మానవ హక్కుల లఘు చిత్రాల పోటీ-2025లో గెలుపొందిన ఏడుగురు విజేతలకు అవార్డులను అందించేందుకు ఇవాళ న్యూఢిల్లీలో కార్యక్రమాన్ని నిర్వహించారు. జాతీయ మానవ హక్కుల సంఘం కార్యాలయ (ఎన్‌హెచ్ఆర్‌సీ) ప్రాంగణంలో అవార్డుల ప్రదానోత్సవ కార్యక్రమం జరిగింది. ఈ సందర్భంగా ఎన్‌హెచ్ఆర్‌సీ ఛైర్‌పర్సన్ జస్టిస్ వి. రామసుబ్రమణ్యన్ మాట్లాడుతూ.. విజేతలకు శుభాకాంక్షలు తెలిపారు. సినిమాను రూపొందించటం పట్ల వారికున్న ఆసక్తిని అభినందించారు. ఆడియో-విజువల్ మాధ్యమం సృజనాత్మకమైనదని, ఇది మనసుపై బలమైన ప్రభావాన్ని చూపుతుందని ఆయన స్పష్టం చేశారు. దేశవ్యాప్తంగా 24 భారతీయ భాషల్లో ఎంట్రీలు రావటం విశేషమని.. ఈ చిత్రాల్లోని వైవిధ్యం కమిషన్ జాతీయ స్వభావాన్ని ప్రతిబింబిస్తుందని పేర్కొన్నారు. ఈ కార్యక్రమంలో ఎన్‌హెచ్ఆర్‌సీ సభ్యులు జస్టిస్ (డాక్టర్) బిద్యుత్ రంజన్ సారంగి, శ్రీమతి విజయ భారతి సయాని, సెక్రటరీ జనరల్ శ్రీ భరత్ లాల్, డైరెక్టర్ జనరల్ (ఇన్వెస్టిగేషన్) శ్రీమతి అనుపమ నీలేకర్ చంద్ర ఇతర ఉన్నతాధికారులు పాల్గొన్నారు.

2015లో పోటీలు ప్రారంభమైనప్పటి నుంచి ఏటా పెరుగుతున్న ఆదరణ.. మానవ హక్కులపై ప్రజల్లో పెరుగుతున్న అవగాహనను ప్రతిబింబిస్తుందని జస్టిస్ రామసుబ్రమణ్యన్ అన్నారు. సమాజంలోని సమస్యలను ఎత్తిచూపేందుకు సృజనాత్మక వేదికలను ప్రజలు వినియోగిస్తున్నారని, ఈ ధోరణి కొనసాగాలని ఆయన అన్నారు.

 

ఎన్‌హెచ్ఆర్‌సీ సభ్యుడు జస్టిస్ (డాక్టర్) బిద్యుత్ రంజన్ సారంగి మాట్లాడుతూ.. ఏడుగురు విజేతల సినిమాలు వైవిధ్యమైన సందేశాలను అందించాయన్నారు. మానవ హక్కులను ప్రచారం చేయటంలో, పరిరక్షించటంలో సినిమాల పాత్రను ఆయన స్పష్టం చేశారు. అణగారిన వర్గాల జీవితాలను సున్నితంగా చిత్రీకరించిన 'ద డస్క్ ఆఫ్ లైఫ్' డాక్యుమెంటరీ, 'రాణి' లఘు చిత్రాలను ఆయన ప్రత్యేకంగా ప్రశంసించారు.

ఎన్‌హెచ్ఆర్‌సీ సభ్యురాలు శ్రీమతి విజయ భారతి సయాని ప్రసంగిస్తూ.. సామాజిక మార్పునకు సినీ రూపకల్పన శక్తిమంతమైన సాధనమని, మూస ధోరణులను ఇవి సవాలు చేస్తాయని, సామాజిక కట్టుబాట్లను తొలగిస్తాయని, కార్యాచరణకు స్ఫూర్తినిస్తాయని అన్నారు. మానవ హక్కులపై అవగాహన కల్పించేందుకు మార్గదర్శకులుగా వ్యవహరించే సామర్థ్యం యువ సినీరూపకర్తలకు ఉందని ఆమె తెలిపారు.

