حکومت نے تمام لوگوں کو سستی قیمتوں پر معیاری جنرک ادویات کی فراہمی کے لیے ’پردھان منتری بھارتیہ جن اوشدھی پریوجنا‘ اسکیم کا آغاز کیا ہے۔ اس اسکیم کے تحت، پورے ملک میں ’جن اوشدھی کیندر‘ (جے اے کے) کے نام سے مخصوص آؤٹ لیٹس کھولے گئے ہیں، جو برانڈڈ ادویات کے مقابلے میں 50 فیصد سے 80 فیصد تک سستی ادویات فراہم کرتے ہیں۔ 28 فروری 2026 تک، اس اسکیم کے تحت ملک بھر میں کل 18,646 جن اوشدھی کیندر کھولے جا چکے ہیں۔

مدھیہ پردیش کے کھجوراہو لوک سبھا حلقے میں کل 38 جن اوشدھی کیندر فعال ہیں، جن میں کٹنی ضلع میں 9، پنہ ضلع میں 4 اور چھترپور ضلع میں 25 کیندر شامل ہیں۔ یہ کیندر ’فارماسیوٹیکلز اینڈ میڈیکل ڈیوائسز بیورو آف انڈیا‘ (پی ایم بی آئی) سے ابتدائی منظوری اور ریاستی ڈرگ لائسنسنگ اتھارٹیز سے مطلوبہ لائسنس حاصل کرنے کے بعد قائم اور فعال کیے جاتے ہیں۔

گزشتہ مالی سال یعنی 2024-25 کے دوران، ملک بھر میں کل 4,142 جن اوشدھی کیندر کھولے گئے اور ایم آر پی پر کل 2022.47 کروڑ روپے کی فروخت ہوئی۔ گزشتہ مالی سال کے دوران ادویات کی قلت  کا کوئی بڑا واقعہ رپورٹ نہیں ہوا ہے۔

پردھان منتری بھارتیہ جن اوشدھی پریوجنا کے تحت مصنوعات کی باسکٹ میں 2,110 ادویات اور 315 سرجیکل، طبی استعمال کی اشیاء اور آلات شامل ہیں، جو تمام اہم علاج کے گروپس کا احاطہ کرتے ہیں، جیسے کہ امراضِ قلب، اینٹی کینسر، اینٹی ڈائیبیٹک، اینٹی انفیکٹیو، اینٹی الرجی، گیسٹرو انٹسٹائنل ادویات اور نیوٹراسیوٹیکلز۔ ضروری ادویات کی قومی فہرست میں شامل تقریباً تمام جنرک ادویات، ماسوائے لیب ری ایجنٹس اور ویکسین کے، اس پروڈکٹ باسکٹ کا حصہ ہیں۔

فی الحال، پی ایم بی آئی پروڈکٹ باسکٹ میں دائمی امراض اور غیر متعدی امراض کے مریضوں کے لیے 850 سے زائد ادویات دستیاب ہیں۔ ٹی بی کے خلاف ادویات کے لیے، سال 2021 میں ’ٹی بی مکت بھارت ابھیان‘ کا آغاز کیا گیا تھا اور وزارت صحت و خاندانی بہبود کی جانب سے ایک الگ مہم کے تحت تمام ٹی بی مریضوں کا رجسٹریشن کیا گیا تھا، جس کا مقصد مفت ادویات کی فراہمی تھا۔ پی ایم بی آئی نے 100 سے زائد جن اوشدھی کیندروں (جے اے کے) کا سروے کیا اور کم مانگ اور مذکورہ مہم کے تحت ادویات کی مفت دستیابی کی وجہ سے اینٹی ٹی بی ادویات کو شامل نہ کرنے کا فیصلہ کیا۔

جن اوشدھی کیندروں میں ادویات کی رسائی اور دستیابی کو یقینی بنانے کے لیے درج ذیل اقدامات کیے گئے ہیں:

• ایک اینڈ ٹو اینڈ انفارمیشن ٹیکنالوجی پر مبنی سپلائی چین سسٹم موجود ہے، جس میں فی الحال پورے ملک میں پانچ گودام اور 41 ڈسٹری بیوٹرز شامل ہیں۔
• ستمبر 2024 سے، جن اوشدھی کیندروں (جے اے کے) کی جانب سے 200 عام استعمال کی ادویات کے اسٹاک رکھنے کو مراعات دی جارہی ہیں۔ ان ادویات میں پروڈکٹ باسکٹ کی 100 سب سے زیادہ فروخت ہونے والی اور مارکیٹ میں تیزی سے فروخت ہونے والی 100 ادویات شامل ہیں اور کیندر کے مالکان ان ادویات کا اسٹاک برقرار رکھنے کی بنیاد پر ماہانہ ترغیبی رقم  حاصل کرنے کے اہل ہیں۔
• اس کے علاوہ، عام طور پر استعمال ہونے والی مصنوعات کی دستیابی کو یقینی بنانے کے لیے، اسکیم کو نافذ کرنے والی ایجنسی ’فارماسیوٹیکلز اینڈ میڈیکل ڈیوائسز بیورو آف انڈیا‘ (پی ایم بی آئی) 400 تیزی سے فروخت ہونے والی مصنوعات کی باقاعدگی سے نگرانی کرتی ہے اور ان کی مانگ کا تخمینہ مسلسل بنیادوں پر لگایا جاتا ہے۔ مزید برآں، حصولِ ادویات کے عمل کو آٹومیشن کے ذریعے بڑھانے کے لیے فورکاسٹنگ کے طریقۂ کار کو ڈیجیٹائز کرنے کے اقدامات کیے گئے ہیں۔

پردھان منتری بھارتیہ جن اوشدھی پریوجنا اسکیم خود روزگار کا ایک مضبوط ذریعہ ہے، جو پائیدار اور مستقل آمدنی فراہم کرنے کے ساتھ ساتھ مختلف سطحوں پر روزگار کے مواقع پیدا کر رہی ہے۔ اسکیم کے دائرۂ کار کو وسیع کرنے کے لیے، حکومت نے مارچ 2027 کے آخر تک ملک بھر میں جن اوشدھی کیندروں(جے اے کے) کی کل تعداد کو 25,000 تک بڑھانے کا ہدف مقرر کیا ہے۔

حکومت نے جن اوشدھی کیندر کھولنے کے لیے ایک فرنچائز نما ماڈل اپنایا ہے، جس کے تحت انفرادی کاروباری افراد، غیر سرکاری تنظیموں، سوسائٹیز، ٹرسٹ، فرموں، پرائیویٹ کمپنیوں وغیرہ سے آن لائن درخواستیں طلب کی جاتی ہیں۔ کوئی بھی فرد جس کے پاس ڈی فارما یا بی فارما  کی اہلیت ہو، چاہے وہ خود ہو یا کوئی ایسا فرد یا ادارہ جس نے متعلقہ اسٹیٹ لائسنسنگ اتھارٹی سے ڈرگ لائسنس حاصل کرنے کے لیے ایسی اہلیت رکھنے والے کسی شخص کو بطور فارماسسٹ ملازم رکھا ہو، جن اوشدھی کیندر کھولنے کا اہل ہے۔ ملک کے تمام اضلاع بشمول مدھیہ پردیش کے تمام اضلاع سے ویب سائٹ www.janaushadhi.gov.in کے ذریعے آن لائن درخواستیں طلب کی گئی ہیں۔

یہ معلومات آج لوک سبھا میں کیمیائی مواد اور کھادوں کی وزیر مملکت محترمہ انوپریا پٹیل نے ایک تحریری جواب میں فراہم کیں۔

******

ش ح۔ ک ح –ن ع

U.NO.5908

 

(ریلیز آئی ڈی: 2252640) وزیٹر کاؤنٹر : 9