سادھنا ہفتہ 2026، جو کہ مشن کرم یوگی کے تحت قومی تعلیمی ہفتہ کی ایک اہم مہم ہے، ملک گیر سطح پر غیر معمولی عوامی شرکت کے ساتھ اختتام پذیر ہوا۔ اس دوران کرم یوگی تربیتی پلیٹ فارم پر 3.18 کروڑ سے زائد نصابی سرگرمیاں مکمل کی گئیں، جو قومی تعلیمی ہفتہ 2024 کے مقابلے میں تقریباً دس گنا اضافہ ہے۔ یہ مہم 2 اپریل سے 10 اپریل 2026 تک جاری رہی اور اس نے ایک ایسے سرکاری نظام کی تشکیل کے لیے حکومت کے عزم کو مزید مضبوط کیا جو مستقبل کے تقاضوں سے ہم آہنگ، عوام دوست اور صلاحیت پر مبنی ہو۔

اس مہم کا افتتاح معزز وزیرِ اعظم جناب نریندر مودی کے ویڈیو پیغام کے ذریعے کیا گیا، جس نے سرکاری اہلکاروں میں مسلسل سیکھنے اور صلاحیت سازی کی ایک ملک گیر تحریک کی بنیاد رکھی۔

اس اقدام میں بے مثال پیمانے پر شرکت دیکھنے میں آئی، جہاں 46.9 لاکھ ملازمین نے کم از کم ایک نصاب مکمل کیا، جبکہ 33.44 لاکھ ملازمین نے چار گھنٹے سے زائد تعلیمی سرگرمی مکمل کی۔ خاص طور پر 36.61 لاکھ ملازمین نے مصنوعی ذہانت سے متعلق کم از کم ایک نصاب میں حصہ لیا، جو حکمرانی میں ڈیجیٹل صلاحیت اور جدید ٹیکنالوجی کی بڑھتی ہوئی اہمیت کو ظاہر کرتا ہے۔

سادھنا ہفتہ 2026 کی ایک نمایاں خصوصیت اگلی صف کے کارکنوں، جیسے اساتذہ، پولیس اہلکاروں اور میدان میں کام کرنے والے عملے کی بھرپور شرکت رہی، جن میں سے کئی نے پہلی مرتبہ منظم تربیت میں حصہ لیا۔ ان کارکنوں نے مجموعی طور پر 1.48 کروڑ نصابی سرگرمیاں مکمل کیں، جو کل شرکت کا تقریباً 47 فیصد بنتا ہے اور اس پروگرام کی نچلی سطح تک گہری رسائی کو ظاہر کرتا ہے۔

اس مہم کی رفتار کو ریاستی اور مرکز کے زیر انتظام علاقوں کی حکومتوں نے مزید تقویت دی، جن کے ملازمین نے تقریباً 80 فیصد نصابی تکمیل میں حصہ لیا، جو صلاحیت سازی کی کوششوں میں مضبوط باہمی تعاون کی عکاسی کرتا ہے۔

ایک ہفتے پر مشتمل اس مہم کو 136 موضوعاتی آن لائن مذاکروں اور 84 اجتماعی گفتگوؤں کے ذریعے مزید مضبوط بنایا گیا، جن میں مجموعی طور پر 16.4 لاکھ سے زائد تعلیمی شرکتیں ہوئیں۔ ان نشستوں میں مصنوعی ذہانت اور ڈیجیٹل تبدیلی، ہندوستانی علمی نظام، بنیادی ڈھانچہ اور فنی مہارت، حکمرانی اور اخلاقیات، نیز صحت اور فلاح و بہبود جیسے مختلف موضوعات شامل تھے، جس سے ایک جامع اور ہمہ جہت تعلیمی تجربہ فراہم ہوا۔

ایک جامع قومی کوشش کے طور پر ترتیب دی گئی اس مہم، سادھنا ہفتہ 2026، نے عوام تک رسائی کے لیے کثیر ذرائع پر مبنی حکمتِ عملی اختیار کی، جس میں مطبوعہ ذرائع، ٹیلی ویژن، ریڈیو، ڈیجیٹل ذرائع ابلاغ اور نچلی سطح کی سرگرمیاں شامل تھیں، جس کے ذریعے وسیع پیمانے پر شرکت اور علاقائی سطح تک رسائی ممکن ہوئی۔ اس اقدام میں موضوعاتی کہانی سازی، علاقائی زبانوں میں مواد اور عوام مرکز بیانیہ پر بھی خصوصی توجہ دی گئی، جس کے نتیجے میں مختلف طبقات میں آگاہی اور شمولیت میں نمایاں اضافہ ہوا۔

اس مہم کے نتائج سے ظاہر ہوتا ہے کہ سرکاری نظام میں مسلسل سیکھنے کی ایک مضبوط روایت فروغ پا رہی ہے، جس کے باعث ملازمین میں شعور، شرکت اور ذمہ داری کے احساس میں اضافہ ہوا ہے۔ خاص طور پر جدید شعبوں، جیسے مصنوعی ذہانت، میں بڑھتی ہوئی شمولیت اس بات کی غمازی کرتی ہے کہ سرکاری عملہ بدلتی ہوئی حکمرانی کی ضروریات سے ہم آہنگ ہونے کے لیے تیزی سے تیار ہو رہا ہے۔

اس طرح سادھنا ہفتہ 2026، مشن کرم یوگی کے تحت ایک سنگِ میل کے طور پر سامنے آیا ہے، جو نہ صرف شرکت کے اعتبار سے اہم ہے بلکہ اس نے حکمرانی کے ایک نئے تصور کو بھی اجاگر کیا ہے، جس میں سیکھنا، حالات کے مطابق ڈھلنا اور عوام مرکز خدمات کی فراہمی انتظامی نظام کی بنیادی خصوصیات بن چکی ہیں۔

******

ش ح۔ ش ا ر۔ ول

Uno-5733

(ریلیز آئی ڈی: 2251201) وزیٹر کاؤنٹر : 13