چیئرمین: معزز اراکین، راجیہ سبھا کے 270ویں اجلاس کے اختتام کے ساتھ، ہم پارلیمنٹ کا بجٹ اجلاس مکمل کر رہے ہیں۔ میں آپ کے قیمتی نقطہ نظر کی دل کی گہرائیوں سے تعریف کرتا ہوں جس نے ایوان میں ہونے والی بات چیت کو تقویت بخشی۔

پارلیمنٹ کے تین اجلاسوں میں سے بجٹ سیشن کو اولین مقام حاصل ہے۔ یہ نہ صرف تینوں سیشنوں میں سب سے طویل ہے بلکہ ملک کی ترقی کی رفتار کو نئی شکل دینے میں سب سے زیادہ نتیجہ خیز بھی ہے۔ اس اجلاس کے دوران منظور شدہ بجٹ مختص، پالیسیوں کی توثیق اور ترجیحات کا براہ راست اثر بھارت کے ہر شہری کی زندگی پر پڑتا ہے۔

معزز اراکین، اجلاس کا آغاز عزت مآب صدر جمہویہ کے خطاب پر شکریہ کی تحریک پر چار دنوں پر محیط بحث کے ساتھ ہوا، جس کے دوران اس ایوان کے 79 اراکین نے بھرپور توانائی اور خلوص کے ساتھ حصہ لیا۔ شکریہ کی تحریک پر بحث کے لیے معزز وزیر اعظم کے جواب سے معزز اراکین کی جانب سے اٹھائے گئے بہت سے نکات کی وضاحت اور سیاق و سباق سامنے آئے۔

مرکزی بجٹ 2026-27 پر بحث اتنی ہی تیز اور جامع تھی۔ چار دنوں پر محیط اس میں 97 ممبران نے شرکت کی۔ اس کے علاوہ ایوان نے حکومت کی دو اہم وزارتوں کے کام پر بھی کافی بحث کی۔

ایوان نے بھارت -امریکہ باہمی تجارتی معاہدے پر کامرس اور صنعت کے وزیر اور مغربی ایشیا کی صورتحال کے بارے میں امور خارجہ کے وزیر کے رضاکارانہ بیانات کا بھی نوٹس لیا۔ مغربی ایشیا میں جاری تنازعہ اور اس کے نتیجے میں ہندوستان کو درپیش چیلنجز بالخصوص اپنی توانائی کی ضروریات کو پورا کرنے کے لیے عزت مآب وزیر اعظم کے بیان نے ابھرتی ہوئی صورتحال کو ایک مناسب تناظر میں پیش کیا اور اس کا سامنا کرنے کے لیے قوم کے اجتماعی عزم کی ضرورت پر زور دیا۔

مجھے یہ جان کر خوشی ہو رہی ہے کہ اس اجلاس کے دوران 50 سے زیادہ پرائیویٹ ممبرز بلز پیش کیے گئے۔

مجھے یہ بتاتے ہوئے خوشی ہو رہی ہے کہ 94 مواقع پر معزز ممبران نے آئین کے 8ویں شیڈول میں شامل 12 علاقائی زبانوں میں بات کی۔

مجموعی طور پر ایوان نے کل 157 گھنٹے 40 منٹ تک کام کیا۔ اس سیشن کی افادیت109.87 فیصد رہی۔ سیشن کے دوران، ہمیں 117 سوالات، وقفہ صفر کے دوران پیش کیے گئے 446 عوامی معاملات اور 207 خصوصی ذکر کرنے کا موقع ملا۔

معزز اراکین ، اس اجلاس میں محترم ہری ونش جی کا تیسری بار راجیہ سبھا کے ڈپٹی چیئرمین کے طور پر دوبارہ انتخاب بھی دیکھا گیا۔ عزت مآب وزیر اعظم نے سیاسی میدان کے تمام قائدین اور اراکین کے ساتھ جناب ہری ونش جی کو ان کے دوبارہ انتخاب پر مبارکباد دی۔

میں ایوان کے کام کاج کو چلانے میں سبھی کی طرف سے کئے گئے تعاون کی تعریف کرتا ہوں اور ایوان کی کارروائی کو چلانے میں میری مدد کرنے کے لئے عزت مآب ڈپٹی چیئرمین، شری ہری ونش جی اور نائب چیئرپرسن کے پینل کے اراکین کی تعریف کرتا ہوں۔

میں ایوان کے قائد ، حزب اختلاف کے قائد ، پارلیمانی امور کے وزیر، مختلف جماعتوں اور گروپوں کے قائدین اور تمام معزز اراکین کا بھی شکریہ ادا کرتا ہوں کہ ان کی جانب سے تعاون کیا گیا۔

میں اس بات کو یقینی بنانے میں سیکرٹری جنرل اور ان کے کلی طور پر وقف افسران اور عملے کی ٹیم کی انتھک کوششوں کا اعتراف کرتا ہوں کہ اس اجلاس کو آسانی سے چلایا جائے۔ میں ایوان کی کارروائی کی کوریج کرنے اور عوام کو باخبر رکھنے پر پرنٹ اور الیکٹرانک میڈیا کا بھی شکریہ ادا کرتا ہوں۔

اب، قومی ترانہ۔

 (قومی ترانہ ’’وندے ماترم‘‘ چلایا جائے گا)

چیئرمین: ایوان کی کارروائی غیر معینہ مدت تک ملتوی کی جاتی ہے۔

**********

 (ش ح –ا ب ن)

U.No:6000

(ریلیز آئی ڈی: 2253221) وزیٹر کاؤنٹر : 10