وزیر مملکت (آزادانہ چارج) برائے سائنس و ٹیکنالوجی، ارضیاتی سائنسزاوروزیر اعظم  کے دفتر، عملہ، عوامی شکایات و پنشن، محکمۂ جوہری توانائی اور محکمۂ خلاء کے وزیرمملکت ڈاکٹر جتیندر سنگھ نے کہا کہ ہندوستان کی ڈیپ ٹیک شعبوں میں مستقبل کی ترقی ملک کی اس صلاحیت پر منحصر ہوگی کہ وہ ایک قابلِ اعتماد اور مربوط طریقہ کار کو اپنائے۔

انہوں نے کہا کہ اسی سوچ کے تحت ’’ریسرچ، ڈیولپمنٹ اینڈ انوویشن (آر ڈی آئی) فنڈ‘‘ اسکیم شروع کی گئی، جس کا مقصد تحقیق و ترقی میں نجی شعبے کی شمولیت کو تیز کرنا ہے۔

نئی دہلی کے ڈاکٹر امبیڈکر انٹرنیشنل سینٹر میں ٹیکنالوجی ڈیولپمنٹ بورڈ کی جانب سے منعقدہ پروگرام سے خطاب کرتے ہوئے  جناب جتیندر سنگھ نے کہا کہ ہندوستان کوانٹم ٹیکنالوجی، ڈیپ ٹیک فنانسنگ اور صنعت کی قیادت میں قائم تحقیقی نظاموں کے ذریعے اختراع پر مبنی ترقی کے نئے مرحلے میں داخل ہو رہا ہے۔

پروگرام کے دوران آر ڈی آئی فنڈ اسکیم کے تحت پانچ منصوبوں کے معاہدوں پر دستخط کیے گئے، اسکیم کے تحت پہلی الیکٹرانک فنڈ تقسیم جاری کی گئی، آر ڈی آئی اسکیم کی پیش رفت پر مبنی ایک کمپینڈیم جاری کیا گیا اور ’’ہندوستان میں کوانٹم محفوظ ماحولیاتی نظام‘‘ پر رپورٹ بھی جاری کی گئی۔

