ನವದೆಹಲಿಯ ಪುಸಾದಲ್ಲಿ ನಡೆದ ರಾಷ್ಟ್ರೀಯ ಕೃಷಿ ಸಮ್ಮೇಳನ - ಖಾರಿಫ್ ಅಭಿಯಾನ 2026 ಇದರ ಎರಡನೇ ದಿನದಂದು, ಕೇಂದ್ರ ಕೃಷಿ ಮತ್ತು ರೈತರ ಕಲ್ಯಾಣ ಮತ್ತು ಗ್ರಾಮೀಣಾಭಿವೃದ್ಧಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಭಾರತೀಯ ಕೃಷಿಯ ಸಮಗ್ರ ಅಭಿವೃದ್ಧಿಯ ಕುರಿತು ರಾಜ್ಯ ಕೃಷಿ ಸಚಿವರು, ಹಿರಿಯ ಅಧಿಕಾರಿಗಳು, ವಿಜ್ಞಾನಿಗಳು ಮತ್ತು ಪ್ರಗತಿಪರ ರೈತರೊಂದಿಗೆ ಸಮಗ್ರ ಚರ್ಚೆಗಳನ್ನು ನಡೆಸಿದರು. ಕೃಷಿ ಬೆಳವಣಿಗೆಯನ್ನು ವೇಗಗೊಳಿಸಲು ಈಗ ನೀತಿ, ನಾವೀನ್ಯತೆ ಮತ್ತು ಬದ್ಧತೆಯಿಂದ ನಡೆಸಲ್ಪಡುವ ಸಮಯಕ್ಕೆ ಅನುಗುಣವಾಗಿ, ಫಲಿತಾಂಶ-ಆಧಾರಿತ ಮತ್ತು ರೈತ-ಕೇಂದ್ರಿತ ಕ್ರಮದ ಅಗತ್ಯವಿದೆ. ರಾಜ್ಯ ಕೃಷಿ ಸಚಿವರುಗಳ ಉತ್ತಮ ರೀತಿಯ ಸ್ಪಂದನೆ ಹಾಗೂ  ಭಾಗವಹಿಸುವಿಕೆಯು ಸಮ್ಮೇಳನವನ್ನು ಕೃಷಿ ಪ್ರಗತಿಗಾಗಿ ಪ್ರಬಲ 'ಟೀಮ್ ಇಂಡಿಯಾ' ವೇದಿಕೆಯಾಗಿ ಪರಿವರ್ತಿಸಿದೆ ಎಂದು ಅವರು ಹೇಳಿದರು. 

ಭಾರತ ಸರ್ಕಾರದ ಕೃಷಿ ಮತ್ತು ರೈತ ಕಲ್ಯಾಣ ಇಲಾಖೆ ಆಯೋಜಿಸಿದ್ದ ಈ ಸಮ್ಮೇಳನದ ಎರಡನೇ ದಿನದಲ್ಲಿ ದೇಶಾದ್ಯಂತದ ಕೃಷಿ ಸಚಿವರು, ಹಿರಿಯ ಕೃಷಿ ಅಧಿಕಾರಿಗಳು, ವಿಜ್ಞಾನಿಗಳು ಮತ್ತು ಪ್ರಗತಿಪರ ರೈತರು ಭಾಗವಹಿಸಿದ್ದರು. ಕೇಂದ್ರ ಕೃಷಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಸಮ್ಮೇಳನದಲ್ಲಿ ಕೇಂದ್ರ ಕೃಷಿ ಮತ್ತು ರೈತ ಕಲ್ಯಾಣ ರಾಜ್ಯ ಸಚಿವರುಗಳಾದ ಶ್ರೀ ರಾಮನಾಥ್ ಠಾಕೂರ್ ಮತ್ತು ಶ್ರೀ ಭಾಗೀರಥ ಚೌಧರಿ ಭಾಗವಹಿಸಿದ್ದರು. ಒಡಿಶಾ ಉಪಮುಖ್ಯಮಂತ್ರಿ ಮತ್ತು ಕೃಷಿ ಸಚಿವರಾದ ಶ್ರೀ ಕನಕ್ ವರ್ಧನ್ ಸಿಂಗ್ ದೇವ್; ಉತ್ತರ ಪ್ರದೇಶದ ಕೃಷಿ ಸಚಿವರಾದ ಶ್ರೀ ಸೂರ್ಯ ಪ್ರತಾಪ್ ಶಾಹಿ; ಬಿಹಾರ ಕೃಷಿ ಸಚಿವರಾದ ಶ್ರೀ ವಿಜಯ್ ಕುಮಾರ್ ಸಿನ್ಹಾ; ರಾಜಸ್ಥಾನ ಕೃಷಿ ಸಚಿವರಾದ ಶ್ರೀ ಕಿರೋರಿ ಲಾಲ್ ಮೀನಾ; ಮಹಾರಾಷ್ಟ್ರ ಸಚಿವರಾದ ಶ್ರೀ ಜಯಪ್ರಕಾಶ್ ಜಯಕುಮಾರ್ ರಾವಲ್; ಮಧ್ಯಪ್ರದೇಶ ಕೃಷಿ ಸಚಿವರಾದ ಶ್ರೀ ಎಡಲ್ ಸಿಂಗ್ ಕನ್ಸಾನ; ಛತ್ತೀಸ್ಗಢ ಕೃಷಿ ಸಚಿವರಾದ ಶ್ರೀ ರಾಮವಿಚಾರ್ ನೇತಮ್; ಗುಜರಾತ್ ಕೃಷಿ ಸಚಿವರಾದ ಶ್ರೀ ಜಿತುಭಾಯಿ ಸಾವ್ಜಿಭಾಯಿ ವಘಾನಿ; ತಮಿಳುನಾಡು ಕೃಷಿ ಸಚಿವರಾದ ಶ್ರೀ ಆರ್. ವಿನೋದ್; ಹರಿಯಾಣ ಕೃಷಿ ಸಚಿವರಾದ ಶ್ರೀ ಶ್ಯಾಮ್ ಸಿಂಗ್ ರಾಣಾ; ಅರುಣಾಚಲ ಪ್ರದೇಶದ ಕೃಷಿ ಸಚಿವರಾದ ಶ್ರೀ ಗೇಬ್ರಿಯಲ್ ಡಿ. ವಾಂಗ್ಸು; ಮೇಘಾಲಯ ಕೃಷಿ ಸಚಿವರಾದ ಶ್ರೀ ಅಂಪರಿನ್ ಲಿಂಗ್ಡೋ; ಮಿಜೋರಾಂ ಕೃಷಿ ಸಚಿವರಾದ ಶ್ರೀ ಪಿ. ಸಿ. ವನ್ಲಾಲ್ರುವಾಟಾ; ತ್ರಿಪುರ ಕೃಷಿ ಸಚಿವರಾದ ಶ್ರೀ ರತನ್ ಲಾಲ್ ನಾಥ್; ಸಿಕ್ಕಿಂ ಕೃಷಿ ಸಚಿವರಾದ ಶ್ರೀ ಪುರಣ್ ಕುಮಾರ್ ಗುರುಂಗ್; ಪಶ್ಚಿಮ ಬಂಗಾಳ ಸಚಿವರಾದ ಶ್ರೀ ಅಶೋಕ್ ಕೀರ್ತಾನಿಯಾ; ಮತ್ತು ಅಸ್ಸಾಂ ಪಂಚಾಯತ್ ರಾಜ್ ಮತ್ತು ಗ್ರಾಮೀಣಾಭಿವೃದ್ಧಿ ಸಚಿವರಾದ ಶ್ರೀ ಅತುಲ್ ಬೋರಾ ಭಾಗವಹಿಸಿದ್ದರು. ಹಾಗೂ, ಕೇಂದ್ರ ಕೃಷಿ ಕಾರ್ಯದರ್ಶಿ ಶ್ರೀ ಅತಿಶ್ ಚಂದ್ರ, ಐಸಿಎಆರ್ ಮಹಾನಿರ್ದೇಶಕ ಡಾ. ಎಂ. ಎಲ್. ಜಾಟ್ ಮತ್ತು ವಿವಿಧ ರಾಜ್ಯಗಳ ಹಿರಿಯ ಅಧಿಕಾರಿಗಳು ಸಹ ವ್ಯಾಪಕ ಚರ್ಚೆಗಳಲ್ಲಿ ಭಾಗವಹಿಸಿದ್ದರು.

