جن سمرتھ پورٹل کا سفر

بھارت بھر میں کاروباری خواہشات عموماً ایک سادہ ضرورت سے جنم لیتی ہیں: درست وقت پر مناسب معاونت کی دستیابی۔ ابھرتے ہوئے کاروباری افراد، خواتین کی قیادت میں چلنے والے اداروں اور زرعی کاروبار کے شعبے میں قدم رکھنے والے نوجوان پیشہ ور افراد سمیت بہت سے لوگوں کو اپنے خوابوں کو حقیقت کا روپ دینے کے لیے بروقت اور آسان مالی معاونت درکار ہوتی ہے۔ اگرچہ سرکاری اسکیموں کے ذریعے مواقع موجود ہیں، لیکن متعدد پورٹلز اور مختلف طریقۂ کار کو سمجھنا اور ان سے استفادہ کرنا اکثر ایک چیلنج بنا رہتا ہے۔

اس ضرورت کو مدِنظر رکھتے ہوئے حکومت نے قرض سے متعلق اسکیموں کے لیے جن سمرتھ پورٹل کا آغاز کیا۔ یہ اپنی نوعیت کا پہلا پلیٹ فارم ہے جو قرض فراہم کرنے والے اداروں کو براہِ راست مستفیدین سے جوڑتا ہے۔ 6 جون 2022 کو شروع کیے جانے کے بعد سے، اس پورٹل نے ایک سادہ اور ٹیکنالوجی پر مبنی نظام کے ذریعے مالی معاونت تک رسائی کو آسان بنایا ہے۔ اسے دو بنیادی مقاصد کے تحت تیار کیا گیا تھا: سرکاری اسکیموں کی رسائی میں اضافہ اور قرضوں کی فراہمی کے عمل کو مزید مؤثر اور منظم بنانا۔

جن سمرتھ نے اپنے سفر کے چار سال مکمل کر لیے ہیں اور یہ پورٹل بلا رکاوٹ قرضہ جاتی سہولیات کی فراہمی کے ذریعے مالی شمولیت کو مزید مضبوط بنانے کا سلسلہ جاری رکھے ہوئے ہے۔

ایک پلیٹ فارم، متعدد زبانیں

انگریزی، ہندی، گجراتی، تیلگو، تمل، مراٹھی، بنگالی اور کنڑ

جن سمرتھ قرض کے حصول کے عمل کو ایک مربوط اور صارف دوست ڈیجیٹل نظام کے ذریعے آسان بناتا ہے۔ ملک کی دیہی اور محروم آبادی کی سہولت کے لیے یہ پورٹل آٹھ مختلف زبانوں میں دستیاب ہے۔ یہ پلیٹ فارم کریڈٹ سے منسلک مرکزی حکومت کی 16 اسکیموں کے لیے درخواستیں جمع کرانے کا ایک متحدہ ڈیجیٹل دروازہ فراہم کرتا ہے۔ زراعت اور قابلِ تجدید توانائی سے لے کر کاروباری سرگرمیوں اور رہائش تک، یہ پورٹل مختلف شعبوں اور طبقات کے لیے قرضوں تک جامع اور مساوی رسائی کو ممکن بناتا ہے۔

پورٹل کے ساتھ اب تک 269 رکن قرض فراہم کرنے والے ادارے منسلک ہو چکے ہیں، جن میں شامل ہیں:

• 12 سرکاری شعبے کے بینک
• 20 نجی شعبے کے بینک
• 19 نان بینکنگ مالیاتی کمپنیاں (NBFCs)
• 28 علاقائی دیہی بینک
• 7 اسمال فنانس بینک
• 180 ضلعی مرکزی کوآپریٹو بینک (DCCBs)
• 2 شیڈولڈ ریاستی کوآپریٹو بینک
• 1 آل انڈیا مالیاتی ادارہ

آسان اور ڈیجیٹل درخواستی عمل

یہ پورٹل 24x7 دستیاب ہے اور درخواست دہندگان کو ایک آسان اور وقت کی بچت کرنے والا ڈیجیٹل درخواست کا تجربہ فراہم کرتا ہے۔

• چند بنیادی سوالات کے جواب دینے کے بعد پورٹل درخواست گزار کو اس کے لیے موزوں ترین اسکیم سے ہم آہنگ کر دیتا ہے۔
• پورٹل خودکار طور پر اہلیت کی جانچ کرتا ہے اور جدید ٹیکنالوجی کی مدد سے مطلوبہ معلومات بھی ازخود پُر کر دیتا ہے۔
• یہ اصولی منظوری (In-Principle Sanction) فراہم کرتا ہے اور اپنے خودکار بزنس رول انجن کے ذریعے درخواست اور متعلقہ دستاویزات منتخب بینک شاخ کو ارسال کر دیتا ہے۔
• پورٹل درخواست گزار کو ہر مرحلے پر پیش رفت سے آگاہ رکھتا ہے، جس سے بینک شاخوں کے بار بار جسمانی دوروں کی ضرورت کم ہو جاتی ہے۔
• مختلف سرکاری ڈیٹا بیسز کے ساتھ حقیقی وقت (ریئل ٹائم) میں جانچ پڑتال قرض کی کارروائی کو تیز تر بناتی ہے۔ اہم انضمامات میں لوکل گورنمنٹ ڈائریکٹری (LGD)، اُدیَم (UDYAM)، یونیک آئیڈینٹیفکیشن اتھارٹی آف انڈیا (UIDAI)، ایگری اسٹیک (AgriStack)، ڈی پی آئی آئی ٹی (DPIIT) کا اسٹارٹ اپ پورٹل اور لوکوس (LOKoS) شامل ہیں۔ ٹیکس سے متعلق ریکارڈ کے لیے سنٹرل بورڈ آف ڈائریکٹ ٹیکسز (CBDT) اور گڈز اینڈ سروسز ٹیکس (GST) کے نظام بھی منسلک ہیں۔ اس کے علاوہ مختلف ضابطہ کار اور غیر سرکاری ذرائع کو بھی پورٹل میں شامل کیا گیا ہے، جن میں نیشنل سیکیورٹیز ڈپازٹری لمیٹڈ (NSDL)، نیشنل ای-گورننس سروسز لمیٹڈ (NeSL)، سیبل (CIBIL)، نیشنل کریڈٹ گارنٹی ٹرسٹی کمپنی (NCGTC) اور کریڈٹ گارنٹی فنڈ ٹرسٹ فار مائیکرو اینڈ اسمال انٹرپرائزز (CGTMSE) وغیرہ شامل ہیں۔

