ಸಂಕ್ಷಿಪ್ತ ಮಾಹಿತಿ: ಜನವರಿ-ಮಾರ್ಚ್ 2026ರಲ್ಲಿ 15 ವರ್ಷ ಮೇಲ್ಪಟ್ಟ ವ್ಯಕ್ತಿಗಳ ಒಟ್ಟಾರೆ ಎಲ್‌ಎಫ್‌ಪಿಆರ್‌ (ಕಾರ್ಮಿಕ ಬಲದ ಭಾಗವಹಿಸುವಿಕೆ ದರ) ಶೇ. 55.5 ರಷ್ಟಿದ್ದು, ಇದು ಹಿಂದಿನ ತ್ರೈಮಾಸಿಕದ ಶೇ. 55.8 ಕ್ಕೆ ಹೋಲಿಸಿದರೆ ಸ್ವಲ್ಪ ಇಳಿಕೆ ಕಂಡಿದೆ. 15 ವರ್ಷ ಮೇಲ್ಪಟ್ಟ ಮಹಿಳಾ ಎಲ್‌ಎಫ್‌ಪಿಆರ್ ಹಿಂದಿನ ತ್ರೈಮಾಸಿಕಕ್ಕೆ ಹೋಲಿಸಿದರೆ ಶೇ. 34.7 ರಷ್ಟಿದ್ದು, ಯಾವುದೇ ಗಮನಾರ್ಹ ಬದಲಾವಣೆ ಕಂಡಿಲ್ಲ. ಜನವರಿ-ಮಾರ್ಚ್ 2026ರಲ್ಲಿ ನಗರ ಪ್ರದೇಶದ ಡಬ್ಲ್ಯುಪಿಆರ್‌ (ಕಾರ್ಮಿಕ ಜನಸಂಖ್ಯೆಯ ಅನುಪಾತ) ಶೇ. 46.9 ರಷ್ಟು ಸ್ಥಿರತೆಯನ್ನು ಕಾಯ್ದುಕೊಂಡಿದೆ. ಗ್ರಾಮೀಣ ಪ್ರದೇಶಗಳಲ್ಲಿ 15 ವರ್ಷ ಮೇಲ್ಪಟ್ಟ ನಿಯಮಿತ ವೇತನ ಪಡೆಯುವ ಉದ್ಯೋಗಿಗಳ ಸಂಖ್ಯೆಯು ಜನವರಿ-ಮಾರ್ಚ್ 2026ರ ಅವಧಿಯಲ್ಲಿ ಹಿಂದಿನ ತ್ರೈಮಾಸಿಕದ ಶೇ. 14.8 ರಿಂದ ಶೇ. 15.5 ಕ್ಕೆ ಸಾಧಾರಣ ಏರಿಕೆ ಕಂಡಿದೆ. ಜನವರಿ-ಮಾರ್ಚ್ 2026ರಲ್ಲಿ ದ್ವಿತೀಯ ಮತ್ತು ತೃತೀಯ ವಲಯಗಳೆರಡರಲ್ಲೂ 15 ವರ್ಷ ಮೇಲ್ಪಟ್ಟ ವ್ಯಕ್ತಿಗಳ ಗ್ರಾಮೀಣ ಉದ್ಯೋಗದ ಪಾಲು ಹೆಚ್ಚಳ ದಾಖಲಿಸಿದೆ. ನಗರ ಪ್ರದೇಶಗಳಲ್ಲಿ 15 ವರ್ಷ ಮೇಲ್ಪಟ್ಟ ವ್ಯಕ್ತಿಗಳ ನಿರುದ್ಯೋಗ ದರ (UR) ಇಳಿಕೆಯ ಪ್ರವೃತ್ತಿಯನ್ನು ತೋರಿಸಿದೆ.

