తెలంగాణలోని హైదరాబాద్‌లో ఉన్న జాతీయ ఫార్మాస్యూటికల్ విద్య, పరిశోధన సంస్థ (నైపర్)లో శాస్త్రీయ  సదస్సును, భారతీయ ఫార్మకోపియా-2026పై చర్చా కార్యక్రమాన్ని భారత ప్రభుత్వ ఆరోగ్యం, కుటుంబ సంక్షేమ మంత్రిత్వ శాఖకు చెందిన ఇండియన్ ఫార్మకోపియా కమిషన్ (ఐపీసీ) నిర్వహించింది. నైపర్ హైదరాబాద్, కేంద్ర ఔషధ ప్రమాణాల నియంత్రణ సంస్థ (సీడీఎస్‌సీవో), ఐడీఎంఏ తెలంగాణ ఛాప్టర్ సహకారంతో వీటిని నిర్వహించింది. ‘‘ఔషధ నాణ్యతను నిర్దారించడంలో ఇండియన్ ఫార్మకోపియా నిర్దేశక ప్రమాణాలు, మలినాల ప్రమాణాల ప్రాధాన్యం’’ అనే ఇతివృత్తంపై ఈ సదస్సు జరిగింది.

ఔషధాల నాణ్యతను, భద్రతను, హేతుబద్ధమైన వినియోగాన్ని ప్రోత్సహించడంతో పాటు ఔషధాల నాణ్యతను బలోపేతం చేయడం, రోగి భద్రతను పరిరక్షించడమే లక్ష్యంగా ఐపీసీ వివిధ కార్యక్రమాలను చేపడుతోంది. ప్రజారోగ్య రక్షణలో ఔషధాల నాణ్యత కీలకమైన అంశమని గుర్తించి, శాస్త్రీయ, నియంత్రణ, భాగస్వాములతో సహకార వేదికల ద్వారా ఔషధ నాణ్యతకు సంబంధించిన సమస్యలను ఐపీసీ నిరంతరం పరిష్కరిస్తోంది. ఔషధాల నాణ్యత, భద్రత, సామర్థ్యాన్ని నిర్ధారించడంలో ఇండియన్ ఫార్మకోపియా రిఫరెన్స్ సబ్‌స్టాన్సెస్ (ఐఆర్‌పీఎస్), మలినాల ప్రమాణాల ప్రాముఖ్యతపై చర్చించడానికి ఈ సదస్సును నిర్వహించారు.

ఈ సదస్సును హైదరాబాద్ నైపర్ డైరెక్టర్ ప్రొఫెసర్ శైలేంద్ర సరఫ్ లాంఛనంగా ప్రారంభించారు. ఫార్మాస్యూటికల్నాణ్యతా కార్యక్రమాలను ముందుకు తీసుకెళ్లేలా విద్యాసంస్థలతో కలసి పనిచేస్తున్నందుకు ఐపీసీని ఆయన అభినందించారు. నైపర్ హైదరాబాద్, గతంలో నైపర్ అహ్మదాబాద్ లాంటి ప్రతిష్ఠాత్మక సంస్థలతో ఏర్పాటు చేసుకున్న ఈ తరహా సహకారాలు.. నియంత్రణా సంస్థలు, విద్యాసంస్థలు, పారిశ్రామిక భాగస్వాముల మధ్య శాస్త్రీయ పరిజ్ఞాన వినిమయానికి, సామర్థ్య నిర్మాణానికి ముఖ్యమైన వేదికను అందిస్తాయని తెలియజేశారు.

ఫార్మాస్యూటికల్ మలినాల వల్ల ఎదురయ్యే దుష్ప్రభావాలను తగ్గించడంలో వ్యర్థాల ప్రొఫైలింగ్, శాస్త్రీయంగా ఏర్పాటు చేసిన ఫార్మకోపియా ప్రమాణాలు ముఖ్యమైన అంశాలని ఐపీసీ కార్యదర్శిగా, శాస్త్రీయ సంచాలకులుగా వ్యవహరిస్తున్న డాక్టర్ వీ కలైసెల్వన్ స్పష్టం చేశారు. విస్తృతమైన ఫార్మకోపియా ప్రమాణాలు, నాణ్యతా హామీ యంత్రాంగాల ద్వారా ఔషధ నాణ్యతా వ్యవస్థలను బలోపేతం చేసి వికసిత్ భారత్ లక్ష్యానికి దోహదపడేందుకు ఐపీసీ కట్టుబడి ఉందని ఆయన పునరుద్ఘాటించారు.

