یوگا کے بین الاقوامی دن 2026 کے شاندار اور پُراثر انعقاد کو یقینی بنانے کی جانب ایک اہم قدم اٹھاتے ہوئے، وزارتِ آیوش نے آج ایک اعلیٰ سطحی کور کمیٹی کا اجلاس طلب کیا۔ اجلاس کی صدارت ویدیا راجیش کوٹیچا، سیکرٹری، وزارتِ آیوش نے کی، جس میں حکومتِ ہند کی اہم وزارتوں اور محکموں کے نمائندوں نے شرکت کی۔

اجلاس میں داخلہ، خارجہ، ثقافت، اطلاعات و نشریات، الیکٹرانکس اور اطلاعاتی ٹیکنالوجی، دفاع، ریلوے، پنچایتی راج، شمال مشرقی خطے کی ترقی،   خواتین و اطفال کے فروغ، اور ماحولیات، جنگلات و موسمیاتی تبدیلی سمیت اہم وزارتوں نے شرکت کی۔ صحت اور خاندانی بہبود، طبی تحقیق، اسکولی تعلیم اور خواندگی، اعلیٰ تعلیم، امورِ نوجوانان، کھیل اور ڈاک جیسے محکموں کی نمائندگی بھی موجود تھی۔

حکومت کے عزم کا اعادہ کرتے ہوئے، سیکرٹری، وزارتِ آیوش نے اس بات پر زور دیا کہ بین الاقوامی یومِ یوگا 2026 گزشتہ برسوں میں رکھی گئی مضبوط بنیادوں پر استوار ہوگا، جبکہ اس میں عوامی شمولیت اور بین الاقوامی تعاون کے نئے پہلوؤں کو متعارف کرایا جائے گا۔ انہوں نے اس بات پر روشنی ڈالی کہ تمام وزارتوں اور متعلقہ فریقین کی مربوط کوششیں یوگا کے عالمی وقار کو صحت، ہم آہنگی اور اجتماعی فلاح و بہبود کے ایک طاقتور ذریعے کے طور پر مزید بلندیوں تک لے جائیں گی۔

مختلف وزارتوں اور متعلقہ محکموں کی موجودگی میں یہ اجلاس ادارہ جاتی اشتراک، ابتدائی جائزے اور مربوط کارروائی کے لیے ایک کلیدی پلیٹ فارم ثابت ہوا۔ اجلاس کی سہولت کاری محترمہ مونا لیسا ڈیش، جوائنٹ سیکرٹری، وزارتِ آیوش نے کی۔ اس موقع پر محترمہ الارمیلمنگئی ڈی، جوائنٹ سیکرٹری، وزارتِ آیوش کے ساتھ ساتھ شریک وزارتوں کے اعلیٰ حکام بھی موجود تھے۔

اجلاس کے دوران بین الاقوامی یومِ یوگا پر ایک تفصیلی پریزنٹیشن دی گئی، جس میں اس کے عالمی ارتقاء، وسعت اور اثرات کا خاکہ پیش کیا گیا۔ بات چیت کا محور بین الاقوامی یومِ یوگا 2026 کے دائرہ کار، رسائی اور اثرات کو مزید وسعت دینے کے لیے وزارتوں کے درمیان تعاون کو مضبوط بنانے پر رہا۔ مربوط حکمتِ عملی، عوامی شرکت میں اضافے اور معاشرے کے مختلف طبقات کی روزمرہ زندگی میں یوگا کو شامل کرنے کے لیے اختراعی اقدامات پر زور دیا گیا۔ وزارتوں کی حوصلہ افزائی کی گئی کہ وہ اپنے متعلقہ پروگراموں کو یوگا کے ذریعے ہمہ جہت صحت، احتیاطی نگہداشت اور مجموعی فلاح و بہبود کے فروغ کے وسیع تر وژن کے مطابق ترتیب دیں۔

وزارتِ آیوش نے اس بات پر روشنی ڈالی کہ گزشتہ ایڈیشنز کی بے مثال کامیابی بشمول 2025 میں حاصل ہونے والی وسیع رسائی کو بنیاد بناتے ہوئے حکومت بین الاقوامی یومِ یوگا 2026 کے لیے 'ہول آف گورنمنٹ' (پوری حکومت کی شمولیت) کا طریقہ کار اپنا رہی ہے۔ تیاریوں کے سلسلے میں منظم کاؤنٹ ڈاؤن مہم، ڈیجیٹل مشغولیت کی حکمت عملی، اور جامعیت، پائیداری اور نوجوانوں کی شرکت پر مبنی موضوعاتی پروگراموں پر فعال طور پر کام کیا جا رہا ہے۔

اجلاس میں یادگار مقامات پر یوگا کے مظاہروں کے انعقاد، عالمی رسائی میں اضافے اور ریاستوں اور مرکز کے زیرِ انتظام علاقوں میں ادارہ جاتی شرکت کو مضبوط بنانے کے منصوبوں کا بھی جائزہ لیا گیا۔

اجلاس تمام شریک وزارتوں اور محکموں کے اس مشترکہ عزم کے ساتھ ختم ہوا کہ وہ قریبی ہم آہنگی کے ساتھ کام کریں گے تاکہ اس بات کو یقینی بنایا جا سکے کہ 12ویں بین الاقوامی یومِ یوگا کو پورے ہندوستان اور دنیا بھر میں بے مثال وسعت، تشہیر اور اثرات کے ساتھ منایا جائے۔

************

ش ح ۔   م  د ۔  م  ص

(U :6429  )