ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯವು ಅಖಿಲ ಭಾರತ ಕೈಗಾರಿಕಾ ಉತ್ಪಾದನಾ ಸೂಚ್ಯಂಕದ (ಐಐಪಿ) ಮೂಲ ವರ್ಷವನ್ನು 2011-12 ರಿಂದ 2022-23 ಕ್ಕೆ ಪರಿಷ್ಕರಿಸುವ ಕಾರ್ಯವನ್ನು ಕೈಗೆತ್ತಿಕೊಂಡಿದ್ದು, 1 ಜೂನ್ 2026 ರಂದು ಹೊಸ ಸರಣಿಯನ್ನು ಬಿಡುಗಡೆ ಮಾಡಲು ಯೋಜಿಸಿದೆ. ಐಐಪಿ ಸರಣಿಯ ಸಂಕಲನದ ವಿವಿಧ ಆಯಾಮಗಳನ್ನು ಬಳಕೆದಾರರು ಮತ್ತು ಇತರ ಪಾಲುದಾರರು ಸುಲಭವಾಗಿ ಅರ್ಥಮಾಡಿಕೊಳ್ಳಲು ಸಹಾಯ ಮಾಡುವ ನಿಟ್ಟಿನಲ್ಲಿ ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯವು ಈ ಪತ್ರಿಕಾ ಪ್ರಕಟಣೆಯ ಮೂಲಕ ‘ಪದೇ ಪದೇ ಕೇಳಲಾಗುವ ಪ್ರಶ್ನೆಗಳನ್ನು’ ಸಿದ್ಧಪಡಿಸಿ ಬಿಡುಗಡೆ ಮಾಡುತ್ತಿದೆ.

ಸಾರಾಂಶ

• ಅಖಿಲ ಭಾರತ ಕೈಗಾರಿಕಾ ಉತ್ಪಾದನಾ ಸೂಚ್ಯಂಕದ (ಐಐಪಿ) ಮೂಲ ವರ್ಷವನ್ನು, ಅಖಿಲ ಭಾರತ ಐಐಪಿ ಮೂಲ ವರ್ಷದ ಪರಿಷ್ಕರಣೆಗಾಗಿ ರಚಿಸಲಾದ ತಾಂತ್ರಿಕ ಸಲಹಾ ಸಮಿತಿಯ (ಟಿಎಸಿ-ಐಐಪಿ) ನೇತೃತ್ವದಲ್ಲಿ 2011-12 ರಿಂದ 2022-23 ಕ್ಕೆ ಪರಿಷ್ಕರಿಸಲಾಗುತ್ತಿದೆ.
• ಟಿಎಸಿ-ಐಐಪಿ ವರದಿಯನ್ನು 25 ಮೇ 2026 ರಂದು ಬಿಡುಗಡೆ ಮಾಡಲಾಗಿದ್ದು, ಇದು ಅಂತರರಾಷ್ಟ್ರೀಯ ಅತ್ಯುತ್ತಮ ಪದ್ಧತಿಗಳಿಗೆ ಅನುಗುಣವಾಗಿ ಐಐಪಿ ಸಂಕಲನದಲ್ಲಿನ ವ್ಯಾಪ್ತಿ ಮತ್ತು ಒಳಗೊಳ್ಳುವಿಕೆ, ಪರಿಕಲ್ಪನಾತ್ಮಕ, ಸಾಂಸ್ಥಿಕ ಮತ್ತು ಕಾರ್ಯಾಚರಣೆಯ ವಿಧಾನಗಳನ್ನು ಒಳಗೊಂಡಿದೆ.
• ಹೊಸ ಐಐಪಿ ಸರಣಿಯ ಐಟಂ ಬುಟ್ಟಿಯನ್ನು (Item basket) ಅಂತಿಮಗೊಳಿಸಲಾಗಿದ್ದು, ಇದು 120 ಹೊಸ ವಸ್ತುಗಳ ಗುಂಪುಗಳು ಸೇರಿದಂತೆ ಒಟ್ಟು 463 ವಸ್ತುಗಳ ಗುಂಪುಗಳನ್ನು ಒಳಗೊಂಡಿದೆ.
• ಪ್ರಸ್ತುತ ಇರುವ ವಲಯಗಳ ಜೊತೆಗೆ, ಹೊಸ ಐಐಪಿ ಸರಣಿಯು ಸಣ್ಣ ಖನಿಜಗಳು, ಅಪರೂಪದ ಭೂಮಿಯ ಖನಿಜಗಳು, ಅನಿಲ ಪೂರೈಕೆ, ನೀರು ಪೂರೈಕೆ, ಒಳಚರಂಡಿ ಮತ್ತು ತ್ಯಾಜ್ಯ ನಿರ್ವಹಣೆಯನ್ನು ಸಹ ಒಳಗೊಳ್ಳಲಿದೆ.
• ಹೊಸ ಐಐಪಿ ಸರಣಿಯು ನವೀಕರಿಸಬಹುದಾದ ಮತ್ತು ನವೀಕರಿಸಲಾಗದ ಮೂಲಗಳ ಮೂಲಕ ವಿದ್ಯುತ್ ಉತ್ಪಾದನೆ, ಅನಿಲ ಪೂರೈಕೆ, ಇಂಧನ ಖನಿಜಗಳು, ಲೋಹ ಖನಿಜಗಳು ಮತ್ತು ಲೋಹೇತರ ಖನಿಜಗಳು, ನೀರು ಪೂರೈಕೆ, ಒಳಚರಂಡಿ ಮತ್ತು ತ್ಯಾಜ್ಯ ನಿರ್ವಹಣೆಗೆ ಪ್ರತ್ಯೇಕ ಸೂಚ್ಯಂಕಗಳನ್ನು ಒದಗಿಸುವ ಮೂಲಕ ಹೆಚ್ಚಿನ ವಿವರವಾದ ಸೂಚ್ಯಂಕಗಳನ್ನು ಬಿಡುಗಡೆ ಮಾಡಲಿದೆ.

ಹೊಸ ಮೂಲ ವರ್ಷ 2022-23 ರೊಂದಿಗಿನ ಹೊಸ ಐಐಪಿ ಸರಣಿಯ ಕುರಿತು ಪದೇ ಪದೇ ಕೇಳಲಾಗುವ ಪ್ರಶ್ನೆಗಳು

ಪ್ರಶ್ನೆ 1: ಕೈಗಾರಿಕಾ ಉತ್ಪಾದನಾ ಸೂಚ್ಯಂಕ (ಐಐಪಿ) ಎಂದರೇನು?

ಉತ್ತರ:        ಕೈಗಾರಿಕಾ ಉತ್ಪಾದನಾ ಸೂಚ್ಯಂಕ (ಐಐಪಿ) ಎಂಬುದು ಒಂದು ನಿರ್ದಿಷ್ಟ ಅವಧಿಯಲ್ಲಿ, ಮೂಲ ವರ್ಷಕ್ಕೆ ಹೋಲಿಸಿದರೆ ಐಟಂ ಬುಟ್ಟಿಯ ಉತ್ಪಾದನೆಯ ಪ್ರಮಾಣದಲ್ಲಿ ಆಗುವ ಬದಲಾವಣೆಗಳನ್ನು ಅಳೆಯಲು ವಿನ್ಯಾಸಗೊಳಿಸಲಾದ ಒಂದು ಸಂಯೋಜಿತ ಸೂಚಕವಾಗಿದೆ.

ಪ್ರಶ್ನೆ 2: ಭಾರತದಲ್ಲಿ ಕೈಗಾರಿಕಾ ಉತ್ಪಾದನಾ ಸೂಚ್ಯಂಕವನ್ನು ಯಾರು ಸಂಕಲಿಸಿ ಬಿಡುಗಡೆ ಮಾಡುತ್ತಾರೆ?

ಉತ್ತರ:        ಕೈಗಾರಿಕಾ ಉತ್ಪಾದನಾ ಸೂಚ್ಯಂಕವನ್ನು (ಐಐಪಿ) ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯದ ಅಡಿಯಲ್ಲಿ ಬರುವ ರಾಷ್ಟ್ರೀಯ ಸಾಂಖ್ಯಿಕ ಕಚೇರಿಯು (ಎನ್‌ ಎಸ್‌ ಒ) ಸಂಕಲಿಸಿ ಬಿಡುಗಡೆ ಮಾಡುತ್ತದೆ.

ಪ್ರಶ್ನೆ 3: 2022-23ರ ಮೂಲ ವರ್ಷದ ಹೊಸ ಸರಣಿಯಲ್ಲಿ ಐಐಪಿ ಬಿಡುಗಡೆ ಮಾಡಲು ಎಷ್ಟು ಸಮಯದ ವಿಳಂಬ ಇರುತ್ತದೆ?

ಉತ್ತರ:        ಐಐಪಿಯನ್ನು ಪ್ರತಿ ತಿಂಗಳು, ಆಯಾ ಉಲ್ಲೇಖಿತ ತಿಂಗಳು ಮುಗಿದ 28 ದಿನಗಳ ಕಾಲಾವಕಾಶದ ನಂತರ ಬಿಡುಗಡೆ ಮಾಡಲಾಗುತ್ತದೆ.

ಪ್ರಶ್ನೆ 4: ಮೂಲ ವರ್ಷ ಎಂದರೇನು ಮತ್ತು ಇದು ಏಕೆ ಮುಖ್ಯ?

