কেন্দ্রগী অৱাং নোংপোক লমদম চাউখৎ থৌরাং মন্ত্রী (এম.দি.ও.এন.ই.আর.), শ্রী জ্যোতিরাদিত্য এম. সিন্দিয়ানা ঙসি অসমগী ইকাই খুম্নরবা মুখ্য মন্ত্রীগা লোয়ননা মিসন "সেনেহজোরি"  - অসম মুগা সিল্ক য়ু.এস.পি. হায়বা অসমগী অখন্নবা মুগা সিল্কপু মালেমগী অথোই অহেন তানরিবা ভেল্যু ৱাংবা লকজরি তেক্সতাইল ইকোসিস্তেম অমদা ওন্থোক্নবা পান্দম থম্লিবা মপুং ওইবা থৌরাং অমা হৌদোকখ্রে।

অসম সরকার, সেন্ত্রেল সিল্ক বোর্দ, তেক্সতাইল মন্ত্রালয় অমসুং অতৈ সেন্ত্রেল মন্ত্রালয়শিং/ওর্গানাইজেসনশিংগা খুৎশম্নদুনা এম.দি.ও.এন.ই.আর.না এঙ্কর তৌদুনা মিসন অসিনা মুগা সিল্ক ভেল্যু চেন অপুনবা মপাঙ্গল কনখৎহন্নবা হোস্ত-প্লান্ত কলচরিং অমসুং সিল্কৱর্ম সিদ প্রদক্সনদগী রিলিং, ৱিভিং, ব্রান্দিং, এক্সপোর্ত প্রমোসন, দিজিতেল ত্রেসএবিলিতী অমসুং তুরিজম ফাওবা হোৎনরি।

মালেমগী অমত্তা ঙাইরবা মহৌশাগী ওইবা গোল্দন সিল্ক অমসুং ভারতকী অহানবা জি.আই.-তেগ তৌরবা সিল্ক হায়না খঙনবা মুগা সিল্ক অসি অসমদা লৈবা চাউরাক্না লাক্ষ ২.৬ রোমগী ফার্মর অমসুং ৱিভরগী ইমুংশিংদা মতেং পাংলি। সেক্তর অসি য়াম্না তাঙনা ফংলবসু অমসুং মালেমগী ওইনা শকখঙনরবসু, মোনিতাইজ তৌবগী চাং অসি য়াম্না নেম্না লৈরি। মিসন সেনেহজোরিনা প্রিমিয়াম, ত্রেস তৌবা য়াবা অমসুং এক্সপোর্ত ওরিয়েন্তেদ মুগা সিল্ক ইকোনোমী অমা শেমদুনা ভেল্যু গেপ অসি কোকহন্নবা হোৎনরি।

মিসন অসিনা জোরহাৎ, শিবসাগর, লখিমপুর, ধেমাজি, দিব্রুগর, তিনসুকিয়া, মাজুলী অমসুং সুলকুচি য়াওনা মরুওইবা মুগা সিল্ক পুথোক্লিবা জিলাশিং অসি কোনশিন্দুনা ক্লস্তরদা য়ুম্ফম ওইবা থৌওং অমা পায়খৎলি। খোঙথাং অসিনা হোস্ত প্লান্ত ইকোলোজী মপাঙ্গল কনখৎহনবা, মোদর্ন রিলিং ইনফ্রাস্ত্রকচর শেম্বা, ফার্মর প্রদ্যুসর ওর্গনাইজেসনশিং (এফ.পি.ও.শিং), কমন ফেসিলিতী সেন্তরশিং (সি.এফ.সি.শিং) শেম্বা, জি.আই. ওথেন্তিকেসন চৎনহনবা অমসুং য়ুনিফাইদ ব্রান্দ আইদেন্তিতী "সেনেহজোরি"গী মখাদা মালেমগী কৈথেলগী খুদোংচাবশিং শেমগৎনবা পান্দম থম্লি।

