આંતરરાષ્ટ્રીય યોગ દિવસ (IDY) 2026 ની ભવ્ય અને પ્રભાવશાળી ઉજવણી સુનિશ્ચિત કરવા તરફ એક મહત્વપૂર્ણ પગલું ભરતા, આયુષ મંત્રાલયે આજે એક ઉચ્ચ સ્તરીય કોર કમિટીની બેઠક યોજી હતી. આ બેઠકની અધ્યક્ષતા આયુષ મંત્રાલયના સચિવ વૈદ્ય રાજેશ કોટેચાએ કરી હતી અને તેમાં ભારત સરકારના મુખ્ય મંત્રાલયો અને વિભાગોના પ્રતિનિધિઓ એકત્ર થયા હતા.

આ બેઠકમાં ગૃહ બાબતો, વિદેશ બાબતો, સંસ્કૃતિ, માહિતી અને પ્રસારણ, ઇલેક્ટ્રોનિક્સ અને ઇન્ફોર્મેશન ટેકનોલોજી, સંરક્ષણ, રેલવે, પંચાયતી રાજ, ઉત્તર પૂર્વીય ક્ષેત્રનો વિકાસ, મહિલા અને બાળ વિકાસ, અને પર્યાવરણ, વન અને આબોહવા પરિવર્તન સહિતના મુખ્ય મંત્રાલયોની સહભાગીતા જોવા મળી હતી. આરોગ્ય અને પરિવાર કલ્યાણ, આરોગ્ય સંશોધન, શાળા શિક્ષણ અને સાક્ષરતા, ઉચ્ચ શિક્ષણ, યુવા બાબતો, રમતગમત અને ટપાલ જેવા વિભાગોનું પણ પ્રતિનિધિત્વ હતું.

સરકારની પ્રતિબદ્ધતાનું પુનરોચ્ચાર કરતા આયુષ મંત્રાલયના સચિવે ભારપૂર્વક જણાવ્યું હતું કે, IDY 2026 અગાઉના વર્ષોમાં નંખાયેલા મજબૂત પાયા પર નિર્મિત થશે અને સાથે જ જનભાગીદારી અને આંતરરાષ્ટ્રીય સહયોગના નવા આયામો રજૂ કરશે. તેમણે હાઇલાઇટ કર્યું હતું કે તમામ મંત્રાલયો અને હિસ્સેદારોના સંકલિત પ્રયાસો સ્વાસ્થ્ય, સંવાદિતા અને સામૂહિક સુખાકારી માટેના એક શક્તિશાળી સાધન તરીકે યોગના વૈશ્વિક કદને વધુ ઊંચાઈ પર લઈ જશે.

વિવિધ મંત્રાલયો અને સંબંધિત વિભાગોના પ્રતિનિધિત્વ સાથે, આ બેઠક સંસ્થાકીય જોડાણ, તૈયારીઓની સમીક્ષા અને સંકલિત કાર્યવાહી માટે એક મુખ્ય પ્લેટફોર્મ તરીકે સાબિત થઈ હતી. આ બેઠકનું સંચાલન આયુષ મંત્રાલયના સંયુક્ત સચિવ સુશ્રી મોનાલિસા ડેશ દ્વારા કરવામાં આવ્યું હતું. આયુષ મંત્રાલયના સંયુક્ત સચિવ સુશ્રી અલમેલમંગાઈ ડી. અને સહભાગી મંત્રાલયોના વરિષ્ઠ અધિકારીઓ પણ ઉપસ્થિત રહ્યા હતા.

બેઠક દરમિયાન આંતરરાષ્ટ્રીય યોગ દિવસ પર વિગતવાર પ્રેઝન્ટેશન રજૂ કરવામાં આવ્યું હતું, જેમાં તેના વૈશ્વિક વિકાસ, વ્યાપ અને પ્રભાવની રૂપરેખા આપવામાં આવી હતી. IDY 2026 ના વ્યાપ, પહોંચ અને પ્રભાવને વધુ વધારવા માટે મંત્રાલયો વચ્ચેના જોડાણને મજબૂત કરવા પર ચર્ચા કેન્દ્રિત કરવામાં આવી હતી. સંકલિત આઉટરીચ વ્યૂહરચનાઓ, જનભાગીદારીમાં વધારો અને સમાજના વિવિધ વર્ગોમાં યોગને રોજિંદા જીવનમાં એકીકૃત કરવાના ઉદ્દેશ્ય સાથે નવીન પહેલો પર ભાર મૂકવામાં આવ્યો હતો. મંત્રાલયોને યોગ દ્વારા સર્વગ્રાહી સ્વાસ્થ્ય, નિવારક આરોગ્ય સંભાળ અને એકંદર સુખાકારીને પ્રોત્સાહન આપવાના વ્યાપક વિઝન સાથે તેમના સંબંધિત કાર્યક્રમોને સાંકળવા માટે પ્રોત્સાહિત કરવામાં આવ્યા હતા.

આયુષ મંત્રાલયે નોંધ્યું હતું કે, 2025 માં પ્રાપ્ત થયેલ વ્યાપક આઉટરીચ સહિત અગાઉની આવૃત્તિઓની અભૂતપૂર્વ સફળતાને આધારે, સરકાર IDY 2026 માટે 'હોલ-ઓફ-ગવર્નમેન્ટ' (સમગ્ર સરકાર) અભિગમ અપનાવી રહી છે. સુનિયોજિત કાઉન્ટડાઉન ઝુંબેશ, ડિજિટલ જોડાણની વ્યૂહરચનાઓ અને સર્વસમાવેશકતા, ટકાઉપણું તથા યુવા ભાગીદારી પર કેન્દ્રિત થીમેટિક કાર્યક્રમો જેવા પ્રારંભિક પ્રયાસો સક્રિયપણે હાથ ધરવામાં આવી રહ્યા છે.

બેઠકમાં પ્રતિષ્ઠિત સ્થળોએ યોગ નિદર્શન આયોજિત કરવાની યોજનાઓ, વૈશ્વિક પહોંચના વિસ્તરણ અને રાજ્યો તથા કેન્દ્રશાસિત પ્રદેશોમાં સંસ્થાકીય ભાગીદારીને મજબૂત કરવાની પણ સમીક્ષા કરવામાં આવી હતી.

ભારત અને સમગ્ર વિશ્વમાં 12મો આંતરરાષ્ટ્રીય યોગ દિવસ અભૂતપૂર્વ વ્યાપ, દૃશ્યતા અને પ્રભાવ સાથે ઉજવવામાં આવે તે સુનિશ્ચિત કરવા માટે તમામ સહભાગી મંત્રાલયો અને વિભાગો વચ્ચે ગાઢ તાલમેલ સાથે કામ કરવાના સહિયારા સંકલ્પ સાથે બેઠક પૂર્ણ થઈ હતી.

SM/NP/JD