ಉತ್ತರ:        ಮೂಲ ವರ್ಷ ಎಂದರೆ ಕಾಲಾನಂತರದಲ್ಲಿ ಉತ್ಪಾದನೆಯನ್ನು ಹೋಲಿಸಲು ಉಲ್ಲೇಖ ಬಿಂದುವಾಗಿ (ಸೂಚ್ಯಂಕ = 100) ತೆಗೆದುಕೊಳ್ಳಲಾದ ಒಂದು ನಿರ್ದಿಷ್ಟ ವರ್ಷವಾಗಿದೆ. ಪ್ರಸ್ತುತ ಡೇಟಾವನ್ನು ಮೂಲ ವರ್ಷಕ್ಕೆ ಹೋಲಿಸುವ ಮೂಲಕ ಉತ್ಪಾದನೆಯು ಹೆಚ್ಚಾಗಿದೆಯೇ ಅಥವಾ ಕಡಿಮೆಯಾಗಿದೆಯೇ ಎಂದು ನಾವು ತಿಳಿದುಕೊಳ್ಳಬಹುದು. ಹೀಗಾಗಿ, ಮೂಲ ವರ್ಷವು ಒಂದು ಪ್ರಮಾಣಿತ ಉಲ್ಲೇಖವಾಗಿ ಕಾರ್ಯನಿರ್ವಹಿಸುತ್ತದೆ.

ಪ್ರಶ್ನೆ 5:          ಹೊಸ ಐಐಪಿ ಸರಣಿಗೆ ಮೂಲ ವರ್ಷವನ್ನು ಆಯ್ಕೆ ಮಾಡುವ ಮಾನದಂಡಗಳು ಯಾವುವು?

ಉತ್ತರ:        ಮೂಲ ವರ್ಷವು ತುಲನಾತ್ಮಕವಾಗಿ ಸ್ಥಿರವಾದ ಆರ್ಥಿಕ ಅವಧಿಯನ್ನು ಪ್ರತಿನಿಧಿಸಬೇಕು ಮತ್ತು ಜಿಡಿಪಿ ಮತ್ತು ಸಗಟು ಬೆಲೆ ಸೂಚ್ಯಂಕದ (ಡಬ್ಲ್ಯುಪಿಐ) ನಂತಹ ಇತರ ಸ್ಥೂಲ ಆರ್ಥಿಕ ಸೂಚಕಗಳ ಮೂಲ ವರ್ಷದೊಂದಿಗೆ ಹೊಂದಿಕೆಯಾಗಬೇಕು. ಅದರಂತೆ, ಹಣಕಾಸು ವರ್ಷ 2022-23 ಅನ್ನು ಮೂಲ ವರ್ಷವಾಗಿ ಆಯ್ಕೆ ಮಾಡಲಾಗಿದೆ.

ಪ್ರಶ್ನೆ 6:  ಮೂಲ ವರ್ಷವನ್ನು ಏಕೆ ಪರಿಷ್ಕರಿಸಲಾಗುತ್ತಿದೆ?

ಉತ್ತರ:        ಆರ್ಥಿಕತೆಯಲ್ಲಿನ ರಚನಾತ್ಮಕ ಬದಲಾವಣೆಗಳು, ತಾಂತ್ರಿಕ ಪ್ರಗತಿ ಮತ್ತು ಹೊಸ ಕೈಗಾರಿಕೆಗಳು ಹಾಗೂ ಉತ್ಪನ್ನಗಳ ಬೆಳವಣಿಗೆಯನ್ನು ಪ್ರತಿಬಿಂಬಿಸಲು ಐಐಪಿ ಮೂಲ ವರ್ಷವನ್ನು ಪರಿಷ್ಕರಿಸಲಾಗುತ್ತದೆ. ಮೂಲ ವರ್ಷವನ್ನು ಪರಿಷ್ಕರಿಸುವುದರಿಂದ ಸೂಚ್ಯಂಕವು ಪ್ರಸ್ತುತ ಉತ್ಪಾದನಾ ಮಾದರಿಗಳನ್ನು ನಿಖರವಾಗಿ ಪ್ರತಿನಿಧಿಸುತ್ತದೆ ಮತ್ತು ಆರ್ಥಿಕ ವಿಶ್ಲೇಷಣೆ ಹಾಗೂ ನೀತಿ ನಿರೂಪಣೆಗೆ ಹೆಚ್ಚು ವಿಶ್ವಾಸಾರ್ಹ ಡೇಟಾವನ್ನು ಒದಗಿಸುತ್ತದೆ.

ಪ್ರಶ್ನೆ 7: ಅಖಿಲ ಭಾರತ ಐಐಪಿಯ ಮೂಲ ವರ್ಷವನ್ನು ಎಷ್ಟು ಬಾರಿ ಪರಿಷ್ಕರಿಸಲಾಗಿದೆ?

ಉತ್ತರ:        ಇದು ಅಖಿಲ ಭಾರತ ಐಐಪಿಯ ಮೂಲ ವರ್ಷದ 10 ನೇ ಪರಿಷ್ಕರಣೆಯಾಗಿದೆ. ಮೊದಲ ಐಐಪಿ ಯನ್ನು 1937 ರ ಮೂಲ ವರ್ಷದೊಂದಿಗೆ ಸಿದ್ಧಪಡಿಸಲಾಯಿತು ಮತ್ತು ತದನಂತರ ಮೂಲ ವರ್ಷವನ್ನು ಅನುಕ್ರಮವಾಗಿ 1946, 1951, 1956, 1960, 1970, 1980-81, 1993-94, 2004-05 ಮತ್ತು 2011-12 ಕ್ಕೆ ಪರಿಷ್ಕರಿಸಲಾಗಿದೆ.

ಪ್ರಶ್ನೆ 8:          ಹೊಸ ಐಐಪಿ (2022-23) ಸರಣಿಯ ವ್ಯಾಪ್ತಿಯು ಹಳೆಯ ಐಐಪಿ (2011-12) ಸರಣಿಗಿಂತ ಹೇಗೆ ಭಿನ್ನವಾಗಿದೆ?

ಉತ್ತರ:        ಹೊಸ ಐಐಪಿ ಸರಣಿಯು (2022-23) ಗಣಿಗಾರಿಕೆ, ತಯಾರಿಕೆ (ಮ್ಯಾನುಫ್ಯಾಕ್ಚರಿಂಗ್) ಮತ್ತು ವಿದ್ಯುತ್‌ ನ ಪ್ರಸ್ತುತ ವಲಯಗಳನ್ನು ಹಾಗೇ ಉಳಿಸಿಕೊಂಡಿದೆ. ಆದಾಗ್ಯೂ, ಇದು ಅನಿಲ ಪೂರೈಕೆ ಮತ್ತು ನೀರು ಪೂರೈಕೆ, ಒಳಚರಂಡಿ ಮತ್ತು ತ್ಯಾಜ್ಯ ನಿರ್ವಹಣೆ ಚಟುವಟಿಕೆಗಳನ್ನು ಸೇರಿಸುವ ಮೂಲಕ ವ್ಯಾಪ್ತಿಯನ್ನು ವಿಸ್ತರಿಸಿದೆ, ಇದು ಕೈಗಾರಿಕಾ ಉತ್ಪಾದನೆಯ ಹೆಚ್ಚು ವಿಶಾಲವಾದ ಮತ್ತು ನಿಖರವಾದ ಚಿತ್ರಣವನ್ನು ನೀಡುತ್ತದೆ. ಗಣಿಗಾರಿಕೆ ವಲಯದಲ್ಲಿ, ಹೊಸ ಸರಣಿಯು ಪ್ರಮುಖ ಖನಿಜಗಳ ಜೊತೆಗೆ ಸಣ್ಣ ಖನಿಜಗಳು ಮತ್ತು ಅಪರೂಪದ ಭೂಮಿಯ ಖನಿಜಗಳನ್ನು ಒಳಗೊಂಡಿದೆ, ಇದು ಸೂಚ್ಯಂಕವನ್ನು ಹೆಚ್ಚು ಸಮಗ್ರವಾಗಿಸುತ್ತದೆ.

ಪ್ರಶ್ನೆ 9:          ತಯಾರಿಕಾ ವಲಯಕ್ಕೆ ಐಟಂ ಬುಟ್ಟಿಯನ್ನು ಆಯ್ಕೆ ಮಾಡಲು ಆಧಾರವೇನು?

ಉತ್ತರ:        ಕೈಗಾರಿಕಾ ಉತ್ಪಾದನೆಗೆ ಗಮನಾರ್ಹ ಕೊಡುಗೆ ನೀಡುವ ಐಟಂ ಮೇಲೆ ಗಮನ ಕೇಂದ್ರೀಕರಿಸಿ, ವಾರ್ಷಿಕ ಕೈಗಾರಿಕೆಗಳ ಸಮೀಕ್ಷೆಯ (ಎ ಎಸ್‌ ಐ) ಡೇಟಾದಿಂದ ಉತ್ಪಾದನಾ ವಲಯದ ಐಟಂ ಬುಟ್ಟಿಯನ್ನು ಆಯ್ಕೆ ಮಾಡಲಾಗುತ್ತದೆ. ಹೊಸ ಐಐಪಿ ಸರಣಿಗಾಗಿ (ಮೂಲ ವರ್ಷ 2022-23), ಎ ಎಸ್‌ ಐ 2021-22 ಮತ್ತು ಎ ಎಸ್‌ ಐ 2022-23 ರ ಡೇಟಾವನ್ನು ಬಳಸಲಾಗಿದೆ ಮತ್ತು ಪ್ರಾತಿನಿಧ್ಯ ಹಾಗೂ ದೃಢತೆಯನ್ನು ಖಚಿತಪಡಿಸಿಕೊಳ್ಳಲು ಒಂದು ವ್ಯವಸ್ಥಿತ ವಿಧಾನವನ್ನು ಅನುಸರಿಸಲಾಗಿದೆ.