ప్రారంభ కార్యక్రమానికి ఐపీసీ, సీడీఎస్‌సీవో, నైపర్ హైదరాబాద్‌కు చెందిన ఉన్నతాధికారులు, ఫార్మాస్యూటికల్ పరిశ్రమ  ప్రతినిధులు పాల్గొన్నారు. హైదరాబాద్‌లోని సీడీఎస్‌సీవో డిప్యూటీ డ్రగ్స్ కంట్రోలర్ (ఇండియా) శ్రీ కే నరేంద్రన్ ఈ కార్యక్రమానికి హాజరైన వారిని ఉద్దేశించి ప్రసంగించారు. ఔషధాల నాణ్యతకు హామీ ఇచ్చేలా ఏకీకృత ప్రమాణాలు, నియంత్రణ సంస్థల పర్యవేక్షణ ప్రాధాన్యాన్ని వివరించారు.

ఔషధ నాణ్యత, వైద్య రంగాలకు చెందిన వారు పాల్గొన్నారు. ఔషధాల వల్ల ఎదురయ్యే తీవ్రమైన ప్రతికూల ప్రభావాలు, రోగి భద్రతా సమస్యలతో పాటుగా ఫార్మకోపియల్ మలినాల వల్ల ఎదురయ్యే క్లినికల్ ప్రభావాలపై చర్చించేందుకు తొలిసారిగా నియంత్రణ, విశ్లేషణ, పారిశ్రామిక, క్లినికల్ రంగాలకు చెందిన నిపుణులను ఐపీసీ ఒకే వేదిక మీదకు తీసుకొచ్చింది. ఐపీఆర్ఎస్, మలినాల ప్రమాణాల అభివృద్ధి, స్వీకరణ, అమల్లో చురుగ్గా పాల్గొంటున్న ఫార్మాస్యూటికల్ పరిశ్రమలకు తమ అనుభవాలను, ఆలోచనలను పంచుకొనే అవకాశాన్ని ఈ సదస్సు అందించింది.

ఫార్మకోపియా ప్రమాణాలు, మలినాల నియంత్రణ, నియంత్రణల అమలు, భారతీయ ఫార్మకోపియా -2026లో పురోగతులు, మలినాల నిర్దేశక ప్రమాణాలు, ఫార్మాస్యూటికల్ నాణ్యతకు హామీ, ప్రమాద అంచనా విధానాలు, ఫార్మాస్యూటికల్ మలినాల నిర్వహణ-నియంత్రణలో అంతర్జాతీయంగా ఎదురవుతున్న సవాళ్లు తదితర సమకాలీన అంశాలపై సాంకేతిక సెషన్లలో ఐపీసీ, సీడీఎస్‌సీవో, విద్యాసంస్థలు, ఫార్మాస్యూటికల్ రంగానికి చెందిన నిపుణులు చర్చించారు.

ఫార్మాస్యూటికల్ మలినాలు, విశ్లేషణ పద్ధతులు, నియంత్రణల అంచనాలు, అమలులో ఎదురయ్యే సవాళ్లకు సంబంధించిన వివిధ అంశాలపై ఐపీసీ, సీడీఎస్‌సీవో, రాష్ట్రాల లైసెన్సింగ్ అథారిటీలు, విద్యావేత్తలు, వైద్యులు, పరిశోధకులు, పరిశ్రమల ప్రతినిధులతో జరిగిన చర్చా కార్యక్రమంతో సదస్సు ముగిసింది.

దేశవ్యాప్తంగా ఉన్న నియంత్రణ సంస్థల ప్రతినిధులు, ఫార్మాస్యూటికల్ పరిశ్రమ నిపుణులు, విద్యావేత్తలు, వైద్యులు, అనలిటికల్ శాస్త్రవేత్తలు, పరిశోధకులు ఈ కార్యక్రమానికి హాజరయ్యారు. శాస్త్రీయంగా పటిష్టంగా ఉన్న ఫార్మకోపియా ప్రమాణాల ద్వారా ఔషధ  నాణ్యత వ్యవస్థలను బలోపేతం చేయడం, ప్రజారోగ్య భద్రతను ప్రోత్సహించడంలో ఐపీసీ నిబద్ధతను ఈ సదస్సు పునరుద్ఘాటిస్తుంది.

 

***

(రిలీజ్ ఐడి: 2261666) సందర్శకుల సూచీ సంఖ్య : : 10