”فٹ انڈیا سنڈے آن سائیکل“ کے 75ویں ایڈیشن میں آج ملک بھر کے 8,000 سے زائد مقامات پر زبردست شرکت دیکھنے میں آئی، جہاں کامن ویلتھ گیمز ڈے منایا گیا اور احمد آباد میں 2030 کے تاریخی کامن ویلتھ گیمز کے لیے جوش و خروش کو مزید بڑھایا گیا۔

احمد آباد کے مشہور سابرمتی ریور فرنٹ سے قومی تقریبات کی قیادت کرتے ہوئے، نوجوانوں کے امور و کھیل اور محنت و روزگار کے مرکزی وزیر ڈاکٹر منسکھ منڈاویہ، گجرات کے نائب وزیر اعلیٰ جناب ہرش سنگھوی اور بالی ووڈ اداکار آیوشمان کھرانہ نے 5,000 سائیکل سواروں، کھلاڑیوں، نوجوان رضاکاروں اور فٹنس کے شوقین افراد کے ساتھ شرکت کی۔ اس موقع پر عوامی شمولیت اور کھیلوں کے جذبے کا شاندار مظاہرہ دیکھنے میں آیا۔

اس تقریب کی ایک بڑی خاص بات ڈاکٹر منسکھ منڈاویہ کے ہاتھوں کامن ویلتھ گیمز کے موضوع پر ایک خصوصی نمائش کا افتتاح تھا، جس میں بھارت کی کھیلوں کی کامیابیوں، کھیلو انڈیا مشن کے تحت کھیلوں کے بنیادی ڈھانچے کی ترقی، اور 2030 میں کامن ویلتھ گیمز کی صد سالہ تقریبات سے قبل ملک کے فروغ پاتے کھیلوں کے نظام کو اجاگر کیا گیا۔

تقریب میں متعدد دلچسپ سرگرمیاں بھی شامل تھیں، جن میں پکل بال، باکس کرکٹ، والی بال، رسہ کشی، اور کئی انٹرایکٹو کمیونٹی گیمز شامل تھے، جنہوں نے ہر عمر کے شرکاء کے لیے میلے جیسا ماحول پیدا کر دیا۔

اداکار آیوشمان کھرانہ نے سابق کامن ویلتھ گیمز میڈلسٹ اور اولمپین، جن میں گرجیت کور، رجنی ایتی مارپو، سونیکا ٹانڈی، انجم مودگل، انکور متل، اور ترپتی مرگنڈے شامل تھے، کے ساتھ شرکت کی۔ انہوں نے نوجوان شرکاء کی حوصلہ افزائی کی اور بھارت کے نوجوانوں میں فٹنس اور کھیلوں کے بڑھتے ہوئے رجحان کو مزید مضبوط کیا۔

اس تقریب میں کئی ممتاز معزز شخصیات اور کھیلوں کے رہنماؤں نے بھی شرکت کی، جن میں انڈین اولمپک ایسوسی ایشن کے سینیئر نائب صدر اجے پٹیل، اولمپک شوٹر اور کامن ویلتھ گیمز میڈلسٹ گگن نارنگ، کھیلو انڈیا کے ڈپٹی ڈائریکٹر جنرل جناب میانک سریواستو اور اولمپین و ایتھلیٹکس فیڈریشن آف انڈیا کے صدر ادیل سمرئی والا شامل تھے۔

تقریب کی ایک خصوصی ثقافتی جھلک معروف فنکار جناب انیش رانگریج کی جانب سے پیش کی گئی، جس میں گربا کی روایتی روح کو یوگا کے سائنسی پہلوؤں کے ساتھ منفرد انداز میں یکجا کیا گیا۔

اس کے علاوہ، مورارجی دیسائی نیشنل انسٹی ٹیوٹ آف یوگا کے ڈاکٹر پون کمار نے شرکا کے ساتھ ویلنس مشاورت اور رہنمائی کے سیشن کے ذریعے بات چیت کی، اور جامع فٹنس و صحت مند طرز زندگی کو فروغ دیا۔