• ಸಾಕಷ್ಟು ವ್ಯಾಪ್ತಿಯನ್ನು ಖಚಿತಪಡಿಸಿಕೊಳ್ಳಲು ಕೈಗಾರಿಕಾ ಗುಂಪಿನ ಮಟ್ಟದಲ್ಲಿ (ಎನ್‌ ಐ ಸಿ 3-ಡಿಜಿಟ್) ಐಟಂ ಬುಟ್ಟಿಯನ್ನು ಸಿದ್ಧಪಡಿಸಲಾಗುತ್ತದೆ.
• ಒಂದು ವಸ್ತುವನ್ನು ಬಹು ಕೈಗಾರಿಕೆಗಳಲ್ಲಿ ಉತ್ಪಾದಿಸಿದಾಗ, ಅದನ್ನು ಗರಿಷ್ಠ ಉತ್ಪಾದನೆಯನ್ನು ದಾಖಲಿಸಿದ ಕೈಗಾರಿಕೆಗೆ ನಿಯೋಜಿಸಲಾಗುತ್ತದೆ.
• ಎ ಎಸ್‌ ಐ 2021-22 ಮತ್ತು ಎ ಎಸ್‌ ಐ 2022-23 ರಿಂದ ಎರಡು ಪ್ರತ್ಯೇಕ ಐಟಂ ಗುಂಪುಗಳನ್ನು ಪಡೆಯಲಾಗುತ್ತದೆ, ಇದು ಪ್ರತಿ ಕೈಗಾರಿಕಾ ಗುಂಪಿನಲ್ಲಿ (ಎನ್‌ ಐ ಸಿ 3-ಡಿಜಿಟ್ ಮಟ್ಟದಲ್ಲಿ) ಉತ್ಪಾದನೆಯ ಶೇ.90 ರವರೆಗೆ ಕೊಡುಗೆ ನೀಡುವ ಐಟಂನ್ನು ಒಳಗೊಂಡಿರುತ್ತದೆ; ಈ ಗುಂಪುಗಳ ನಡುವಿನ ಸಾಮಾನ್ಯ (common) ವಸ್ತುಗಳು ಪ್ರಮುಖ ಬುಟ್ಟಿಯನ್ನು (core basket) ರೂಪಿಸುತ್ತವೆ.
• 2022-23ರಲ್ಲಿ ಯಾವುದೇ ಕೈಗಾರಿಕಾ ಗುಂಪಿಗೆ ಸಾಮಾನ್ಯ ವಸ್ತುಗಳು ಒಟ್ಟು ಉತ್ಪಾದನಾ ಮೌಲ್ಯದ (ಜಿವಿಒ) ಶೇ.80 ಕ್ಕಿಂತ ಕಡಿಮೆ ವ್ಯಾಪ್ತಿಯನ್ನು ಹೊಂದಿದ್ದರೆ, ಕನಿಷ್ಠ ಶೇ.80 ವ್ಯಾಪ್ತಿಯನ್ನು ಸಾಧಿಸುವವರೆಗೆ ಎ ಎಸ್‌ ಐ 2022-23 ಗುಂಪಿನಿಂದ ಹೆಚ್ಚುವರಿ ಐಟಂನ್ನು ಸೇರಿಸಲಾಗುತ್ತದೆ.
• ಉದಯೋನ್ಮುಖ ಉತ್ಪನ್ನಗಳ ಸೇರ್ಪಡೆಯನ್ನು ಖಚಿತಪಡಿಸಿಕೊಳ್ಳಲು, ಯಾವುದೇ ಕೈಗಾರಿಕಾ ಗುಂಪಿನಲ್ಲಿ ಶೇ 2 ಕ್ಕಿಂತ ಹೆಚ್ಚು ಉತ್ಪಾದನೆಗೆ ಕೊಡುಗೆ ನೀಡುವ ಐಟಂನ್ನು ಸಹ ಸೇರಿಸಲಾಗುತ್ತದೆ.

ಪ್ರಶ್ನೆ 10:        ತಯಾರಿಕಾ ವಲಯವನ್ನು ಹೊರತುಪಡಿಸಿ ಇತರ ವಲಯಗಳ ಐಟಂ ಬುಟ್ಟಿಗೆ ಆಧಾರವೇನು?

ಉತ್ತರ:        ತಯಾರಿಕಾ ವಲಯವನ್ನು ಹೊರತುಪಡಿಸಿ ಇತರ ವಲಯಗಳ ಐಟಂ ಬುಟ್ಟಿಯನ್ನು ಆಯಾ ವಲಯದ ಸ್ವರೂಪ ಮತ್ತು ಪ್ರಮುಖ ಅಳೆಯಬಹುದಾದ ಉತ್ಪಾದನೆಗಳ ಆಧಾರದ ಮೇಲೆ ಆಯ್ಕೆ ಮಾಡಲಾಗುತ್ತದೆ. ಕೆಲವು ಸಂದರ್ಭಗಳಲ್ಲಿ, ಸಂಬಂಧಪಟ್ಟ ಸಚಿವಾಲಯಗಳು/ಇಲಾಖೆಗಳೊಂದಿಗೆ ಸಮಾಲೋಚನೆಯನ್ನೂ ನಡೆಸಲಾಗುತ್ತದೆ — ಉದಾಹರಣೆಗೆ, ಭಾರತೀಯ ಗಣಿ ಬ್ಯೂರೋ (ಐಬಿಎಂ) ನೀಡಿದ ಸಲಹೆಗಳೊಂದಿಗೆ ಎಂಸಿಡಿಆರ್ ಖನಿಜಗಳನ್ನು ಗುರುತಿಸಲಾಗಿದೆ. ವಲಯವಾರು ಗುರುತಿಸಲಾದ ಐಟಂ ವಿವರಗಳು ಈ ಕೆಳಗಿನಂತಿವೆ:

• ಗಣಿಗಾರಿಕೆ ಮತ್ತು ಕಲ್ಲು ಗಣಿಗಾರಿಕೆ: ಖನಿಜ ಸಂರಕ್ಷಣೆ ಮತ್ತು ಅಭಿವೃದ್ಧಿ ನಿಯಮಗಳ (ಎಂಸಿಡಿಆರ್) ಅಡಿಯಲ್ಲಿ ನಿಯಂತ್ರಿಸಲ್ಪಡುವ ಇಂಧನ ಖನಿಜಗಳು ಮತ್ತು ಲೋಹದ ಹಾಗೂ ಲೋಹೇತರದ ಖನಿಜಗಳನ್ನು ಒಳಗೊಂಡಿರುವ 34 ಖನಿಜಗಳು, ಜೊತೆಗೆ 1 ಅಪರೂಪದ ಭೂಮಿಯ ಖನಿಜ ಮತ್ತು 9 ಸಣ್ಣ ಖನಿಜಗಳನ್ನು ಒಳಗೊಂಡಿದೆ.
• ವಿದ್ಯುತ್: ನವೀಕರಿಸಬಹುದಾದ ಮತ್ತು ನವೀಕರಿಸಲಾಗದ ಎರಡೂ ಮೂಲಗಳಿಂದ ಒಟ್ಟು ವಿದ್ಯುತ್ ಉತ್ಪಾದನೆಯನ್ನು ಒಳಗೊಳ್ಳುತ್ತದೆ.
• ಅನಿಲ ಪೂರೈಕೆ: ಮುಖ್ಯ ಕೊಳವೆಮಾರ್ಗಗಳ ಮೂಲಕ ಸರಬರಾಜು ಮಾಡಲಾದ/ವಿತರಿಸಲಾದ ಅನಿಲದ ಪ್ರಮಾಣವನ್ನು ಅಳತೆಯ ವಸ್ತುವಾಗಿ ಬಳಸುತ್ತದೆ.
• ನೀರು ಪೂರೈಕೆ, ಒಳಚರಂಡಿ ಮತ್ತು ತ್ಯಾಜ್ಯ ನಿರ್ವಹಣೆ: ನಲ್ಲಿ (ಟ್ಯಾಪ್) ಸಂಪರ್ಕಗಳ ಮೂಲಕ ನೀರು ಪೂರೈಕೆ, ಒಳಚರಂಡಿ/ಸೆಪ್ಟೆಜ್ ಸಂಪರ್ಕಗಳ ಮೂಲಕ ಒಳಚರಂಡಿ (500 ಅಮೃತ್ ನಗರಗಳಲ್ಲಿ ವರದಿಯಾದಂತೆ) ಮತ್ತು ಸಂಗ್ರಹಿಸಿ ಸಂಸ್ಕರಿಸಿದ ತ್ಯಾಜ್ಯದ ಪ್ರಮಾಣದ ಮೂಲಕ ತ್ಯಾಜ್ಯ ನಿರ್ವಹಣೆಯನ್ನು ಪತ್ತೆಹಚ್ಚುತ್ತದೆ.

ಪ್ರಶ್ನೆ 11:  ಐಟಂ ‘n.e.c.’ ವರ್ಗಗಳು ಎಂದರೇನು?

ಉತ್ತರ:        "n.e.c." ವರ್ಗಗಳು ಎಂದರೆ ಉತ್ಪಾದನಾ ವಲಯದ ರಾಷ್ಟ್ರೀಯ ಉತ್ಪನ್ನ ವರ್ಗೀಕರಣ (ಎನ್‌ ಪಿ ಸಿ ಎಂ ಎಸ್) 2011 ರ ಅಡಿಯಲ್ಲಿ "ಬೇರೆಡೆ ವರ್ಗೀಕರಿಸದ" ಉತ್ಪನ್ನ ಗುಂಪುಗಳಾಗಿವೆ. ಈ ವರ್ಗಗಳು ಸಾಮಾನ್ಯವಾಗಿ ವಿವಿಧ ಅಥವಾ ನಿರ್ದಿಷ್ಟವಲ್ಲದ ಉತ್ಪನ್ನಗಳನ್ನು ಒಳಗೊಂಡಿರುತ್ತವೆ.

