કેન્દ્રીય કૃષિ અને ખેડૂત કલ્યાણ, અને ગ્રામીણ વિકાસ મંત્રી શ્રી શિવરાજ સિંહ ચૌહાણે મંગળવારે નવી દિલ્હીમાં પંજાબના મુખ્યમંત્રી શ્રી ભગવંત માન સાથે મુલાકાત કરી હતી.

બેઠક દરમિયાન, શ્રી શિવરાજ સિંહ ચૌહાણે પંજાબમાં કૃષિ અને ખેડૂત કલ્યાણ સંબંધિત વિવિધ મુદ્દાઓ પર શ્રી ભગવંત માન સાથે ચર્ચા કરી હતી. આ ઉચ્ચ સ્તરીય ચર્ચામાં ડાંગરના મિલિંગમાં પડતી મુશ્કેલીઓ, પાક વૈવિધ્યકરણને પ્રોત્સાહન, જળ સંસાધનોનું સંરક્ષણ અને તેલીબિયાં, કઠોળ, કપાસ અને બાગાયત મિશન દ્વારા ટકાઉ કૃષિ વિકાસ પર વિગતવાર ધ્યાન કેન્દ્રિત કરવામાં આવ્યું હતું.

બેઠક બાદ મીડિયાને સંબોધતા શ્રી શિવરાજ સિંહ ચૌહાણે જણાવ્યું હતું કે પંજાબે દેશની ખાદ્ય સુરક્ષાને મજબૂત કરવામાં ઐતિહાસિક ભૂમિકા ભજવી છે અને તે ભારતનું 'અન્નપાત્ર' (food bowl) બની રહ્યું છે. રાષ્ટ્રીય અનાજ ઉત્પાદનમાં પંજાબના ખેડૂતોના યોગદાનની પ્રશંસા કરતા તેમણે ખાતરી આપી હતી કે કેન્દ્ર સરકાર કૃષિ સંબંધિત તમામ મિશનમાં રાજ્યને સંપૂર્ણ સહયોગ આપશે.

કેન્દ્રીય મંત્રીએ ખાતરી આપી હતી કે કેન્દ્ર કૃષિ અને જળ સંરક્ષણ સંબંધિત તમામ પહેલોમાં પંજાબને તમામ સંભવિત સહાય પૂરી પાડશે. તેમણે કહ્યું કે પંજાબના કૃષિ ક્ષેત્રને મજબૂત કરવા અને ખેડૂતોનું કલ્યાણ સુનિશ્ચિત કરવા માટે ભારત સરકારના કપાસ, કઠોળ, તેલીબિયાં અને બાગાયત મિશનની સાથે અન્ય યોજનાઓનો લાભ લેવામાં આવશે.

તેમણે કહ્યું કે કેન્દ્ર સરકાર અને પંજાબ સરકાર રાજ્યમાં પાક વૈવિધ્યકરણને પ્રોત્સાહન આપવા, જળ સંસાધનોનું સંરક્ષણ કરવા અને ટકાઉ કૃષિ વિકાસ સુનિશ્ચિત કરવા માટે સાથે મળીને કામ કરશે. પંજાબની ફળદ્રુપ જમીનમાં અપાર કૃષિ ક્ષમતા છે, પરંતુ જળ સંરક્ષણ અને ટકાઉ ખેતી પદ્ધતિઓ પર પણ વિશેષ ધ્યાન આપવાની જરૂર છે.

શ્રી શિવરાજ સિંહ ચૌહાણે જણાવ્યું હતું કે કેન્દ્ર પંજાબ સાથે મળીને કામ કરશે જેથી પાક વૈવિધ્યકરણને કારણે ખેડૂતોને નુકસાન ન થાય, જળ સંસાધનો સુરક્ષિત રહે, જમીનનું સ્વાસ્થ્ય સુધરે અને કૃષિ આબોહવા પરિવર્તનની અસરો સામે વધુ સ્થિતિસ્થાપક બને. તેમણે એમ પણ કહ્યું કે દેશમાં ખાતરની કોઈ અછત નથી, પરંતુ જમીનનું સ્વાસ્થ્ય જાળવવા માટે ખાતરનો સંતુલિત ઉપયોગ જરૂરી છે.

શ્રી ભગવંત માને જણાવ્યું હતું કે પંજાબ વર્તમાન સીઝન માટે નક્કી કરાયેલ ઘઉંની ખરીદીનો લક્ષ્યાંક સફળતાપૂર્વક હાંસલ કરશે. તેમણે કહ્યું કે રાજ્ય 125 લાખ મેટ્રિક ટન ઘઉંની ખરીદીનો લક્ષ્યાંક પૂરો કરશે અને અનાજ ઉત્પાદનમાં દેશનું નેતૃત્વ કરવાનું ચાલુ રાખશે.

પંજાબની વધારાની નાણાકીય સહાયની માંગ અંગેના પ્રશ્નોના જવાબમાં કેન્દ્રીય મંત્રીએ જણાવ્યું હતું કે કેન્દ્ર સરકાર વિવિધ કૃષિ, સિંચાઈ અને ખેડૂત કલ્યાણ મિશન દ્વારા રાજ્યને ટેકો આપવાનું ચાલુ રાખશે. શ્રી શિવરાજ સિંહ ચૌહાણે એવી પણ ખાતરી આપી હતી કે સેન્ટ્રલ સીડ કમિટીમાં પંજાબના પ્રતિનિધિનો સમાવેશ કરવાની પંજાબ સરકારની દરખાસ્ત પર વિચાર કરવામાં આવશે.

IJ/DK/JD

(રીલીઝ આઈડી: 2260873) મુલાકાતી સંખ્યા : 18