తించడమే ఫేస్, ఐరిస్ పోటీల నిర్వహణలో ముఖ్యోద్దేశం.

పెద్దవైన, పేర్లు లేని డేటా సెట్లను ఉపయోగించి మూల్యాంకనాల్ని చేపట్టారు. మనిషి వయసు క్రమంగా పెరుగుతుండే దశలో ఈ సరిచూసే వ్యవస్థలు ఎంత ప్రభావవంతంగా పనిచేయగలిగేదీ పరీక్షించడానికే ఈ పోటీల్ని నిర్వహించారు. ఇందుకోసం 5 ఏళ్ల నుంచి 10 ఏళ్ల వయసు బాలల విశిష్ట దీర్ఘకాలిక బయోమెట్రిక్ డేటాసెట్లను ఉపయోగించారు. ఇదే ఈ పోటీల్లోని ప్రత్యేకత. ప్రతి ఒక్క నమూనాకీ మధ్య 5 సంవత్సరాల అంతరం ఉండేటట్లు జాగ్రత్త తీసుకున్నారు.

యూఐడీఏఐ ఆధ్వర్యంలో నిర్వహించిన ఈ పోటీ అంతర్జాతీయ స్థాయిలో ఒక విశిష్టమైనదని చెప్పవచ్చు. వివిధ వయో వర్గాల బాలల బయోమెట్రిక్ గుర్తింపునకు సంబంధించి వాస్తవిక ప్రపంచంలో ఎదురయ్యే సమస్యలను పరిష్కరించడానికి ఈ విధమైన డేటా సెట్లను ఉపయోగించుకున్నారు.

బయోమెట్రిక్ విస్తారిత అనుబంధ వ్యవస్థ నుంచి నిరంతర ప్రాతిపదికన నూతన ఆవిష్కరణలనూ, భాగస్వామ్యాన్నీ ప్రోత్సహించే ఉద్దేశంతో యూఐడీఏఐ అగ్రగామి పనితీరును కనబరుస్తున్న భాగస్వాములను గుర్తించి సత్కరించింది. ఈ పోటీల్లో పాల్గొన్న భాగస్వాములందరూ చిత్తశుద్ధితో చేసిన ప్రయత్నాలను యూఐడీఏఐ ప్రోత్సహించింది.

మరింత సమాచారం ఇక్కడ..

https://biochallenge.uidai.gov.in

***