ಭಾರತೀಯ ರೈಲ್ವೆಯು 2025–26 ರ ಹಣಕಾಸು ವರ್ಷದಲ್ಲಿ ಬಲವಾದ ಮತ್ತು ಸುಸಜ್ಜಿತ ಪ್ರಗತಿಯ ವರ್ಷವನ್ನು ದಾಖಲಿಸಿದೆ, ಸರಕು ಸಾಗಣೆ ಕಾರ್ಯಾಚರಣೆಗಳು, ಪ್ರಯಾಣಿಕರ ಸೇವೆಗಳು, ಮೂಲಸೌಕರ್ಯ ಅಭಿವೃದ್ಧಿ, ಸುರಕ್ಷತಾ ವ್ಯವಸ್ಥೆಗಳು, ತಂತ್ರಜ್ಞಾನ ಮತ್ತು ಉತ್ಪಾದನೆಯಲ್ಲಿ ಸ್ವಾವಲಂಬನೆಯನ್ನು ಮುಂದುವರಿಸುವುದರೊಂದಿಗೆ ಡಿಜಿಟಲ್ ಉಪಕ್ರಮಗಳಲ್ಲಿ ಗಮನಾರ್ಹ ಮೈಲಿಗಲ್ಲುಗಳನ್ನು ಸಾಧಿಸಿದೆ. ಈ ಸಾಧನೆಗಳು ಆರ್ಥಿಕ ಚಟುವಟಿಕೆಯನ್ನು ಬೆಂಬಲಿಸುವಲ್ಲಿ, ಸಂಪರ್ಕವನ್ನು ಹೆಚ್ಚಿಸುವಲ್ಲಿ ಮತ್ತು ದೇಶಾದ್ಯಂತ ಪರಿಣಾಮಕಾರಿ ಚಲನಶೀಲತೆಯನ್ನು ಖಚಿತಪಡಿಸುವಲ್ಲಿ ಅದರ ನಿರ್ಣಾಯಕ ಪಾತ್ರವನ್ನು ಒತ್ತಿ ಹೇಳುತ್ತವೆ.

ಕೇಂದ್ರ ರೈಲ್ವೆ, ವಾರ್ತಾ ಮತ್ತು ಪ್ರಸಾರ ಮತ್ತು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರು 2025–26 ರ ಹಣಕಾಸು ವರ್ಷದಲ್ಲಿ ಭಾರತೀಯ ರೈಲ್ವೆಯ ಪರಿವರ್ತನಾಶೀಲ ಪ್ರಗತಿಯನ್ನು ಸಾದರ ಪಡಿಸಲು ಎಕ್ಸ್ ಜಾಲತಾಣವನ್ನು ಬಳಸಿಕೊಂಡಿದ್ದಾರೆ. ದಾಖಲೆಯ ಸರಕು ಸಾಗಣೆ ಮತ್ತು ಪ್ರಯಾಣಿಕರ ಕಾರ್ಯಕ್ಷಮತೆ, ಹೊಸ ವಂದೇ ಭಾರತ್ ಸ್ಲೀಪರ್ ರೈಲುಗಳು ಸೇರಿದಂತೆ ವಂದೇ ಭಾರತ್ ಸೇವೆಗಳ ಪರಿಚಯ ಮತ್ತು ವಿಸ್ತರಣೆ, ಕಡಿಮೆಯಾದ ಅಪಘಾತಗಳು ಮತ್ತು ವರ್ಧಿತ ವ್ಯವಸ್ಥೆಗಳ ಮೂಲಕ ಸುರಕ್ಷತೆಯಲ್ಲಿ ಐತಿಹಾಸಿಕ ಸುಧಾರಣೆಗಳು ಮತ್ತು ಬಲಪಡಿಸಿದ ನಿಲ್ದಾಣ ಮತ್ತು ಟರ್ಮಿನಲ್ ಮೂಲಸೌಕರ್ಯ, ಇವೆಲ್ಲವೂ ಸಂಪರ್ಕವನ್ನು ಶ್ರೀಮಂತಗೊಳಿಸಿವೆ ಮತ್ತು ದೇಶಾದ್ಯಂತ ಪ್ರಯಾಣಿಕರ ಅನುಭವವನ್ನು ಸುಧಾರಿಸಿವೆ ಎಂದು ಅವರು ತಮ್ಮ ಸಂದೇಶದಲ್ಲಿ ಸ್ಪಷ್ಟವಾಗಿ ವಿವರಿಸಿದರು.