پورٹل بینکوں کے بزنس کوریسپونڈنٹس اور معاون شراکت داروں کے ذریعے قرض کی درخواستیں جمع کرانے کے لیے معاونتی (Assisted) سہولت بھی فراہم کرتا ہے۔ اس تک ویب سائٹ اور موبائل ایپلی کیشن (اینڈرائیڈ اور آئی او ایس دونوں پر دستیاب) کے ذریعے رسائی حاصل کی جا سکتی ہے۔ مزید برآں، حقیقی وقت کی رپورٹس تک رسائی کے لیے ایک علیحدہ موبائل ایپ بھی دستیاب ہے۔

جن سمرتھ: وسعت اور اثرات

جن سمرتھ پورٹل کے اثرات نہ صرف بڑے پیمانے پر قرضوں کی فراہمی میں نمایاں ہیں بلکہ ان بے شمار کاروباری کامیابیوں میں بھی جھلکتے ہیں جنہیں اس پلیٹ فارم نے ملک بھر میں ممکن بنایا ہے۔

آغاز کے بعد سے یہ پورٹل ادارہ جاتی قرضوں تک رسائی کو وسعت دینے کے لیے ایک اہم ڈیجیٹل پلیٹ فارم کے طور پر ابھرا ہے۔ یکم جون 2026 تک پورٹل کے ذریعے تقریباً 54.10 لاکھ درخواستوں پر کارروائی کی جا چکی ہے، جن کی مجموعی مالیت 3,00,951 کروڑ روپے ہے۔ مزید برآں، بینکوں نے 49.55 لاکھ مستفیدین کو ڈیجیٹل منظوری فراہم کی ہے، جس میں 2,76,493.78 کروڑ روپے کی رقم شامل ہے۔ یہ اعداد و شمار مؤثر ڈیجیٹل قرضہ جاتی نظاموں پر بڑھتے ہوئے اعتماد کی عکاسی کرتے ہیں۔

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

جامع قرضہ جاتی نظام کی تشکیل

ایک واحد ونڈو ڈیجیٹل پلیٹ فارم کے طور پر تیار کیا گیا جن سمرتھ پورٹل مختلف نوعیت کی قرضہ جاتی ضروریات کو پورا کر رہا ہے۔ یہ پلیٹ فارم ایک مؤثر اور ٹیکنالوجی پر مبنی نظام کے ذریعے مختلف شعبوں میں نئے مواقع بھی پیدا کر رہا ہے۔ جن سمرتھ کاروباری افراد، کسانوں، چھوٹے کاروباروں اور روزگار کے متلاشیوں کو مختلف شعبوں میں معاونت فراہم کرتا ہے۔

طریقۂ کار کی پیچیدگیوں میں کمی اور رسائی میں بہتری کے ذریعے یہ پورٹل ملک بھر کے شہریوں کے لیے ادارہ جاتی قرضوں تک رسائی کو مزید آسان بنا رہا ہے۔ یہ اقدام متعلقہ سرکاری اسکیموں سے وابستہ تمام سرگرمیوں اور عمل کو ابتدا سے انتہا تک ایک مربوط نظام میں شامل کرنے کو بھی یقینی بناتا ہے۔

یہ حکومت کے ڈیجیٹل مالی شمولیت، مؤثر قرضہ جاتی فراہمی اور ہمہ گیر معاشی بااختیاری کے عزم کی عکاسی کرتا ہے، جس کے ذریعے زیادہ سے زیادہ شہریوں کو مالی مواقع سے مستفید ہونے کا موقع فراہم کیا جا رہا ہے۔

حوالہ جات

وزارت خزانہ

https://www.jansamarth.in/home

https://www.pib.gov.in/PressReleasePage.aspx?PRID=2247026&reg=3&lang=2

https://www.jansamarth.in/our-partners

https://www.jansamarth.in/home-loan-pradhan-mantri-awas-yojana-urban-2-0-scheme

جن سمرتھ پورٹل –YouTube

https://www.youtube.com/watch?v=WyFac4PmIYA

https://www.youtube.com/watch?v=YciXtGzjvsw

https://www.youtube.com/watch?v=U55E6ma4MIo

پی ڈی ایف دیکھنے کے لیے یہاں کلک کریں۔

 

****

ش ح۔ ک ا۔ م ذ

U.NO.8004

(रिलीज़ आईडी: 2269472) आगंतुक पटल : 6