ٹیکسٹائل کے مرکزی وزیر جناب گری راج سنگھ نے گزشتہ 12 برسوں میں ٹیکسٹائل کی وزارت کی کامیابیوں پر روشنی ڈالتے ہوئے کہا کہ وزیر اعظم جناب نریندر مودی کی دور اندیش قیادت میں، بھارت کے ٹیکسٹائل اور ملبوسات کے شعبے میں ایک قابل ذکر تبدیلی آئی ہے، جو عالمی سطح پر مسابقتی، اختراع پر مبنی اور روزگار کی صنعت کے طور پر ابھر کر سامنے آئی ہے۔میڈیا سے خطاب کرتے ہوئے، وزیر موصوف نے کہا کہ، وزیر اعظم کے 5 ایف کے وژن – فارم سے فائبر، فائبر سے فیکٹری، فیکٹری سے فیشن اور فیشن سے فارن- سے رہنمائی حاصل کرتے ہوئے، یہ شعبہ ایک مضبوط اور مربوط ویلیو چین میں تبدیل ہو چکا ہے جو کاشتکاروں، مینوفیکچررس، بنکروں، صناعوں اور برآمدکنندگان کو جوڑتی ہے۔ محترم وزیر نے کہا بھارت کی ٹیکسٹائل صنعت 2025-26 میں تقریباً 190 بلین امریکی ڈالر کے بقدر تک توسیع حاصل کر چکی ہے اور 2030 تک 350 بلین امریکی ڈالر کا ہدف حاصل کرنے کے لیے تیار ہے۔گھریلو ٹیکسٹائل منڈی 2014-15 میں تقریباً 6 لاکھ کروڑ روپے کی مالیت سے بڑھ کر 16 لاکھ کروڑ روپے کے بقدر کی ہو چکی ہے، جس سے شعبے کی مضبوط توسیع قومی معیشت میں اس کے بڑھتے ہوئے تعاون کا پتہ چلتا ہے۔ انہوں نے مزید کہا کہ ٹیکسٹائل اور ملبوسات کا شعبہ فی الحال 5.3 کروڑ سے زائد افراد کو راست روزگار فراہم کرتا ہے اور توقع کی جاتی ہے کہ یہ آئندہ تین برسوں میں 2 کروڑ اضافی روزگار بہم پہنچائے گا۔

جناب گری راج سنگھ نے اس بات پر زور دیا کہ حکومت نے ٹیکسٹائل کے پورے ماحولیاتی نظام کو مضبوط بنانے کے لیے کئی تاریخی اصلاحات اور اہم اقدامات کو نافذ کیا ہے۔ ان میں پی ایم متر پارکس، پیداواریت سے منسلک ترغیباتی(پی ایل آئی) اسکیم، نیشنل ٹیکنیکل ٹیکسٹائل مشن (این ٹی ٹی ایم)، ٹیکسٹائل ایکسپورٹ پروموشن مشن (ٹی ای ایم)، نیشنل فائبر مشن اور را میٹریل سپورٹ اسکیم (آر ایم ایس ایس) شامل ہیں، جو کہ سرمایہ کاری، تکنیکی ترقی اور برآمدات کی پائیداری کو فروغ دے رہے ہیں۔ کپاس کے کاشتکاروں کی مدد کرنے اور صنعت کے لیے خام مال کی مناسب دستیابی کو یقینی بنانے کے لیے، حکومت نے کپاس کی پیداواری مشن کا آغاز کیا اور کپاس پر درآمداتی ڈیوٹی ہٹا دی۔ آر او ایس سی ٹی ایل اور آر او ڈی ٹی ای پی جیسی اسکیموں کے ذریعے برآمدی مسابقت کو مضبوط کیا گیا ہے، جبکہ ہندوستان کے آزاد تجارتی معاہدوں کا نیٹ ورک 2014 میں 19 ممالک کا احاطہ کرنے والے 10 ایف ٹی اے​​سے 56 ممالک کو محیط 18 ایف ٹی اے ​​تک پھیلا ہوا ہے، جس سے برآمدات اور سرمایہ کاری کے نئے مواقع پیدا ہوئے ہیں۔ عالمی تجارتی چیلنجوں کے باوجود، ہندوستان نے اپنی برآمدی منزلوں کو متنوع بنایا ہے اور 135 ممالک میں برآمدات میں اضافہ درج کیا ہے۔ وزیر نے مزید کہا کہ ہندوستان تکنیکی ٹیکسٹائل میں ایک بڑی طاقت کے طور پر ابھرا ہے، جس کی مارکیٹ نیشنل ٹیکنیکل ٹیکسٹائل مشن کے تحت تقریباً 6 بلین امریکی ڈالر سے بڑھ کر 25 بلین امریکی ڈالر تک پہنچ گئی ہے۔ تحقیق، اختراع، انکیوبیشن اور انڈسٹری اکیڈمیا کے تعاون میں بڑے پیمانے پر سرمایہ کاری مستقبل کے لیے تیار ٹیکسٹائل ماحولیاتی نظام کی تعمیر میں مدد کر رہی ہے۔ کلیدی ریاستوں میں مربوط ٹیکسٹائل پارکس اور سات پی ایم مِتر پارکس کی ترقی کے ذریعے ٹیکسٹائل کے بنیادی ڈھانچے میں بھی نمایاں پیش رفت ہوئی ہے، جس سے 70,000 کروڑ روپے کی سرمایہ کاری کو راغب کرنے اور تقریباً 21 لاکھ روزگار کے مواقع پیدا کرنے کی توقع ہے۔ پاورلوم سیکٹر نے ٹیکنالوجی اپ گریڈیشن کے اقدامات سے فائدہ اٹھایا ہے، جبکہ این آئی ایف ٹی نے اپنے تعلیمی نقش کو بڑھایا ہے اور ہندوستان کے فیشن اور ڈیزائن ماحولیاتی نظام کو مضبوط کرنے کے لیے وژن این ایکس ٹی اور انڈیا سائز جیسے اختراعی پروجیکٹس متعارف کرائے ہیں۔