এম.দি.ও.এন.ই.আর.গী কেন্দ্রগী মন্ত্রী শ্রী জ্যোতিরাদিত্য এম. সিন্দিয়ানা হায়খি মদুদি প্রধান মন্ত্রী শ্রী নরেন্দ্র মোদীগী লুচিং মখাদা, অৱাং নোংপোক লমদমগী তোপ তোপ্পা মপাঙ্গল অমসুং পোত্থোকশিংনা মালেমগী ওইনা শকখঙবা ফংহন্নবা অমসুং মফম অদুগী মীয়ামগীদমক তুং কোইনা হিংনবগী লম্বী শেমগৎনবা সরকারনা হোৎনরি। অসমগী মুগা সিল্ক অসি তেক্সতাইলগী পোত্থোক অমা খক্তা নত্তে, মসি ভারতকী কলচরেল অমসুং সিভিলাইজেস্নেল হেরিতেজ এসেত অমনি হায়না মহাক্না পনখি।

মন্ত্রীনা মিসন সেনেহজোরি অসি "গবর্নমেন্ত পুম্নমক্কী" ৱাখল্লোনদা নত্তনা "গবর্নমেন্ত পুম্নমক্কী" থৌওংগা লোয়ননা, কেন্দ্রগী মন্ত্রালয়শিং, অসম সরকার, তেক্নিকেল ইন্সতিত্যুসনশিং অমসুং প্রাইবেৎ সেক্তর পার্তনরশিংগা পুনশিন্নদুনা ৱাখল্লোন শেমখিবগী ৱাফম থমখি। চহী অহুমগী মতমগী মনুংদা লুপা করোর ৩৯৬ - ৪১১গী শেনফম থাদবা মিসন অসিদা এম.দি.ও.এন.ই.আর.দগী লুপা করোর ১৩৬ - ১৫১ য়াওরি। মিসন অসিগী পান্দমদি মালেমগী ওইনা শকখঙনরবা লুচিংবা মুগা সিল্ক ইকোসিস্তেম অমা শেমগৎপা, পোত্থোক পুথোক্লিবশিংগীদমক ভেল্যু রিয়েলিজেসন হেনগৎহনবা অমসুং সিল্কদা য়ুম্ফম ওইবা কলচরেল অমসুং এক্সপরিয়েন্সেল তুরিজমগীদমক অসমবু মকোক থোংবা মফম অমা ওইহন্নবা হোৎনবনি।

মহাক্না মখা তারদুনা হায়খি মদুদি মিসন অসিগী মাই পাকপা অসি ওথেন্তিক অসম মুগা সিল্কনা দোমেস্তিক অমসুং ইন্তরনেস্নেল লাকজরী মার্কেৎশিংদা প্রিমিয়ম সেল্ফ স্পেস ফংহন্দুনা রাজ্য অসিদা লৈরিবা ফার্মর অমসুং ৱিভরগী ইমুংশিংগী শেল য়াম্না হেনগৎহন্দুনা উৎলক্কনি। মহাক্না ইনফ্রাস্ত্রকচর দিবেলপমেন্ত, ব্রান্দিং, ক্বালিতী এশুরেন্স অমসুং এক্সপোর্ত ফেসিলিতীগী খুত্থাংদা মুগা সিল্ক ভেল্যু চেন মপুং ফানা মপাঙ্গল কনখৎহন্নবা সরকারগী অচেৎপা ফিরেপ অদু অমুক হন্না ফোংদোকখি।