‌ಕೈಗಾರಿಕೆಗಳ ವಾರ್ಷಿಕ ಸಮೀಕ್ಷೆಯು (ಎ ಎಸ್‌ ಐ) ಐಐಪಿ ಯ ಉತ್ಪಾದನಾ ವಲಯದ ಐಟಂ ಬುಟ್ಟಿ ಆಯ್ಕೆಗೆ ಆಧಾರವಾಗಿದೆ. ಎ ಎಸ್‌ ಐ ನಲ್ಲಿ, ಐಟಂವಾರು ಉತ್ಪಾದನೆಯನ್ನು ಸಂಗ್ರಹಿಸಲು ಎನ್‌ ಪಿ ಸಿ ಎಂ ಎಸ್ 2011 ಅನ್ನು ಬಳಸಲಾಗುತ್ತದೆ ಮತ್ತು ವಿವಿಧ ಅಥವಾ ನಿರ್ದಿಷ್ಟವಲ್ಲದ ಉತ್ಪನ್ನಗಳನ್ನು ವರದಿ ಮಾಡಲು n.e.c. ವರ್ಗದ ಅವಕಾಶವನ್ನು ಹೊಂದಿದೆ.

ಪ್ರಶ್ನೆ 12:        ಹಳೆಯ ಸರಣಿಗೆ ಹೋಲಿಸಿದರೆ ಹೊಸ ಸರಣಿಯಲ್ಲಿ n.e.c. ಐಟಂ ನಿರ್ವಹಣೆಯಲ್ಲಿ ಏನು ವ್ಯತ್ಯಾಸವಿದೆ?

ಉತ್ತರ:        ಮೇಲೆ ತಿಳಿಸಿದಂತೆ, n.e.c. ವಸ್ತುಗಳು ಯಾವುದೇ ನಿರ್ದಿಷ್ಟ ಉತ್ಪನ್ನವನ್ನು ಪ್ರತಿನಿಧಿಸದ ಕಾರಣ, 2011-12ರ ಸರಣಿಯಲ್ಲಿ ಐಟಂ ಬುಟ್ಟಿ ಆಯ್ಕೆಯ ಚೌಕಟ್ಟಿನಿಂದ ಈ ಐಟಂನ್ನು ತೆಗೆದುಹಾಕಲಾಗಿತ್ತು. ನಂತರ ಈ ಐಟಂ ಉತ್ಪಾದನೆಯನ್ನು ಕೈಗಾರಿಕಾ ಗುಂಪಿನ ಇತರ ಐಟಂ ನಡುವೆ ಪ್ರಮಾಣಾನುಗುಣವಾಗಿ ವಿತರಿಸಲಾಯಿತು. ಆದಾಗ್ಯೂ, ವಿಶಿಷ್ಟ ವಸ್ತುಗಳಾಗಿ ಇವುಗಳ ಹೊರಗಿಡುವಿಕೆಯು ಉತ್ಪಾದನೆಯ ಕೆಲವು ವಿಶಿಷ್ಟ ಅಥವಾ ನಾವೀನ್ಯತೆ ಆಧಾರಿತ ವಿಭಾಗಗಳ ಭಾಗಶಃ ಕಡಿಮೆ ಪ್ರಾತಿನಿಧ್ಯಕ್ಕೆ ಕಾರಣವಾಗಬಹುದು. ಉತ್ಪಾದನೆಯ ಮರುಹಂಚಿಕೆಯು ಕಡಿಮೆ ತೂಕವನ್ನು ಹೊಂದಿರಬಹುದಾದ ಕೆಲವು ಐಟಂ ಪ್ರಭಾವವನ್ನು ಹೆಚ್ಚಿಸುವುದಕ್ಕೂ ಕಾರಣವಾಗುತ್ತದೆ.

ಹೊಸ ಸರಣಿಯಲ್ಲಿ, 2022-23ರ ಮೂಲ ವರ್ಷದ ಅಖಿಲ ಭಾರತ ಐಐಪಿ ಗಾಗಿ ಐಟಂ ಬುಟ್ಟಿಯ ಆಯ್ಕೆಗೆ n.e.c. ಐಟಂನ್ನು ಉಳಿಸಿಕೊಳ್ಳಲಾಗಿದೆ. ಇದನ್ನು ಕಾರ್ಯಗತಗೊಳಿಸಲು, ಒಮ್ಮೆ n.e.c. ವಸ್ತುವನ್ನು ಆಯ್ಕೆ ಮಾಡಿದ ನಂತರ, ಅದನ್ನು ವರದಿ ಮಾಡುವ ಸಂಬಂಧಿತ ಕಾರ್ಖಾನೆಗಳಿಗೆ ಕ್ಷೇತ್ರ ಅಧಿಕಾರಿಗಳು ಭೇಟಿ ನೀಡಿದರು ಹಾಗೂ n.e.c. ವರ್ಗಗಳ ಅಡಿಯಲ್ಲಿ ಬರುವ ನಿರ್ದಿಷ್ಟ ಐಟಂನ್ನು ಗುರುತಿಸಿ ಅವುಗಳನ್ನು ಐಟಂ ಬುಟ್ಟಿಯಲ್ಲಿ ಸೂಕ್ತವಾಗಿ ಸೇರಿಸಿದ್ದಾರೆ. ಒಟ್ಟಾರೆಯಾಗಿ, ಈ ಐಟಂನ್ನು ಸೇರಿಸುವುದರಿಂದ ಉದಯೋನ್ಮುಖ, ವೈವಿಧ್ಯಮಯ ಮತ್ತು ಹಿಂದೆ ಕಡಿಮೆ ಪ್ರಾತಿನಿಧ್ಯ ಹೊಂದಿದ್ದ ಉತ್ಪನ್ನಗಳು ಈಗ ಮಾಪನ ವ್ಯವಸ್ಥೆಯ ಭಾಗವಾಗುವುದನ್ನು ಖಚಿತಪಡಿಸುವ ಮೂಲಕ ಐಐಪಿ ಯನ್ನು ಬಲಪಡಿಸುತ್ತದೆ.

ಪ್ರಶ್ನೆ 13: ಐಟಂ ಆಯ್ಕೆಯ ನಂತರ ಐಟಂ ಗುಂಪುಗಳನ್ನು ಹೇಗೆ ರಚಿಸಲಾಯಿತು?

ಉತ್ತರ:        ಮಾಸಿಕ ಡೇಟಾ ವರದಿ ಮಾಡುವಿಕೆಯಲ್ಲಿ ಸ್ಥಿರತೆ, ಹೋಲಿಕೆ ಮತ್ತು ಕಾರ್ಯಾಚರಣೆಯ ಕಾರ್ಯಸಾಧ್ಯತೆಯನ್ನು ಖಚಿತಪಡಿಸಿಕೊಳ್ಳಲು ಕೈಗಾರಿಕಾ ಗುಂಪಿನೊಳಗಿನ ಸಾಮ್ಯತೆಯ ಆಧಾರದ ಮೇಲೆ ಉತ್ಪನ್ನಗಳನ್ನು ಒಟ್ಟುಗೂಡಿಸಿ ಐಟಂ ಗುಂಪುಗಳನ್ನು ರಚಿಸಲಾಗಿದೆ.

ಪ್ರಶ್ನೆ 14:        ಹೊಸ ಐಐಪಿ ಸರಣಿಯು ನವೀಕರಿಸಬಹುದಾದ ಇಂಧನ ಉತ್ಪಾದನೆಗೆ ಪ್ರತ್ಯೇಕ ಸೂಚ್ಯಂಕವನ್ನು ಪ್ರಸಾರ ಮಾಡುತ್ತದೆಯೇ?

ಉತ್ತರ:        ಹೌದು, ಹೊಸ ಐಐಪಿ ಸರಣಿಯಲ್ಲಿ ನವೀಕರಿಸಬಹುದಾದ ಮೂಲಗಳ ಮೂಲಕ ವಿದ್ಯುತ್ ಉತ್ಪಾದನೆಯನ್ನು ಪ್ರತ್ಯೇಕವಾಗಿ ಗುರುತಿಸಲಾಗಿದೆ.

ಪ್ರಶ್ನೆ 15: ಐಐಪಿ ಯಲ್ಲಿ "ತೂಕ" (weight) ಎಂದರೇನು?

ಉತ್ತರ:        ತೂಕಗಳು ಒಟ್ಟು ಕೈಗಾರಿಕಾ ಉತ್ಪಾದನೆಯಲ್ಲಿ ಒಟ್ಟು ಮೌಲ್ಯವರ್ಧನೆ (ಜಿವಿಎ) ಅಥವಾ ಒಟ್ಟು ಉತ್ಪಾದನಾ ಮೌಲ್ಯಕ್ಕೆ (ಜಿವಿಒ) ನೀಡಿದ ಕೊಡುಗೆಯ ಆಧಾರದ ಮೇಲೆ ವಲಯಗಳು, ಕೈಗಾರಿಕಾ ಗುಂಪುಗಳು ಅಥವಾ ಐಟಂ ಸಾಪೇಕ್ಷ ಪ್ರಾಮುಖ್ಯತೆಯನ್ನು ಸೂಚಿಸುತ್ತವೆ.

ಪ್ರಶ್ನೆ 16:        ಐಐಪಿ ಯ ಹೊಸ ಸರಣಿಯಲ್ಲಿ ವಲಯ ಮಟ್ಟದ ತೂಕವನ್ನು ಹೇಗೆ ನಿರ್ಧರಿಸಲಾಗುತ್ತದೆ?

ಉತ್ತರ:        ಐಐಪಿ ಯಲ್ಲಿನ ವಲಯ ಮಟ್ಟದ ತೂಕವನ್ನು 2022-23ರ ಮೂಲ ವರ್ಷದ ರಾಷ್ಟ್ರೀಯ ಲೆಕ್ಕಪತ್ರ ಅಂಕಿಅಂಶಗಳಿಗೆ ಅನುಗುಣವಾಗಿ, ಹಣಕಾಸು ವರ್ಷ 2022-23 ರಲ್ಲಿ ಪ್ರಸ್ತುತ ಬೆಲೆಗಳಲ್ಲಿ ಒಟ್ಟು ಮೌಲ್ಯವರ್ಧನೆಯಲ್ಲಿ (ಜಿವಿಎ) ಪ್ರತಿ ವಲಯದ ಪಾಲಿನ ಆಧಾರದ ಮೇಲೆ ಪಡೆಯಲಾಗುತ್ತದೆ.