1. میسرز ای-ٹی آر این ایل انرجی پرائیویٹ لمیٹڈ، مہاراشٹرا نے اپنی پیٹنٹ شدہ تھری-ڈائمنشنل الیکٹروڈ آرکیٹیکچر (3ڈی ای اے) ٹیکنالوجی پر مبنی ایڈوانسڈ لیتھیم آئن بیٹری سیلز کی تیاری اور مینوفیکچرنگ کے لیے ایک معاہدے پر دستخط کیے ہیں۔ اس پروجیکٹ کا مقصد لیتھیم آئن سیل کے ڈیزائن اور مینوفیکچرنگ کے متعدد پہلوؤں کی ازسرِنو ترتیب کرنا ہے، بشمول مواد کی پروسیسنگ، سیل آرکیٹیکچر، کمپیکٹ خودکار مینوفیکچرنگ سسٹمز اور لاگت کے لحاظ سے کفایتی بیٹری کی پیداوار، تاکہ اس طرح ہندوستان کے گھریلو بیٹری مینوفیکچرنگ کے ماحولیاتی نظام کو مضبوط کیا جا سکے۔
2. میسرز دھرووا اسپیس پرائیویٹ لمیٹڈ، حیدرآباد، تلنگانہ نے "پروجیکٹ گروڑ" کے لیے ایک معاہدے پر دستخط کیے ہیں — جو کہ ایک مقامی، ماڈیولر اور کمیونیکیشن پے لوڈ سے آزاد  500 کلوگرام کلاس کا سیٹلائٹ پلیٹ فارم ہے، جسے بڑے پیمانے پر پیداوار اور کانسٹیلیشن-اسکیل کی تعیناتی کے لیے ڈیزائن کیا گیا ہے۔ اس پروجیکٹ کا مقصد ہندوستان کو ایسے توسیع پذیر، فلیٹ-پیک اور ماڈیولر سیٹلائٹ سسٹمز کی صلاحیت سے لیس کرنا ہے جو اسٹریٹجک، تجارتی اور سائنسی ایپلی کیشنز کے لیے لچکدار مواصلاتی نیٹ ورکس کی معاونت کر سکیں۔
3. میسرز آئیسٹیم ریسرچ پرائیویٹ لمیٹڈ، بنگلورو، کرناٹک نے عالمی سطح پر لاعلاج دو بیماریوں — یعنی عمر کے ساتھ بڑھنے والے میکولر ڈیجنریشن سے جڑے جیوگرافک ایٹروفی اور ایڈیوپیتھک پلمونری فائبروسس — کے علاج کے لیے اپنی نوعیت کی پہلی سیل تھراپیز کی تیاری کے لیے ایک معاہدے پر دستخط کیے ہیں۔ یہ پروجیکٹ ری جنریٹو میڈیسن  اور صحت کی دیکھ بھال کی ناگزیر و تشنہ ضروریات کو پورا کرنے کے مقصد سے تیار کیے جانے والے مقامی سیل تھراپی پلیٹ فارمز میں ایک بڑی پیش رفت کی نمائندگی کرتا ہے۔
4. میسرز نوکارک روبوٹکس پرائیویٹ لمیٹڈ، اتر پردیش نے انٹیلیجنٹ موبائل لائف سپورٹ سسٹم (آئی ایم ایل ایس ایس) کی تیاری کے لیے ایک معاہدے پر دستخط کیے ہیں، جو کہ خاص طور پر ہندوستانی حالات کے لیے ڈیزائن کیا گیا ایک پورٹیبل آئی سی یو گریڈ ایمرجنسی اور کریٹیکل کیئر پلیٹ فارم ہے۔ یہ سسٹم ہنگامی اور دیہی صحت کی دیکھ بھال کی فراہمی کو مضبوط بنانے کے لیے جدید وینٹی لیٹر سپورٹ، مریض کی نگرانی، مصنوعی ذہانت (اے آئی) کی مدد سے کلینیکل رہنمائی، کثیر اللسانی صوتی تعاون  اور کنیکٹڈ ہیلتھ کیئر کی خصوصیات کو یکجا کرتا ہے۔
5. میسرز اینڈور ایئر سسٹمز پرائیویٹ لمیٹڈ، نوئیڈا، اتر پردیش نے "پروجیکٹ سبل-200" کے لیے ایک معاہدے پر دستخط کیے ہیں، جو کہ ایک مقامی بغیر پائلٹ والا ہیلی کاپٹر پلیٹ فارم ہے اور 200 کلوگرام سے زیادہ کا وزن اٹھانے کی صلاحیت رکھتا ہے۔ بلند و بالا مقامات اور دشوار گزار آپریشنل ماحول کے لیے ڈیزائن کیا گیا یہ نظام، جدید پروپلشن اور طویل پرواز سے متعلق ٹیکنالوجیز کے ذریعے لاجسٹکس، آفات کے وقت امدادی کارروائیوں، نگرانی اور اسٹریٹجک ایپلی کیشنز میں معاونت فراہم کرے گا۔

آر ڈی آئی فریم ورک کے تحت ایک اور اہم سنگِ میل عبور کرتے ہوئے، ٹی ڈی بی نے اس اسکیم کے تحت فنڈز کی پہلی الیکٹرانک منتقلی  بھی عمل میں لائی۔ پہلی قسط کے اجراء کے حصے کے طور پر، میسرز آئیسٹیم ریسرچ پرائیویٹ لمیٹڈ کو اس کے مقامی سیل تھراپی پلیٹ فارم کی ترقی اور تجارتی سازی میں معاونت کے لیے 50 کروڑ روپے الیکٹرانک طریقے سے منتقل کیے گئے۔