ಜನರನ್ನು ಉದ್ದೇಶಿಸಿ ಮಾತನಾಡಿದ ಕೇಂದ್ರ ಕೃಷಿ ಮತ್ತು ರೈತರ ಕಲ್ಯಾಣ ಮತ್ತು ಗ್ರಾಮೀಣಾಭಿವೃದ್ಧಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು, ಸಮ್ಮೇಳನವನ್ನು 'ಭಾರತದ ಕೃಷಿ ತಂಡ'ದ ಐತಿಹಾಸಿಕ ಸಭೆ ಎಂದು ಬಣ್ಣಿಸಿದರು. ಸಮ್ಮೇಳನ ಸಭಾಂಗಣವು 'ಮಿನಿ ಇಂಡಿಯಾ'ದ ಉತ್ಸಾಹವನ್ನು ಪ್ರತಿಬಿಂಬಿಸುತ್ತದೆ, ರಾಷ್ಟ್ರೀಯ ಹಿತಾಸಕ್ತಿ, ರೈತರ ಕಲ್ಯಾಣ ಮತ್ತು ಕೃಷಿ ಅಭಿವೃದ್ಧಿಗಾಗಿ ಸಾಮೂಹಿಕವಾಗಿ ಕೆಲಸ ಮಾಡುವ ಸಾಮಾನ್ಯ ಸಂಕಲ್ಪದೊಂದಿಗೆ ಒಗ್ಗೂಡಿದೆ ಎಂದು ಅವರು ಹೇಳಿದರು. ನಾಯಕತ್ವದ ಮಹತ್ವವನ್ನು ಒತ್ತಿ ಹೇಳಿದ ಸಚಿವರು, ವೈಯಕ್ತಿಕವಾಗಿ ಉಪಕ್ರಮಗಳನ್ನು ಮುನ್ನಡೆಸಿದಾಗ, ಹೆಚ್ಚಿನ ವೇಗ, ಗಂಭೀರತೆ ಮತ್ತು ಸ್ಪಷ್ಟ ಫಲಿತಾಂಶಗಳು ಗೋಚರಿಸುತ್ತವೆ ಎಂದು ಹೇಳಿದರು.