ಪೀಠಿಕೆ

ಎಂಒಎಸ್‌ಪಿಐ (MoSPI) ನ ರಾಷ್ಟ್ರೀಯ ಸಾಂಖ್ಯಿಕ ಕಚೇರಿ (NSO) ವತಿಯಿಂದ ನಡೆಸಲ್ಪಡುವ ನಿಯತಕಾಲಿಕ ಕಾರ್ಮಿಕ ಬಲ ಸಮೀಕ್ಷೆಯು (ಪಿಎಲ್‌ಎಫ್‌ಎಸ್‌), ಜನಸಂಖ್ಯೆಯ ಚಟುವಟಿಕೆಯ ಭಾಗವಹಿಸುವಿಕೆ ಮತ್ತು ಉದ್ಯೋಗ-ನಿರುದ್ಯೋಗ ಪರಿಸ್ಥಿತಿಗಳ ದತ್ತಾಂಶದ ಪ್ರಾಥಮಿಕ ಮೂಲವಾಗಿದೆ. ಸಿಡಬ್ಲ್ಯುಎಸ್ (CWS) ಚೌಕಟ್ಟಿನಡಿಯಲ್ಲಿ ಗ್ರಾಮೀಣ ಮತ್ತು ನಗರ ಭಾರತ ಎರಡಕ್ಕೂ ಕಾರ್ಮಿಕ ಬಲದ ಸೂಚಕಗಳ ಮಾಸಿಕ ಮತ್ತು ತ್ರೈಮಾಸಿಕ ಅಂದಾಜುಗಳನ್ನು ಒದಗಿಸಲು ಪಿಎಲ್‌ಎಫ್‌ಎಸ್‌ ಸಮೀಕ್ಷೆಯ ವಿಧಾನವನ್ನು ಜನವರಿ 2025 ರಿಂದ ಮಾರ್ಪಡಿಸಲಾಗಿದೆ. ವ್ಯಾಪಕ ವ್ಯಾಪ್ತಿಯೊಂದಿಗೆ ಹೆಚ್ಚಿನ ಆವರ್ತನದ ಕಾರ್ಮಿಕ ಬಲದ ಸೂಚಕಗಳನ್ನು ಸೃಷ್ಟಿಸುವ ಅಗತ್ಯವನ್ನು ಪರಿಗಣಿಸಿ, ನಿಯತಕಾಲಿಕ ಕಾರ್ಮಿಕ ಬಲ ಸಮೀಕ್ಷೆಯ ಮಾದರಿ ವಿಧಾನವನ್ನು ಜನವರಿ 2025 ರಿಂದ ಪುನಶ್ಚೇತನಗೊಳಿಸಲಾಗಿದೆ.

ಮರುವಿನ್ಯಾಸಗೊಳಿಸಲಾದ ಪಿಎಲ್‌ಎಫ್‌ಎಸ್‌ ಈ ಕೆಳಗಿನ ಉದ್ದೇಶಗಳನ್ನು ಸಾಧಿಸುವ ಗುರಿಯನ್ನು ಹೊಂದಿದೆ:

• ಪ್ರಚಲಿತ ಸಾಪ್ತಾಹಿಕ ಸ್ಥಿತಿಗತಿಯ ಅಡಿಯಲ್ಲಿ ಅಖಿಲ ಭಾರತ ಮಟ್ಟದಲ್ಲಿ ಗ್ರಾಮೀಣ ಮತ್ತು ನಗರ ಪ್ರದೇಶಗಳೆರಡಕ್ಕೂ ಪ್ರತಿ ತಿಂಗಳು ಪ್ರಮುಖ ಉದ್ಯೋಗ ಮತ್ತು ನಿರುದ್ಯೋಗ ಸೂಚಕಗಳನ್ನು – ಅಂದರೆ ಕಾರ್ಮಿಕ ಬಲದ ಭಾಗವಹಿಸುವಿಕೆ ದರ (ಎಲ್‌ಎಫ್‌ಪಿಆರ್), ಕಾರ್ಮಿಕ ಜನಸಂಖ್ಯೆಯ ಅನುಪಾತ (WPR) ಮತ್ತು ನಿರುದ್ಯೋಗ ದರವನ್ನು (UR) – ಸೃಷ್ಟಿಸುವುದು.
• ತ್ರೈಮಾಸಿಕ ಪಿಎಲ್‌ಎಫ್‌ಎಸ್‌ ಫಲಿತಾಂಶಗಳನ್ನು ಗ್ರಾಮೀಣ ಪ್ರದೇಶಗಳಿಗೂ ವಿಸ್ತರಿಸುವುದು, ಆ ಮೂಲಕ ಸಿಡಬ್ಲ್ಯುಎಸ್ ಚೌಕಟ್ಟಿನ ಅಡಿಯಲ್ಲಿ ಗ್ರಾಮೀಣ ಮತ್ತು ನಗರ ಭಾರತ ಎರಡಕ್ಕೂ ಕಾರ್ಮಿಕ ಮಾರುಕಟ್ಟೆ ಸೂಚಕಗಳ ತ್ರೈಮಾಸಿಕ ಅಂದಾಜುಗಳನ್ನು ಸಿದ್ಧಪಡಿಸುವುದು.
• ಗ್ರಾಮೀಣ ಮತ್ತು ನಗರ ಪ್ರದೇಶಗಳಿಗೆ ಸಾಮಾನ್ಯ ಸ್ಥಿತಿ ಮತ್ತು ಪ್ರಚಲಿತ ಸಾಪ್ತಾಹಿಕ ಸ್ಥಿತಿಗತಿ ಎರಡರಲ್ಲೂ ಪ್ರಮುಖ ಉದ್ಯೋಗ ಮತ್ತು ನಿರುದ್ಯೋಗ ಸೂಚಕಗಳ ವಾರ್ಷಿಕ ಅಂದಾಜುಗಳನ್ನು ಒದಗಿಸುವುದು.