پروگرام کے دوران اپریل 2026 تک آر ڈی آئی اسکیم کے تحت سیکنڈ لیول فنڈ مینیجر (ایس ایل ایف ایم) کے طور پر ٹیکنالوجی ڈویلپمنٹ بورڈ (ٹی ڈی بی) کی اسٹیٹس رپورٹ پر ایک مجموعہ (کمپینڈیم) بھی جاری کیا گیا۔ اس میں آر ڈی آئی فنڈ کو فعال بنانے میں ٹی ڈی بی کی جانب سے حاصل کردہ پیش رفت پیش کی گئی ہے جس میں موصولہ تجاویز کی تفصیلات، شعبہ وار تقسیم، پروجیکٹ کی جانچ اور تشخیص کا طریقہ کار، منظور شدہ پروجیکٹس، فنڈنگ کے رجحانات اور اسٹریٹجک شعبوں میں اعلیٰ اثر انگیز، جدید ترین ملکی ٹیکنالوجیز کی تجارتی سازی کو ممکن بنانے کے لیے بورڈ کی مسلسل کوششوں کا احاطہ کیا گیا ہے۔

اس  اشاعت میں ڈیپ ٹیک، بائیوٹیکنالوجی، مصنوعی ذہانت (اے آئی)، خلائی ٹیکنالوجیز، صحت کی دیکھ بھال، توانائی کی منتقلی ، ماحولیاتی ٹیکنالوجیز اور ڈیجیٹل انفراسٹرکچر پر محیط پروجیکٹوں کو پیش کرکے آر ڈی آئی  اقدام کے تحت ابھرتے ہوئے اختراعی منظرنامے پر مزید روشنی ڈالی گئی ہے، جس سے ہندوستان کے 'تحقیق سے تجارتی سازی' کے ماحولیاتی نظام کی بڑھتی ہوئی رفتار کی عکاسی ہوتی ہے۔

آر ڈی آئی اقدام کی اہمیت پر روشنی ڈالتے ہوئے، ڈاکٹر جتیندر سنگھ نے کہا کہ وزیر اعظم جناب نریندر مودی کی قیادت میں حکومت نے ہندوستان کے اختراعی نظام کو مضبوط بنانے اور تحقیق و ترقی میں نجی سرمایہ کاری کے لیے سازگار حالات پیدا کرنے کے لیے کئی منفرد اور غیر روایتی طریقے اپنائے ہیں۔ انہوں نے واضح کیا کہ ان روایتی ماڈلز کے برعکس جہاں حکومتیں آزادانہ طور پر صنعت کی شمولیت کی توقع رکھتی ہیں، ہندوستان نے نجی شعبے کی قیادت میں ہونے والی اختراعات کے لیے ادارہ جاتی اور مالیاتی امدادی نظام قائم کرکے ایک فعال اور پیش قدمی پر مبنی انداز اختیار کیا ہے۔

وزیر موصوف نے کہا کہ یہ اقدام حکومت کے اس عزم کی عکاسی کرتا ہے جس کا مقصد ایک ایسا ماحولیاتی نظام تیار کرنا ہے جہاں اسٹارٹ اپس، ایم ایس ایم ایز اور صنعتیں طویل مدتی اختراعی شراکت داروں کے طور پر ابھر سکیں۔ خلائی ٹیکنالوجی اور ڈیپ ٹیک جیسے شعبوں میں کی جانے والی وسیع تر اصلاحات کا حوالہ دیتے ہوئے انہوں نے کہا کہ حکومت نے مستقل طور پر ادارہ جاتی کشادگی اور اسٹیک ہولڈرز کی شرکت کی حوصلہ افزائی کی ہے۔ انہوں نے کہا کہ خلائی شعبے میں اصلاحات نے یہ ثابت کیا ہے کہ کس طرح اسٹریٹجک پالیسی اقدامات جدید ترین ٹیکنالوجی کے شعبوں میں اختراع اور عوامی شرکت کی راہ ہموار کر سکتے ہیں۔