2030 میں منعقد ہونے والے تاریخی صد سالہ کامن ویلتھ گیمز کی تیاریوں کے سلسلے میں، وزارت امور نوجوانان و کھیل ملک بھر میں شاندار، باہمی اور عوامی شمولیت پر مبنی اقدامات کا انعقاد جاری رکھے گی تاکہ عوامی شرکت کو مزید فروغ دیا جا سکے اور بھارت کے کھیلوں کے نظام کو مضبوط بنایا جا سکے۔

یہ ملک گیر تقریبات کامن ویلتھ گیمز تحریک کے بارے میں زیادہ آگاہی پیدا کرنے کے ساتھ ساتھ نوجوانوں کو فٹنس، کھیلوں، اور فعال طرزِ زندگی اپنانے کی ترغیب دینے کے لیے منعقد کی جا رہی ہیں، جبکہ بھارت 2030 میں سی ڈبلیو جی کی میزبانی کی تیاری کر رہا ہے۔

نوجوانوں کے امور و کھیل اور محنت و روزگار کے مرکزی وزیر ڈاکٹر منسکھ منڈاویہ نے کہا، ”آج کا دن بہت خاص ہے کیونکہ ہم ’فٹ انڈیا سنڈے آن سائیکل‘ کے 75ویں ایڈیشن اور کامن ویلتھ گیمز ڈے دونوں کا جشن منا رہے ہیں۔ مجھے اس بات پر فخر ہے کہ گجرات 2030 میں کامن ویلتھ گیمز کی میزبانی کرے گا، اور اس سے بھی زیادہ خوشی اس بات کی ہے کہ ہزاروں لوگ صبح سویرے فٹنس اور قوم سازی کے لیے اکٹھے ہوئے ہیں۔“

انہوں نے کہا، ”ایک صحت مند معاشرہ ہی ایک خوشحال ملک تعمیر کر سکتا ہے۔ اگر ہم واقعی معزز وزیر اعظم جناب نریندر مودی جی کے ’وکست بھارت‘ کے وژن کو حقیقت بنانا چاہتے ہیں تو ہر شہری کو فٹنس اور صحت مند طرزِ زندگی کو ترجیح دینی ہوگی۔ سائیکلنگ صرف ورزش نہیں بلکہ ایک تحریک ہے۔ یہ ہمیں صحت مند رکھتی ہے، آلودگی کم کرتی ہے اور ایندھن کی بچت میں مدد دیتی ہے، ساتھ ہی یہ معزز وزیرِ اعظم جناب نریندر مودی جی کی ایندھن کے کم استعمال کی اپیل سے بھی ہم آہنگ ہے۔ اگر ہم روزمرہ زندگی میں، حتیٰ کہ مختصر فاصلے طے کرنے کے لیے بھی سائیکلنگ اپنائیں، تو ہم ایک زیادہ صحت مند اور پائیدار بھارت کی تعمیر میں اپنا کردار ادا کر سکتے ہیں۔“

گجرات کے نائب وزیر اعلیٰ ہرش سنگھوی نے کہا، ”آج پورا شہر احمد آباد ’فٹ انڈیا سنڈے آن سائیکل‘ کے لیے متحرک نظر آیا، اور مجھے گجرات کے عوام کی جانب سے اس قدر زبردست ردِعمل دیکھ کر بے حد خوشی ہوئی۔ یہ حقیقت کہ ہزاروں شہری صبح سویرے فٹنس اور کھیلوں کے لیے باہر نکلے، صحت مند طرزِ زندگی کے بارے میں بڑھتی ہوئی آگاہی اور جوش و جذبے کی عکاسی کرتی ہے۔“

