ਸੀਐੱਸਆਈਆਰ ਦੇ ਨਵੇਂ ਭਰਤੀ ਕੀਤੇ ਗਏ ਵਿਗਿਆਨੀਆਂ ਲਈ ਦਸ ਰੋਜ਼ਾ ਇੰਡਕਸ਼ਨ ਪ੍ਰੋਗਰਾਮ ਦਾ ਸਫਲ ਆਯੋਜਨ 4 ਤੋਂ 13 ਮਈ, 2026 ਤੱਕ ਸੀਐੱਸਆਈਆਰ-ਮਨੁੱਖੀ ਸਰੋਤ ਵਿਕਾਸ ਕੇਂਦਰ ਵਿਖੇ ਕੀਤਾ ਗਿਆ। ਇਸ ਪ੍ਰੋਗਰਾਮ ਵਿੱਚ ਦੇਸ਼ ਭਰ ਦੀਆਂ ਵੱਖ-ਵੱਖ ਸੀਐੱਸਆਈਆਰ ਪ੍ਰਯੋਗਸ਼ਾਲਾਵਾਂ ਦੇ 41 ਨੌਜਵਾਨ ਵਿਗਿਆਨੀ ਸ਼ਾਮਲ ਹੋਏ। ਇਸ ਪ੍ਰੋਗਰਾਮ ਨੇ ਉਨ੍ਹਾਂ ਨੂੰ ਸਿੱਖਣ, ਸਹਿਯੋਗ ਕਰਨ ਅਤੇ ਪੇਸ਼ਾਵਰ ਵਿਕਾਸ ਲਈ ਇੱਕ ਗਤੀਸ਼ੀਲ ਪਲੇਟਫਾਰਮ ਪ੍ਰਦਾਨ ਕੀਤਾ।

ਪ੍ਰੋਗਰਾਮ ਦੀ ਸ਼ੁਰੂਆਤ 4 ਮਈ, 2026 ਨੂੰ ਇੱਕ ਪ੍ਰੇਰਨਾਦਾਇਕ ਉਦਘਾਟਨੀ ਸੈਸ਼ਨ ਦੇ ਨਾਲ ਹੋਈ, ਜੋ ਨਵੀਨਤਾ, ਵਿਗਿਆਨਕ ਸਿੱਖਿਆ ਅਤੇ ਰਾਸ਼ਟਰ ਨਿਰਮਾਣ ਦੀ ਇੱਕ ਖੁਸ਼ਹਾਲ ਯਾਤਰਾ ਦੀ ਸ਼ੁਰੂਆਤ ਦਾ ਪ੍ਰਤੀਕ ਸੀ। ਉਦਘਾਟਨੀ ਸਮਾਰੋਹ ਦਾ ਰਸਮੀ ਸੰਚਾਲਨ ਸੀਐੱਸਆਈਆਰ-ਆਈਆਈਟੀਆਰ ਦੇ ਡਾਇਰੈਕਟਰ ਡਾ. ਭਾਸਕਰ ਨਾਰਾਇਣ, ਸੀਐੱਸਆਈਆਰ-ਸੀਆਰਆਰਆਈ ਦੇ ਡਾਇਰੈਕਟਰ ਡਾ. ਚਾਲੂਮੁਰੀ ਰਵੀ ਸ਼ੇਖਰ ਅਤੇ ਸੀਐੱਸਆਈਆਰ-ਐੱਚਆਰਡੀਸੀ  ਦੇ ਮੁਖੀ ਡਾ. ਟੀ.ਐੱਸ. ਰਾਣਾ ਨੇ ਸ਼ਮ੍ਹਾ ਰੋਸ਼ਨ ਕਰਕੇ ਕੀਤਾ, ਜੋ ਗਿਆਨ ਦੇ ਪ੍ਰਕਾਸ਼ ਅਤੇ ਵਿਗਿਆਨਕ ਜਿਗਿਆਸਾ ਦੀ ਭਾਵਨਾ ਦਾ ਪ੍ਰਤੀਕ ਸੀ।