ಭಾರತ ಆಹಾರ ಧಾನ್ಯ ಉತ್ಪಾದನೆಯಲ್ಲಿ ಅಭೂತಪೂರ್ವ ಯಶಸ್ಸನ್ನು ಸಾಧಿಸಿದೆ ಎಂದು ಕೇಂದ್ರ ಕೃಷಿ ಮತ್ತು ರೈತರ ಕಲ್ಯಾಣ ಮತ್ತು ಗ್ರಾಮೀಣಾಭಿವೃದ್ಧಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಹೇಳಿದರು. ಮೂರನೇ ಮುಂಗಡ ಅಂದಾಜಿನ ಪ್ರಕಾರ, ದೇಶದ ಒಟ್ಟು ಆಹಾರ ಧಾನ್ಯ ಉತ್ಪಾದನೆಯು ಸುಮಾರು 376.563 ಮಿಲಿಯನ್ ಟನ್ಗಳನ್ನು ತಲುಪಿದೆ, ಇದು ಇದುವರೆಗೆ ದಾಖಲಾದ ಅತ್ಯಧಿಕವಾಗಿದೆ. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ನಾಯಕತ್ವ, ರೈತರ ಕಠಿಣ ಪರಿಶ್ರಮ, ವೈಜ್ಞಾನಿಕ ಸಂಶೋಧನೆ ಮತ್ತು ರಾಜ್ಯಗಳ ಸಕ್ರಿಯ ಸಹಕಾರದಿಂದಾಗಿ ಈ ಸಾಧನೆ ಸಾಧ್ಯವಾಗಿದೆ. ಭಾರತವು ಅಕ್ಕಿ ಉತ್ಪಾದನೆಯಲ್ಲಿ ವಿಶ್ವ ನಾಯಕನಾಗಿ ಹೊರಹೊಮ್ಮಿದೆ ಮತ್ತು ಗೋಧಿ, ಜೋಳ, ದ್ವಿದಳ ಧಾನ್ಯಗಳು ಮತ್ತು ಎಣ್ಣೆಬೀಜಗಳ ಉತ್ಪಾದನೆಯಲ್ಲಿ ಗಣನೀಯ ಪ್ರಗತಿ ಸಾಧಿಸಲಾಗಿದೆ ಎಂದು ಅವರು ಹೆಮ್ಮೆಯಿಂದ ಹೇಳಿದರು.

ಈ ಸಾಧನೆಗಳು ಮಹತ್ವದ್ದಾಗಿದೆ ಎಂದು ಕೇಂದ್ರ ಕೃಷಿ ಮತ್ತು ರೈತರ ಕಲ್ಯಾಣ ಮತ್ತು ಗ್ರಾಮೀಣಾಭಿವೃದ್ಧಿ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಹೇಳಿದರು. ಭಾರತವು ಆಹಾರ ಭದ್ರತೆಯನ್ನು ಮತ್ತಷ್ಟು ಬಲಪಡಿಸಬೇಕು, ರೈತರ ಆದಾಯವನ್ನು ಹೆಚ್ಚಿಸಬೇಕು, ಕೃಷಿಯನ್ನು ಹೆಚ್ಚು ಲಾಭದಾಯಕವಾಗಿಸಬೇಕು ಮತ್ತು ಪೌಷ್ಠಿಕಾಂಶ ಭದ್ರತೆಗೆ ಸಮಾನ ಪ್ರಾಮುಖ್ಯತೆಯನ್ನು ನೀಡಬೇಕು. ಕೃಷಿಯು ಕೇವಲ ಉತ್ಪಾದನೆಯ ಬಗ್ಗೆ ಅಲ್ಲ, ಆದರೆ ರಾಷ್ಟ್ರದ ಜೀವನಾಡಿಯಾಗಿದೆ ಮತ್ತು ಆದ್ದರಿಂದ ಕೃಷಿ ವಲಯದೊಂದಿಗೆ ಸಂಬಂಧ ಹೊಂದಿರುವ ಪ್ರತಿಯೊಬ್ಬರೂ ಮಿಷನ್ ಮೋಡ್ ನಲ್ಲಿ ಕೆಲಸ ಮಾಡಬೇಕು ಎಂದು ಅವರು ಹೇಳಿದರು.

ಸಮ್ಮೇಳನದ ಸಂದರ್ಭದಲ್ಲಿ, ರಾಜ್ಯಗಳು ದ್ವಿದಳ ಧಾನ್ಯಗಳ ಮಿಷನ್, ಎಣ್ಣೆಬೀಜಗಳ ಮಿಷನ್, ಹತ್ತಿ ಮಿಷನ್ ಮತ್ತು ಇತರ ಪ್ರಮುಖ ಕೃಷಿ ಅಭಿಯಾನಗಳ ಅನುಷ್ಠಾನವನ್ನು ವೈಯಕ್ತಿಕವಾಗಿ ಪರಿಶೀಲಿಸಬೇಕೆಂದು ಕೇಂದ್ರ ಸಚಿವರು ಒತ್ತಾಯಿಸಿದರು. ರೈತರ ಅಗತ್ಯಗಳಿಗೆ ಅನುಗುಣವಾಗಿ ವೇಗವಾದ, ಪ್ರಾಯೋಗಿಕ ಮತ್ತು ಬೇಡಿಕೆ ಆಧಾರಿತ ಸಂಶೋಧನೆಯನ್ನು ಕೈಗೊಳ್ಳುವಂತೆ ವಿಜ್ಞಾನಿಗಳಿಗೆ ಕೇಂದ್ರ ಸಚಿವರು ಕರೆ ನೀಡಿದರು. ಹಾಗೂ, ಅಲ್ಪಾವಧಿಯ ಮತ್ತು ಹೆಚ್ಚು ಸೂಕ್ತವಾದ ಬೆಳೆ ಪ್ರಭೇದಗಳನ್ನು, ವಿಶೇಷವಾಗಿ ತೊಗರಿ, ಸೋಯಾಬೀನ್ ಮತ್ತು ಎಣ್ಣೆಬೀಜ ಬೆಳೆಗಳಿಗೆ ಅಭಿವೃದ್ಧಿಪಡಿಸುವತ್ತ ಸಭೆಯಲ್ಲಿ ವಿಶೇಷ ಒತ್ತು ನೀಡಲಾಯಿತು.

