نائب صدر جمہوریہ ہند کا سکریٹریٹ
نائب صدر جمہوریہ نے ڈاکٹر امبیڈکر انٹرنیشنل سینٹر ، نئی دہلی میں دوسرا ڈاکٹر امبیڈکر میموریل لیکچر دیا
نائب صدر جمہوریہ نے ڈاکٹر امبیڈکر کے شمولیت پر مبنی ترقی اور آئینی اخلاقیات کے وژن پر روشنی ڈالی
’’جمہوری اداروں کو بات چیت ، بحث اور تعمیری تبادلہ خیال کے ذریعے کام کرنا چاہیے‘‘: نائب صدر جمہوریہ
’’مساوات کے بغیر آزادی استحقاق کی طرف لے جاتی ہے ، آزادی کے بغیر مساوات اقدام کو روکتی ہے‘‘: نائب صدر جمہوریہ
’’ہندوستان کا آئین سب سے جامع جمہوری چارٹر میں سے ایک ہے‘‘: نائب صدر جمہوریہ
پوسٹ کرنے کی تاریخ:
14 APR 2026 6:24PM by PIB Delhi
نائب صدر جمہوریہ ہند جناب سی پی رادھاکرشنن نے آج ڈاکٹر امبیڈکر انٹرنیشنل سینٹر میں ’’معمار قوم کے طور پر ڈاکٹر امبیڈکر: وِکست بھارت کی سمت میں راہیں‘‘ کے موضوع پر دوسرا ڈاکٹر امبیڈکر میموریل لیکچر دیا۔ اس سے قبل، انہوں نے بھارت رتن ڈاکٹر بھیم راؤ رام جی امبیڈکر کو ان کے یومِ پیدائش کے موقع پر سینٹر میں گلہائے عقیدت نذر کیے۔
ڈاکٹر امبیڈکر جینتی کے ساتھ ساتھ تمل نئے سال اور بیساکھی جیسے تہواروں پر مبارک باد پیش کرتے ہوئے نائب صدر جمہوریہ نے کہا کہ یہ موقع ہندوستان کے بھرپور ثقافتی تنوع اور اتحاد کی عکاسی کرتا ہے۔ انہوں نے ڈاکٹر امبیڈکر کو جدید ہندوستان کے عظیم ترین معماروں میں سے ایک اور ایک حقیقی معمارِ قوم قرار دیا جن کا تعاون آج بھی جمہوریہ ہند کی رہنمائی کررہا ہے۔
لیکچر سیریز کے انعقاد کے لیے سماجی انصاف اور تفویض اختیارات کی وزارت کی ستائش کرتے ہوئے نائب صدر جمہوریہ نے کہا کہ اس طرح کے اقدامات نوجوان نسلوں کو جمہوری نظریات اور آئینی اقدار کو برقرار رکھنے کی ترغیب دیں گے۔ انہوں نے کہا کہ یہ لیکچر قوم کی اخلاقی اور فکری بنیادوں کے ساتھ از سر نو جڑنے کا موقع فراہم کرتا ہے۔
ڈاکٹر امبیڈکر کے زندگی کے سفر پر روشنی ڈالتے ہوئے، نائب صدر جمہوریہ نے کہا کہ بے پناہ مشکلات کے باوجود، انہوں نے استقامت، اسکالرشپ اور انصاف کے عزم کے ذریعے چیلنجوں کو مواقع میں تبدیل کیا۔ انہوں نے اس بات پر زور دیا کہ ڈاکٹر امبیڈکر تعلیم کو سماجی تبدیلی کی کلید مانتے تھے۔ انہوں نے کہا کہ حقیقی آزادی تعلیم سے شروع ہوتی ہے۔
نائب صدر جمہوریہ نے ڈاکٹر امبیڈکر کے دانشورانہ امتیاز کو اجاگر کرتے ہوئے ان کے بنیادی کام ’’روپے کا مسئلہ‘‘ اور نوآبادیاتی معاشی پالیسیوں پر سوال اٹھانے کے لیے ان کے حوصلے کا ذکر کیا۔ انہوں نے کہا کہ ڈاکٹر امبیڈکر نے دکھایا کہ کس طرح علم اور حکمت انتہائی طاقتور نظاموں کو بھی چیلنج کر سکتے ہیں۔
