نوجوانوں کے امور اور کھیلوں کی وزیر مملکت، رکشا کھڈسے نے آج کھیلو انڈیا اسٹیٹ سینٹر آف ایکسی لینس (کے آئی ایس سی ای) آسام اور گوہاٹی میں ہائی پرفارمنس سینٹر کا دورہ کیا، جہاں انہوں نے شمال مشرق میں بڑھتے ہوئے اعلیٰ کارکردگی والے کھیلوں کے ماحولیاتی نظام کا جائزہ لیتے ہوئے کھلاڑیوں، کوچوں، کھیلوں کے سائنس کے ماہرین اور عہدیداروں سے بات چیت کی۔

 

 

اپنے دورے کے دوران، رکشا کھڈسے نے ہائی پرفارمنس سنٹر میں مختلف تربیت اور بحالی کی سہولیات کا جائزہ لیا، جس میں اسپورٹس سائنس لیبارٹری، فزیولوجیکل اور بایو مکینیکل اسسمنٹ کی سہولیات اور ایتھلیٹ سپورٹ سسٹم شامل ہیں۔ اس دورے نے ہندوستان کے کھیلوں کے ماحولیاتی نظام میں کھیل سائنس، ٹیکنالوجی، اور ڈیٹا سے چلنے والے کھلاڑیوں کی ترقی کے بڑھتے ہوئے انضمام کو اجاگر کیا۔

اس دورے کے دوران وزیر کے ساتھ اسپیشل سیکرٹری، محکمہ کھیل اور یوتھ ویلفیئر، کوثر جمیل ہلالی، محکمہ کھیل اور یوتھ ویلفیئر کے ڈائریکٹر، انکور بھرالی، ایس اے آئی گوہاٹی کے علاقائی ڈائریکٹر، ڈی کے متل کے آئی ایس سی ای آسام کے ہائی پرفارمنس مینیجر، محکمہ کھیل اور یوتھ ویلفیئر کے سینیئر افسران بھی موجود تھے۔

 

 

مختلف کھیلوں سے تعلق رکھنے والے کھلاڑیوں سے بات چیت کرتے ہوئے رکشا کھڈسے نے ان کی لگن اور عزم کو سراہا اور انہیں نظم و ضبط اور ثابت قدمی کے ساتھ عمدگی حاصل کرنے کی کوشش جاری رکھنے کی ترغیب دی۔ انہوں نے اس بات پر بھی زور دیا کہ حکومت ملک بھر میں کھیلوں کے بنیادی ڈھانچے کو مضبوط بنانے اور کھلاڑیوں کے لیے عالمی معیار کے تربیتی ماحول فراہم کرنے پر مسلسل توجہ دے رہی ہے۔

اس موقع پر خطاب کرتے ہوئے رکشا کھڈسے نے کہا کہ وزیر اعظم جناب نریندر مودی کی دور اندیش قیادت میں بھارت میں کھیلوں کے بنیادی ڈھانچے، کھلاڑیوں کی معاونت کے نظام اور سائنسی تربیتی طریقۂ کار میں انقلابی توسیع دیکھنے میں آ رہی ہے۔ انہوں نے کہا کہ کھیلو انڈیا اسٹیٹ سینٹر آف ایکسی لینس (کے آئی ایس سی ای) آسام اور ہائی پرفارمنس سینٹر جیسے مراکز صلاحیتوں کو نکھارنے اور کھلاڑیوں کو بین الاقوامی کامیابی کے لیے تیار کرنے میں اہم کردار ادا کر رہے ہیں۔

ہائی پرفارمنس سینٹر خطے میں کھیلوں کی سائنس اور بحالی کی ایک اہم سہولت کے طور پر ابھرا ہے، جو چوٹوں کے انتظام، بحالی، جسمانی جانچ، حرکتی تجزیے اور کارکردگی میں بہتری کے لیے جدید نظاموں سے لیس ہے۔

 

 

رکشا کھڈسے نے کھیلو انڈیا نظام کے تحت جاری کھلاڑیوں کی ترقی کے پروگراموں کا بھی جائزہ لیا اور اس بات پر تبادلۂ خیال کیا کہ شمال مشرقی خطے کے نوجوان کھلاڑیوں کے لیے قومی اور بین الاقوامی سطح پر مقابلہ کرنے کے مواقع اور راستے مزید مضبوط بنانا کس قدر اہم ہے۔

یہ دورہ حکومت کے اس وسیع وژن کی عکاسی کرتا ہے جس کا مقصد ایک سائنسی بنیادوں پر قائم، کھلاڑی مرکوز اور عالمی سطح پر مسابقتی کھیلوں کا نظام تشکیل دینا ہے، جبکہ بھارت 2030 کے کامن ویلتھ گیمز اور اس سے آگے کے طویل مدتی کھیلوں کے اہداف کی جانب پیش قدمی کر رہا ہے۔

*************

ش ح۔ ف ش ع

                                                                                                                                       U: 7484

(ریلیز آئی ڈی: 2264851) وزیٹر کاؤنٹر : 6