ಬೀಜ ಲಭ್ಯತೆಯ ವಿಷಯದ ಬಗ್ಗೆ, ಕೇಂದ್ರ ಸಚಿವರಾದ ಶ್ರೀ ಚೌಹಾಣ್ ಅವರು ದೃಢ ಮತ್ತು ಗಂಭೀರ ನಿಲುವನ್ನು ಅಳವಡಿಸಿಕೊಂಡರು. ಕೃಷಿ ಉತ್ಪಾದಕತೆಗೆ ಗುಣಮಟ್ಟದ ಬೀಜವು ಮೊದಲ ಮತ್ತು ಅತ್ಯಂತ ಅಗತ್ಯವಾದ ಅವಶ್ಯಕತೆಯಾಗಿದೆ ಎಂದು ಅವರು ಹೇಳಿದರು. ದೇಶದಲ್ಲಿ ಸಾಕಷ್ಟು ಬೀಜ ಲಭ್ಯತೆಯ ಹೊರತಾಗಿಯೂ, ರೈತರು ಸಾಮಾನ್ಯವಾಗಿ ಸರಿಯಾದ ಸಮಯದಲ್ಲಿ ಬೀಜಗಳನ್ನು ಪಡೆಯುವುದಿಲ್ಲ, ಇದನ್ನು ಅವರು ಕಳವಳಕಾರಿ ವಿಷಯವೆಂದು ಅವರು ಹೇಳಿದರು. ಎಲ್ಲಾ ರಾಜ್ಯಗಳು ಬ್ರೀಡರ್ ಬೀಜ ಮತ್ತು ಇತರ ಅಗತ್ಯ ಬೀಜಗಳನ್ನು ಸಮಯಕ್ಕೆ ಸರಿಯಾಗಿ ತಲುಪಿಸಲು, ವಿತರಣಾ ವ್ಯವಸ್ಥೆಯನ್ನು ಬಲಪಡಿಸಲು ಮತ್ತು ಮುಂಗಾರು ಬೆಳೆ (ಖಾರಿಫ್) ಋತುವಿನಲ್ಲಿ ರೈತರಿಗೆ ಸಕಾಲಿಕ ಬೀಜ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳಲು ಅವರು ಇಲಾಖೆಗೆ ನಿರ್ದೇಶನ ನೀಡಿದರು. ಯಾವುದೇ ಸಂದರ್ಭದಲ್ಲೂ ಕಳಪೆ ಗುಣಮಟ್ಟದ ಬೀಜಗಳು ಮಾರುಕಟ್ಟೆಗೆ ಪ್ರವೇಶಿಸಬಾರದು ಮತ್ತು ಕಟ್ಟುನಿಟ್ಟಾದ ಮೇಲ್ವಿಚಾರಣೆ ಮತ್ತು ಉಲ್ಲಂಘನೆಗಳ ವಿರುದ್ಧ ಪರಿಣಾಮಕಾರಿ ಕ್ರಮ ಕೈಗೊಳ್ಳಬೇಕೆಂದು ಅವರು ಒತ್ತಿ ಹೇಳಿದರು. ಅಗತ್ಯವಿದ್ದಾಗ ಬೀಜಗಳನ್ನು ಪೀಡಿತ ಪ್ರದೇಶಗಳಿಗೆ ತಕ್ಷಣ ಪೂರೈಸಲು ತುರ್ತು ಪರಿಸ್ಥಿತಿಗಳನ್ನು ಎದುರಿಸಲು ರಾಷ್ಟ್ರೀಯ ಮಟ್ಟದ ಬೀಜ ಮೀಸಲು ಕಾರ್ಯವಿಧಾನವನ್ನು ಸ್ಥಾಪಿಸಲಾಗಿದೆ ಎಂದು ಅವರು ಮಾಹಿತಿ ನೀಡಿದರು. ಕಡಿಮೆ ಮಳೆ ಅಥವಾ ಇತರ ಸವಾಲಿನ ಪರಿಸ್ಥಿತಿಗಳಿಗೆ ಜಿಲ್ಲಾ ಮಟ್ಟದಲ್ಲಿ ಸಿದ್ಧರಾಗಿರಲು ಅವರು ರಾಜ್ಯ ಸರ್ಕಾರಗಳನ್ನು ಒತ್ತಾಯಿಸಿದರು.