آئین کا مسودہ تیار کرنے میں ڈاکٹر امبیڈکر کے اہم کردار کا حوالہ دیتے ہوئے نائب صدر جمہوریہ ہند نے کہا کہ وسیع تر مباحثوں میں اپنی قیادت کے ذریعے انہوں نے انصاف ، آزادی ، مساوات اور بھائی چارے پر مبنی ایک شمولیت والے ہندوستان کی بنیاد رکھی۔ انہوں نے ہندوستان کے آئین کو دنیا کے سب سے جامع جمہوری چارٹر میں سے ایک قرار دیا۔
آئینی اخلاقیات کی اہمیت پر زور دیتے ہوئے نائب صدر جمہوریہ نے راجیہ سبھا کے چیئرمین کے طور پر اپنے کردار پر غور کرتے ہوئے کہا کہ جمہوری اداروں کو بات چیت، بحث اور تعمیری تبادلہ خیال کے ذریعے کام کرنا چاہیے۔ انہوں نے باخبر اور قابل احترام مشغولیت کی ضرورت پر زور دیتے ہوئے کہا کہ پارلیمانی گفتگو میں خلل ڈالنے کے بجائے فیصلے ہونے چاہئیں۔
نائب صدر جمہوریہ نے سیاسی جمہوریت کے ساتھ ساتھ سماجی اور اقتصادی جمہوریت کے ڈاکٹر امبیڈکر کے وژن پر روشنی ڈالی۔ انہوں نے وزیر اعظم جناب نریندر مودی کی قیادت میں حالیہ برسوں میں کیے گئے مختلف اقدامات کا حوالہ دیا، جن کا مقصد شمولیت پر مبنی ترقی، مالی طور پر بااختیار بنانا اور پسماندہ علاقوں کی ترقی ہے۔
انہوں نے صنفی مساوات کے بارے میں ڈاکٹر امبیڈکر کے ترقی پسندانہ نظریے پر بھی زور دیا اور سماجی ترقی کے اقدام کے طور پر خواتین کو بااختیار بنانے پر ان کے زور کو یاد کیا۔ انہوں نے تمام شعبوں میں خواتین کی بڑھتی ہوئی شرکت اور کامیابیوں اور خواتین کی قیادت میں ترقی کی حمایت کرنے والے حکومت کے اقدامات پر روشنی ڈالی۔
نائب صدر جمہوریہ نے کہا کہ 2047 تک وکست بھارت کی تعمیر کی خواہش کے لیے آئینی اقدار کی رہنمائی میں اجتماعی کوشش کی ضرورت ہے۔ انہوں نے کہا کہ ایک ترقی یافتہ ہندوستان کو شمولیت پر مبنی، مساوی ، اختراعی اور جمہوری اصولوں پر مبنی ہونا چاہیے۔
ڈاکٹر امبیڈکر کی زندگی سے وابستہ پنچ تیرتھ کے فروغ پر روشنی ڈالتے ہوئے نائب صدر جمہوریہ نے کہا کہ یہ مقامات آنے والی نسلوں کے لیے تحریک کے پائیدار ذرائع کے طور پر کام کرتے ہیں۔ انہوں نے شہریوں پر زور دیا کہ وہ ایک منصفانہ اور شمولیت پر مبنی معاشرے کی تعمیر کے لیے مل کر کام کریں ، جو ڈاکٹر امبیڈکر کو حقیقی خراج تحسین ہوگا۔
سماجی انصاف اور تفویض اختیارات کے مرکزی وزیر جناب وریندر کمار، سماجی انصاف اور تفویض اختیارات کے محکمے کے سکریٹری جناب سدھانش پنت، اسکالرز، معززین اور ممتاز مہمانوں کے ساتھ اس موقع پر موجود تھے۔
****
ش ح۔ م م۔ م ر
U-NO. 5820
(ریلیز آئی ڈی: 2251957)
وزیٹر کاؤنٹر : 10