بھارت کو اپریل 2026 سے اپریل 2028 تک کامن کرائیٹیریا ڈیولپمنٹ بورڈ (سی سی ڈی بی) کا چیئر نامزد کیا گیا ہے، جو ایک باوقار ذمہ داری ہے اور بین الاقوامی آئی ٹی سکیورٹی معیارات کی تیاری میں ملک کے بڑھتے ہوئے کردار کی عکاسی کرتی ہے۔ اس قیادت کی باضابطہ توثیق 14 سے 16 اپریل 2026 تک ٹوکیو، جاپان میں منعقد ہونے والے کامن کرائیٹیریا ریکگنیشن ارینجمنٹ (سی سی آر اے) کے پہلی سہ ماہی اجلاس کے دوران کی گئی۔

کامن کرائیٹیریا ریکگنیشن ارینجمنٹ (سی سی آر اے) ایک بنیادی بین الاقوامی معاہدہ ہے، جو مختلف ممالک کے درمیان آئی ٹی سکیورٹی سرٹیفکیٹس کے باہمی اعتراف کو ممکن بناتا ہے۔ اعلیٰ سطحی پالیسی کمیٹیوں کے علاوہ، سی سی آر اے مخصوص ورکنگ گروپس اور انتظامی طریقۂ کار کے ذریعے کام کرتا ہے تاکہ کامن کریٹیریا پورٹل کی سالمیت برقرار رکھی جا سکے، جو دنیا بھر میں تصدیق شدہ محفوظ آئی ٹی مصنوعات کے لیے ”واحد مستند ذریعہ“ کے طور پر کام کرتا ہے۔

سی سی ڈی بی، سی سی آر اے کا تکنیکی مرکز ہے، جو کامن کرائیٹیریا (سی سی) اور انفارمیشن ٹیکنالوجی سکیورٹی ایویلیوایشن کے لیے کامن میتھوڈولوجی (سی ای ایم) کے بین الاقوامی ورک پروگرام کا انتظام کرتا ہے۔ جہاں سی سی آر اے کے دیگر گروپ پالیسی امور سنبھالتے ہیں، وہیں سی سی ڈی بی عالمی آئی ٹی مصنوعات کو محفوظ بنانے والے تکنیکی معیارات اور جانچ کے پیمانوں پر توجہ مرکوز کرتا ہے۔

بھارت 16 ستمبر 2013 سے بطور ”سرٹیفکیٹ آتھرائزنگ نیشن“ سی سی آر اے کا ایک فعال رکن ہے۔ ملک اس میں وزارتِ الیکٹرانکس و انفارمیشن ٹیکنالوجی (MEITY) اور ایس ٹی کیو سی ڈائریکٹوریٹ کے ذریعے خدمات انجام دیتا ہے، جو بھارت میں آئی ٹی سکیورٹی جانچ کے لیے باضابطہ سرٹیفکیشن ادارے کے طور پر کام کرتا ہے۔

سی سی آر اے کے قواعد کے مطابق، رکن ممالک کی جانب سے کامن کریٹیریا کے تحت جانچے گئے مصنوعات کے جاری کردہ سرٹیفکیٹ کو بغیر دوبارہ تصدیق کے باہمی طور پر تسلیم کیا جاتا ہے، جس سے محفوظ آئی ٹی مصنوعات کی بین الاقوامی تجارت میں آسانی پیدا ہوتی ہے۔ سی سی آر اے میں 20 سرٹیفکیٹ جاری کرنے والے ممالک اور 18 سرٹیفکیٹ استعمال کرنے والے ممالک شامل ہیں۔ یہ تمام ممالک مشترکہ طور پر کامن کرائیٹیریا پورٹل کی سالمیت کو یقینی بناتے ہیں، جو تصدیق شدہ محفوظ آئی ٹی مصنوعات کے لیے عالمی سطح پر مستند ذخیرے کے طور پر کام کرتا ہے۔

سی سی ڈی بی کی چیئرمین شپ سنبھالنا عالمی آئی ٹی سکیورٹی معیارات کے فروغ کے لیے بھارت کی تکنیکی مہارت اور عزم کو ظاہر کرتا ہے۔ یہ قیادی کردار بھارت کو بین الاقوامی سکیورٹی جانچ کے طریقۂ کار کی تشکیل میں نمایاں مقام فراہم کرتا ہے اور اس بات کو یقینی بناتا ہے کہ ابھرتی ہوئی ٹیکنالوجیز، خصوصاً وہ جو بھارت کے لیے اہم ہیں، عالمی معیاری فریم ورک میں مناسب طور پر شامل کی جائیں۔ دو سالہ مدت بھارت کو دنیا بھر میں آئی ٹی سکیورٹی سرٹیفکیشن کے مستقبل سے متعلق اہم فیصلوں پر اثرانداز ہونے کا موقع فراہم کرے گی۔

***

ش ح۔ ف ش ع

U: 7081

(ریلیز آئی ڈی: 2261194) وزیٹر کاؤنٹر : 11