بالواسطہ ٹیکس اور کسٹمز کے مرکزی بورڈ (سی بی آئی سی) کے رکن (تعمیلی نظم و نسق اور زونل رکن)جناب سُرجیت بھُجبل نے آج ارونا چل پردیش کےایٹہ نگر میں نئے ‘جی ایس ٹی بھون’ کا افتتاح کیا۔

نیتی وہار، ایم. او. ڈبلیو. بی-II، ایٹہ نگر میں واقع جی ایس ٹی بھون کو سی بی آئی سی کے تحت ایٹا نگر کمشنریٹ کے لیے ایک جدید دفتری کمپلیکس کے طور پر قائم کیا گیا ہے۔ اس سہولت کو ایک مخصوص ٹیکس دہندہ سہولت مرکز کے طور پر تصور کیا گیا ہے، جس کا مقصد خدمات کی فراہمی کو مضبوط بنانا، رسائی کو بہتر بنانا اور تعمیل میں آسانی کو فروغ دینا ہے۔

افتتاحی تقریب میں معزز شخصیات نے شرکت کی جن میں لوبسانگ تسیرنگ، اروناچل پردیش کے ایس جی ایس ٹی کمشنر امیت کمار سنگھ، ششی واپانگ لانو، اوٹو یپوتھومی، بلّو مامونگ، مارٹو کاتو، ارون کاسیناتھ، پردیپ کمار اور راجندر کمار شامل تھے۔ اس کے علاوہ سی جی ایس ٹی اینڈ کسٹمز کے افسران و اہلکار اور گواہاٹی ریجن کے نمائندگان بھی موجود تھے۔

سرجیت بھجبل نے خطاب کرتے ہوئے اروناچل پردیش کے عوام کو اس اہم کامیابی پر مبارکباد دی اور جی ایس ٹی کے بنیادی اصولوں پر زور دیا۔ انہوں نے کہا کہ جی ایس ٹی کی کامیابی صرف نفاذ میں نہیں بلکہ اعتماد، رضاکارانہ تعمیل اور ٹیکس دہندگان اور انتظامیہ کے درمیان تعاون پر مبنی شراکت میں مضمر ہے۔

انہوں نے اروناچل پردیش کی خصوصیت یعنی دیانت داری اور سماجی اعتماد کی اقدار کو اجاگر کرتے ہوئے کہا کہ محکمہ ایک ذمہ دار اور عوامی مرکزیت پر مبنی ٹیکس انتظامیہ کو فروغ دینے کے لیے پرعزم ہے۔ انہوں نے کہا کہ یہ جی ایس ٹی بھون صرف ایک دفتر نہیں ہوگا بلکہ سہولت، بات چیت اور باہمی اعتماد کا مرکز ہوگا۔

ریاست کی جی ایس ٹی کارکردگی پر روشنی ڈالتے ہوئے انہوں نے کہا کہ مالی سال 2026-2025 کے دوران اروناچل پردیش میں ریونیو وصولی 526 کروڑ روپے تک پہنچ گئی، جو گزشتہ سال کے مقابلے میں 29.4 فیصد اضافہ ہے اور ملک میں سب سے زیادہ شرحِ نمو میں سے ایک ہے۔ انہوں نے کہا کہ یہ اضافہ بہتر تعمیلی رویے اور جی ایس ٹی نظام پر بڑھتے اعتماد کی عکاسی کرتا ہے اور ٹیکس نیٹ کو مزید وسیع کرنے کے لیے مسلسل رابطہ کاری کی ضرورت پر زور دیا۔

کل پرکاش سنگھ نے کہا کہ بنیادی ڈھانچے کی ترقی کا مقصد ٹیکس دہندگان کے تجربے کو بہتر بنانا ہونا چاہیے۔ انہوں نے کہا کہ کوشش ایک ایسے تعاون پر مبنی تعمیلی نظام کی طرف بڑھنے کی ہے جہاں ٹیکس دہندگان کو رہنمائی، تعاون اور حوصلہ افزائی کے ذریعے رضاکارانہ تعمیل کی طرف لایا جائے۔

انہوں نے زور دیا کہ افسران کو سہولت کار اور شراکت دار کے طور پر کام کرنا چاہیے جبکہ تمام تعاملات میں شفافیت، انصاف اور جوابدہی کو یقینی بنانا ضروری ہے۔ انہوں نے یہ بھی کہا کہ یہ شمال مشرقی خطے میں تیسرا جی ایس ٹی بھون ہے جو اس خطے میں ٹیکس انتظامیہ کو مضبوط بنانے پر حکومت کی توجہ کو ظاہر کرتا ہے۔

شیام کانو مہنتا نے کہا کہ نیا جی ایس ٹی بھون ٹیکس دہندگان کی خدمات میں رسائی اور کارکردگی کو نمایاں طور پر بہتر بنائے گا۔ انہوں نے کہا کہ رجسٹرڈ ٹیکس دہندگان کی بڑھتی ہوئی تعداد جی ایس ٹی نظام پر بڑھتے اعتماد کی علامت ہے۔ انہوں نے یقین دہانی کرائی کہ رضاکارانہ تعمیل کو فروغ دینے اور ٹیکس دہندگان کی شمولیت بڑھانے کے لیے ریاست بھر میں باقاعدہ آگاہی اور رابطہ پروگرام منعقد کیے جائیں گے۔

***

ش ح۔ ک ا۔ ش ب ن

U.NO. 6600

(ریلیز آئی ڈی: 2257726) وزیٹر کاؤنٹر : 5