ರಸಗೊಬ್ಬರಗಳು, ಮಣ್ಣಿನ ಆರೋಗ್ಯ ಕಾರ್ಡ್ ಗಳು ಮತ್ತು ರೈತರ ಐಡಿಗಳಿಗೆ ವಿಶೇಷ ಒತ್ತು ನೀಡಿದರು. ಮಣ್ಣಿನ ಆರೋಗ್ಯ ಕಾರ್ಡ್ ಗಳು ಕೇವಲ ದಾಖಲೆಗಳಾಗಿ ಉಳಿಯಬಾರದು, ಬದಲಾಗಿ, ರೈತರು ಪೋಷಕಾಂಶಗಳ ಕೊರತೆ ಮತ್ತು ಸೂಕ್ತವಾದ ರಸಗೊಬ್ಬರ ಅನ್ವಯವನ್ನು ಅರ್ಥಮಾಡಿಕೊಳ್ಳಲು ಕ್ಷೇತ್ರ ಮಟ್ಟದಲ್ಲಿ ಸಕ್ರಿಯವಾಗಿ ಬಳಸಿಕೊಳ್ಳಬೇಕು ಎಂದು ಕೇಂದ್ರ ಸಚಿವರು ಹೇಳಿದರು. 'ಕೃಷಿ ಉಳಿಸಿ(ಖೇತ್ ಬಚಾವೋ) ಅಭಿಯಾನ'ದ ಮೂಲಕ ಸಮತೋಲಿತ ರಸಗೊಬ್ಬರ ಬಳಕೆಯನ್ನು ಪ್ರೋತ್ಸಾಹಿಸಲು ಅವರು ರಾಜ್ಯಗಳನ್ನು ಒತ್ತಾಯಿಸಿದರು. 'ಕೃಷಿ ಉಳಿಸಿ(ಖೇತ್ ಬಚಾವೋ) ಅಭಿಯಾನ'ದ ಮಹತ್ವವನ್ನು ಎತ್ತಿ ತೋರಿಸಿದ ಕೇಂದ್ರ ಸಚಿವರಾದ ಶ್ರೀ ಚೌಹಾಣ್ ಅವರು, ಇದು ಕೇವಲ ಇಲಾಖಾ ಕಾರ್ಯಕ್ರಮಕ್ಕೆ ಮಾತ್ರ ಸೀಮಿತವಾಗಿರದೆ ಸಾಮೂಹಿಕ ಭಾಗವಹಿಸುವಿಕೆಯ ಚಳುವಳಿಯಾಗಬೇಕು ಎಂದು ಹೇಳಿದರು. ಜೂನ್ 1 ರಿಂದ ಜೂನ್ 30 ರವರೆಗೆ ಕೃಷಿ ಉಳಿಸಿ (ಖೇತ್ ಬಚಾವೋ) ಅಭಿಯಾನದ ಅಡಿಯಲ್ಲಿ, ಸಾರ್ವಜನಿಕ ಪ್ರತಿನಿಧಿಗಳು, ವಿಜ್ಞಾನಿಗಳು, ಅಧಿಕಾರಿಗಳು ಮತ್ತು ರೈತರು ಜಂಟಿಯಾಗಿ ಕ್ಷೇತ್ರಮಟ್ಟದ ಜಾಗೃತಿ ಚಟುವಟಿಕೆಗಳನ್ನು ಕೈಗೊಳ್ಳುತ್ತಾರೆ. ಗ್ರಾಮ ಮಟ್ಟದ ಸಂಪರ್ಕ ಕಾರ್ಯಕ್ರಮಗಳ ಮೂಲಕ, ರೈತರಿಗೆ ಮಣ್ಣಿನ ಆರೋಗ್ಯ, ಸಮತೋಲಿತ ರಸಗೊಬ್ಬರ ಬಳಕೆ, ಗುಣಮಟ್ಟದ ಬೀಜಗಳು, ಸರಿಯಾದ ಕೀಟನಾಶಕಗಳು, ಕೆಸಿಸಿ ಪ್ರಯೋಜನಗಳು, ಸರ್ಕಾರಿ ಯೋಜನೆಗಳು ಮತ್ತು ಆಧುನಿಕ ಕೃಷಿ ತಂತ್ರಜ್ಞಾನಗಳ ಬಗ್ಗೆ ತಿಳಿಸಲಾಗುವುದು ಎಂದು ಅವರು ಮಾಹಿತಿ ನೀಡಿದರು.

ಪಾರದರ್ಶಕ, ಗುರಿಯಿಟ್ಟುಕೊಂಡ ಮತ್ತು ಪರಿಣಾಮಕಾರಿ ಭವಿಷ್ಯದ ರೈತ ಸೇವಾ ವ್ಯವಸ್ಥೆಯ ಅಡಿಪಾಯ ಎಂದು ರೈತ ಐಡಿಯನ್ನು ವಿವರಿಸಿದ ಶ್ರೀ ಚೌಹಾಣ್ ಅವರು, ರಸಗೊಬ್ಬರ ವಿತರಣೆಯಲ್ಲಿ ಪಾರದರ್ಶಕತೆ, ಕಪ್ಪು ಮಾರುಕಟ್ಟೆ ತಡೆಗಟ್ಟುವಿಕೆ ಮತ್ತು ನಿಜವಾದ ರೈತರಿಗೆ ಸರಿಯಾದ ಪೂರೈಕೆಯನ್ನು ಖಚಿತಪಡಿಸಿಕೊಳ್ಳುವ ಅಗತ್ಯವನ್ನು ಒತ್ತಿ ಹೇಳಿದರು. ಹಾಗೂ, ಜಾಗತಿಕ ಬೆಲೆಗಳು ಏರುತ್ತಿದ್ದರೂ, ಭಾರತ ಸರ್ಕಾರವು ರೈತರ ಹಿತಾಸಕ್ತಿಗಳನ್ನು ರಕ್ಷಿಸಲು ಬದ್ಧವಾಗಿದೆ ಮತ್ತು ರಸಗೊಬ್ಬರಗಳನ್ನು ಕೃಷಿ ಉದ್ದೇಶಗಳಿಗಾಗಿ ಕಟ್ಟುನಿಟ್ಟಾಗಿ ಬಳಸಲಾಗುತ್ತಿದೆ ಮತ್ತು ದುರುಪಯೋಗವಾಗದಂತೆ ನೋಡಿಕೊಳ್ಳುತ್ತದೆ ಎಂದು ಹೇಳಿದರು.

ಕೃಷಿ ಸಾಲ ಮತ್ತು ಕಿಸಾನ್ ಕ್ರೆಡಿಟ್ ಕಾರ್ಡ್ ಗಳ ಕುರಿತು, ಲಾಭದಾಯಕ ಕೃಷಿಗೆ ಬಂಡವಾಳಕ್ಕೆ ಸಕಾಲಿಕ ಪ್ರವೇಶವು ನಿರ್ಣಾಯಕವಾಗಿದೆ ಎಂದು ಕೇಂದ್ರ ಸಚಿವರು ಹೇಳಿದರು. ಕೆಲವು ರಾಜ್ಯಗಳು ಕೃಷಿ ಸಾಲದ ಹರಿವಿನಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸಿದ್ದರೂ, ಪೂರ್ವ ಮತ್ತು ಈಶಾನ್ಯ ಭಾರತದ ಹಲವು ಭಾಗಗಳು ಇನ್ನೂ ಹಿಂದುಳಿದಿವೆ ಎಂದು ಅವರು ಒಪ್ಪಿಕೊಂಡರು. ರಾಜ್ಯಗಳೊಂದಿಗೆ ಸಮನ್ವಯದೊಂದಿಗೆ ಕೃಷಿ ಸಾಲದ ಪ್ರವೇಶವನ್ನು ವಿಸ್ತರಿಸಲು ಬ್ಯಾಂಕುಗಳೊಂದಿಗೆ ಶೀಘ್ರದಲ್ಲೇ ಚರ್ಚೆಗಳನ್ನು ನಡೆಸಲಾಗುವುದು ಎಂದು ಅವರು ಹೇಳಿದರು. ಬಾಕಿ ಇರುವ ಕಿಸಾನ್ ಕ್ರೆಡಿಟ್ ಕಾರ್ಡ್ ವಿಲೇವಾರಿ ಪ್ರಕರಣಗಳನ್ನು ಪರಿಶೀಲಿಸಲು ಮತ್ತು ರೈತರ ನಿಜವಾದ ಅಗತ್ಯಗಳ ಆಧಾರದ ಮೇಲೆ ಸಾಲ ವ್ಯವಸ್ಥೆಗಳನ್ನು ಬಲಪಡಿಸಲು ಅವರು ರಾಜ್ಯಗಳನ್ನು ಒತ್ತಾಯಿಸಿದರು.