ਇਸ ਇੰਡਕਸ਼ਨ ਪ੍ਰੋਗਰਾਮ ਦਾ ਮੰਤਵ ਨਵੇਂ ਭਰਤੀ ਕੀਤੇ ਗਏ ਵਿਗਿਆਨੀਆਂ ਨੂੰ ਸੀਐੱਸਆਈਆਰ ਦੇ ਵਿਗਿਆਨਕ, ਪ੍ਰਸ਼ਾਸਨਿਕ ਅਤੇ ਸਹਿਯੋਗੀ ਈਕੋਸਿਸਟਮ ਦੀ ਵਿਆਪਕ ਸਮਝ ਪ੍ਰਦਾਨ ਕਰਨਾ ਸੀ, ਨਾਲ ਹੀ ਉਨ੍ਹਾਂ ਨੂੰ ਪ੍ਰਭਾਵਸ਼ਾਲੀ ਵਿਗਿਆਨਕ ਲੀਡਰਸ਼ਿਪ ਲਈ ਲੋੜੀਂਦੀ ਤਕਨੀਕੀ ਮੁਹਾਰਤ ਅਤੇ ਵਿਵਹਾਰਕ ਹੁਨਰਾਂ ਨਾਲ ਲੈਸ ਕਰਨਾ ਸੀ। ਪ੍ਰੋਗਰਾਮ ਦੌਰਾਨ ਪ੍ਰਤੀਨਿਧੀਆਂ ਨੂੰ ਸੀਐੱਸਆਈਆਰ ਅਤੇ ਹੋਰ ਸੰਸਥਾਵਾਂ ਦੇ ਉੱਘੇ ਵਿਗਿਆਨੀਆਂ ਅਤੇ ਡਾਇਰੈਕਟੋਰੇਟ ਮੁਖੀਆਂ ਵੱਲੋਂ ਦਿੱਤੇ ਗਏ ਮਾਹਿਰ ਭਾਸ਼ਣਾਂ, ਵਿਵਹਾਰਕ ਸਿਖਲਾਈ ਸੈਸ਼ਨਾਂ ਅਤੇ ਇੰਟਰਐਕਟਿਵ ਚਰਚਾਵਾਂ ਤੋਂ ਲਾਭ ਹੋਇਆ। ਇਸ ਪ੍ਰੋਗਰਾਮ ਨੇ ਸੀਐੱਸਆਈਆਰ ਦੀਆਂ ਵੱਖ-ਵੱਖ ਪ੍ਰਯੋਗਸ਼ਾਲਾਵਾਂ ਦੇ ਵਿਗਿਆਨੀਆਂ ਵਿਚਕਾਰ ਨੈੱਟਵਰਕਿੰਗ ਅਤੇ ਸਹਿਯੋਗ ਦੇ ਕੀਮਤੀ ਮੌਕੇ ਵੀ ਪ੍ਰਦਾਨ ਕੀਤੇ। ਇਸ ਪ੍ਰੋਗਰਾਮ ਦਾ ਉਦੇਸ਼ ਤਕਨੀਕੀ ਸਿੱਖਿਆ ਅਤੇ ਵਿਵਹਾਰਕ ਵਿਕਾਸ ਦੇ ਸੁਮੇਲ ਰਾਹੀਂ ਪੇਸ਼ਾਵਰ ਵਿਕਾਸ ਲਈ ਇੱਕ ਸੰਪੂਰਨ ਪਹੁੰਚ ਨੂੰ ਉਤਸ਼ਾਹਿਤ ਕਰਨਾ ਸੀ ਅਤੇ ਪ੍ਰਤੀਨਿਧੀਆਂ ਨੂੰ ਉਨ੍ਹਾਂ ਦੀਆਂ ਪੇਸ਼ਾਵਰ ਯੋਗਤਾਵਾਂ ਦੇ ਨਾਲ-ਨਾਲ ਉਨ੍ਹਾਂ ਦੇ ਅੰਤਰ-ਵਿਅਕਤੀਗਤ ਹੁਨਰ ਨੂੰ ਮਜ਼ਬੂਤ ਕਰਨ ਵਿੱਚ ਸਮਰੱਥ ਬਣਾਉਣਾ ਸੀ, ਤਾਂ ਜੋ ਉਹ ਬਹੁ-ਵਿਸ਼ੇ ਵਿਗਿਆਨਕ ਵਾਤਾਵਰਨ ਵਿੱਚ ਪ੍ਰਭਾਵਸ਼ਾਲੀ ਢੰਗ ਨਾਲ ਯੋਗਦਾਨ ਪਾਉਣ ਲਈ ਤਿਆਰ ਹੋ ਸਕਣ। ਨੁਮਾਇੰਦਿਆਂ ਨੇ ਰਚਨਾਤਮਕ ਸਮੱਸਿਆ-ਹੱਲ ਅਤੇ ਫੈਸਲੇ ਲੈਣ ਦੀਆਂ ਸਮਰੱਥਾਵਾਂ ਨੂੰ ਵਧਾਉਣ, ਲੀਡਰਸ਼ਿਪ ਦੀ ਪ੍ਰਭਾਵਸ਼ੀਲਤਾ ਨੂੰ ਮਜ਼ਬੂਤ ਕਰਨ ਅਤੇ ਨਵੀਨਤਾ-ਸੰਚਾਲਿਤ ਵਿਗਿਆਨਕ ਸੋਚ ਨੂੰ ਉਤਸ਼ਾਹਿਤ ਕਰਨ ਵਰਗੇ ਪ੍ਰਮੁੱਖ ਵਿਸ਼ਿਆਂ ਬਾਰੇ ਜਾਣਕਾਰੀ ਹਾਸਲ ਕੀਤੀ। ਗਲੋਬਲ ਵਿਗਿਆਨ ਅਤੇ ਤਕਨਾਲੋਜੀ ਸਹਿਯੋਗ, ਤਕਨਾਲੋਜੀ ਤਬਾਦਲੇ ਅਤੇ ਖੋਜ ਦੇ ਵਪਾਰੀਕਰਨ ’ਤੇ ਤਕਨੀਕੀ ਸੈਸ਼ਨਾਂ ਨੇ ਵਿਗਿਆਨਕ ਕਾਢਾਂ ਨੂੰ ਸਮਾਜਿਕ ਅਤੇ ਉਦਯੋਗਿਕ ਪ੍ਰਭਾਵ ਵਿੱਚ ਬਦਲਣ ਬਾਰੇ ਕੀਮਤੀ ਜਾਣਕਾਰੀ ਪ੍ਰਦਾਨ ਕੀਤੀ।

