گاندھی نگر، 24 مئی: نوجوانوں کے امور اور کھیلوں کے مرکزی وزیر ڈاکٹر منسکھ منڈاویہ نے آج ایس اے آئی این سی او ای گاندھی نگر میں کھیلوں کے کئی نئے بنیادی ڈھانچے کی سہولیات کا افتتاح کیا، اس کے ساتھ ہی انہوں نے ملک بھر میں عالمی معیار کے اعلیٰ کارکردگی والے کھیلوں کے ماحولیاتی نظام کی تعمیر کے لیے حکومت کے عزم کا اعادہ کیا۔

وزیر نے مرکز میں نئے تیار کردہ پیرا ایتھلیٹ ہاسٹل، سنٹرلائزڈ ڈائننگ ہال، اسٹرینتھ اینڈ کنڈیشننگ ہال، کثیر مقصد تربیتی ہال اور میڈیٹیشن پارک کا افتتاح کیا۔

یہ سہولیات تربیت، صحت یابی، غذائیت، کھیل سائنس اور ذہنی تندرستی میں مربوط تعاون کے ذریعے کھلاڑیوں کی تیاری کو مضبوط بنانے کے لیے تیار کی گئی ہیں۔

کھلاڑیوں، کوچ اور عہدیداروں سے خطاب کرتے ہوئے ڈاکٹر منڈاویہ نے کہا کہ وزیر اعظم نریندر مودی کی قیادت میں بھارت کا کھیلوں کا ماحولیاتی نظام ایک ایسی تبدیلی سے گزر رہا ہے جس میں کھلاڑیوں پر مرکوز ترقی اور کھیل کے جامع ڈھانچے پر خصوصی زور دیا جا رہا ہے۔

”وزیر اعظم نریندر مودی جی حقیقی معنوں میں ہمارے پیرا ایتھلیٹس کے ’پرم مترا‘ ہیں۔ ان کی قیادت میں بھارت نے نہ صرف پورے ملک میں کھیلوں کے بنیادی ڈھانچے کو وسعت دی ہے بلکہ ہر پیرا ایتھلیٹ کے لیے وقار، رسائی، پہچان اور مساوی مواقع کو یقینی بنایا ہے،“ وزیر نے کہا۔

عالمی کھیلوں میں بھارت کے عروج پر روشنی ڈالتے ہوئے، ڈاکٹر منڈاویہ نے کہا کہ بھارت نے ایشیائی پیرا گیمز میں 111 تمغے اور پیرا اولمپکس 2024 میں ریکارڈ 29 تمغے حاصل کیے، جو ملک کے تیزی سے مضبوط ہوتے کھیلوں کے ماحولیاتی نظام کی عکاسی کرتا ہے۔

انہوں نے کہا، ”حالیہ بین الاقوامی مقابلوں میں ہماری ریکارڈ کارکردگی حادثاتی کامیابیاں نہیں ہیں۔ یہ کھلاڑیوں میں پائیدار سرمایہ کاری، سائنسی تربیت، جدید انفراسٹرکچر اور اس پختہ یقین کا نتیجہ ہے کہ بھارت عالمی کھیلوں کا پاور ہاؤس بن سکتا ہے“۔

وزیر موصوف نے کہا کہ ایس اے آئی این سی او ای گاندھی نگر، جسے وزارت نے پیرا اسپورٹس کے لیے نوڈل سینٹر کے طور پر نامزد کیا ہے، پیرا ایتھلیٹ کی ترقی کے لیے ملک کے اعلیٰ کارکردگی کے مراکز میں سے ایک کے طور پر ابھر رہا ہے۔

یہ مرکز اس وقت چھ پیرا کھیلوں کے شعبوں کو سپورٹ کرتا ہے جن میں پیرا ایتھلیٹکس، پیرا بیڈمنٹن، پیرا ٹیبل ٹینس، پیرا پاور لفٹنگ، پیرا سوئمنگ اور پیرا فینسنگ شامل ہیں۔ ان سہولیات کو ہینڈ بال، کبڈی اور کھو کھو کی تربیت کے لیے بھی استعمال کیا جا رہا ہے۔

ڈاکٹر منڈاویہ نے کبڈی، پیرا اسپورٹس، والی بال اور باسکٹ بال کے مرکز میں منعقد کیے جانے والے نیشنل کوچنگ کیمپس میں شرکت کرنے والے کھلاڑیوں سے بھی بات چیت کی۔ انہوں نے کہا کہ اعلیٰ سطح کے تربیتی ماحول اور سائنسی معاونت کے نظاموں کی مسلسل نمائش اولمپک اور پیرا اولمپکس سمیت مستقبل کے بین الاقوامی مقابلوں میں بھارت کے تمغے کے امکانات کو مضبوط کرے گی۔

”پیرا ایتھلیٹ ہاسٹل، اسٹرینتھ اینڈ کنڈیشننگ ہال اور سنٹرلائزڈ ڈائننگ ہال جیسی سہولیات محض عمارتیں نہیں ہیں؛ یہ بھارت کے مستقبل کے چیمپئن میں سرمایہ کاری ہیں۔ یہ مربوط اعلیٰ کارکردگی والے ماحولیاتی نظام آنے والے سالوں میں بھارت کے کھیلوں کی بہترین کارکردگی کے سفر میں ایک اہم کردار ادا کریں گے،“ وزیر نے مزید کہا۔

نئے افتتاح شدہ کثیر مقصدی تربیتی ہال کو بنیادی طور پر کبڈی کی تربیت کے لیے استعمال کیا جائے گا اور توقع ہے کہ اس سے کھلاڑیوں کے لیے سال بھر ہائی انٹینسٹی پریکٹس، میچ سمولیشن اور ٹیکٹیکل تیاری میں مدد ملے گی۔ جدید طاقت اور کنڈیشننگ ہال کو سائنسی تربیتی طریقوں کے ذریعے کھلاڑیوں کی کارکردگی، برداشت، صحت یابی اور چوٹ سے بچاؤ کے لیے ڈیزائن کیا گیا ہے۔

ڈاکٹر منڈاویہ نے مزید اس بات پر روشنی ڈالی کہ پیرا ایتھلیٹ ہاسٹل اور سنٹرلائزڈ ڈائننگ ہال کو سماجی انصاف اور عطائے اختیار کی وزارت کے مالی تعاون سے تیار کیا گیا ہے، جو کھیلوں کی جامع ترقی اور پیرا ایتھلیٹ کی فلاح و بہبود کے لیے حکومت ہند کے مربوط نقطہ نظر کی عکاسی کرتا ہے۔

کھلاڑیوں کی مجموعی ترقی کی اہمیت پر زور دیتے ہوئے وزیر نے کہا کہ جدید کھیلوں کی فضیلت کا انحصار صرف جسمانی تیاری پر نہیں بلکہ غذائیت، ذہنی تندرستی، نظم و ضبط اور صحت یابی پر بھی ہے۔ انہوں نے ذکر کیا کہ میڈیٹیشن پارک اور سینٹرلائزڈ ڈائننگ ہال جیسی سہولیات کھلاڑیوں کے لیے ایک جامع اعلیٰ کارکردگی کا ماحولیاتی نظام بنانے میں اہم کردار ادا کریں گی۔

افتتاحی تقریب میں اسپورٹس اتھارٹی آف انڈیا کے سینیئر عہدیداروں، کوچ، کھلاڑیوں اور کھیل برادری کے ارکان نے شرکت کی۔

***********

ش ح۔ ف ش ع

                                                                                                                                       U: 7483