ಕೃಷಿ ಯಾಂತ್ರೀಕರಣದ ಕುರಿತು ಮಾತನಾಡಿದ ಕೇಂದ್ರ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು, ಕೇವಲ ಯಂತ್ರಗಳನ್ನು ವಿತರಿಸುವುದು ಸಾಕಾಗುವುದಿಲ್ಲ ಎಂದು ಹೇಳಿದರು. ಸರಿಯಾದ ಯಂತ್ರವು ಸರಿಯಾದ ರೈತನನ್ನು ತಲುಪುತ್ತದೆ ಮತ್ತು ಪರಿಣಾಮಕಾರಿಯಾಗಿ ಬಳಸಿಕೊಳ್ಳಲ್ಪಡುತ್ತದೆ ಎಂದು ಖಚಿತಪಡಿಸಿಕೊಳ್ಳುವುದು ಕೂಡಾ ಅಷ್ಟೇ ಮುಖ್ಯವಾಗಿದೆ. ರೈತರ ಅನುಕೂಲದಂತೆ ನೇಮಕಾತಿ ಕೇಂದ್ರಗಳ ಪರಿಣಾಮಕಾರಿತ್ವದ ಪರಿಶೀಲನೆಗೆ ಅವರು ಕರೆ ನೀಡಿದರು ಮತ್ತು ಸ್ಥಳೀಯ ಅವಶ್ಯಕತೆಗಳಿಗೆ ಅನುಗುಣವಾಗಿ ಯಂತ್ರಗಳ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳುವಂತೆ ರಾಜ್ಯಗಳನ್ನು ಒತ್ತಾಯಿಸಿದರು. ಉತ್ತಮ ಆಡಳಿತ ಪದ್ಧತಿಗಳಾಗಿ ಪಾರದರ್ಶಕ ಆಯ್ಕೆ ವ್ಯವಸ್ಥೆಗಳು, ಆನ್ಲೈನ್ ಅರ್ಜಿಗಳು ಮತ್ತು ಸಾರ್ವಜನಿಕ ವಿತರಣಾ ಕಾರ್ಯವಿಧಾನಗಳನ್ನು ಪ್ರತಿಪಾದಿಸಿ, ಅವುಗಳ ಅನುಷ್ಠಾನಕ್ಕೆ  ಈ ಸಂದರ್ಭದಲ್ಲಿ ಅವರು ಒತ್ತಾಯಿಸಿದರು.

ತೋಟಗಾರಿಕೆಯ ಕುರಿತು ಮಾತನಾಡುತ್ತಾ, ಭಾರತವು ಹಣ್ಣು ಮತ್ತು ತರಕಾರಿ ಉತ್ಪಾದನೆಯಲ್ಲಿ ಅಗಾಧ ಸಾಮರ್ಥ್ಯವನ್ನು ಹೊಂದಿದೆ ಎಂದು ಕೇಂದ್ರ ಸಚಿವರು ಹೇಳಿದರು. ಈಗ ಉದ್ದೇಶವು ಉತ್ಪಾದನೆಯನ್ನು ಹೆಚ್ಚಿಸುವುದು ಮಾತ್ರವಲ್ಲದೆ ರಫ್ತು-ಗುಣಮಟ್ಟದ ಬೆಳೆಗಳನ್ನು ಉತ್ಪಾದಿಸುವುದು ಕೂಡ ಆಗಬೇಕು. ಕಾರ್ಯವಿಧಾನದ ಸಂಕೀರ್ಣತೆಗಳಿಂದಾಗಿ, ಹಲವಾರು ಯೋಜನೆಗಳ ಪ್ರಯೋಜನಗಳು ಹೆಚ್ಚಾಗಿ ರೈತರನ್ನು ಸಕಲಿಕವಾಗಿ ಸರಿಯಾಗಿ ತಲುಪಲು ವಿಫಲವಾಗುತ್ತವೆ ಮತ್ತು ಆದ್ದರಿಂದ ಸರಳೀಕರಣದ ಕಡೆಗೆ ಉತ್ತಮ ರೀತಿಯ ಕ್ರಮಗಳು ಅತ್ಯಗತ್ಯ ಎಂದು ಅವರು ತಿಳಿಸಿದರು.