ಡಿಸೆಂಬರ್ 2024 ರವರೆಗೆ ಬಿಡುಗಡೆಯಾದ ಹಿಂದಿನ ಪಿಎಲ್‌ಎಫ್‌ಎಸ್‌ ತ್ರೈಮಾಸಿಕ ಬುಲೆಟಿನ್‌ಗಳು ಕೇವಲ ನಗರ ಪ್ರದೇಶಗಳಿಗೆ ಸಂಬಂಧಿಸಿದ ಕಾರ್ಮಿಕ ಮಾರುಕಟ್ಟೆ ಸೂಚಕಗಳನ್ನು ಪ್ರಸ್ತುತಪಡಿಸುತ್ತಿದ್ದವು. ಏಪ್ರಿಲ್ - ಜೂನ್ 2025 ರ ಬುಲೆಟಿನ್ ಈ ಸರಣಿಯಲ್ಲಿ ಗ್ರಾಮೀಣ ಮತ್ತು ನಗರ ಪ್ರದೇಶಗಳೆರಡಕ್ಕೂ ಅಂದಾಜುಗಳನ್ನು ಒದಗಿಸಿದ ಮೊದಲನೆಯದಾಗಿದ್ದು, ಈಗಿನ ಜನವರಿ - ಮಾರ್ಚ್ 2026 ರ ಬುಲೆಟಿನ್ ಈ ಸರಣಿಯ ನಾಲ್ಕನೇ ಬುಲೆಟಿನ್ ಆಗಿದೆ. ಈ ತ್ರೈಮಾಸಿಕ ಬುಲೆಟಿನ್‌ನಲ್ಲಿ, ಕಾರ್ಮಿಕರ ಸಂಖ್ಯೆಯ ಅಂದಾಜುಗಳನ್ನು ನಿಖರ ಅಂಕಿ-ಅಂಶಗಳಲ್ಲಿ ಒದಗಿಸುವ ಪ್ರಯತ್ನಗಳನ್ನು ಮಾಡಲಾಗಿದೆ.

ಈ ತ್ರೈಮಾಸಿಕ ಬುಲೆಟಿನ್ ಪ್ರಮುಖ ಕಾರ್ಮಿಕ ಬಲದ ಸೂಚಕಗಳಾದ – ಕಾರ್ಮಿಕ ಬಲದ ಭಾಗವಹಿಸುವಿಕೆ ದರ (ಎಲ್‌ಎಫ್‌ಪಿಆರ್), ಕಾರ್ಮಿಕ ಜನಸಂಖ್ಯೆಯ ಅನುಪಾತ, ನಿರುದ್ಯೋಗ ದರ, ಮತ್ತು ಉದ್ಯೋಗದ ಸ್ಥಿತಿ ಹಾಗೂ ಕೆಲಸದ ಉದ್ಯಮಕ್ಕೆ ಅನುಗುಣವಾಗಿ ಕಾರ್ಮಿಕರ ವಿತರಣೆಯ ಅಂದಾಜುಗಳನ್ನು – ಪ್ರಚಲಿತ ಸಾಪ್ತಾಹಿಕ ಸ್ಥಿತಿಗತಿಯಲ್ಲಿ (CWS), ಅಖಿಲ ಭಾರತ ಮಟ್ಟದಲ್ಲಿ ಗ್ರಾಮೀಣ ಮತ್ತು ನಗರ ಪ್ರದೇಶಗಳಿಗೆ ಪ್ರತ್ಯೇಕವಾಗಿ ಪ್ರಸ್ತುತಪಡಿಸುತ್ತದೆ. ಇದರ ಜೊತೆಗೆ, ಆಯ್ದ ರಾಜ್ಯಗಳಿಗಾಗಿ ಸಿಡಬ್ಲ್ಯುಎಸ್‌ನಲ್ಲಿನ ಎಲ್‌ಎಫ್‌ಪಿಆರ್, ಡಬ್ಲ್ಯುಪಿಆರ್‌ ಮತ್ತು ಯುಆರ್‌ ನ ರಾಜ್ಯ ಮಟ್ಟದ ಅಂದಾಜುಗಳನ್ನು ಸಹ ನೀಡಲಾಗಿದೆ.