جناب  جتیندر سنگھ نے کہا کہ ہندوستان اب ان منتخب ممالک میں شامل ہو چکا ہے جو نیشنل کوانٹم مشن کے تحت کوانٹم کمیونیکیشن، کوانٹم کمپیوٹنگ، کوانٹم سینسنگ اور کوانٹم میٹریلز میں سرمایہ کاری کر رہے ہیں۔انہوں نے بتایا کہ ہندوستان نے آٹھ سال میں 2000 کلومیٹر کوانٹم محفوظ مواصلاتی صلاحیت حاصل کرنے کا ہدف مقرر کیا تھا، لیکن چار سال سے بھی کم عرصے میں تقریباً نصف ہدف حاصل کر لیا گیا ہے۔

وزیر موصوف نے خبردار کیا کہ ابھرتی ہوئی کوانٹم کمپیوٹنگ ٹیکنالوجی موجودہ کرپٹوگرافک نظاموں کے لیے چیلنج بن سکتی ہے، جواس وقت  بینکنگ، حکمرانی، ٹیلی کام اور اسٹریٹجک انفراسٹرکچر میں استعمال ہو رہے ہیں۔انہوں نے پوسٹ کوانٹم کرپٹوگرافی، کوانٹم کی ڈسٹری بیوشن اور کوانٹم محفوظ بنیادی ڈھانچے کو قومی سلامتی اور قابلِ اعتماد ڈیجیٹل حکمرانی کے لیے اہم قرار دیا۔ انہوں نے اختراع کاروں اور اسٹارٹ اپس کے لیے ڈیجیٹل پلیٹ فارمز، مصنوعی ذہانت (اے آئی) سے لیس آؤٹ ریچ ٹولز اور مواصلات کے آسان فارمیٹس کے ذریعے تکنیکی علم تک رسائی کو مزید آسان بنانے کی ضرورت پر بھی زور دیا۔

حکومتِ ہند کے پرنسپل سائنٹیفک ایڈوائزر پروفیسر اجے کمار سود نے آر ڈی آئی فنڈ کو ایک ممکنہ طور پر انقلابی اقدام قرار دیا جو گہری ڈیپ ٹیک) کی تحقیق اور اختراع میں بڑے پیمانے پر نجی سرمایہ کاری کو متحرک کرنے کی صلاحیت رکھتا ہے۔ انہوں نے اس بات پر روشنی ڈالی کہ نسبتاً مختصر وقت میں اس اقدام کا نفاذ، پالیسی پر عملدرآمد میں رفتار اور وسعت کے تئیں حکومت کے عزم کی عکاسی کرتا ہے۔ "کوانٹم سیف ایکوسسٹم ان انڈیا" رپورٹ کے اجراء کا حوالہ دیتے ہوئے انہوں نے کہا کہ ملک کو "کیو-ڈے"  کے منظر نامے کے لیے پیشگی اور فعال طور پر تیار رہنا چاہیے، جب موجودہ انکرپشن سسٹمز کوانٹم کمپیوٹنگ کی صلاحیتوں کے سامنے کمزور پڑ سکتے ہیں۔ انہوں نے فنانس، ہیلتھ کیئر اور گورننس جیسے شعبوں میں پوسٹ کوانٹم کرپٹوگرافی، کوانٹم محفوظ مواصلاتی نظام اور محفوظ ڈیجیٹل انفراسٹرکچر کے لیے قومی سطح پر تیاری کی ضرورت پر زور دیا۔

محکمۂ سائنس اور ٹیکنالوجی کے سکریٹری اور ٹی ڈی بی کے چیئرپرسن پروفیسر ابھے کرندیکر نے اس بات پر روشنی ڈالی کہ آر ڈی آئی اقدام ہندوستان میں نجی شعبے کی قیادت میں تحقیق و ترقی  کو مضبوط بنانے کے مقصد سے کی جانے والے اہم ترین حکومتی اقدامات میں سے ایک ہے۔ انہوں نے کہا کہ نفاذ کے عمل میں ماہرین، سرمایہ کاری کمیٹیوں، سائنسی اداروں اور انڈسٹری اسٹیک ہولڈرز کے درمیان وسیع تعاون شامل رہا ہے جنہوں نے اس اقدام کو فعال بنانے کے لیے کئی مہینوں تک رضاکارانہ طور پر کام کیا ہے۔ انہوں نے اس اعتماد کا اظہار کیا کہ آر ڈی آئی فریم ورک نجی سرمائے کی سرمایہ کاری کو راغب کرنے، ڈیپ ٹیک اختراعات کو مضبوط بنانے اور ملک میں عالمی سطح پر مسابقتی ٹیکنالوجیز اور اسٹارٹ اپس کی ترقی میں مددگار ثابت ہوگا۔