ರೈಲು ಕಾರ್ಯಾಚರಣೆಗಳು ವರ್ಷವಿಡೀ ದೃಢವಾಗಿ ಉಳಿದವು, ಸುಮಾರು 25,000 ರೈಲುಗಳು ಪ್ರತಿದಿನ ಓಡುತ್ತಿದ್ದವು, ವ್ಯಾಪಕ ಸಂಪರ್ಕವನ್ನು ಖಚಿತಪಡಿಸಿದವು. ಗರಿಷ್ಠ ಬೇಡಿಕೆಯ ಅವಧಿಯಲ್ಲಿ ಹೆಚ್ಚುವರಿ ವಿಶೇಷ ರೈಲು ಸೇವೆಗಳನ್ನು ಪರಿಚಯಿಸಲಾಯಿತು, ಪ್ರಯಾಣಿಕರಿಗೆ ಪ್ರಯಾಣದ ಅನುಕೂಲತೆ ಮತ್ತು ಪ್ರವೇಶವನ್ನು ಸುಧಾರಿಸಲಾಯಿತು.

ಸರಕು ಸಾಗಣೆಯು ಐತಿಹಾಸಿಕ ದಾಖಳೆಯ ಎತ್ತರವನ್ನು ತಲುಪಿತು, ವರ್ಷದಲ್ಲಿ 1,670 ಮಿಲಿಯನ್ ಟನ್ ಲೋಡಿಂಗ್ ಸಾಧಿಸಲಾಯಿತು. ಈ ಬೆಳವಣಿಗೆಯು ಕಲ್ಲಿದ್ದಲು, ಸಿಮೆಂಟ್, ರಸಗೊಬ್ಬರಗಳು ಮತ್ತು ಆಹಾರ ಧಾನ್ಯಗಳಂತಹ ಪ್ರಮುಖ ಸರಕುಗಳನ್ನು ಪರಿಣಾಮಕಾರಿಯಾಗಿ ನಿರ್ವಹಿಸುವ ಭಾರತೀಯ ರೈಲ್ವೆಯ ಸಾಮರ್ಥ್ಯವನ್ನು ಪ್ರತಿಬಿಂಬಿಸುತ್ತದೆ, ಇದರಿಂದಾಗಿ ವಲಯಗಳಾದ್ಯಂತ ಪ್ರಮುಖ ಪೂರೈಕೆ ಸರಪಳಿಗಳನ್ನು ಉಳಿಸಿಕೊಳ್ಳುತ್ತದೆ.

ಉತ್ಪಾದನಾ ರಂಗದಲ್ಲಿ, ಭಾರತೀಯ ರೈಲ್ವೆ 1,674 ಲೋಕೋಮೋಟಿವ್ ಗಳನ್ನು ಉತ್ಪಾದಿಸುವ ಮೂಲಕ ತನ್ನ 'ಮೇಕ್ ಇನ್ ಇಂಡಿಯಾ' ಪ್ರಯತ್ನಗಳನ್ನು ಬಲಪಡಿಸಿತು. ಪ್ರಯಾಣಿಕರ ರೋಲಿಂಗ್ ಸ್ಟಾಕ್ ನ ಆಧುನೀಕರಣವು ಸಹ ಮುಂದುವರೆಯಿತು, 6,677 ಎಲ್.ಎಚ್.ಬಿ. ಕೋಚ್ ಗಳನ್ನು ತಯಾರಿಸಲಾಯಿತು, ಇದು ಸುರಕ್ಷಿತ ಮತ್ತು ಹೆಚ್ಚು ಆರಾಮದಾಯಕ ಪ್ರಯಾಣಕ್ಕೆ ಕೊಡುಗೆ ನೀಡಿತು.