মীয়াম তিনখিবা অদুদা ৱা ঙাংলদুনা শ্রী সিন্দিয়ানা ঙসিগী নুমিৎ অসি অসম অমসুং অৱাং নোংপোক লমদমগী ওইনা পুৱারী ওইরবা নুমিৎ অমনি হায়না ফোঙদোকখি। মহাক্না মিসন সেনেহজোরীগী ৱাখল্লোন অসি অশেংবা মওংদা মওং-মরিল তাখিবা অসি অশতলক্ষ্মী মহোতসব স্তোল অমদা অসামগী মুগা সিল্ক - ফ্যাব্রিক খক্তমক নত্তনা লোইশিনখ্রবা পোৎলমশিং - উৎখিবা অদু নিংশিংলদুনা মিসন অসিগী ইথিল পীখিবা অচেৎপা ইমোস্নেল বোন্দ অদু নীংশিংখি। মালেমগী মুগা সিল্ক পুথোকপগী চাদা ৯০দি অসামদা ওইরি অমসুং মসিগী সেক্তর অসিগী তোপ তোপ্পা মগুন - মহৌশাগী সনাগী মচু, অখন্নবা দুরএবিলিতী অমসুং জি.আই.-বেক তৌরবা ত্রেসএবিলিতী অসিনা মালেমগী থাক্তা লুচিংবা তেক্সতাইলশিংগী মরক্তা অসামগী মমীং লৈ হায়না মহাক্না ফোংদোকখি। লৌমীশিং অমসুং ইন্ত্রপ্রিনরশিংগী অখন্নবা হোৎনবশিং অসি লৈরবসু, ঙসিদি মোগা সিল্কতগী চহিদা প্রদ্যুসরশিংনা লুপা ১৮,০০০দগী ২১,০০০ খক্তমক ফংবা ঙম্লে হায়না মহাক্না পনখি। মিসন সেনেহজোরী অসি মসিগী ফিবম অসি অকনবা মওংদা ওন্থোক্নবা থৌরাং তৌবনি। মোগা সিল্ককী অপুনবা প্রিমিয়াম ভেল্যু অসি ফার্ম গেৎতগী মপানগী সমুদ্রাং ফাওবা চৎপা অমসুং খ্বাইদগী মরুওইনা, অসামগী ৱিভরশিং অমসুং ফার্মরশিংদা য়ৌহনবা হায়বা অরোইবা পান্দমগা লোয়ননা, মিসন অসিগী মখাদা লমজিং-লমতাক্লিবা ৱাখল্লোন অসি গবর্নমেন্ত পুম্নমক্কী, ভারত পুম্নমক্কী ওইবা মিৎয়েং অমনি হায়না মন্ত্রীনা ফোংদোকখি।

শ্রী সিন্দিয়ানা হায়খি, "অসামগী কোকোনশিংদগী মুগা সিল্কপু মালেমগী থাক্তা পুখৎনবা ভেল্যু চেনগী শরুক খুদিংমক পুন্না হোৎনমিন্নবা অমসুং মতেং পাংনবা ঐহাক্কী অচেৎপা ৱাফম্নি।"

অসমগী মুখ্য মন্ত্রীনা মিসন সেনেহজোরিগী ৱাখল্লোন অমসুং মতেং পীনবগীদমক এমদোনরবু থাগৎপা ফোংদোকখি। মহাক্না মসিবু অসমগী ত্রেদিস্নেল সিল্ক সেক্তরগীদমক লান্মী ওইরবা খোংথাং অমনি হায়না ফোঙদোকখি। মহাক্না হায়খি মদুদি মুগা সিল্ক অসি অসমগী কলচরেল আইদেন্তিতীগা য়াম্না মরী লৈনৈ অমসুং মিসন অসিনা লৌমীশিং, ফার্মরশিং, ৱিভরশিং, আর্তিসানশিং অমসুং ওন্ত্রপ্রিনরশিংদা অনৌবা খুদোংচাবশিং ফংহল্লগনি।

অৱাং-নোংপোক লমদমগী চাউখৎ-থৌরাংগীদমক ভারত সরকারনা মমাংদা অমুক্তা ওইখিদ্রিবা মওংদা অৱাং-নোংপোক লমদমগীদমক হোৎনরি হায়না অৱাং-নোংপোক লমদমগী চাউখৎ-থৌরাং রাজ্য মন্ত্রী শ্রী দোক্তর.  সুকান্তা মজুমদারনা হায়খি। মহাক্না মিসন সেনেহজোরীবু ত্রান্সফোর্মেতিব ইনিসিয়েতিব অমা ওইনা শন্দোক্না তাকখি। মসিনা অসমবু মালেমগী ওইনা প্রিমিয়ম সিল্ক পুথোকপগী সেন্তর অমা ওইনা শকখঙহনগনি। মসিনা থবক ফংহনগনি, এন্ত্রিপ্রেন্যুওরশিপ পুক্নিং থৌগৎকনি অমসুং খুঙ্গংগী পুন্সি মহিং লেপথোকপদা মতেং পাংগনি।