وزیر موصوف نے کہا کہ پچھلے 12 برسوں کی کامیابیاں ہندوستان کو ایک کم لاگت پروڈیوسر سے ڈیزائن کی قیادت والی، اختراع پر مبنی، پائیدار اور برآمد پر مبنی عالمی ٹیکسٹائل مرکز میں تبدیل کرنے کے حکومت کے عزم کی عکاسی کرتی ہیں۔

ریاستی وزیر (ٹیکسٹائل) شری پبیترا مارگریتا نے گزشتہ 12 سالوں میں ٹیکسٹائل کے شعبے کی کامیابیوں پر بات کرتے ہوئے کہا کہ وزیر اعظم جناب نریندر مودی کی قیادت میں، ہندوستان کے ہینڈ لوم اور دستکاری کے شعبوں میں بے مثال ترقی، بااختیار بنانے اور مارکیٹ کے انضمام کا مشاہدہ کیا گیا ہے۔ انہوں نے نوٹ کیا کہ نیشنل ہینڈلوم ڈیولپمنٹ پروگرام کے ذریعے تقریباً 2,000 کروڑ روپے کی سرمایہ کاری کی گئی ہے، جس سے لاکھوں بنکروں کو اپ گریڈ شدہ لوم، ہنر مندی کی ترقی، بنیادی ڈھانچے کی مدد اور مارکیٹ تک رسائی میں اضافہ ہوا ہے۔ وزیر نے اس بات پر زور دیا کہ گورنمنٹ ای-مارکیٹ پلیس (جی ای ایم)، انڈیا ہینڈ میڈ پورٹل، جی آئی ٹیگنگ، میگا ہینڈلوم کلسٹرس اور ویورز کی مدرا اسکیم جیسے اقدامات نے ذریعہ معاش کو مضبوط کیا ہے اور بیچوانوں پر انحصار کم کیا ہے۔ انہوں نے مزید کہا کہ دستکاری کے شعبے کو کلسٹر ڈویلپمنٹ، ہنر کی اپ گریڈیشن، کاریگروں کے شناختی کارڈز اور مارکیٹنگ کے اقدامات کے ذریعے نمایاں مدد ملی ہے، جس سے کاریگروں کی پیداواری صلاحیت اور آمدنی کو بہتر بنانے میں مدد ملی ہے۔

سکریٹری، ٹیکسٹائل کی وزارت، محترمہ نیلم شامی راؤ نے کہا کہ ٹیکسٹائل سیکٹر خواتین کو بااختیار بنانے میں ایک بڑی ورک فورس اور ابھرتے ہوئے کاروباری افراد کے طور پر اہم کردار ادا کر رہا ہے۔ سکریٹری نے اس اعتماد کا اظہار کیا کہ مسلسل پالیسی سپورٹ، بنیادی ڈھانچے کی ترقی، سرمایہ کاری کے فروغ، مہارتوں میں اضافہ اور تکنیکی جدت طرازی کے ساتھ، ملک ایک سرکردہ عالمی ٹیکسٹائل پاور ہاؤس بننے کے لیے اچھی طرح سے پوزیشن میں ہے اور وکٹ بھارت کے مقصد میں اہم کردار ادا کر سکتا ہے۔

***

 (ش ح –ا ب ن)

U.No:8299

(रिलीज़ आईडी: 2271869) आगंतुक पटल : 8