ನಕಲಿ ಬೀಜಗಳು, ಕಳಪೆ ಗುಣಮಟ್ಟದ ಕೀಟನಾಶಕಗಳು ಮತ್ತು ದೋಷಯುಕ್ತ ಕೃಷಿ ಒಳಹರಿವಿನ ವಿರುದ್ಧ ಕೇಂದ್ರ ಸಚಿವರಾದ ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು ಕಠಿಣ ಸಂದೇಶವನ್ನು ನೀಡಿದರು. ರೈತರಿಗೆ ನಕಲಿ ಮತ್ತು ಕಳಪೆ ಗುಣಮಟ್ಟದ ಉತ್ಪನ್ನಗಳನ್ನು ಮಾರಾಟ ಮಾಡುವವರು ಕೇವಲ ಆರ್ಥಿಕ ಅಪರಾಧಗಳನ್ನು ಮಾಡುವುದಲ್ಲದೆ ರಾಷ್ಟ್ರೀಯ ಹಾನಿಯನ್ನುಂಟುಮಾಡುತ್ತಿದ್ದಾರೆ ಎಂದು ಅವರು ಹೇಳಿದರು. ತಪಾಸಣೆಗಳನ್ನು ತೀವ್ರಗೊಳಿಸಲು, ಮಾದರಿಗಳನ್ನು ಹೆಚ್ಚಿಸಲು, ಮಾನ್ಯತೆ ಪಡೆದ ಪ್ರಯೋಗಾಲಯಗಳನ್ನು ಸ್ಥಾಪಿಸಲು ಮತ್ತು ಅಂತಿಮ ಶಿಕ್ಷೆಯಾಗುವವರೆಗೆ ಅಪರಾಧಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಅವರು ರಾಜ್ಯಗಳನ್ನು ಒತ್ತಾಯಿಸಿದರು. ಕೀಟನಾಶಕಗಳನ್ನು ನಿಯಂತ್ರಿಸಲು ಬಲವಾದ ಮತ್ತು ಹೆಚ್ಚು ಪರಿಣಾಮಕಾರಿ ಕಾನೂನು ಚೌಕಟ್ಟನ್ನು ಪರಿಚಯಿಸಲು ಪ್ರಯತ್ನಗಳು ನಡೆಯುತ್ತಿವೆ ಎಂದು ಅವರು ತಿಳಿಸಿದರು.

ಬೆಳೆ ವಿಮಾ ಯೋಜನೆಯ ಕುರಿತು ಮಾತನಾಡಿದ ಕೇಂದ್ರ ಸಚಿವರಾದ ಶ್ರೀ ಚೌಹಾಣ್ ಅವರು, ರೈತರಿಗೆ ಸಕಾಲಿಕ ಪರಿಹಾರವು ದ್ವಿದಳ ಧಾನ್ಯಗಳು ಮತ್ತು ಎಣ್ಣೆಬೀಜಗಳಿಗೆ ಅತ್ಯಂತ ಪರಿಣಾಮಕಾರಿಯಾಗಿದೆ ಎಂದು ಹೇಳಿದರು, ರೈತರಿಗೆ ಲಾಭದಾಯಕ ಬೆಲೆಗಳು ಸಿಗದ ಹೊರತು, ಈ ಬೆಳೆಗಳನ್ನು ಬೆಳೆಯಲು ಅವರನ್ನು ಪ್ರೋತ್ಸಾಹಿಸಲು ಸಾಧ್ಯವಾಗುವುದಿಲ್ಲ ಎಂದು ಕೇಂದ್ರ ಸಚಿವರು ಹೇಳಿದರು. “ಪಿಎಂ-ಆಶಾ”ದಂತಹ ಯೋಜನೆಗಳ ಉತ್ತಮ ಅನುಷ್ಠಾನ, ಸಕಾಲಿಕ ಸಂಗ್ರಹಣೆ ಮತ್ತು ಸಕ್ರಿಯ ರಾಜ್ಯ ಭಾಗವಹಿಸುವಿಕೆಯನ್ನು ಅವರು ಒತ್ತಿ ಹೇಳಿದರು. ಅವರ ಪ್ರಕಾರ, ದ್ವಿದಳ ಧಾನ್ಯಗಳು ಮತ್ತು ಎಣ್ಣೆಬೀಜಗಳಲ್ಲಿ ಸ್ವಾವಲಂಬನೆಯನ್ನು ಸಾಧಿಸಲು ಬೆಲೆ ಬೆಂಬಲ ಮತ್ತು ಖರೀದಿ ವ್ಯವಸ್ಥೆಗಳು ಅತ್ಯಗತ್ಯವಾಗಿದೆ.

ಎಫ್.ಪಿ.ಒ.ಗಳು, ಕೃಷಿ ವಿಜ್ಞಾನ ಕೇಂದ್ರಗಳು ಮತ್ತು ಕೃಷಿ ವಿಶ್ವವಿದ್ಯಾಲಯಗಳ ಪಾತ್ರವನ್ನು ಶ್ರೀ ಚೌಹಾಣ್ ಅವರು ವಿವರಿಸಿದರು. ಕೃಷಿ ವಿಜ್ಞಾನ ಕೇಂದ್ರಗಳು ಸಂಶೋಧನೆ, ನಾವೀನ್ಯತೆ ಮತ್ತು ತಂತ್ರಜ್ಞಾನವನ್ನು ನೇರವಾಗಿ ತಳಮಟ್ಟಕ್ಕೆ ರೈತರ ಕೃಷಿ ಭೂಮಿಗೆ ಕೊಂಡೊಯ್ಯಲು ಪ್ರಬಲ ಮಾಧ್ಯಮವಾಗಬಹುದು ಎಂದು ಅವರು ಹೇಳಿದರು. ಇದಕ್ಕಾಗಿ, ರಾಜ್ಯಗಳು, ಕೃಷಿ ವಿಶ್ವವಿದ್ಯಾಲಯಗಳು, ವಿಜ್ಞಾನಿಗಳು, ಪ್ರಗತಿಪರ ರೈತರು ಮತ್ತು ಕೃಷಿ ವಿದ್ಯಾರ್ಥಿಗಳ ನಡುವೆ ಬಲವಾದ ಸಮನ್ವಯದ ಅಗತ್ಯವಿದೆ. ರೈತರ ಮಾರುಕಟ್ಟೆ ಶಕ್ತಿಯನ್ನು ಬಲಪಡಿಸಲು ಎಫ್.ಪಿ.ಒ.ಗಳು  ಒಂದು ಪ್ರಮುಖ ಕಾರ್ಯವಿಧಾನವಾಗಿದೆ ಎಂದು ಅವರು ವಿವರಿಸಿದರು.