ಪ್ರಚಲಿತ ಸಾಪ್ತಾಹಿಕ ಸ್ಥಿತಿಗತಿಯ ಅಡಿಯಲ್ಲಿ 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳ ಪ್ರಮುಖ ಸಂಶೋಧನೆಗಳು ಹೀಗಿವೆ:

ಕಾರ್ಮಿಕ ಬಲದ ಭಾಗವಹಿಸುವಿಕೆ ದರ (ಎಲ್‌ಎಫ್‌ಪಿಆರ್) ಸ್ಥಿರವಾಗಿ ಉಳಿದಿದೆ: 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳಲ್ಲಿನ ಒಟ್ಟಾರೆ ಎಲ್‌ಎಫ್‌ಪಿಆರ್ ಹಿಂದಿನ ತ್ರೈಮಾಸಿಕದ ಶೇ. 55.8 ಕ್ಕೆ ಹೋಲಿಸಿದರೆ ಜನವರಿ-ಮಾರ್ಚ್ 2026 ರಲ್ಲಿ ಶೇ. 55.5 ರಷ್ಟು ಅಂದಾಜಿಸಲಾಗಿದೆ. ಗ್ರಾಮೀಣ ಪ್ರದೇಶಗಳಲ್ಲಿ, 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳ ಎಲ್‌ಎಫ್‌ಪಿಆರ್ ಈ ತ್ರೈಮಾಸಿಕದಲ್ಲಿ ಶೇ. 58.2 ರಷ್ಟಿದ್ದರೆ, ಅಕ್ಟೋಬರ್-ಡಿಸೆಂಬರ್ 2025 ರಲ್ಲಿ ಇದು ಶೇ. 58.4 ರಷ್ಟಿತ್ತು. ಇದೇ ವಯೋಮಾನದ ನಗರ ಪ್ರದೇಶದ ಎಲ್‌ಎಫ್‌ಪಿಆರ್ ಹಿಂದಿನ ತ್ರೈಮಾಸಿಕದ ಶೇ. 50.4 ಕ್ಕೆ ಹೋಲಿಸಿದರೆ ಜನವರಿ-ಮಾರ್ಚ್ 2026 ರಲ್ಲಿ ಶೇ. 50.2 ರಷ್ಟಿದೆ.

ಮಹಿಳಾ ಎಲ್‌ಎಫ್‌ಪಿಆರ್ ಬಹುತೇಕ ಬದಲಾಗದೆ ಉಳಿದಿದೆ: 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಮಹಿಳೆಯರ ಒಟ್ಟಾರೆ ಎಲ್‌ಎಫ್‌ಪಿಆರ್ ಬಹುತೇಕ ಸ್ಥಿರವಾಗಿದ್ದು, ಹಿಂದಿನ ತ್ರೈಮಾಸಿಕದ ಶೇ. 34.9 ಕ್ಕೆ ಹೋಲಿಸಿದರೆ ಜನವರಿ-ಮಾರ್ಚ್ 2026 ರಲ್ಲಿ ಶೇ. 34.7 ರಷ್ಟು ದಾಖಲಾಗಿದೆ. ಪ್ರಸಕ್ತ ತ್ರೈಮಾಸಿಕದಲ್ಲಿ, ಗ್ರಾಮೀಣ ಪ್ರದೇಶದ ಮಹಿಳಾ ಎಲ್‌ಎಫ್‌ಪಿಆರ್ ಹಿಂದಿನ ತ್ರೈಮಾಸಿಕದ ಶೇ. 39.4 ಕ್ಕೆ ಎದುರಾಗಿ ಶೇ. 39.2 ರಷ್ಟು ಅಂದಾಜಿಸಲಾಗಿದೆ, ಮತ್ತು ನಗರ ಪ್ರದೇಶಗಳಲ್ಲಿ ಇದು ಶೇ. 25.5 ಕ್ಕೆ ಹೋಲಿಸಿದರೆ ಶೇ. 25.4 ರಷ್ಟಿದೆ.