ٹی ڈی بی کے سکریٹری جناب راجیش کمار پاٹھک نے آر ڈی آئی اقدام کے تیز رفتار نفاذ پر روشنی ڈالی اور بتایا کہ ٹی ڈی بی اس اسکیم کے تحت پروجیکٹ کی تجاویز طلب کرنے، معاہدوں پر دستخط کرنے اور فنڈز جاری کرنے والا پہلا سیکنڈ لیول فنڈ مینیجر بن گیا ہے۔ انہوں نے مطلع کیا کہ اس اقدام کو مختصر مدت کے اندر 124 پروجیکٹ تجاویز موصول ہوئیں، جو 25,000 کروڑ روپے سے زیادہ کے پروجیکٹ کی مانگ کی نمائندگی کرتی ہیں۔ انہوں نے یہ بھی کہا کہ منتخب کردہ پروجیکٹس میں صحت، توانائی، کوانٹم ٹیکنالوجیز اور ایڈوانسڈ مینوفیکچرنگ سمیت مختلف شعبوں میں اسٹارٹ اپس، ایم ایس ایم ایز  اور لسٹڈ کمپنیاں شامل ہیں۔ انہوں نے مزید کہا، "ریسرچ ڈویلپمنٹ اینڈ اِنوویشن (آر ڈی آئی) فنڈ کے تحت فنڈنگ کے لیے ٹی ڈی بی کی جانب سے منتخب کردہ 22 کمپنیاں ملک کے بہترین اسٹارٹ اپس میں سے ہیں اور ان میں سے کچھ (15) کو 'بھارت اِنوویٹس 2026' کے حصے کے طور پر ملک گیر تلاش کے ذریعے منتخب کیا گیا ہے، جو کہ جون میں نیس ، فرانس میں منعقد ہونے والے ہندوستان کی ٹیکنالوجی اختراع کا ایک عالمی مظاہرہ ہے۔"

اس پروگرام میں آر ڈی آئی اسکیم کی اسٹیٹس رپورٹ پر ایک کمپینڈیم کا اجراء اور مقامی اختراع، محفوظ مواصلاتی نظام اور باہمی تعاون پر مبنی ٹیکنالوجی ڈویلپمنٹ فریم ورک کے ذریعے ہندوستان کے کوانٹم محفوظ ماحولیاتی نظام کو مضبوط بنانے پر تبادلۂ خیال بھی شامل تھا۔ تقریب کا اختتام 'آتم نربھر بھارت' اور 'وِکست بھارت 2047' کے وژن کے مطابق ہندوستان کے ڈیپ ٹیک اختراعی نظام کو تیز کرنے کے تئیں تجدیدِ عزم کے ساتھ ہوا۔

اس تقریب میں حکومتِ ہند کے پرنسپل سائنٹیفک ایڈوائزر پروفیسر اجے کمار سود؛ سکریٹری، محکمہ سائنس اور ٹیکنالوجی و چیئرپرسن، ٹی ڈی بی، پروفیسر ابھے کرندیکر؛ سکریٹری، ٹی ڈی بی، جناب راجیش کمار پاٹھک؛ سینئر حکام، ٹی ڈی بی بورڈ کے ارکان، سرمایہ کاری کمیٹی کے ارکان اور صنعت، اسٹارٹ اپس اور تحقیقی اداروں کے نمائندوں نے شرکت کی۔

 

****

ش ح ۔   م  د ۔  م  ص

(U :7153  )

(ریلیز آئی ڈی: 2261820) وزیٹر کاؤنٹر : 11