అంతర్జాతీయ యోగ దినోత్సవం 2026 ను ఘనంగా, ప్రభావవంతంగా నిర్వహించే దిశగా కీలక అడుగు వేస్తూ ఆయుష్ మంత్రిత్వ శాఖ ఈరోజు ఉన్నత స్థాయి ప్రధాన కమిటీ సమావేశాన్ని ఏర్పాటు చేసింది. ఆయుష్ మంత్రిత్వ శాఖ కార్యదర్శి వైద్య రాజేష్ కొటేచా ఈ సమావేశానికి అధ్యక్షత వహించారు.  భారత ప్రభుత్వ కీలక మంత్రిత్వ శాఖలు,  విభాగాల ప్రతినిధులు ఇందులో పాల్గొన్నారు.

హోం, విదేశీ వ్యవహారాలు, సంస్కృతి, సమాచార ప్రసార, ఎలక్ట్రానిక్స్,  సమాచార సాంకేతికత, రక్షణ, రైల్వే, పంచాయతీ రాజ్, ఈశాన్య ప్రాంత అభివృద్ధి, మహిళా శిశు అభివృద్ధి, పర్యావరణ, అటవీ వాతావరణ మార్పు మొదలైన కీలక మంత్రిత్వ శాఖలు ఈ సమావేశంలో పాల్గొన్నాయి. ఆరోగ్య కుటుంబ సంక్షేమ, ఆరోగ్య పరిశోధన, పాఠశాల విద్య -  అక్షరాస్యత, ఉన్నత విద్య, యువజన వ్యవహారాలు, క్రీడలు, తపాలా విభాగాలు కూడా ప్రాతినిధ్యం వహించాయి.

ఆయుష్ మంత్రిత్వ శాఖ కార్యదర్శి మాట్లాడుతూ, యోగా దినోత్సవం నిర్వహణలో ప్రభుత్వ నిబద్ధతను పునరుద్ఘాటించారు. అంతర్జాతీయ యోగ దినోత్సవం 2026 గత సంవత్సరాల్లో ఏర్పరిచిన బలమైన పునాదిపై నిర్మితమవుతుందని, ప్రజల భాగస్వామ్యం, అంతర్జాతీయ సహకారంలో కొత్త కోణాలను ప్రవేశపెడుతుందని ఆయన చెప్పారు. ఆరోగ్యం, సామరస్యం, సామూహిక శ్రేయస్సు కోసం యోగా  ఒక శక్తిమంతమైన సాధనమని, అన్ని మంత్రిత్వ శాఖలు, భాగస్వాముల సమన్వయ ప్రయత్నాలు యోగ అంతర్జాతీయ స్థాయిని మరింత పెంచుతాయని ఆయన పేర్కొన్నారు.

వివిధ మంత్రిత్వ శాఖలు, ఆయా విభాగాల ప్రాతినిధ్యంతో, ఈ సమావేశం సంస్థాగత ఏకీకరణ, సన్నాహక సమీక్ష, సమన్వయ చర్యలకు కీలక వేదికగా నిలిచింది. ఆయుష్ మంత్రిత్వ శాఖ సంయుక్త కార్యదర్శి మోనాలిసా డాష్ ఈ సమావేశాన్ని నిర్వహించారు. ఆయుష్ మంత్రిత్వ శాఖ సంయుక్త కార్యదర్శి అలర్మేల్మంగై డి.  మంత్రిత్వ శాఖల ఉన్నతాధికారులు కూడా హాజరయ్యారు.