صدرجمہوریہ ہند، محترمہ دروپدی مرمو نے آج (15 اپریل 2026) مہاراشٹر کے ناگپور میں واقع نیشنل اکیڈمی آف ڈائریکٹ ٹیکسز میں انڈین ریونیو سروس (انکم ٹیکس) کے 78ویں بیچ کے زیر تربیت افسران  کی اختتامی تقریب میں شرکت کی اور اس کی صدارت کی۔

اس موقع پر صدر  جمہوریہ ہند نے کہا کہ حالیہ برسوں میں بھارت کا معاشی سفر نہایت متحرک اور متاثر کن رہا ہے۔ براہِ راست ٹیکس وصولیوں میں مسلسل اضافہ بہتر ٹیکس تعمیل اور ٹیکس نیٹ کے پھیلاؤ کی علامت ہے، اور یہ شہریوں اور انتظامیہ کے درمیان بڑھتے ہوئے اعتماد کی بھی عکاسی کرتا ہے۔انہوں نے کہا کہ انکم ٹیکس ایکٹ 2025، جو یکم اپریل 2026 سے نافذ ہوا ہے، اس تبدیلی کے سفر میں ایک اہم سنگ میل ہے۔ یہ اصلاحات ایک جدید، آسان اور شفاف ٹیکس نظام کی طرف تاریخی قدم ہیں۔انہوں نے اس بات پر زور دیا کہ اس قانون کی حقیقی کامیابی صرف اسی صورت میں ممکن ہوگی جب اسے درست، شفاف اور مؤثر طریقے سے نافذ کیا جائے، اور یہ اہم ذمہ داری آئی آر ایس افسران کے کندھوں پر عائد ہوتی ہے۔

صدرِ جمہوریہ نے کہا کہ انڈین ریونیو سروس کے افسران کا کردار محض ٹیکس وصولی تک محدود نہیں ہے۔ وہ عوامی اعتماد کے امین ہیں؛ وہ انصاف اور مساوات کے محافظ ہیں۔ وہ ملک کی معاشی ترقی، سماجی انصاف اور اچھی حکمرانی کے ستون ہیں۔ انہوں نے نوجوان افسران کو یاد دہانی کرائی کہ وہ ہمیشہ یہ بات ذہن میں رکھیں کہ عاجزی، ضبطِ نفس اور حساسیت ان کے پیشہ ورانہ طرزِ عمل کے لازمی اجزاء ہونے چاہیے۔ انہوں نے کہا کہ ان کی ذمہ داری صرف قوانین کے نفاذ تک محدود نہیں بلکہ انتظامی نظام پر عوامی اعتماد کو مضبوط بنانا بھی اس میں شامل ہے۔ انہوں نے زور دیا کہ وہ فیصلے جو انصاف، شفافیت اور دیانت داری پر مبنی ہوں نہ صرف حکمرانی کو مضبوط کرتے ہیں بلکہ ملک اور اس کے شہریوں کی ہمہ گیر ترقی میں بھی اہم کردار ادا کرتے ہیں۔

صدرِ جمہوریہ ہند نے کہا کہ ملک کے ہر شہری کی طرف سے داخل کردہ انکم ٹیکس ریٹرن کے پیچھے محنت، خواہش اور کاروباری جذبے کی ایک کہانی مضمر ہوتی ہے۔ انڈین ریونیو سروس کے افسران کی ذمہ داری صرف قانون کی تعمیل کو یقینی بنانا ہی نہیں بلکہ یہ بھی ہے کہ تمام شہریوں، خصوصاً معاشرے کے محروم طبقات سے تعلق رکھنے والے افراد کے ساتھ عزت و وقار اور انصاف کے ساتھ پیش آیا جائے۔

صدرِ جمہوریہ نے کہا کہ آج ہمارا ملک تیزی سے وِکست بھارت کے عزم کو حقیقت میں بدلنے کی سمت میں آگے بڑھ رہا ہے۔ ایسے موقع پر انتظامی نظام اور اس سے وابستہ ہر ادارے کی ذمہ داری مزید بڑھ جاتی ہے کہ وہ کارکردگی اور شفافیت کے اعلیٰ ترین معیار اپنائے اور ایک جامع (انکلوسِو) نقطۂ نظر کے ساتھ کام کرے۔

صدر جمہوریہ کی تقریر دیکھنے کے لیے براہ کرم یہاں کلک کریں ۔ٍ

Please click here to see the President's Speech-

************

ش ح۔ش آ۔ ج ا

 (U: 5898)

(ریلیز آئی ڈی: 2252521) وزیٹر کاؤنٹر : 19