ಸೇವೆಯ ಗುಣಮಟ್ಟವನ್ನು ಹೆಚ್ಚಿಸಲು ಮತ್ತು ರೋಗಿಗಳ ಅವಶ್ಯಕತೆಗನುಗುಣವಾಗಿ ಆರೋಗ್ಯ ವಿತರಣೆಯನ್ನು ಖಚಿತಪಡಿಸಿಕೊಳ್ಳಲು ಒಂದು ಮಹತ್ವದ ಹೆಜ್ಜೆಯಾಗಿ, ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯದ ಅಡಿಯಲ್ಲಿ ಬರುವ ಉದ್ಯೋಗಿಗಳ ರಾಜ್ಯ ವಿಮಾ ನಿಗಮವು (ಇಎಸ್ ಐ ಸಿ), ದೇಶಾದ್ಯಂತ ಇರುವ ತನ್ನ ಎಲ್ಲಾ ಆಸ್ಪತ್ರೆಗಳು ಮತ್ತು ಚಿಕಿತ್ಸಾಲಯಗಳಲ್ಲಿ ಸಮಗ್ರ 'ಕೇಂದ್ರೀಕೃತ ಆನ್ ಲೈನ್ ರೋಗಿಗಳ ಪ್ರತಿಕ್ರಿಯೆ ವ್ಯವಸ್ಥೆ'ಯನ್ನು ಯಶಸ್ವಿಯಾಗಿ ಜಾರಿಗೆ ತಂದಿದೆ.

ಈ ಡಿಜಿಟಲ್ ಉಪಕ್ರಮವು ವಿಮೆದಾರರು (ಐಪಿ) ಮತ್ತು ಫಲಾನುಭವಿಗಳು ತಮ್ಮ ಆರೋಗ್ಯ ರಕ್ಷಣೆಯ ಅನುಭವಗಳನ್ನು ಸರಾಗವಾಗಿ ಹಂಚಿಕೊಳ್ಳಲು, ನಿರ್ದಿಷ್ಟ ಕಾಳಜಿಗಳನ್ನು ವ್ಯಕ್ತಪಡಿಸಲು ಮತ್ತು ಸಾಂಸ್ಥಿಕ ಸುಧಾರಣೆಗಾಗಿ ಕಾರ್ಯಸಾಧ್ಯವಾದ ಸಲಹೆಗಳನ್ನು ನೀಡಲು ಸಬಲೀಕರಣಗೊಳಿಸುತ್ತದೆ. ಈ ವೇದಿಕೆಯನ್ನು ನಿರ್ಣಾಯಕ ಸೇವಾ ನಿಯತಾಂಕಗಳಾದ ಸೌಲಭ್ಯದ ಸ್ವಚ್ಛತೆ, ವೈದ್ಯಕೀಯ ಸಿಬ್ಬಂದಿಯ ನಡವಳಿಕೆ ಮತ್ತು ಅಗತ್ಯ ಔಷಧಿಗಳ ಲಭ್ಯತೆಯ ಕುರಿತು ನೇರ ನಾಗರಿಕ ಪ್ರತಿಕ್ರಿಯೆಯನ್ನು ಪಡೆಯಲು ವಿನ್ಯಾಸಗೊಳಿಸಲಾಗಿದೆ.

ಸುಲಭ ಲಭ್ಯತೆ ಮತ್ತು ಬಹುಭಾಷಾ ಬೆಂಬಲ

ವ್ಯಾಪಕ ಭಾಗವಹಿಸುವಿಕೆ ಮತ್ತು ಸಂಪೂರ್ಣ ಸುಲಭ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳಲು, ಈ ವ್ಯವಸ್ಥೆಯು ಫಲಾನುಭವಿಗಳಿಗೆ ಬಹು ಪ್ರತಿಕ್ರಿಯೆ ಮಾಧ್ಯಮಗಳನ್ನು ನೀಡುತ್ತದೆ:

• ಸ್ವಯಂಚಾಲಿತ ಎಸ್ ಎಂ ಎಸ್ ಲಿಂಕ್ ಗಳು:  ಫಲಾನುಭವಿಗಳು ಇಎಸ್ ಐಸಿ ಎಚ್ ಐಎಸ್ (ಧನ್ವಂತ್ರಿ) ಮಾಡ್ಯೂಲ್ ಮೂಲಕ ಸೇವೆಗಳನ್ನು ಪಡೆದ ತಕ್ಷಣ, ಅವರ ಮೊಬೈಲ್ ಗೆ ನೇರ ಪ್ರತಿಕ್ರಿಯೆಯ ಲಿಂಕ್ ಅನ್ನು ಎಸ್ ಎಂ ಎಸ್ ಮೂಲಕ ಕಳುಹಿಸಲಾಗುತ್ತದೆ.
• ಸ್ಥಳದಲ್ಲೇ ಕ್ಯೂಆರ್ ಕೋಡ್ ಗಳು: ಎಲ್ಲಾ ಒಪಿಡಿ  ಮತ್ತು ಆಸ್ಪತ್ರೆಯ ಪ್ರಮುಖ ಸ್ಥಳಗಳಲ್ಲಿ ಪ್ರದರ್ಶಿಸಲಾದ ಅಗತ್ಯಕ್ಕೆ ತಕ್ಕನಾದ, ಬಹುಭಾಷಾ ಪೋಸ್ಟರ್ ಗಳಲ್ಲಿನ ಕ್ಯೂಆರ್ ಕೋಡ್ ಗಳನ್ನು ಸ್ಕ್ಯಾನ್ ಮಾಡುವ ಮೂಲಕ ಫಲಾನುಭವಿಗಳು ತಮ್ಮ ಪ್ರತಿಕ್ರಿಯೆಯನ್ನು ತ್ವರಿತವಾಗಿ ಹಂಚಿಕೊಳ್ಳಬಹುದು.
• ವೆಬ್ ಪೋರ್ಟಲ್: ಇಎಸ್ ಐಸಿಯ ಅಧಿಕೃತ ಜಾಲತಾಣದ ಮೂಲಕವೂ ಪ್ರತಿಕ್ರಿಯೆಯನ್ನು ನೇರವಾಗಿ ಸಲ್ಲಿಸಬಹುದು.

ಬಳಕೆದಾರ ಸ್ನೇಹಿ ಇಂಟರ್ ಫೇಸ್ ಹೊಂದಿರುವ ಈ ವ್ಯವಸ್ಥೆಯಲ್ಲಿ, ರೋಗಿಗಳು ತಮ್ಮ ಮೊಬೈಲ್ಗಳನ್ನು ಬಳಸಿ ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡಿ, ತಮ್ಮ ಐಪಿ  ಸಂಖ್ಯೆಯನ್ನು ನಮೂದಿಸಿ, ತಮ್ಮ ಅನುಭವವನ್ನು ರೇಟಿಂಗ್ ಮಾಡುವ ಮೂಲಕ ಕೇವಲ ಕೆಲವು ಸೆಕೆಂಡುಗಳಲ್ಲಿ ಪ್ರತಿಕ್ರಿಯೆಯನ್ನು ಸಲ್ಲಿಸಬೇಕು.

ಪಾರದರ್ಶಕತೆ ಮತ್ತು ಹೊಣೆಗಾರಿಕೆಗಾಗಿ ದೃಢವಾದ ತಂತ್ರಜ್ಞಾನ

ಪ್ರತಿಕ್ರಿಯೆ ಕಾರ್ಯವಿಧಾನದ ದೃಢೀಕರಣವನ್ನು ಖಚಿತಪಡಿಸಿಕೊಳ್ಳಲು, ಈ ವ್ಯವಸ್ಥೆಯು ಒಟಿಪಿ   ಪರಿಶೀಲನಾ ಪ್ರಕ್ರಿಯೆಯ ಮೂಲಕ ಐಪಿ ವಿವರಗಳ ನೈಜ ಸಮಯದ ಮೌಲ್ಯೀಕರಣವನ್ನು ಹೊಂದಿದೆ ಮತ್ತು ನಕಲಿ ಪ್ರತಿಕ್ರಿಯೆಗಳನ್ನು ತಡೆಯಲು ಕಟ್ಟುನಿಟ್ಟಾದ ವ್ಯವಸ್ಥೆಯನ್ನು ಹೊಂದಿದೆ. ಇದಲ್ಲದೆ, ಭಾರತದ ವೈವಿಧ್ಯಮಯ ಉದ್ಯೋಗಿಗಳಿಗೆ ಪರಿಣಾಮಕಾರಿಯಾಗಿ ಸೇವೆ ಸಲ್ಲಿಸಲು ಈ ಪ್ರತಿಕ್ರಿಯೆ ವೇದಿಕೆಯು ಸಮಗ್ರ ಬಹುಭಾಷಾ ಬೆಂಬಲವನ್ನು ಒದಗಿಸುತ್ತದೆ.