এম.দি.ও.এন.ই.আর.গী সেক্রেতরী শ্রী সঞ্জয় জাজুনা মিসন অসি ইমপ্লিমেন্ত তৌবগী ফ্রেমৱার্ক অদু শন্দোক্না তাকখি অমসুং মালেমদা অশেংবা মুগা সিল্ক পুথোক্লিবা অসমগী তোপ তোপ্পা খুদোংচাবা অদু পনখি। মহাক্না হায়খি মদুদি মিসন অসিনা হোস্ত-প্লান্ত রিজেনেরেসন মপাঙ্গল কনখৎহনবা, সিদ সেক্যুরিতী ফগৎহনবা, রীলিং ইনফ্রাস্ত্রকচর মোদর্নাইজ তৌবা, জি.আই. ওথেন্তিকেসন প্রমোৎ তৌবা, দিজিতেল ত্রেসএবিলিতী সিস্তেমশিং শেম্বা অমসুং ব্রেন্দিং অমসুং এক্সপোর্তকী থোংদা কৈথেলগী এক্সেস হেঙ্গৎহনবদা মিৎয়েং থমগনি।

মিসন অসিনা ২০২৮ ফাওবদা মরুওইবা ফল কয়া ফংনবা পান্দম থম্লি। মসিগী মনুংদা মোদর্নাইজেদ মুগা রিলিং য়ুনিৎ মঙা অমসুং মুগা স্পুন মিল অমা লিংখৎপা, এফ.পি.ও. ৩০ অমসুং ফার্মর ইন্তরেস্ত গ্রুপ ১,১৮০ হেন্না শেম্বা, সোম অমসুং সোলু হোস্ত প্লান্তশিংগী হেক্তর ৫,০০০ অমুক হন্না শেমগৎপা, জি.আই. লিঙ্ক তৌরবা সিস্তেমশিংগী খুত্থাংদা ত্রেদ তৌরিবা মুগা সিল্ককী চাদা ৮০ হেন্না ওথেন্তিকেসন তৌবা, ইমুং ৮,০০০ হেনবদা দিজিতেল ত্রেসএবিলিতী মেকানিজম শেম্বা অমসুং মুগা সিল্ক এক্সপোর্ত অসি চহিগী ওইনা কিলোগ্রাম ২,০০০ হেনবা হেনগৎহনবা য়াওরি।

মিসন সেনেহজোরিনা মুগা সিল্ক ত্রেল অমা শেমগৎপা, সিল্ক তুরিজম পার্ক অমা লিংখৎপা অমসুং চহিগী ওইনা মুগা উৎসব ফেস্তিবেলশিং পাংথোক্তুনা অসমবু সিল্ক হেরিতেজ তুরিজমগী মরুওইবা মফম অমা ওইহন্দুনা কলচরেল ইকোনোমীদা খুমাং চাউশিলহন্নবা হোৎনরি।

হৌদোকপগী থৌরম অদুদা ভারত সরকার, অসম সরকার, সেন্ত্রেল সিল্ক বোর্দ, তেক্সতাইল অমসুং সেরিকলচর ইন্সতিত্যুসনশিংগী মকোক থোংবা ওফিসিএলশিং, প্রদ্যুসর ওর্গনাইজেসনশিংগী মীহুৎশিং, ৱিভরশিং, ইন্ত্রপ্রিনরশিং অমসুং মুগা সিল্ক ভেল্যু চেনগা মরী লৈনবা অতোপ্পা স্তেকহোল্দরশিংগা লোয়ননা তেক্সতাইলগী রাজ্য মন্ত্রী শ্রী পবিত্রা মার্গেরিতাসু শরুক য়াখি।

 ***