ਇਸ ਪ੍ਰੋਗਰਾਮ ਦਾ ਸਮਾਪਤੀ ਸਮਾਰੋਹ 13 ਮਈ, 2026 ਨੂੰ ਆਯੋਜਿਤ ਕੀਤਾ ਗਿਆ, ਜਿਸ ਵਿੱਚ ਮੁੱਖ ਮਹਿਮਾਨ ਵਜੋਂ ਅਕੈਡਮੀ ਆਫ ਸਾਇੰਟਿਫਿਕ ਐਂਡ ਇਨੋਵੇਟਿਵ ਰਿਸਰਚ  ਦੇ ਡਾਇਰੈਕਟਰ ਪ੍ਰੋ. ਮਨੋਜ ਕੁਮਾਰ ਧਰ ਹਾਜ਼ਰ ਸਨ। ਨਵੇਂ ਭਰਤੀ ਕੀਤੇ ਗਏ ਵਿਗਿਆਨੀਆਂ ਨੂੰ ਸੰਬੋਧਨ ਕਰਦਿਆਂ ਪ੍ਰੋਫੈਸਰ ਧਰ ਨੇ ਉਨ੍ਹਾਂ ਨੂੰ ਨਵੀਨਤਾ ਅਤੇ ਪ੍ਰਭਾਵਸ਼ਾਲੀ ਵਿਗਿਆਨਕ ਖੋਜ ਵਿੱਚ ਸਰਗਰਮ ਯੋਗਦਾਨ ਪਾਉਣ ਲਈ ਪ੍ਰੇਰਿਤ ਕੀਤਾ। ਉਨ੍ਹਾਂ ਨੇ ਅਕਾਦਮਿਕ ਅਤੇ ਖੋਜ ਉੱਤਮਤਾ ਹਾਸਲ ਕਰਨ ਲਈ ਸੀਐੱਸਆਈਆਰ ਪ੍ਰਯੋਗਸ਼ਾਲਾਵਾਂ ਅਤੇ ਅਕੈਡਮੀ ਆਫ ਸਾਇੰਟਿਫਿਕ ਐਂਡ ਇਨੋਵੇਟਿਵ ਰਿਸਰਚ ਵਿਚਕਾਰ ਮਜ਼ਬੂਤ ​​ਸਹਿਯੋਗ ਦੀ ਮਹੱਤਤਾ ’ਤੇ ਜ਼ੋਰ ਦਿੱਤਾ, ਜਿਸ ਵਿੱਚ ਖੋਜ ਅਤੇ ਵਿੱਦਿਅਕ ਸੰਸਥਾਵਾਂ ਵਿੱਚ ਚੋਟੀ ਦੀ ਦਰਜਾਬੰਦੀ ਪ੍ਰਾਪਤ ਕਰਨ ਦਾ ਸਾਂਝਾ ਟੀਚਾ ਵੀ ਸ਼ਾਮਲ ਹੈ।