ಪ್ರಶ್ನೆ 17:        ತಯಾರಿಕಾ ವಲಯದಲ್ಲಿ ಎನ್‌ ಐ ಸಿ 2/3/4-ಡಿಜಿಟ್ ಮಟ್ಟದಲ್ಲಿ ತೂಕವನ್ನು ಹೇಗೆ ವಿತರಿಸಲಾಗುತ್ತದೆ?

ಉತ್ತರ:        ತಯಾರಿಕಾ ವಲಯದ ಒಟ್ಟು ತೂಕವನ್ನು ಎ ಎಸ್‌ ಐ 2022-23 ರಲ್ಲಿನ ಅವುಗಳ ಆಯಾ ಜಿವಿಎಗೆ ಅನುಗುಣವಾಗಿ ಎನ್‌ ಐ ಸಿ 2-ಡಿಜಿಟ್ ಕೈಗಾರಿಕಾ ಗುಂಪುಗಳಾದ್ಯಂತ ವಿತರಿಸಲಾಗುತ್ತದೆ. ಎನ್‌ ಐ ಸಿ 2-ಡಿಜಿಟ್ ಮಟ್ಟದಲ್ಲಿ ಪಡೆದ ತೂಕವನ್ನು ಎ ಎಸ್‌ ಐ 2022-23 ರಲ್ಲಿನ ಅವುಗಳ ಆಯಾ ಜಿವಿಎ ಅಂಕಿಅಂಶಗಳಿಗೆ ಅನುಗುಣವಾಗಿ 3-ಡಿಜಿಟ್‌ ಗೆ ಮತ್ತಷ್ಟು ವಿತರಿಸಲಾಗುತ್ತದೆ. ಎನ್‌ ಐ ಸಿ 3-ಡಿಜಿಟ್ ಮಟ್ಟದ ತೂಕವನ್ನು ನಂತರ ಎ ಎಸ್‌ ಐ 2022-23 ರಲ್ಲಿನ ಜಿವಿಎ ಅಂಕಿಅಂಶಗಳಲ್ಲಿನ ಅವುಗಳ ಪಾಲನ್ನು ಬಳಸಿ ಎನ್‌ ಐ ಸಿ 4-ಡಿಜಿಟ್‌ ಗಳ ನಡುವೆ ವಿತರಿಸಲಾಗುತ್ತದೆ.

ಪ್ರಶ್ನೆ 18: ತಯಾರಿಕಾ ವಲಯದಲ್ಲಿ ಐಟಂಮಟ್ಟದಲ್ಲಿ ತೂಕವನ್ನು ಹೇಗೆ ವಿತರಿಸಲಾಗುತ್ತದೆ?

ಉತ್ತರ:        4-ಡಿಜಿಟ್ ಕೈಗಾರಿಕಾ ತೂಕವನ್ನು ಎ ಎಸ್‌ ಐ 2022-23 ರ ಪ್ರಕಾರ ಆಯಾ 4-ಡಿಜಿಟ್ ಕೈಗಾರಿಕಾ ಗುಂಪಿನೊಳಗೆ ಅವುಗಳ ಒಟ್ಟು ಉತ್ಪಾದನಾ ಮೌಲ್ಯದ (ಜಿವಿಒ) ಕೊಡುಗೆಗೆ ಅನುಗುಣವಾಗಿ ಆಯ್ಕೆಮಾಡಿದ ಐಟಂ ನಡುವೆ ವಿತರಿಸಲಾಗುತ್ತದೆ.

ಪ್ರಶ್ನೆ 19:        2022-23 ರ ಹೊಸ ಐಐಪಿ ಸರಣಿಯಲ್ಲಿ ಐಟಂ ಬುಟ್ಟಿಯಲ್ಲಿ ಆದ ಬದಲಾವಣೆಗಳು ಯಾವುವು?

ಉತ್ತರ:        ಹಳೆಯ ಸರಣಿಯೊಂದಿಗೆ ಹೊಸ ಐಐಪಿ ಸರಣಿಯ ಐಟಂ ಬುಟ್ಟಿಯ ಹೋಲಿಕೆ ಈ ಕೆಳಗಿನಂತಿದೆ:

ಐಟಂ ಬುಟ್ಟಿ	ಐಐಪಿ 2011-12 ಸರಣಿಯಲ್ಲಿನ ಐಟಂ ಗುಂಪು	ಐಐಪಿ 2022-23 ಸರಣಿಯಲ್ಲಿನ ಐಟಂ ಗುಂಪು
ಗಣಿಗಾರಿಕೆ ಮತ್ತು ಕಲ್ಲು ಗಣಿಗಾರಿಕೆ	1 (29)	3 (44)
ತಯಾರಿಕೆ	405	455
ವಿದ್ಯುತ್ ಮತ್ತು ಅನಿಲ ಪೂರೈಕೆ	1	3
ನೀರು ಪೂರೈಕೆ, ಒಳಚರಂಡಿ ಮತ್ತು ತ್ಯಾಜ್ಯ ನಿರ್ವಹಣೆ	--	2
ಒಟ್ಟು ಐಟಂ ಗುಂಪುಗಳ ಸಂಖ್ಯೆ	407	463

ಪ್ರಶ್ನೆ 20: ಹಳೆಯ ಸರಣಿಗೆ ಹೋಲಿಸಿದರೆ ಹೊಸ ಸರಣಿಯಲ್ಲಿ ಎಷ್ಟು ಹೊಸ ಐಟಂ ಗುಂಪುಗಳನ್ನು ಸೇರಿಸಲಾಗಿದೆ?

ಉತ್ತರ: ಹೊಸ ಐಐಪಿ ಸರಣಿಯಲ್ಲಿ ಒಟ್ಟು 120 ಹೊಸ ಐಟಂ ಗುಂಪುಗಳನ್ನು ಸೇರಿಸಲಾಗಿದೆ. ಕೆಲವು ಉದಾಹರಣೆಗಳೆಂದರೆ: ಮ್ಯಾಗ್ನೆಟಿಕ್ ಪಟ್ಟಿಯನ್ನು ಹೊಂದಿರುವ ಕಾರ್ಡ್‌ ಗಳು (ಉದಾ. ಡೆಬಿಟ್ ಕಾರ್ಡ್, ಕ್ರೆಡಿಟ್ ಕಾರ್ಡ್), ಸಿಸಿಟಿವಿ ಕ್ಯಾಮೆರಾ, ನೇಯದ ಜವಳಿ ವಸ್ತುಗಳು, ವಿಮಾನ ಮತ್ತು ಬಾಹ್ಯಾಕಾಶ ನೌಕೆಯ ಭಾಗಗಳು, ಸ್ಟೆಂಟ್‌ ಗಳು, ಲಸಿಕೆಗಳು (ಪಶುವೈದ್ಯಕೀಯ ಹೊರತುಪಡಿಸಿ).

ಪ್ರಶ್ನೆ 21: ಹಳೆಯ ಸರಣಿಗೆ ಹೋಲಿಸಿದರೆ ಹೊಸ ಸರಣಿಯಲ್ಲಿ ಎಷ್ಟು ಐಟಂ ಗುಂಪುಗಳನ್ನು ಕೈಬಿಡಲಾಗಿದೆ?

ಉತ್ತರ: ಹೊಸ ಐಐಪಿ ಸರಣಿಯಲ್ಲಿ ಒಟ್ಟು 64 ಐಟಂ ಗುಂಪುಗಳನ್ನು ಕೈಬಿಡಲಾಗಿದೆ. ಕೆಲವು ಉದಾಹರಣೆಗಳೆಂದರೆ: ಸೀಮೆಎಣ್ಣೆ, ಫ್ಲೋರೊಸೆಂಟ್ ಟ್ಯೂಬ್‌ ಗಳು ಮತ್ತು ಸಿ ಎಫ್‌ ಎಲ್‌ ಗಳು, ಸೈಕಲ್/ಟ್ರೈಸಿಕಲ್/ರಿಕ್ಷಾ ಟೈರ್‌ ಗಳ ಟ್ಯೂಬ್‌ ಗಳು, ಎಲ್‌ ಎಮ್‌ ವಿ ಟೈರ್‌ ಗಳ ಟ್ಯೂಬ್‌ ಗಳು, ಮುದ್ರಣ ಯಂತ್ರಗಳು, ಹೊಲಿಗೆ ಯಂತ್ರಗಳು.

ಪ್ರಶ್ನೆ 22: ಐಟಂ ಗುಂಪುಗಳ ಸಂಖ್ಯೆಯನ್ನು ಹೆಚ್ಚಿಸುವುದರ ಪ್ರಾಮುಖ್ಯತೆ ಏನು?

ಉತ್ತರ: ವಿಸ್ತೃತ ಐಟಂ ಬುಟ್ಟಿಯು ಪ್ರಾತಿನಿಧ್ಯವನ್ನು ಸುಧಾರಿಸುತ್ತದೆ, ಕೈಗಾರಿಕಾ ಉತ್ಪಾದನೆಯಲ್ಲಿನ ವೈವಿಧ್ಯತೆಯನ್ನು ಸೆರೆಹಿಡಿಯುತ್ತದೆ ಮತ್ತು ಉದಯೋನ್ಮುಖ ಕೈಗಾರಿಕಾ ಉತ್ಪನ್ನಗಳು ಹಾಗೂ ತಂತ್ರಜ್ಞಾನಗಳನ್ನು ಪ್ರತಿಬಿಂಬಿಸುತ್ತದೆ.