ಪ್ರತಿಯೊಂದು ರಾಜ್ಯವು ಈಗ ಕೃಷಿ-ಹವಾಮಾನ ಪರಿಸ್ಥಿತಿಗಳು, ಲಭ್ಯವಿರುವ ಸಂಪನ್ಮೂಲಗಳು ಮತ್ತು ಸ್ಥಳೀಯ ಸಾಮರ್ಥ್ಯದ ಆಧಾರದ ಮೇಲೆ ತನ್ನದೇ ಆದ ಕೃಷಿ ಮಾರ್ಗಸೂಚಿಯನ್ನು ಸಿದ್ಧಪಡಿಸಬೇಕು ಎಂದು ಕೇಂದ್ರ ಸಚಿವರು ಹೇಳಿದರು. ಕೇಂದ್ರ ಸರ್ಕಾರ, ವೈಜ್ಞಾನಿಕ ಸಂಸ್ಥೆಗಳು ಮತ್ತು ಸಚಿವಾಲಯದ ಸಂಪೂರ್ಣ ತಂಡವು ಈ ದಿಕ್ಕಿನಲ್ಲಿ ರಾಜ್ಯಗಳೊಂದಿಗೆ ಕೆಲಸ ಮಾಡಲು ಸಂಪೂರ್ಣವಾಗಿ ಸಿದ್ಧವಾಗಿದೆ ಎಂದು ಅವರು ಭರವಸೆ ನೀಡಿದರು. ರೈತರ ಹಿತದೃಷ್ಟಿಯಿಂದ ಕೇಂದ್ರ ಸರ್ಕಾರವು ಅಗತ್ಯವಿರುವ ಎಲ್ಲ ಬೆಂಬಲವನ್ನು ನೀಡುತ್ತದೆ ಎಂದು ಅವರು ಈ ಸಂದರ್ಭದಲ್ಲಿ ಪುನರುಚ್ಚರಿಸಿದರು.

ತಮ್ಮ ಭಾಷಣವನ್ನು ಮುಕ್ತಾಯಗೊಳಿಸುತ್ತಾ, ಶ್ರೀ ಶಿವರಾಜ್ ಸಿಂಗ್ ಚೌಹಾಣ್ ಅವರು, ನಿಯಮಗಳು ಮತ್ತು ಕಾರ್ಯವಿಧಾನಗಳು ರೈತರ ಅನುಕೂಲಕ್ಕಾಗಿ ಅಸ್ತಿತ್ವದಲ್ಲಿವೆ, ಬದಲಾಗಿ ರೈತರು ನಿಯಮಗಳಿಗಾಗಿ ಅಸ್ತಿತ್ವದಲ್ಲಿಲ್ಲ ಎಂದು ಹೇಳಿದರು. ಆದ್ದರಿಂದ, ಅನಗತ್ಯ ನಿಯಮಗಳ ಸಂಕೀರ್ಣತೆಗಳು ಎಲ್ಲಿದ್ದರೂ ಅವುಗಳನ್ನು ತೆಗೆದುಹಾಕಬೇಕು. ಅವರು ರಾಜ್ಯಗಳು ಸಲಹೆಗಳನ್ನು ಬಹಿರಂಗವಾಗಿ ಹಂಚಿಕೊಳ್ಳಬೇಕೆಂದು ಒತ್ತಾಯಿಸಿದರು ಮತ್ತು ಆಡಳಿತದ ಪರಿಣಾಮವು ಕೇವಲ ಕಡತಗಳಲ್ಲಿ ಮಾತ್ರವಲ್ಲ, ಜನರ ಜೀವನದಲ್ಲಿಯೂ ಗೋಚರಿಸಬೇಕು ಎಂದು ಪುನರುಚ್ಚರಿಸಿದರು. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ನಿರಂತರವಾಗಿ ಸುಧಾರಣೆಗಳಿಗೆ ಒತ್ತು ನೀಡಿದ್ದಾರೆ ಮತ್ತು ಪ್ರಧಾನ ಮಂತ್ರಿಯವರ ಮಾರ್ಗದರ್ಶನದಲ್ಲಿ, ರಾಜ್ಯಗಳ ಸಹಕಾರ, ವಿಜ್ಞಾನಿಗಳ ಪ್ರಯತ್ನಗಳು ಮತ್ತು ರೈತರ ಕಠಿಣ ಪರಿಶ್ರಮದಿಂದ, ಭಾರತವು ಕೃಷಿಯಲ್ಲಿ ಹೊಸ ಎತ್ತರವನ್ನು ಸಾಧಿಸುತ್ತಿದೆ ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದರು.

ಭಾರತವು ತನ್ನದೇ ಆದ ಅವಶ್ಯಕತೆಗಳನ್ನು ಪೂರೈಸುವುದಲ್ಲದೆ, ಆಹಾರ ಧಾನ್ಯಗಳು, ಹಣ್ಣುಗಳು, ತರಕಾರಿಗಳು, ದ್ವಿದಳ ಧಾನ್ಯಗಳು, ಎಣ್ಣೆಬೀಜಗಳು ಮತ್ತು ಇತರ ಕೃಷಿ ಉತ್ಪನ್ನಗಳಲ್ಲಿ ಬಲವಾದ ಜಾಗತಿಕ ಮಾದರಿ ವೇದಿಕೆಯಾಗಿ, ಉತ್ತಮ ಉದಾಹರಣೆಯಾಗಿ ಹೊರಹೊಮ್ಮುತ್ತಿದೆ ಎಂದು ಅವರು ಹೇಳಿದರು.

*****