ہندوستانی بحریہ نے 17 مئی 2026 کو بھوپال میں اپر لیک، جسے عام طور پر بھوج تال کے نام سے جانا جاتا ہے، میں اپنے ممتاز نیول سیلنگ نوڈ کا افتتاح کیا۔

افتتاحی تقریب کی صدارت نائب امیر بحریہ دنیش کے ترپاٹھی، چیف آف نیول اسٹاف (سی این ایس) نے کی، جس میں دفاعی افواج اور سول انتظامیہ کے سینیئر حکام، این سی سی کیڈٹ اور طلبا نے شرکت کی۔ اس موقع کی یادگار تقریب کے طور پر آئی این ڈبلیو ٹی سی وشاکھاپٹنم اور بحریہ کی روئنگ، کیایاکنگ اور کینوئنگ ٹیموں کے 30 سے زائد اہلکاروں نے شاندار سیلنگ پریڈ پیش کی، جبکہ تقریب کے دوران کیایاکنگ، کینوئنگ اور روئنگ کے مظاہرے بھی کیے گئے۔

آبی مہارتوں کی تربیت ہمیشہ سے بحری اہلکاروں کی تربیت اور ترقی کے عمل کا ایک لازمی حصہ رہی ہے، جو اُن کے بنیادی عملی میدان میں باہمی ہم آہنگی اور مسابقتی جذبے کو فروغ دیتی ہے۔

جدید ترین سہولت کے طور پر تیار کیا گیا یہ سیلنگ نوڈ ہندوستانی بحریہ کی سیلنگ ٹیم، بحریہ کی روئنگ، کینوئنگ اور کیایاکنگ ٹیموں، نیز این سی سی کی تربیت کے لیے وسیع پیمانے پر استعمال کیا جائے گا۔ اس وقت بحریہ کی سیلنگ ٹیم کے کل 34 ارکان میں سے 17 کا تعلق ریاست مدھیہ پردیش سے ہے۔ اس سہولت کا مقصد مدھیہ پردیش کے مزید نوجوانوں کو مسابقتی آبی کھیلوں کی جانب راغب کرنا اور انہیں دفاعی افواج میں شمولیت کے لیے ترغیب دینا ہے۔

یہ اقدام معزز وزیر اعظم کے اُس وژن کو عملی جامہ پہنانے کی جانب ایک اہم قدم ہے جس کا مقصد اولمپکس اور ایشیائی کھیلوں کے لیے عالمی معیار کی کھیلوں کی صلاحیتیں تیار کرنا ہے اور یہ قومی کھیل پالیسی کے اُن اہداف سے بھی ہم آہنگ ہے جو کھیلوں میں اعلیٰ کارکردگی کو فروغ دینے اور مسابقتی کھیلوں میں ٹیلنٹ کے دائرے کو وسعت دینے پر مرکوز ہیں۔

                                               **************

ش ح۔ ف ش ع

17-05-2026

                                                                                                                                       U: 7169

 

(ریلیز آئی ڈی: 2262055) وزیٹر کاؤنٹر : 9