ಪ್ರಶ್ನೆ 23: ಹೊಸ ಐಐಪಿ ಸರಣಿಯನ್ನು ಪ್ರಾರಂಭಿಸುವ ಸಮಯದಲ್ಲಿ ಲಿಂಕಿಂಗ್ ಫ್ಯಾಕ್ಟರ್ ಅನ್ನು ಬಿಡುಗಡೆ ಮಾಡಲಾಗುತ್ತದೆಯೇ?

ಉತ್ತರ: ಹೌದು. 2022-23ರ ಮೂಲ ವರ್ಷದ ಹೊಸ ಐಐಪಿ ಸರಣಿಯನ್ನು ಪ್ರಾರಂಭಿಸುವ ಸಮಯದಲ್ಲಿ, ಹಿಂದಿನ ಸರಣಿಯನ್ನು ಹೊಸ ಸರಣಿಯೊಂದಿಗೆ ಲಿಂಕ್ ಮಾಡಲು ವಲಯ ಮಟ್ಟದಲ್ಲಿ ಲಿಂಕಿಂಗ್ ಫ್ಯಾಕ್ಟರ್ ಅನ್ನು ಬಿಡುಗಡೆ ಮಾಡಲಾಗುತ್ತದೆ.

ಲಿಂಕಿಂಗ್ ಫ್ಯಾಕ್ಟರ್ ಅನ್ನು ಜ್ಯಾಮಿತೀಯ ಸರಾಸರಿ (Geometric Mean - GM) ವಿಧಾನವನ್ನು ಬಳಸಿ ಈ ಕೆಳಗಿನಂತೆ ಲೆಕ್ಕಹಾಕಲಾಗುತ್ತದೆ:

ಪ್ರಶ್ನೆ 24: ಐಐಪಿ ಯ ಹೊಸ ಸರಣಿಯಲ್ಲಿ ವಿಭಿನ್ನ ಬಳಕೆಯ ಆಧಾರಿತ ವರ್ಗಗಳು ಯಾವುವು?

ಉತ್ತರ: 2011-12ರ ಸರಣಿಯ ಆರು ಬಳಕೆಯ ಆಧಾರಿತ ವರ್ಗಗಳು ಹೊಸ ಐಐಪಿ ಸರಣಿಯಲ್ಲೂ ಮುಂದುವರಿಯಲಿವೆ. ಆದಾಗ್ಯೂ, ವರ್ಗಗಳನ್ನು ಬದಲಾಯಿಸಲಾಗಿಲ್ಲ; ಆದರೆ ಬಳಕೆಯ ಆಧಾರಿತ ವರ್ಗೀಕರಣದ ಅಡಿಯಲ್ಲಿ ಪ್ರತ್ಯೇಕ ಐಟಂ ವರ್ಗೀಕರಣಗಳನ್ನು ವಿವರವಾಗಿ ಪರಿಶೀಲಿಸಲಾಗಿದೆ ಮತ್ತು ನವೀಕರಿಸಲಾಗಿದೆ. ಆರು ಬಳಕೆಯ ಆಧಾರಿತ ವರ್ಗಗಳು ಈ ಕೆಳಗಿನಂತಿವೆ:

1. ಪ್ರಾಥಮಿಕ ಸರಕುಗಳು: ನೈಸರ್ಗಿಕ ಮೂಲಗಳಿಂದ ನೇರವಾಗಿ ಪಡೆಯಲಾಗುವ ಮತ್ತು ಉತ್ಪಾದನೆ ಹಾಗೂ ವಿದ್ಯುತ್ ಉತ್ಪಾದನಾ ಚಟುವಟಿಕೆಗಳಲ್ಲಿ ಮುಂದಿನ ಸಂಸ್ಕರಣೆ ಮತ್ತು ಬಳಕೆಗಾಗಿ ಬಳಸಲಾಗುವ ಸರಕುಗಳು. ಉದಾಹರಣೆಗೆ: ಅದಿರುಗಳು ಮತ್ತು ಖನಿಜಗಳು (ಸಾರೀಕೃತ ಸೇರಿದಂತೆ); ಇಂಧನಗಳು (ಡೀಸೆಲ್, ಏವಿಯೇಷನ್ ಟರ್ಬೈನ್ ಫ್ಯುಯೆಲ್, ಪೆಟ್ರೋಲ್, ಎಲ್‌ ಪಿ ಜಿ ಇತ್ಯಾದಿ) ಮತ್ತು ವಿದ್ಯುತ್. ಈ ವರ್ಗವು ಪೂರೈಕೆ ಸರಪಳಿಯ ಸೋರ್ಸಿಂಗ್‌ ಭಾಗದ ಬಗ್ಗೆ ಮಾಹಿತಿ ನೀಡುತ್ತದೆ.
2. ಬಂಡವಾಳ ಸರಕುಗಳು: ಇವು ಮಧ್ಯಂತರ ಸರಕುಗಳನ್ನು ಹೊರತುಪಡಿಸಿ, ಇತರ ಸರಕುಗಳು ಅಥವಾ ಸೇವೆಗಳ ಉತ್ಪಾದನೆಯಲ್ಲಿ ಬಳಸಲಾಗುವ (ಆದರೆ ಇನ್‌ಪುಟ್‌ ಗಳಾಗಿ ಅಲ್ಲ) ಸಿದ್ಧಪಡಿಸಿದ ಸರಕುಗಳನ್ನು ಒಳಗೊಂಡಿರುತ್ತವೆ. ಸಾಮಾನ್ಯವಾಗಿ, ಬಂಡವಾಳ ಸರಕುಗಳು ಸ್ಪಷ್ಟವಾದ ಆಸ್ತಿಗಳಾಗಿದ್ದು, ಉತ್ಪಾದನಾ ಸಾಧನಗಳಿಗಾಗಿ ಬಳಸಲಾಗುತ್ತದೆ, ಉದಾ. ಸ್ಥಾವರ ಮತ್ತು ಯಂತ್ರೋಪಕರಣಗಳು. ಘಟಕಗಳು, ಯಂತ್ರೋಪಕರಣಗಳು ಮತ್ತು ಸರಕುಗಳನ್ನು ಮುಂದಿನ ಹೂಡಿಕೆಗಳಿಗಾಗಿ ಬಳಸಲಾಗುತ್ತದೆ. ಉದಾಹರಣೆಗೆ: ಬಾಯ್ಲರ್‌ ಗಳು, ಏರ್ ಮತ್ತು ಗ್ಯಾಸ್ ಕಂಪ್ರೆಸರ್‌ ಗಳು, ಟ್ರ್ಯಾಕ್ಟರ್‌ ಗಳು, ಟ್ರಾನ್ಸ್‌ ಫಾರ್ಮರ್‌ ಗಳು, ವಾಣಿಜ್ಯ ವಾಹನಗಳು ಮತ್ತು ಟೆಕ್ಸ್‌ ಟೈಲ್ ಯಂತ್ರೋಪಕರಣಗಳಂತಹ ಎಲ್ಲಾ ಯಂತ್ರೋಪಕರಣಗಳು. ಬಂಡವಾಳ ವೆಚ್ಚದ ಚಕ್ರಗಳನ್ನು ಅರ್ಥಮಾಡಿಕೊಳ್ಳುವಲ್ಲಿ ಈ ವರ್ಗಗಳು ಅತ್ಯಂತ ಉಪಯುಕ್ತವಾಗಿವೆ.
3. ಮಧ್ಯಂತರ ಸರಕುಗಳು: ಅಪೂರ್ಣ ಉತ್ಪನ್ನವಾಗಿ ಉತ್ಪಾದಿಸಲಾದ (ಅಂತಿಮ ಬಳಕೆಗಾಗಿ ಅಲ್ಲದ) ಅಥವಾ ಮುಂದಿನ ಫಿನಿಶಿಂಗ್‌ ಗಾಗಿ ಉತ್ಪಾದನೆಯಲ್ಲಿ ಇನ್‌ಪುಟ್ ಆಗಿ ಹೋಗುವ ಅಥವಾ ಉತ್ಪನ್ನದ ಒಂದು ಭಾಗವಾಗಿ ರೂಪುಗೊಳ್ಳುವ ಯಾವುದೇ ಸರಕು/ಉತ್ಪನ್ನವನ್ನು ಮಧ್ಯಂತರ ಸರಕುಗಳು ಎಂದು ವರ್ಗೀಕರಿಸಲಾಗುತ್ತದೆ. ಉದಾಹರಣೆಗೆ: ಹತ್ತಿ ನೂಲು, ಪ್ಲೈವುಡ್, ಸ್ಟೀಲ್ ಟ್ಯೂಬ್‌ ಗಳು/ಪೈಪ್‌ ಗಳು, ಫಾಸ್ಟೆನರ್‌ ಗಳು, ಆಟೋಮೊಬೈಲ್ ಭಾಗಗಳು ಇತ್ಯಾದಿ. ಮಧ್ಯಂತರ ಸರಕುಗಳು ಪೂರೈಕೆ ಸರಪಳಿಯಲ್ಲಿ ಅತ್ಯಗತ್ಯವಾಗಿದ್ದು, ಇವು ಉತ್ಪಾದನಾ ದಕ್ಷತೆ ಮತ್ತು ಅಂತಿಮ ಉತ್ಪನ್ನದ ವೆಚ್ಚದ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸಲು ನಿರ್ಣಾಯಕವಾಗಿವೆ, ಇದು ವಿದೇಶಿ ವ್ಯಾಪಾರ ಮತ್ತು ಜಾಗತಿಕ ಮೌಲ್ಯ ಸರಪಳಿಗಳ ಮೇಲೆ ವಸ್ತುತಃ ಪರಿಣಾಮ ಬೀರುತ್ತದೆ.
4. ಮೂಲಸೌಕರ್ಯ/ನಿರ್ಮಾಣ ಸರಕುಗಳು: ಮೂಲಸೌಕರ್ಯ ಉದ್ಯಮ ಅಥವಾ ನಿರ್ಮಾಣ ಉದ್ಯಮದಲ್ಲಿ ಪ್ರಾಥಮಿಕವಾಗಿ ಇನ್‌ಪುಟ್ ಆಗಿ ಬಳಸಲಾಗುವ ಸಿದ್ಧಪಡಿಸಿದ ಸರಕುಗಳನ್ನು ಮೂಲಸೌಕರ್ಯ/ನಿರ್ಮಾಣ ಸರಕುಗಳ ಅಡಿಯಲ್ಲಿ ವರ್ಗೀಕರಿಸಲಾಗಿದೆ. ಗ್ರಾಹಕ ಬಾಳಿಕೆ ಬರುವ ವಸ್ತುಗಳು ಅಥವಾ ಮಧ್ಯಂತರ ಸರಕುಗಳ ಅಡಿಯಲ್ಲಿ ವರ್ಗೀಕರಿಸಲು ಸಾಧ್ಯವಾಗದ ಐಟಂನ್ನು ನಿಖರವಾಗಿ ವರ್ಗೀಕರಿಸಲು ಈ ವರ್ಗವನ್ನು ರಚಿಸಲಾಗಿದೆ. ಉದಾಹರಣೆಗೆ: ಬಣ್ಣ, ಸಿಮೆಂಟ್, ಕೇಬಲ್‌, ಇಟ್ಟಿಗೆ ಮತ್ತು ಟೈಲ್ಸ್‌, ರೈಲು ಸಾಮಗ್ರಿಗಳು ಇತ್ಯಾದಿ. ಈ ಸರಕುಗಳು ದಕ್ಷ, ಸುರಕ್ಷಿತ, ವೆಚ್ಚ-ಪರಿಣಾಮಕಾರಿ ವ್ಯಾಪ್ತಿಯನ್ನು ಖಚಿತಪಡಿಸುತ್ತವೆ ಮತ್ತು ಅಂತರರಾಷ್ಟ್ರೀಯ ವ್ಯಾಪಾರದಲ್ಲಿ ತುಲನಾತ್ಮಕ ಪ್ರಯೋಜನದ ಮೇಲೆ ಪ್ರಮುಖ ಪ್ರಭಾವ ಬೀರುತ್ತವೆ.
5. ಬಾಳಿಕೆ ಬರುವ ಗ್ರಾಹಕ ಸರಕುಗಳು: ಗ್ರಾಹಕರರಿಂದ ನೇರವಾಗಿ ಬಳಸಲ್ಪಡುವ ಮತ್ತು ಗಮನಾರ್ಹ ಜೀವಿತಾವಧಿಯನ್ನು ಹೊಂದಿರುವ (ಸಾಮಾನ್ಯವಾಗಿ ಒಂದು ವರ್ಷಕ್ಕಿಂತ ಹೆಚ್ಚು) ಉತ್ಪನ್ನಗಳನ್ನು ಗ್ರಾಹಕ ಬಾಳಿಕೆ ಬರುವ ಸರಕುಗಳು ಎಂದು ವರ್ಗೀಕರಿಸಲಾಗಿದೆ. ಉದಾಹರಣೆಗೆ: ಪ್ರೆಶರ್ ಕುಕ್ಕರ್, ಏರ್ ಕಂಡಿಷನರ್‌, ಟೈರ್, ಟೆಲಿಫೋನ್ ಮತ್ತು ಮೊಬೈಲ್ ಉಪಕರಣಗಳು, ಟಿವಿ ಸೆಟ್‌, ಪ್ರಯಾಣಿಕ ಕಾರುಗಳು, ದ್ವಿಚಕ್ರ ವಾಹನಗಳು (ಮೋಟಾರ್ ಸೈಕಲ್‌/ಸ್ಕೂಟರ್‌), ಚಿನ್ನದ ಆಭರಣಗಳು ಇತ್ಯಾದಿ. ಗ್ರಾಹಕ ಬಾಳಿಕೆ ಬರುವ ವಸ್ತುಗಳು ಗ್ರಾಹಕ ಮತ್ತು ವ್ಯವಹಾರದ ವಿಶ್ವಾಸದ ಪ್ರಮುಖ ಸೂಚಕವಾಗಿದ್ದು ಒಟ್ಟು ಬೇಡಿಕೆಯ ಪ್ರಮುಖ ಭಾಗವಾಗಿವೆ.
6. ತ್ವರಿತ ಬಾಳಿಕೆಯ ಗ್ರಾಹಕ ಸರಕುಗಳು: ಗ್ರಾಹಕರ ತಕ್ಷಣದ ಬಳಕೆಗಾಗಿ ಇರುವ ಮತ್ತು ದೀರ್ಘಕಾಲದವರೆಗೆ ಸಂಗ್ರಹಿಸಿಡಲು ಸಾಧ್ಯವಾಗದ ಸರಕುಗಳು ತ್ವರಿತ ಬಾಳಿಕೆಯ ಸರಕುಗಳಾಗಿವೆ. ಉದಾಹರಣೆಗೆ: ಖಾದ್ಯ ತೈಲಗಳು, ಹಾಲು, ಹಾಲಿನ ಪುಡಿ, ಗೋಧಿ ಹಿಟ್ಟು, ಅಕ್ಕಿ, ಬಿಸ್ಕತ್ತುಗಳು/ಕುಕೀಸ್, ಸಕ್ಕರೆ, ಚಹಾ, ಕಾಫಿ, ಔಷಧಗಳು ಇತ್ಯಾದಿ. ಇಂತಹ ಸರಕುಗಳು ಗ್ರಾಹಕ ವೆಚ್ಚದ ಸ್ಥಿರ, ನಿರಂತರ ಮತ್ತು ಹೆಚ್ಚಿನ ಪ್ರಮಾಣದ ಹರಿವನ್ನು ಸೃಷ್ಟಿಸುತ್ತವೆ, ಇದು ಜಿಡಿಪಿಯನ್ನು ಚಾಲನೆ ಮಾಡುತ್ತದೆ. ಈ ಬೇಡಿಕೆಯ ಬಹುಪಾಲು ವಿವೇಚನಾ ರಹಿತವಾಗಿದ್ದು, ಆರ್ಥಿಕ ಚಕ್ರಗಳನ್ನು ಲೆಕ್ಕಿಸದೆ ಆರ್ಥಿಕತೆಯನ್ನು ಮುನ್ನಡೆಸುತ್ತದೆ.

