فصلوں کی باقیات(پرالی)جلانے سے ہونے والی فضائی آلودگی کو کنٹرول کرنے کے لیے حکومت نے پنجاب، ہریانہ، اتر پردیش، راجستھان اور دہلی این سی ٹی میں دھان کی فصل کے باقیات جلانے کی نگرانی کے لیے ایک کثیر سطحی نظام اپنایا ہے۔

سیٹیلائٹ ڈیٹا کا استعمال کرتے ہوئے فصلوں کی باقیات جلانے کے واقعات کا اندازہ لگانے کے لیے بھارتی خلائی تحقیقاتی ادارہ (اسرو) نے ریاستی ریموٹ سینسنگ مراکز اور بھارتی زرعی تحقیقاتی ادارہ (آئی اے آر آئی) کی مشاورت سے ایک معیاری پروٹوکول تیار کیا اور اسے اگست 2021 میں سی اے کیو ایم کے ذریعے جاری کیا گیا۔

پرالی جلانے کی فعال آگ کی صورتحال کا پتہ سیٹیلائٹ اوور پاس کے دوران عملی طور پر لگایا جاتا ہے۔ اس کے علاوہ، آگ سے متاثرہ رقبے کا اندازہ مناسب سیٹیلائٹ ڈیٹا کے ذریعے بھی کیا گیا۔ دھان کی کٹائی کے موسم کے دوران پرالی جلانے کے واقعات کی رپورٹنگ معیاری پروٹوکول کے مطابق ریموٹ سینسنگ مراکز کے ذریعے کی جاتی ہے اور اس بات کو یقینی بنایا جاتا ہے کہ علاقائی حکام کو الرٹ بھیجے جائیں تاکہ پرالی جلانے کے واقعات پر فوری کارروائی کی جا سکے۔

یہ پروٹوکول فصلوں کی باقیات جلانے کی آگ کے واقعات کی نگرانی کے لیے استعمال کیا جاتا ہے، اور آئی اے آر آئی اپنی سی آر ای اے ایم ایس لیبارٹری کے ذریعے اس پروٹوکول کی بنیاد پر ہریانہ، دہلی، پنجاب، اتر پردیش، مدھیہ پردیش اور راجستھان کے لیے روزانہ آگ کے واقعات کا ڈیٹا شائع کرتا ہے۔

سیٹیلائٹ ڈیٹا کے ذریعے علاقائی سطح پر فصلوں کی باقیات جلانے کی نگرانی کامیاب رہی ہے۔ تاہم، ذیلی یومیہ سطح پر سیٹیلائٹ اوور پاس سے شناخت کی کارکردگی میں اضافہ ہوتا ہے۔ پرالی جلانے کے واقعات کی مزید مؤثر نشاندہی کے لیے شام کے دیر وقت میں نفاذی اداروں کی گشت میں اضافہ کیا جاتا ہے۔

2025 کے فصلوں کی باقیات جلانے کے موسم (یکم اکتوبر2025سے30نومبر2025) میں پنجاب کے 18 اضلاع اور ہریانہ کے 13 اضلاع میں دھان کی فصل کے باقیات جلانے کے واقعات کی نگرانی اور کارروائی کو تیز کرنے کے لیے سی اے کیو ایم کی معاونت کے لیے سی پی سی بی کی جانب سے 31 فلائنگ اسکواڈز تعینات کیے گئے۔ ان  ٹیموں نےروزانہ اپڈیٹس، تصویری ثبوت اور تعمیل کی صورتحال فراہم کیں۔ فلائنگ اسکواڈز نے ریاستی حکومت/نوڈل افسران/متعلقہ ضلعی حکام کے ساتھ رابطہ رکھا اور اپنی روزانہ رپورٹس سی اے کیو ایم کو ارسال کیں۔

نگرانی کا کام مختلف انتظامی سطحوں پر افسران کی تعیناتی اور پرالی سکیورٹی فورس کی تعیناتی کے ذریعے بھی کیا جاتا ہے۔ پنجاب میں سال 2025 کے دوران فصلوں کی باقیات جلانے کے واقعات کی نگرانی اور روک تھام کے لیے 10,500 فیلڈ اہلکار تعینات کیے گئے ہیں۔ اس کے علاوہ مؤثر اقدامات کے نفاذ کے لیے پرالی سکیورٹی فورس (پی پی ایف) کے 1700 اہلکاروں کو بلاک سطح پر نوڈل/کلسٹر افسران کے علاوہ تعینات کیا گیا ہے تاکہ پرالی جلانے کو روکنے اور کنٹرول کرنے کے اقدامات مؤثر طریقے سے نافذ کیے جا سکیں۔ پرالی جلانے کے واقعات کی نگرانی کے لیے پنجاب حکومت کے چیف سیکریٹری کی سطح پر ڈپٹی کمشنر (ڈی سی) اور سینئر سپرنٹنڈنٹس آف پولیس (ایس ایس پی) کے ساتھ باقاعدہ ماہانہ جائزہ اجلاس منعقد کیے گئے۔

اسی طرح ہریانہ میں پرالی جلانے کی روک تھام اور کنٹرول کے لیے مؤثر اقدامات کے نفاذ کے لیے 10,000 نوڈل افسران تعینات کیے گئے ہیں۔

مندرجہ بالا اقدامات کے علاوہ حکومت نے دہلی-این سی آر اور ملحقہ علاقوں میں فضائی آلودگی سے نمٹنے کے لیے کیے گئے اقدامات کا باقاعدہ جائزہ لیا ہے، جن میں فصلوں کی باقیات جلانے سے متعلق امور بھی شامل ہیں۔ اس سلسلے میں اہم اجلاس درج ذیل ہیں:

• 7 اکتوبر 2025 کو عزت مآب وزیر برائے ماحولیات، جنگلات اور موسمیاتی تبدیلی اور وزیر برائے زراعت و کسان بہبود کی مشترکہ صدارت میں فصلوں کی باقیات جلانے کے انتظام سے متعلق وزارتی بین وزارت اجلاس منعقد ہوا۔
• 8 اگست 2025، 16 ستمبر 2025، 10 اکتوبر 2025، 11 نومبر 2025، 26 نومبر 2025، 3 دسمبر 2025، 15 دسمبر 2025، 16 دسمبر 2025، 17 دسمبر 2025، 19 دسمبر 2025، 6 جنوری 2026، 12 جنوری 2026 اور 20 جنوری 2026 کو مرکزی وزیر برائے ماحولیات، جنگلات اور موسمیاتی تبدیلی کی صدارت میں باقاعدہ جائزہ اجلاس منعقد کیے گئے، جن میں دہلی-این سی آر میں فضائی آلودگی کے کنٹرول سے متعلق امور، آلودگی میں کمی کے اقدامات اور پورے خطے میں فضائی معیار کے انتظام کو مزید مضبوط بنانے کی حکمت عملیوں پر غور کیا گیا۔

مشترکہ کوششوں کے نتیجے میں پنجاب اور ہریانہ نے 2025 میں دھان کی کٹائی کے موسم کے دوران آگ لگنے کے واقعات میں 2022 کے اسی عرصے کے مقابلے میں تقریباً 90 فیصد کمی درج کی ہے۔

یہ معلومات مرکزی وزیر برائے ماحولیات، جنگلات اور موسمیاتی تبدیلی جناب کیرتی وردھن سنگھ نے آج راجیہ سبھا میں ایک تحریری سوال کے جواب میں فراہم کیں۔

*********

 

 ش ح۔ع و۔ش ا

Urdu No-7414

(रिलीज़ आईडी: 2264024) आगंतुक पटल : 10