ವಂದೇ ಭಾರತ್ ಸ್ಲೀಪರ್ ರೈಲುಗಳ ಬಿಡುಗಡೆಯೊಂದಿಗೆ ಪ್ರಯಾಣಿಕರ ಸೇವೆಗಳು ಗಮನಾರ್ಹ ಪ್ರಗತಿಯನ್ನು ಕಂಡವು, ಇದು ಅಸ್ತಿತ್ವದಲ್ಲಿರುವ ವಂದೇ ಭಾರತ್ ಮತ್ತು ಅಮೃತ ಭಾರತ್ ರೈಲುಗಳ ಫ್ಲೀಟ್ ಗೆ ಸೇರ್ಪಡೆಯಾಗಿದೆ. ಈ ಸೇವೆಗಳು ವೇಗವಾದ, ಆಧುನಿಕ ಮತ್ತು ಪ್ರಯಾಣಿಕ ಸ್ನೇಹಿ ಪ್ರಯಾಣ ಆಯ್ಕೆಗಳನ್ನು ನೀಡುವಲ್ಲಿ ಮಹತ್ವದ ಹೆಜ್ಜೆಯನ್ನು ಪ್ರತಿನಿಧಿಸುತ್ತವೆ, ವಿಶೇಷವಾಗಿ ದೀರ್ಘ-ದೂರ ಪ್ರಯಾಣಗಳಿಗೆ ಇವುಗಳು ತುಂಬಾ ಉಪಯುಕ್ತವಾಗಿವೆ.

ಸ್ಥಳೀಯ “ಕವಚ್ ಸ್ವಯಂಚಾಲಿತ ರೈಲು ರಕ್ಷಣಾ ವ್ಯವಸ್ಥೆ”ಯ ವಿಸ್ತರಣೆಯೊಂದಿಗೆ ಸುರಕ್ಷತಾ ಉಪಕ್ರಮಗಳು ವೇಗವನ್ನು ಪಡೆದುಕೊಂಡವು, ಈಗ 3,100 ಮಾರ್ಗ ಕಿಲೋಮೀಟರ್ಗಳಿಗಿಂತ ಹೆಚ್ಚು ಕಾರ್ಯರೂಪಕ್ಕೆ ಬಂದಿವೆ, ಆದರೆ ಹೆಚ್ಚುವರಿಯಾಗಿ 24,400 ಕಿಲೋಮೀಟರ್ಗಳಲ್ಲಿ ಅನುಷ್ಠಾನವು ನಡೆಯುತ್ತಿದೆ. ಈ ತಂತ್ರಜ್ಞಾನ-ಚಾಲಿತ ವ್ಯವಸ್ಥೆಯು ಘರ್ಷಣೆಗಳನ್ನು ತಡೆಗಟ್ಟುವ ಮತ್ತು ಕಾರ್ಯಾಚರಣೆಯ ಸುರಕ್ಷತೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ.

ಡಿಜಿಟಲ್ ರೂಪಾಂತರವು ಪ್ರಮುಖ ಗಮನ ಕ್ಷೇತ್ರವಾಗಿ ಉಳಿಯಿತು. ಜುಲೈ 2025 ರಲ್ಲಿ ರೈಲ್ ಒನ್ ಮೊಬೈಲು ಅಪ್ಲಿಕೇಶನ್ ನ ಪ್ರಾರಂಭವು ಪ್ರಯಾಣಿಕರಿಗೆ ಟಿಕೆಟ್ ಬುಕಿಂಗ್, ರೈಲು ವಿಚಾರಣೆ ಮತ್ತು ಕುಂದುಕೊರತೆ ಪರಿಹಾರಕ್ಕಾಗಿ ಏಕೀಕೃತ ವೇದಿಕೆಯನ್ನು ಒದಗಿಸಿತು. ಸಮಾನಾಂತರವಾಗಿ, ಟಿಕೆಟ್ ಗಳಲ್ಲಿ ಪಾರದರ್ಶಕತೆಯನ್ನು ಖಚಿತಪಡಿಸಿಕೊಳ್ಳಲು ನಿರಂತರ ಪ್ರಯತ್ನಗಳು 3.04 ಕೋಟಿಗೂ ಹೆಚ್ಚು ಅನುಮಾನಾಸ್ಪದ ಬಳಕೆದಾರ ಖಾತೆಗಳನ್ನು ತೆಗೆದುಹಾಕಲು ಕಾರಣವಾಯಿತು, ಇದು ರೈಲ್ವೆ ಸೇವೆಗಳಿಗೆ ನ್ಯಾಯಯುತ ಪ್ರವೇಶವನ್ನು ಉತ್ತೇಜಿಸಿತು.