ಪ್ರಶ್ನೆ 25: ಯಾವ ರೀತಿಯ ಡೇಟಾ ವೇರಿಯಬಲ್ (ಪ್ರಮಾಣ ಅಥವಾ ಮೌಲ್ಯ) ಅನ್ನು ಬಳಸಲಾಗುತ್ತದೆ?

ಉತ್ತರ: ಹಿಂದಿನ 2011-12ರ ಸರಣಿಯಂತೆಯೇ, ಕೈಗಾರಿಕಾ ಉತ್ಪಾದನೆಯನ್ನು ಸೆರೆಹಿಡಿಯುವಲ್ಲಿ ಹೈಬ್ರಿಡ್ ವಿಧಾನವನ್ನು ಬಳಸಲಾಗುತ್ತದೆ. ಏಕರೂಪದ ಐಟಂ ಗುಂಪುಗಳ ಉತ್ಪಾದನೆಯನ್ನು ಸೆರೆಹಿಡಿಯಲು ಪ್ರಮಾಣದ ಅಳತೆಗಳನ್ನು ಬಳಸಲಾಗುತ್ತದೆ ಮತ್ತು ಉತ್ಪನ್ನಗಳು ವೈವಿಧ್ಯಮಯವಾಗಿರುವಲ್ಲಿ ಅಥವಾ ಗುಣಮಟ್ಟದ ವ್ಯತ್ಯಾಸಗಳು ಪ್ರಮಾಣದ ಹೋಲಿಕೆಯನ್ನು ಕಷ್ಟಕರವಾಗಿಸುವಲ್ಲಿ ಮೌಲ್ಯ-ಆಧಾರಿತ ಸೂಚಕಗಳನ್ನು ಬಳಸಲಾಗುತ್ತದೆ. ಉತ್ಪಾದನಾ ಅವಧಿಯು ಒಂದು ತಿಂಗಳಿಗಿಂತ ಹೆಚ್ಚಿರುವ ವಸ್ತುಗಳಿಗೆ, ಮೌಲ್ಯದ ರೂಪದಲ್ಲಿರುವ "ಪ್ರಗತಿಯಲ್ಲಿರುವ ಕೆಲಸ" ವನ್ನು ಉತ್ಪಾದನೆಯ ಅಳತೆಯಾಗಿ ತೆಗೆದುಕೊಳ್ಳಲಾಗುತ್ತದೆ.

ಪ್ರಶ್ನೆ 26: ಹೊಸ ಸರಣಿಯ ಚಾಲ್ತಿ ಅವಧಿಯಲ್ಲಿ ಕಾರ್ಖಾನೆಗಳನ್ನು ಬದಲಾಯಿಸಲು ಅವಕಾಶವಿದೆಯೇ?

ಉತ್ತರ: ಹೌದು. ಕಾರ್ಖಾನೆಗಳು ದೀರ್ಘಕಾಲದವರೆಗೆ ಯಾವುದೇ ಮಾಹಿತಿ ನೀಡದಿದ್ದರೆ (ಪ್ರತಿಕ್ರಿಯಿಸದಿದ್ದರೆ) ಅಥವಾ ಶಾಶ್ವತವಾಗಿ ಮುಚ್ಚಿಹೋಗಿದ್ದರೆ ಎದುರಾಗುವ ಸವಾಲುಗಳನ್ನು ನಿವಾರಿಸಲು, ಹೊಸ ಐಐಪಿ ಸರಣಿಯಲ್ಲಿ ಅಂತಹ ಕಾರ್ಖಾನೆಗಳ ಜಾಗಕ್ಕೆ ಬೇರೆ ಕಾರ್ಖಾನೆಗಳನ್ನು ಬದಲಾಯಿಸುವ ಅವಕಾಶವನ್ನು ಕಲ್ಪಿಸಲಾಗಿದೆ.