شہریوں، کھلاڑیوں، نوجوان رضاکاروں، اور فٹنس کے شوقین افراد کی بھرپور شرکت نے خطے میں کھیلوں کی ثقافت کی تیز رفتار ترقی کو ظاہر کیا اور 2030 کے کامن ویلتھ گیمز سے قبل احمد آباد کے عالمی کھیلوں کے مقابلوں کے ایک اہم مرکز کے طور پر ابھرنے کو مزید تقویت دی۔

اداکار اور فٹ انڈیا آئیکون آیوشمان کھرانہ نے کہا، ”مجھے واقعی خوشی ہے کہ آج یہاں ہر عمر کے لوگ موجود ہیں، لطف اندوز ہو رہے ہیں اور بھرپور توانائی کے ساتھ حصہ لے رہے ہیں۔ فٹ انڈیا اور آنے والے کامن ویلتھ گیمز 2030 کے درمیان اشتراک نہایت خوبصورت ہے کیونکہ یہ نوجوان بھارتیوں میں کھیلوں کی ثقافت کو فروغ دے رہا ہے۔ ’سنڈے آن سائیکل‘ ایک بہت دلچسپ اور مستقبل پر مبنی اقدام ہے۔“

انہوں نے مزید کہا، ”کھیل صرف تمغے جیتنے کا نام نہیں؛ یہ نظم و ضبط، قربانی، اور خواب پیدا کرنے کا ذریعہ ہیں۔ ہر کھلاڑی کے پیچھے ایک پورا خاندان ہوتا ہے جو قربانیاں دیتا ہے اور ان کے خوابوں کی حمایت کرتا ہے۔ ان کی کامیابی دراصل ملک کی کامیابی بن جاتی ہے۔ آج یہاں شریک بچوں کو دیکھ کر مجھے یقین ہے کہ بھارت کے مستقبل کے کئی میڈلسٹ ہمارے درمیان موجود ہیں۔ معزز وزیر اعظم جناب نریندر مودی جی کے وژن اور رہنمائی میں ایسے اقدامات بھارتی کھیلوں کے مستقبل کو تشکیل دے رہے ہیں۔“

دسمبر 2024 میں معزز وزیر اعظم جناب نریندر مودی کے تصور کردہ فٹ انڈیا موومنٹ کے تحت آغاز کے بعد سے، ”فٹ انڈیا سنڈے آن سائیکل“ بھارت کے سب سے بڑے عوامی شمولیت پر مبنی فٹنس اقدامات میں سے ایک بن چکا ہے، جو 3.07 لاکھ سے زائد مقامات تک پہنچ چکا ہے، 50 لاکھ سے زیادہ سائیکل سواروں کو شامل کر چکا ہے، اور زمینی و ڈیجیٹل شرکت کے ذریعے 7 کروڑ سے زائد بھارتیوں سے جڑ چکا ہے۔

وزارت امورِ نوجوانان و کھیل کی جانب سے سائیکلنگ فیڈریشن آف انڈیا (سی ایف آئی)، یوگاسن بھارت، راہگیری فاؤنڈیشن، مائی بائیکس، اور مائی بھارت کے اشتراک سے منعقد کیے جانے والے اس اقدام نے وزیر اعظم کے ”فٹنس کا ڈوز، آدھا گھنٹہ روز“ کے وژن کو مزید مضبوط بنایا ہے۔

جیسے جیسے احمد آباد 2030 میں تاریخی کامن ویلتھ گیمز کی میزبانی کی جانب پیش قدمی کر رہا ہے، آج کی یہ تقریب اس بات کی ایک طاقتور یاد دہانی بن کر سامنے آئی کہ ایک پوری قوم ایک زیادہ فِٹ، مضبوط، اور بلند حوصلہ کھیلوں کے مستقبل کی جانب ایک ساتھ سائیکل چلا رہی ہے۔

************

ش ح۔ ف ش ع

                                                                                                                                       U: 7486