સાર્વત્રિક સ્વાસ્થ્ય કવરેજ તરફની ભારતની સફરમાં એક મોટો સીમાચિહ્નરૂપ નવો અધ્યાય ઉમેરતાં, પશ્ચિમ બંગાળ સરકાર આવતીકાલે વિશ્વની સૌથી મોટી જાહેર ભંડોળ ધરાવતી સ્વાસ્થ્ય આશ્વાસન યોજના - આયુષ્માન ભારત પ્રધાનમંત્રી જન આરોગ્ય યોજના (AB PM-JAY)માં જોડાવા માટે સંપૂર્ણ તૈયાર છે. આ યોજનાના રાજ્યમાં અમલીકરણ માટે ભારત સરકારના સ્વાસ્થ્ય અને પરિવાર કલ્યાણ મંત્રાલયના નેજા હેઠળની નેશનલ હેલ્થ ઓથોરિટી (NHA) અને પશ્ચિમ બંગાળ સરકારના સ્વાસ્થ્ય અને પરિવાર કલ્યાણ વિભાગ વચ્ચે નવી દિલ્હીના વિજ્ઞાન ભવન ખાતે એક સમજૂતીજ્ઞાપન (MoU) પર હસ્તાક્ષર કરવામાં આવશે.

આ એમઓયુ પર હસ્તાક્ષર થવાની સાથે જ, પશ્ચિમ બંગાળ દેશમાં AB PM-JAY યોજના લાગુ કરનારું 36મું રાજ્ય/કેન્દ્રશાસિત પ્રદેશ બનશે. આ વિકાસ દેશભરના તમામ નાગરિકો માટે સમાન અને સુલભ સ્વાસ્થ્ય સેવાઓ સુનિશ્ચિત કરવાની દિશામાં એક મોટી ઉપલબ્ધિ દર્શાવે છે.

એમઓયુ હસ્તાક્ષર સમારોહની અધ્યક્ષતા કેન્દ્રીય સ્વાસ્થ્ય અને પરિવાર કલ્યાણ મંત્રી શ્રી જે.પી. નડ્ડા કરશે. આ અવસરે પશ્ચિમ બંગાળના મુખ્યમંત્રી શ્રી શુભેન્દુ અધિકારી, આયુષ મંત્રાલય અને સ્વાસ્થ્ય તથા પરિવાર કલ્યાણ મંત્રાલયના માનનીય રાજ્યમંત્રી શ્રી પ્રતાપ રાવ જાધવ, કેન્દ્રીય સ્વાસ્થ્ય અને પરિવાર કલ્યાણ તથા રસાયણ અને ખાતર રાજ્યમંત્રી શ્રીમતી અનુપ્રિયા પટેલ, કેન્દ્રીય સ્વાસ્થ્ય સચિવ શ્રીમતી પુણ્ય સલીલા શ્રીવાસ્તવ અને પશ્ચિમ બંગાળના મુખ્ય સચિવ શ્રી મનોજ કુમાર અગ્રવાલ તેમજ સ્વાસ્થ્ય અને પરિવાર કલ્યાણ મંત્રાલય, નેશનલ હેલ્થ ઓથોરિટી અને પશ્ચિમ બંગાળ સરકારના અન્ય વરિષ્ઠ અધિકારીઓ ઉપસ્થિત રહેશે.

આયુષ્માન ભારત PM-JAY યોજના પાત્ર લાભાર્થીઓને સેકન્ડરી (દ્વિતીયક) અને ટર્શરી (તૃતીયક) સંભાળની હોસ્પિટલમાં દાખલ થવા માટે પ્રતિ વર્ષ પ્રતિ પરિવાર ₹5 લાખ સુધીનું સ્વાસ્થ્ય કવચ પૂરું પાડે છે. આ યોજના તેની શરૂઆત થઈ ત્યારથી જ ભારતની સ્વાસ્થ્ય પ્રણાલીના પરિવર્તનનો મુખ્ય આધાર સ્તંભ બનીને ઉભરી આવી છે, જેણે લોકોના ખિસ્સાના ખર્ચમાં ઘટાડો કર્યો છે અને સંબંધિત સરકારી તેમજ ખાનગી હોસ્પિટલોના વિશાળ નેટવર્ક દ્વારા ગુણવત્તાયુક્ત સારવાર સુધીની પહોંચમાં સુધારો કર્યો છે.

પશ્ચિમ બંગાળમાં AB PM-JAY ના અમલીકરણથી રાજ્યના લાખો પાત્ર લાભાર્થીઓને સ્વાસ્થ્ય પાછળ થતા આકસ્મિક અને મોટા ખર્ચાઓ સામે આર્થિક સુરક્ષા મળવાની અપેક્ષા છે, સાથે જ તેઓ દેશભરમાં સ્વાસ્થ્ય લાભોની સીમલેસ પોર્ટેબિલિટી (દેશમાં ગમે ત્યાં સારવાર મેળવવાની સુવિધા) નો લાભ લઈ શકશે. આ પહેલ ગુણવત્તાયુક્ત અને પરવડે તેવી સ્વાસ્થ્ય સેવાઓની પહોંચ વધારીને રાજ્યની સ્વાસ્થ્ય ઇકોસિસ્ટમને પણ વધુ મજબૂત બનાવશે.

SM/IJ/JD