 

పోటీకి పెరుగుతున్న ఆదరణను సెక్రటరీ జనరల్ శ్రీ భరత్ లాల్ వివరించారు. 2024లో ఈ పోటీలకు 303 దరఖాస్తులు అందగా.. 2025లో ఆ సంఖ్య 526కు పెరిగినట్లు వెల్లడించారు. మూడంచెల ఎంపిక ప్రక్రియలో 438 లఘు చిత్రాలు జ్యూరీ పరిశీలనకు అర్హత సాధించినట్లు తెలిపారు. మానవ హక్కుల పరిరక్షణను ప్రోత్సహించే దిశగా.. ప్రముఖ చైతన్య కార్యక్రమంగా ఈ పోటీ రూపుదిద్దుకుందని ఆయన అన్నారు.

సంయుక్త కార్యదర్శి శ్రీమతి సైడింగ్‌పుయి ఛక్‌చువాక్ విజేతల పేర్లను ప్రకటించారు. సారికా జైన్ రూపొందించిన 'రాణి' చిత్రానికి మొదటి బహుమతిగా రూ.2లక్షలతో పాటు ట్రోఫీ, ధ్రువీకరణ పత్రాన్ని అందించారు. ఇంగ్లీష్ సబ్ టైటిల్స్‌తో ఉన్న ఈ హిందీ చిత్రం.. వర్గ విభేదాలను, ఇళ్లల్లో పనిచేసే మహిళా కార్మికుల సమస్యలను తెలియజేస్తుంది.
 

 

శ్రీ అమల్ ఎస్ రూపొందించిన 'మీన్‌వైల్ షీ' చిత్రానికి రెండో బహుమతిగా రూ.1.5 లక్షలను అందించారు. ఇంగ్లీష్ సబ్ టైటిల్స్‌తో ఉన్న మలయాళ చిత్రంలో.. గృహ హింస, లింగ వివక్షత వల్ల మహిళా ఉద్యోగులు ఎదుర్కొంటున్న వివిధ సమస్యలను వివరించారు.

తమిళనాడుకు చెందిన సాయి శశాంక్ తాటి రూపొందించిన 'ది డెలివరీ' చిత్రానికి మూడో బహుమతిగా లక్ష రూపాయాలను అందించారు. గిగ్ వర్కర్లు ఎదుర్కొనే సామాజిక భద్రతా లేమి, ఉద్యోగ అభద్రత వంటి సవాళ్లను ఈ చిత్రం తెలియజేస్తుంది.

ప్రత్యేక ప్రశంసలు పొందిన నాలుగు చిత్రాలకు రూ.50,000 నగదు బహుమతిని అందించారు. అవి: ఫాల్గుణి భక్త సినిమా 'మాలతి', రవి కర్ణవాల్ రూపొందించిన ‘సెకండ్ ఛాన్స్’, దామోదర్ డి. పవార్ చిత్రం ‘డస్క్ ఆఫ్ లైఫ్’, మనోజ్ అప్పాసోజాన్వేకర్ రూపొందించిన ‘భాగ్యశ్రీ’. గిరిజన విద్య, జైలు సంస్కరణలు, వృద్ధుల మనోధైర్యం, గ్రామీణ భారతదేశంలోని వితంతు హక్కుల వంటి అంశాలపై ఈ సినిమాలను చిత్రీకరించారు.

 

ఈ కార్యక్రమంలో అవార్డులు పొందిన సినీ రూపకర్తలు సృజనాత్మకతకు సంబంధించిన విశేషాలను పంచుకున్నారు. అవార్డులు పొందిన సినిమాలను కమిషన్ వెబ్‌సైట్‌లో అందుబాటులో ఉంచుతారు. మానవ హక్కులపై అవగాహనను ప్రోత్సహించేందుకు ప్రభుత్వ సంస్థలు, విద్యా సంస్థలు, పౌర సమాజ సంస్థలు వీటిని వినియోగించుకోవచ్చు.

 

***

(రిలీజ్ ఐడి: 2250017) సందర్శకుల సూచీ సంఖ్య : : 7