ಶ್ರೇಣೀಕೃತ ಮೇಲ್ವಿಚಾರಣೆ ಮತ್ತು ತ್ವರಿತ ಕುಂದುಕೊರತೆ ನಿವಾರಣೆ

ರೋಗಿಗಳ ಪ್ರತಿಕ್ರಿಯೆಯನ್ನು ತಕ್ಷಣದ ಆಡಳಿತಾತ್ಮಕ ಕ್ರಮವಾಗಿ ಪರಿವರ್ತಿಸಲು, ಈ ವ್ಯವಸ್ಥೆಯು ಬಲವಾದ, ಪಾತ್ರ ಆಧಾರಿತ ಡಿಜಿಟಲ್ ಡ್ಯಾಶ್ ಬೋರ್ಡ್ ಗಳನ್ನು ಒಳಗೊಂಡಿದೆ. ಇದು ಮೂರು ವಿಭಿನ್ನ ಆಡಳಿತಾತ್ಮಕ ಹಂತಗಳಲ್ಲಿ ನಿರಂತರ, ನೈಜ-ಸಮಯದ ಕಾರ್ಯಕ್ಷಮತೆಯ ಮೇಲ್ವಿಚಾರಣೆಯನ್ನು ಸಕ್ರಿಯಗೊಳಿಸುತ್ತದೆ:

• ಪ್ರಧಾನ ಕಚೇರಿ ಮಟ್ಟ
• ಪ್ರಾದೇಶಿಕ ಕಚೇರಿಗಳ ಮಟ್ಟ
• ಸ್ಥಳೀಯ ಇಎಸ್ಐ ಆರೋಗ್ಯ ಕೇಂದ್ರಗಳ ಮಟ್ಟ 

ಮುಖ್ಯವಾಗಿ, 3 ಕ್ಕಿಂತ ಕಡಿಮೆ ಇರುವ ಯಾವುದೇ ಸೇವಾ ರೇಟಿಂಗ್ ಗಳನ್ನು ಸ್ವಯಂಚಾಲಿತವಾಗಿ ಗುರುತಿಸುವ ಮೂಲಕ ಗಂಭೀರ ಸಮಸ್ಯೆಗಳನ್ನು ಪತ್ತೆಹಚ್ಚಲು ಈ ವ್ಯವಸ್ಥೆಯನ್ನು ಸಿದ್ಧಪಡಿಸಲಾಗಿದೆ. ಈ ಸ್ವಯಂಚಾಲಿತ ಎಚ್ಚರಿಕೆ ಕಾರ್ಯವಿಧಾನವು ಸಂಬಂಧಪಟ್ಟ ಅಧಿಕಾರಿಗಳು ಸಕಾಲಿಕ ಮತ್ತು ಉದ್ದೇಶಿತ ಸರಿಪಡಿಸುವ ಕ್ರಮಗಳನ್ನು ತೆಗೆದುಕೊಳ್ಳುವುದನ್ನು ಖಚಿತಪಡಿಸುತ್ತದೆ. ಹೆಚ್ಚುವರಿಯಾಗಿ, ಈ ವೇದಿಕೆಯು ಎಲ್ಲಾ ಆರೋಗ್ಯ ಸೌಲಭ್ಯಗಳ ಕಾರ್ಯಕ್ಷಮತೆಯ ಶ್ರೇಯಾಂಕವನ್ನು  ಬೆಂಬಲಿಸುತ್ತದೆ, ಆ ಮೂಲಕ ನಿರಂತರ ಸುಧಾರಣೆ, ಆರೋಗ್ಯಕರ ಸ್ಪರ್ಧೆ ಮತ್ತು ಕಟ್ಟುನಿಟ್ಟಾದ ಸಾಂಸ್ಥಿಕ ಹೊಣೆಗಾರಿಕೆಯ ಸಂಸ್ಕೃತಿಯನ್ನು ಉತ್ತೇಜಿಸುತ್ತದೆ.

ದೇಶದ ಕಾರ್ಮಿಕ ವರ್ಗಕ್ಕೆ ತನ್ನ ಪ್ರಮುಖ ಧ್ಯೇಯವನ್ನು ಪುನರುಚ್ಚರಿಸುತ್ತಾ ಈ ಉಪಕ್ರಮವು, "ಇಎಸ್ ಐಸಿ – ಉತ್ತಮ ಆರೋಗ್ಯ ಸೇವೆಗೆ ಬದ್ಧವಾಗಿದೆ" ಎನ್ನುವ ಧ್ಯೇಯೋದ್ದೇಶವನ್ನು ಕಾರ್ಯರೂಪದಲ್ಲಿ ತರುವ ಮೂಲಕ ಇಎಸ್ಐಸಿಯ ಸಮರ್ಪಣಾ ಮನೋಭಾವಕ್ಕೆ ಸಾಕ್ಷಿಯಾಗಿದೆ.

*****