ಮಹಿಳಾ ಎಲ್‌ಎಫ್‌ಪಿಆರ್ (ಕಾರ್ಮಿಕ ಬಲದ ಭಾಗವಹಿಸುವಿಕೆ ದರ) ಬಹುತೇಕ ಬದಲಾಗದೆ ಉಳಿದಿದ್ದು, ಜನವರಿ-ಮಾರ್ಚ್ 2026 ರಲ್ಲಿ ಶೇ. 34.7 ರಷ್ಟು ದಾಖಲಾಗಿದೆ.

ನಗರ ಪ್ರದೇಶದ ಕಾರ್ಮಿಕ ಬಲದ ಸ್ಥಿರತೆ: 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳ ಒಟ್ಟಾರೆ ಕಾರ್ಮಿಕ ಜನಸಂಖ್ಯೆಯ ಅನುಪಾತವು (ಡಬ್ಲ್ಯುಪಿಆರ್‌), ಅಕ್ಟೋಬರ್-ಡಿಸೆಂಬರ್ 2025 ರಲ್ಲಿದ್ದ ಶೇ. 53.1 ಕ್ಕೆ ಹೋಲಿಸಿದರೆ ಜನವರಿ-ಮಾರ್ಚ್ 2026 ರಲ್ಲಿ ಶೇ. 52.8 ರಷ್ಟಿದೆ. ಈ ತ್ರೈಮಾಸಿಕದಲ್ಲಿ ಗ್ರಾಮೀಣ ಡಬ್ಲ್ಯುಪಿಆರ್‌ ಹಿಂದಿನ ತ್ರೈಮಾಸಿಕದ ಶೇ. 56.1 ರಿಂದ ಶೇ. 55.7 ಕ್ಕೆ ಅಲ್ಪ ಪ್ರಮಾಣದ ಇಳಿಕೆ ಕಂಡರೆ, ನಗರ ಪ್ರದೇಶದ ಡಬ್ಲ್ಯುಪಿಆರ್‌ ಹಿಂದಿನ ತ್ರೈಮಾಸಿಕದ ಶೇ. 47.1 ಕ್ಕೆ ಹೋಲಿಸಿದರೆ ಪ್ರಸಕ್ತ ತ್ರೈಮಾಸಿಕದಲ್ಲಿ ಶೇ. 46.9 ರಷ್ಟು ಸ್ಥಿರತೆಯನ್ನು ಕಾಯ್ದುಕೊಂಡಿದೆ.

15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳ ನಗರ ಪ್ರದೇಶದ ಕಾರ್ಮಿಕ ಜನಸಂಖ್ಯೆಯ ಅನುಪಾತವು (ಡಬ್ಲುಪಿಆರ್‌), ಜನವರಿ-ಮಾರ್ಚ್ 2026 ರಲ್ಲಿ ಶೇ. 46.9 ರಷ್ಟು ಸ್ಥಿರವಾಗಿ ಉಳಿದಿದೆ.

 

ನಗರ ಪ್ರದೇಶಗಳಲ್ಲಿನ ಒಟ್ಟಾರೆ ನಿರುದ್ಯೋಗ ದರವು (UR) ಇಳಿಕೆಯ ಪ್ರವೃತ್ತಿಯನ್ನು ತೋರಿಸಿದೆ: 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳ ನಗರ ಪ್ರದೇಶದ ಒಟ್ಟಾರೆ ನಿರುದ್ಯೋಗ ದರವು, ಕಳೆದ ಎರಡು ತ್ರೈಮಾಸಿಕಗಳಿಗೆ ಹೋಲಿಸಿದರೆ ಜನವರಿ-ಮಾರ್ಚ್ 2026ರ ತ್ರೈಮಾಸಿಕದಲ್ಲಿ ಇಳಿಕೆಯ ಪ್ರವೃತ್ತಿಯನ್ನು ಪ್ರದರ್ಶಿಸಿದೆ. ಹಿಂದಿನ ತ್ರೈಮಾಸಿಕದಲ್ಲಿ ಶೇ. 6.7 ರಷ್ಟಿದ್ದ ಈ ದರವು ಪ್ರಸಕ್ತ ತ್ರೈಮಾಸಿಕದಲ್ಲಿ ಶೇ. 6.6 ಕ್ಕೆ ತಲುಪಿದೆ. ಇದೇ ಅವಧಿಯಲ್ಲಿ ಗ್ರಾಮೀಣ ಪ್ರದೇಶಗಳಲ್ಲಿನ ನಿರುದ್ಯೋಗ ದರವು ಶೇ. 4.0 ರಿಂದ ಶೇ. 4.3 ಕ್ಕೆ ಅಲ್ಪ ಪ್ರಮಾಣದಲ್ಲಿ ಏರಿಕೆಯಾಗಿದೆ.