ಪ್ರಶ್ನೆ 27: ಹೊಸ ಸರಣಿಯಲ್ಲಿ ಐಐಪಿ ಯನ್ನು ಸಂಕಲಿಸಲು ಯಾವ ರೀತಿಯ ಸೂತ್ರವನ್ನು ಬಳಸಲಾಗುತ್ತದೆ?

ಉತ್ತರ:  ಸೂಚ್ಯಂಕವನ್ನು ಸಂಕಲಿಸಲು ಲಾಸ್ಪೆರೆಸ್ ಸ್ಥಿರ ಆಧಾರಿತ ಮಾದರಿಯ (Laspeyres fixed based type) ಸೂಚ್ಯಂಕ ಸೂತ್ರವನ್ನು ಬಳಸಲಾಗುತ್ತದೆ:

ಪ್ರಶ್ನೆ 28: ಎನ್‌ ಐ ಸಿ 2-ಡಿಜಿಟ್ ಮಟ್ಟದಲ್ಲಿ ಸೂಚ್ಯಂಕದ ಪ್ರಸಾರದಲ್ಲಿ ಯಾವ ಎನ್‌ ಐ ಸಿ ವರ್ಗೀಕರಣವನ್ನು ಬಳಸಲಾಗುತ್ತದೆ?

ಉತ್ತರ: ಐಐಪಿ ಯ ಹೊಸ ಸರಣಿಯಲ್ಲಿ ಸೂಚ್ಯಂಕವನ್ನು ಪ್ರಸಾರ ಮಾಡಲು ಎನ್‌ ಐ ಸಿ ಯ ಇತ್ತೀಚಿನ ಆವೃತ್ತಿಯಾದ ಎನ್‌ ಐ ಸಿ 2025 ಅನ್ನು ಬಳಸಲಾಗುತ್ತದೆ.

ಪ್ರಶ್ನೆ 29:   ಮೌಲ್ಯ-ವರದಿಯಾದ ವಸ್ತುಗಳಿಗೆ ಆದ್ಯತೆಯ ಬೆಲೆ ಡಿಫ್ಲೇಟರ್ ಯಾವುದು ಮತ್ತು ಮಧ್ಯಂತರ ಅವಧಿಯಲ್ಲಿ ಏನನ್ನು ಬಳಸಲಾಗುತ್ತದೆ?

ಉತ್ತರ: ಪ್ರಸ್ತುತ ಸಗಟು ಬೆಲೆ ಸೂಚ್ಯಂಕವನ್ನು ಮೌಲ್ಯ-ಆಧಾರಿತ ವಸ್ತುಗಳಿಗೆ ಡಿಫ್ಲೇಟರ್ ಆಗಿ ಬಳಸಲಾಗುತ್ತಿದೆ. ಔಟ್‌ಪುಟ್ ಪ್ರೊಡ್ಯೂಸರ್ ಪ್ರೈಸ್ ಇಂಡೆಕ್ಸ್ ಬಿಡುಗಡೆಯಾದ ನಂತರ, ಅದರ ಸ್ಥಿರತೆಯನ್ನು ಪರಿಶೀಲಿಸಿದ ಬಳಿಕ ಅದನ್ನೇ ಬಳಸಲಾಗುತ್ತದೆ.

ಪ್ರಶ್ನೆ 30: ಕಾರ್ಖಾನೆಗಳಿಂದ ಕಾಣೆಯಾದ ಮೌಲ್ಯಗಳು ಅಥವಾ ತಾತ್ಕಾಲಿಕ ಪ್ರತಿಕ್ರಿಯೆ ಇಲ್ಲದಿರುವುದನ್ನು ಹೊಸ ಐಐಪಿ ಹೇಗೆ ನಿರ್ವಹಿಸುತ್ತದೆ?

ಉತ್ತರ: ಒಂದು ಕಾರ್ಖಾನೆಯು 6 ತಿಂಗಳಿಗಿಂತ ಕಡಿಮೆ ಅವಧಿಗೆ ಪ್ರತಿಕ್ರಿಯಿಸದಿದ್ದರೆ, ಟಿಎಸಿ-ಐಐಪಿ ಶಿಫಾರಸು ಮಾಡಿದ ಇಂಪ್ಯುಟೇಶನ್ ವಿಧಾನವನ್ನು ಬಳಸಲಾಗುತ್ತದೆ.

ಪ್ರಶ್ನೆ 31: ಅಖಿಲ ಭಾರತ ಐಐಪಿ ಯ ಮೂಲ ವರ್ಷದ ಪರಿಷ್ಕರಣೆಗಾಗಿ ರಚಿಸಲಾದ ತಾಂತ್ರಿಕ ಸಲಹಾ ಸಮಿತಿಯ (ಟಿಎಸಿ) ಪ್ರಮುಖ ಪಾತ್ರವೇನು?

ಉತ್ತರ: ಟಿಎಸಿ-ಐಐಪಿ ಯ ಉಲ್ಲೇಖದ ನಿಯಮಗಳು ಪ್ರಸ್ತುತ ಇರುವ ಐಐಪಿ ಚೌಕಟ್ಟಿನ ಆಳವಾದ ಪರಿಶೀಲನೆಯನ್ನು ನಡೆಸುವುದು ಮತ್ತು ಮೂಲ ವರ್ಷದ ಪರಿಷ್ಕರಣೆಗಾಗಿ ಅಗತ್ಯವಾದ ಸಾಂಸ್ಥಿಕ ಮತ್ತು ರಚನಾತ್ಮಕ ಬದಲಾವಣೆಗಳನ್ನು ಶಿಫಾರಸು ಮಾಡುವುದು ಸೇರಿವೆ.

ಪ್ರಶ್ನೆ 32: ಚೈನ್-ಲಿಂಕ್ಡ್ ಸೂಚ್ಯಂಕಗಳ ಸಂಕಲನದ ವಿಧಾನವನ್ನು ಅಂತಿಮಗೊಳಿಸಲಾಗಿದೆಯೇ?

ಉತ್ತರ: ಚೈನ್-ಲಿಂಕ್ಡ್ ಸೂಚ್ಯಂಕಗಳ ಸಂಕಲನದ ವಿಧಾನವನ್ನು ಟಿಎಸಿ-ಐಐಪಿ ಪರಿಶೀಲಿಸಿದೆ ಮತ್ತು ಶಿಫಾರಸು ಮಾಡಿದೆ. ಈ ಸೂಚ್ಯಂಕಗಳನ್ನು ಆಂತರಿಕವಾಗಿ ತರಬಹುದು ಮತ್ತು ಅವುಗಳ ಸ್ಥಿರತೆ ಹಾಗೂ ಸ್ಥಿತಿಸ್ಥಾಪಕತ್ವವನ್ನು ವೀಕ್ಷಿಸಿದ ನಂತರವೇ ಪ್ರಾಯೋಗಿಕವಾಗಿ ಬಿಡುಗಡೆ ಮಾಡಬಹುದು ಎಂದು ಶಿಫಾರಸು ಮಾಡಲಾಗಿದೆ.

ಪ್ರಶ್ನೆ 33: ಹೊಸ ಸರಣಿಯೊಂದಿಗೆ ‘ಋತುಮಾನ-ಹೊಂದಾಣಿಕೆ ಮಾಡಿದ’ ಐಐಪಿಯನ್ನು ಬಿಡುಗಡೆ ಮಾಡಲಾಗುತ್ತದೆಯೇ?

ಉತ್ತರ: ಪುನರಾವರ್ತಿತ ಋತುಮಾನದ ಮಾದರಿಗಳನ್ನು ವಿಶ್ವಾಸಾರ್ಹವಾಗಿ ಗುರುತಿಸಲು ಮತ್ತು ಅಂದಾಜು ಮಾಡಲು ಸಾಕಷ್ಟು ಸುದೀರ್ಘ ಹಾಗೂ ಸ್ಥಿರವಾದ ‘ಕಾಲಾನುಕ್ರಮದ ದತ್ತಾಂಶ’ ಅಗತ್ಯವಿರುತ್ತದೆ. ಆದ್ದರಿಂದ, ಹೊಸ ಐಐಪಿ ಸರಣಿಯಲ್ಲಿ, ಸಾಕಷ್ಟು ವರ್ಷಗಳ ಕಾಲಾನುಕ್ರಮದ ದತ್ತಾಂಶ ಲಭ್ಯವಾದ ನಂತರವೇ ಋತುಮಾನ-ಹೊಂದಾಣಿಕೆಯ ಕಾರ್ಯವನ್ನು ಕೈಗೆತ್ತಿಕೊಳ್ಳಲಾಗುವುದು.

ಪ್ರಶ್ನೆ 34: ಬಳಕೆದಾರರು ಐಐಪಿ ಡೇಟಾವನ್ನು ಎಲ್ಲಿ ಪ್ರವೇಶಿಸಬಹುದು?

ಉತ್ತರ: ಐಐಪಿ ಡೇಟಾವನ್ನು ಅಧಿಕೃತ ಪತ್ರಿಕಾ ಪ್ರಕಟಣೆ ಮತ್ತು ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯದ ಪ್ರಕಟಣೆಯ ಮೂಲಕ ಬಿಡುಗಡೆ ಮಾಡಲಾಗುತ್ತದೆ. ಐಐಪಿ ಡೇಟಾವನ್ನು ಇ-ಸಾಂಖ್ಯಿಕ ಪೋರ್ಟಲ್ (MoSPI) ಮೂಲಕ ಇಲ್ಲಿ ಪ್ರವೇಶಿಸಬಹುದು: https://esankhyiki.mospi.gov.in

 

****

(ಪ್ರಕಟಣೆ ಐ.ಡಿ.: 2266052) ವಿಸಿಟರ್ ಕೌಂಟರ್ : 12