ਇਸ ਪ੍ਰੋਗਰਾਮ ਦਾ ਸੁਚਾਰੂ ਤਾਲਮੇਲ ਵਿਗਿਆਨੀ-ਈ ਡਾ. ਸ਼ੋਭਨਾ ਚੌਧਰੀ ਅਤੇ ਸੀਨੀਅਰ ਤਕਨੀਕੀ ਅਧਿਕਾਰੀ ਸ਼੍ਰੀਮਤੀ ਪ੍ਰੀਤੀ ਚੌਧਰੀ ਵੱਲੋਂ ਕੀਤਾ ਗਿਆ, ਜਿਨ੍ਹਾਂ ਦੇ ਸਮਰਪਿਤ ਯਤਨਾਂ ਨੇ ਸਾਰੇ ਭਾਗੀਦਾਰਾਂ ਲਈ ਇੱਕ ਜੀਵੰਤ, ਦਿਲਚਸਪ ਅਤੇ ਜਾਣਕਾਰੀ ਭਰਪੂਰ ਸਿੱਖਣ ਦਾ ਅਨੁਭਵ ਯਕੀਨੀ ਬਣਾਇਆ।

ਇੰਡਕਸ਼ਨ ਪ੍ਰੋਗਰਾਮ ਦਾ ਸਫਲਤਾਪੂਰਵਕ ਸੰਪੂਰਨ ਹੋਣਾ ਵਿਗਿਆਨੀਆਂ ਦੀ ਅਗਲੀ ਪੀੜ੍ਹੀ ਦੇ ਪਾਲਣ-ਪੋਸ਼ਣ ਅਤੇ ਸਮਰੱਥਾ ਨਿਰਮਾਣ, ਲੀਡਰਸ਼ਿਪ ਵਿਕਾਸ ਅਤੇ ਸਹਿਯੋਗੀ ਖੋਜ ਸੱਭਿਆਚਾਰ ਰਾਹੀਂ ਰਾਸ਼ਟਰ ਦੇ ਵਿਗਿਆਨਕ ਅਤੇ ਨਵੀਨਤਾ ਵਾਤਾਵਰਣ ਪ੍ਰਣਾਲੀ ਨੂੰ ਮਜ਼ਬੂਤ ​​ਕਰਨ ਦੇ ਪ੍ਰਤੀ ਸੀਐੱਸਆਈਆਰ  ਦੀ ਨਿਰੰਤਰ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।

*****

ਐੱਨਕੇਆਰ/ਏਕੇ

(Release ID: 2262306) ਵਿਜ਼ੀਟਰ ਕਾਊਂਟਰ : 19