 

15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳ ನಗರ ಪ್ರದೇಶದ ನಿರುದ್ಯೋಗ ದರವು (UR) ಇಳಿಕೆಯ ಪ್ರವೃತ್ತಿಯನ್ನು ತೋರಿಸಿದೆ.

ಗ್ರಾಮೀಣ ಪ್ರದೇಶಗಳಲ್ಲಿ ನಿಯಮಿತ ವೇತನ/ಸಂಬಳ ಪಡೆಯುವ ಉದ್ಯೋಗಿಗಳ ಸಂಖ್ಯೆಯಲ್ಲಿ ಏರಿಕೆ: ಗ್ರಾಮೀಣ ಪ್ರದೇಶಗಳಲ್ಲಿ, ನಿಯಮಿತ ವೇತನ ಅಥವಾ ಸಂಬಳ ಪಡೆಯುವ ಉದ್ಯೋಗಿಗಳ ಪ್ರಮಾಣವು ಏರಿಕೆಯನ್ನು ಕಂಡಿದ್ದು, ಹಿಂದಿನ ತ್ರೈಮಾಸಿಕದಲ್ಲಿದ್ದ ಶೇ. 14.8 ರಿಂದ ಜನವರಿ-ಮಾರ್ಚ್ 2026ರ ಅವಧಿಯಲ್ಲಿ ಶೇ. 15.5 ಕ್ಕೆ ಏರಿದೆ. 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಸ್ವಯಂ ಉದ್ಯೋಗಿಗಳ ಪಾಲು ಅಕ್ಟೋಬರ್-ಡಿಸೆಂಬರ್ 2025 ರಲ್ಲಿದ್ದ ಶೇ. 63.2 ರಿಂದ ಈ ತ್ರೈಮಾಸಿಕದಲ್ಲಿ ಶೇ. 62.5 ಕ್ಕೆ ಇಳಿದಿದೆ. ನಗರ ಪ್ರದೇಶಗಳಲ್ಲಿ, ವಿವಿಧ ಉದ್ಯೋಗ ಸ್ಥಿತಿಗಳಾದ್ಯಂತ ಕಾರ್ಮಿಕರ ವಿತರಣೆಯು ಹಿಂದಿನ ತ್ರೈಮಾಸಿಕಕ್ಕೆ ಹೋಲಿಸಿದರೆ ಬಹುತೇಕ ಸ್ಥಿರವಾಗಿ ಉಳಿದಿದೆ.

ಗ್ರಾಮೀಣ ಪ್ರದೇಶಗಳಲ್ಲಿ, ನಿಯಮಿತ ವೇತನ ಅಥವಾ ಸಂಬಳ ಪಡೆಯುವ ಉದ್ಯೋಗಿಗಳ ಪಾಲು ಜನವರಿ-ಮಾರ್ಚ್ 2026 ರ ಅವಧಿಯಲ್ಲಿ ಸಾಧಾರಣ ಏರಿಕೆಯನ್ನು ಕಂಡಿದೆ.

