حکومت ہند کے زمینی وسائل کے محکمے کے سکریٹری جناب نریندر بھوشن کی قیادت میں دیہی ترقیات کی وزارت کے ایک اعلیٰ سطحی وفد نے جمعرات کے روز چھتیس گڑھ کے دھمتری ضلع کے مگرلود بلاک میں پردھان منتری کرشی سینچائی یوجنا 2.0 (ڈبلیو ڈی سی-پی ایم کے ایس وائی 2.0) کے  اہم ترقیاتی جزو کے تحت مخصوص ترقیاتی منصوبوں کا وسیع  علاقائی دورہ کیا۔

 

 

وفد نے حفاظتی آبپاشی، روزگار کے فروغ اور مٹی و پانی کے تحفظ پر مرکوز مختلف اقدامات کا جائزہ لیا۔ اس وفد میں جوائنٹ سکریٹری (واٹرشیڈ مینجمنٹ) جناب نتن کھڑے اور ضلعی  کلیکٹرجناب  ابھیناش مشرا شامل تھے۔

 

سنکرا گاؤں کے دورے کے دوران سکریٹری نے اہم ترقیاتی جزو ( ڈبلیو ڈی سی) اور منریگا کے مشترکہ تعاون سے 40.34 لاکھ روپے کی لاگت سے تعمیر شدہ ایک اسٹاپ ڈیم کا معائنہ کیا۔ اس ڈیم سے تقریباً 80 سے 85 ایکڑ زمین سیراب ہوئی ہے اور 50 سے زائد کسان اس سے مستفید ہو رہے ہیں۔ بیلاوڈی گاؤں میں وفد نے 20.20 لاکھ روپے کی لاگت سے تیار کی گئی 430 میٹر طویل آبپاشی نہر کا جائزہ لیا، جو اس وقت تقریباً 150 ایکڑ زمین کو سیراب کر رہی ہے اور مٹی کے کٹاؤ کو کافی حد تک کم کرنے میں مدد دے رہی ہے۔

وفد نے سونگا گاؤں میں پانچ ایکڑ کے شجرکاری منصوبے کا بھی دورہ کیا، جہاں دریا کے ایک جزیرے پر 1050 امرود اور لیموں کے پودے لگائے گئے ہیں۔ پانی کی کمی کے مسئلے سے نمٹنے کے لیے حکام نے علاقے میں چھوٹے تالاب بنانے کا مشورہ دیا ہے۔

وفد نے بودرا اور گڈاڈیہ گاؤں میں ‘‘امرت سروور’’ منصوبوں کا بھی جائزہ لیا، جو زیر زمین پانی کی بحالی اور کمیونٹی کو پانی کی دستیابی میں مدد فراہم کر رہے ہیں۔

اس دورے کی ایک اہم جھلک گڈاڈیہ میں لِفٹ آبپاشی منصوبہ تھا، جو مہاندی دریا کے پانی کو استعمال کرتے ہوئے 85 ہیکٹر زرعی زمین کو سیراب کرتا ہے اور تقریباً 250 کسانوں کو فائدہ پہنچاتا ہے۔ جناب نریندر بھوشن نے اس اقدام کو ایک ‘‘کامیاب ماڈل’’ قرار دیتے ہوئے حکام کو ہدایت دی کہ ایسے منصوبوں کو ریاستی سطح پر مثالی ماڈل کے طور پر دستاویزی شکل دی جائے تاکہ مستقبل کی  اہم ترقیاتی اسکیموں میں ان سے رہنمائی لی جا سکے۔

یہ دورہ بیلاوڈی گاؤں میں سبزیوں کے کھیت کے معائنے کے ساتھ مکمل ہوا، جہاں کسانوں کی طرف سے آمدنی بڑھانے کے لیے اپنائی گئی باغبانی کی تکنیکوں کو سراہا گیا۔

**********

ش ح۔ ع ح ۔ش ب ن

U-7103

(ریلیز آئی ڈی: 2261364) وزیٹر کاؤنٹر : 16