વર્ષ 2026 માટે ભારતના બ્રિક્સ (BRICS) અધ્યક્ષપદ હેઠળ, ભારત સરકારના યુવા બાબતો અને રમતગમત મંત્રાલયના યુવા બાબતોના વિભાગ દ્વારા 20–21 મે 2026 ના રોજ ઇન્દોર ખાતે બ્રિક્સ યુવા ઉદ્યોગસાહસિકતા વર્કિંગ ગ્રુપની બેઠકનું આયોજન કરવામાં આવશે.

આ બેઠક "બિલ્ડિંગ ફોર રેઝિલિયન્સ, ઇનોવેશન, કો-ઓપરેશન એન્ડ સસ્ટેનેબિલિટી" (સ્થિતિસ્થાપકતા, ઇનોવેશન, સહકાર અને ટકાઉપણાં માટે નિર્માણ) ની વ્યાપક થીમ હેઠળ બોલાવવામાં આવી રહી છે, અને તે બ્રિક્સ સભ્ય દેશોના યુવા ઉદ્યોગસાહસિકો અને પ્રતિનિધિઓને એકસાથે લાવશે. આ બેઠક ઇનોવેશન, સાહસ અને ટકાઉ વિકાસના મુખ્ય પ્રેરક તરીકે યુવાનો પર ભારતના સતત ભારને પ્રતિબિંબિત કરે છે.

આ બે દિવસીય જોડાણમાં કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાનું વર્ચ્યુઅલ સંબોધન જોવા મળશે. વર્કિંગ ગ્રુપની બેઠકના ઉદ્ઘાટન સત્રનું નેતૃત્વ કેન્દ્રીય યુવા બાબતો અને રમતગમત રાજ્ય મંત્રી શ્રીમતી રક્ષા નિખિલ ખડસે કરશે, જેઓ પ્રદર્શનનું ઉદ્ઘાટન કરશે અને ઉદ્ઘાટન પ્રવચન આપશે.

આ સત્રમાં મધ્ય પ્રદેશ સરકારના રમતગમત અને યુવા કલ્યાણ મંત્રી શ્રી વિશ્વાસ કૈલાશ સારંગ અને યુવા બાબતોના વિભાગના સચિવ ડૉ. પલ્લવી જૈન ગોવિલના વક્તવ્યનો પણ સમાવેશ થશે.

આ કાર્યક્રમમાં બ્રિક્સ દેશોમાં યુવા-પ્રેરિત ઉદ્યોગસાહસિકતા ઇકોસિસ્ટમને મજબૂત કરવા અંગેના સંવાદને પ્રોત્સાહિત કરવા માટે આયોજિત માળખાકીય ચર્ચાઓ, અરસપરસ સત્રો (ઇન્ટરેક્ટિવ સેશન્સ) અને સહયોગી આદાનપ્રદાનનું મિશ્રણ જોવા મળશે. આ કાર્યક્રમમાં ડિજિટલ ઇનોવેશન, સર્વસમાવેશીતા અને ટકાઉપણું પર વિષયવાર સત્રોનો સમાવેશ થશે, સાથે જ વિવિધ દેશો વચ્ચે પરસ્પર શીખવાની અને જોડાણની તકો પણ મળશે.

આ બેઠક યુવા ઉદ્યોગસાહસિકો વચ્ચે અનુભવોની વહેંચણી, ભાગીદારીની શોધ અને સહકારને પ્રોત્સાહન આપવા માટે એક પ્લેટફોર્મ તરીકે કામ કરે તેવી અપેક્ષા છે. તે બ્રિક્સ દેશોમાં આર્થિક વૃદ્ધિ અને સામાજિક પ્રભાવના ચાલક તરીકે ઉદ્યોગસાહસિકતાને આગળ વધારવા પર એક સહિયારી સમજણ કેળવવામાં પણ યોગદાન આપશે.

આ પહેલ યુવાનોના જોડાણને મજબૂત કરવા અને ભારતના બ્રિક્સ અધ્યક્ષપદ દરમિયાન સાર્થક આંતરરાષ્ટ્રીય સહયોગને પ્રોત્સાહન આપવા માટેની ભારતની પ્રતિબદ્ધતાને રેખાંકિત કરે છે.

IJ/DK/JD

(રીલીઝ આઈડી: 2262891) મુલાકાતી સંખ્યા : 16