ದ್ವಿತೀಯ ಮತ್ತು ತೃತೀಯ ವಲಯಗಳೆರಡರಲ್ಲೂ ಗ್ರಾಮೀಣ ಉದ್ಯೋಗದ ಹೆಚ್ಚಳ: ಉದ್ಯೋಗದ ವಲಯವಾರು ವಿತರಣೆಯು ಇದೇ ರೀತಿಯ ರಚನಾತ್ಮಕ ಮಾದರಿಯನ್ನು ಪ್ರದರ್ಶಿಸುವುದನ್ನು ಮುಂದುವರೆಸಿದೆ, ಗ್ರಾಮೀಣ ಕಾರ್ಮಿಕ ಬಲವು ಪ್ರಧಾನವಾಗಿ ಪ್ರಾಥಮಿಕ ವಲಯದಲ್ಲಿ ತೊಡಗಿಸಿಕೊಂಡಿದೆ ಮತ್ತು ನಗರ ಕಾರ್ಮಿಕ ಬಲವು ತೃತೀಯ ವಲಯದಲ್ಲಿ ಕೇಂದ್ರೀಕೃತವಾಗಿದೆ. ಗ್ರಾಮೀಣ ಪ್ರದೇಶಗಳಲ್ಲಿ, ಕೃಷಿಯಲ್ಲಿ ತೊಡಗಿರುವ ಕಾರ್ಮಿಕರ ಪಾಲು ಜನವರಿ-ಮಾರ್ಚ್ 2026 ರ ಅವಧಿಯಲ್ಲಿ ಶೇ. 55.8 ರಷ್ಟಿದ್ದು, ಇದು ಹಿಂದಿನ ತ್ರೈಮಾಸಿಕದ ಶೇ. 58.5 ರಿಂದ ಇಳಿಕೆಯನ್ನು ದಾಖಲಿಸಿದೆ. ಅದೇ ಸಮಯದಲ್ಲಿ ತೃತೀಯ ವಲಯದ ಉದ್ಯೋಗದ ಪಾಲು ಅಕ್ಟೋಬರ್-ಡಿಸೆಂಬರ್ 2025 ರಲ್ಲಿದ್ದ ಶೇ. 20.6 ರಿಂದ ಪ್ರಸಕ್ತ ತ್ರೈಮಾಸಿಕದಲ್ಲಿ ಶೇ. 21.7 ಕ್ಕೆ ಏರಿದೆ. ಗ್ರಾಮೀಣ ಪ್ರದೇಶಗಳಲ್ಲಿ ಗಣಿಗಾರಿಕೆ ಮತ್ತು ಕಲ್ಲುಗಣಿಗಾರಿಕೆಯನ್ನೊಳಗೊಂಡ ದ್ವಿತೀಯ ವಲಯವು ಸಹ ಹಿಂದಿನ ತ್ರೈಮಾಸಿಕದ ಶೇ. 20.9 ರಿಂದ ಪ್ರಸಕ್ತ ತ್ರೈಮಾಸಿಕದಲ್ಲಿ ಶೇ. 22.6 ಕ್ಕೆ ಏರಿಕೆಯನ್ನು ಕಂಡಿದೆ. ನಗರ ಪ್ರದೇಶಗಳಲ್ಲಿ, ಕಾರ್ಮಿಕರ ವಲಯವಾರು ವಿತರಣೆಯು ಬಹುತೇಕ ಸ್ಥಿರವಾಗಿ ಉಳಿದಿದೆ.

ಜನವರಿ-ಮಾರ್ಚ್ 2026 ರಲ್ಲಿ ದ್ವಿತೀಯ ಮತ್ತು ತೃತೀಯ ವಲಯಗಳೆರಡರಲ್ಲೂ ಗ್ರಾಮೀಣ ಉದ್ಯೋಗದ ಪಾಲು ಏರಿಕೆಯನ್ನು ದಾಖಲಿಸಿದೆ.

ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಅಂದಾಜು ಜನಸಂಖ್ಯೆಯ ಅಂಕಿ-ಅಂಶಗಳನ್ನು ಬಳಸಿಕೊಂಡು, 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಕಾರ್ಮಿಕರ ನಿಖರ ಸಂಖ್ಯೆಯನ್ನು ಅಂದಾಜಿಸಲಾಗಿದೆ. ಜನವರಿ-ಮಾರ್ಚ್ 2026 ರ ತ್ರೈಮಾಸಿಕದಲ್ಲಿ ದೇಶದಲ್ಲಿ ಸರಾಸರಿ 57.4 ಕೋಟಿ 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳು ಉದ್ಯೋಗದಲ್ಲಿದ್ದರು, ಅದರಲ್ಲಿ 40.2 ಕೋಟಿ ಪುರುಷರು ಮತ್ತು 17.2 ಕೋಟಿ ಮಹಿಳೆಯರಾಗಿದ್ದಾರೆ.

 

 

*****

(ಪ್ರಕಟಣೆ ಐ.ಡಿ.: 2260045) ವಿಸಿಟರ್ ಕೌಂಟರ್ : 9