35 ಗತಿ ಶಕ್ತಿ ಕಾರ್ಗೋ ಟರ್ಮಿನಲ್ ಗಳ ಕಾರ್ಯಾರಂಭದೊಂದಿಗೆ ಮೂಲಸೌಕರ್ಯ ಅಭಿವೃದ್ಧಿಯು ವೇಗದಲ್ಲಿ ಮುಂದುವರೆಯಿತು, ಸುಧಾರಿತ ಲಾಜಿಸ್ಟಿಕ್ಸ್ ದಕ್ಷತೆ ಮತ್ತು ಮಲ್ಟಿಮೋಡಲ್ ಏಕೀಕರಣವನ್ನು ಸುಗಮಗೊಳಿಸಿತು. ಹೆಚ್ಚುವರಿಯಾಗಿ, ಅಮೃತ್ ಭಾರತ್ ನಿಲ್ದಾಣ ಯೋಜನೆಯಡಿಯಲ್ಲಿ 119 ನಿಲ್ದಾಣಗಳನ್ನು ಪುನರಾಭಿವೃದ್ಧಿಗೊಳಿಸಲಾಗಿದ್ದು, ನವೀಕರಿಸಿದ ಸೌಲಭ್ಯಗಳು ಮತ್ತು ಸುಧಾರಿತ ಪ್ರಯಾಣಿಕರ ಅನುಭವವನ್ನು ನೀಡಲಾಗುತ್ತಿದೆ.

ಕಾರ್ಯತಂತ್ರದ ಪ್ರಮುಖ ಪ್ರದೇಶಗಳಲ್ಲಿ ಸಂಪರ್ಕ ವರ್ಧನೆಗಳನ್ನು ಸಹ ಸಾಧಿಸಲಾಗಿದೆ. ಬೈರಾಬಿ-ಸೈರಾಂಗ್ ರೈಲು ಮಾರ್ಗವು ಐಜ್ವಾಲ್ ಗೆ ರೈಲು ಸಂಪರ್ಕವನ್ನು ವಿಸ್ತರಿಸಿದೆ, ಈಶಾನ್ಯದಲ್ಲಿ ಜಾಲವನ್ನು ಬಲಪಡಿಸಿದೆ. ಅದೇ ಸಮಯದಲ್ಲಿ, ಪ್ರಮುಖ ಸೇತುವೆ ಮೂಲಸೌಕರ್ಯ ಯೋಜನೆಗಳು ಜಮ್ಮು ಮತ್ತು ಕಾಶ್ಮೀರಕ್ಕೆ ಎಲ್ಲಾ ಹವಾಮಾನ ರೈಲು ಸಂಪರ್ಕವನ್ನು ಬಲಪಡಿಸಿವೆ.

ಈ ಸಾಧನೆಗಳು ಭಾರತೀಯ ರೈಲ್ವೆಯ ಸಾಮರ್ಥ್ಯ ವಿಸ್ತರಣೆ, ಆಧುನೀಕರಣ, ಸುರಕ್ಷತೆ ವರ್ಧನೆ ಮತ್ತು ಸಮಗ್ರ ಅಭಿವೃದ್ಧಿಯ ಮೇಲೆ ನಿರಂತರ ಗಮನ ಕೇಂದ್ರೀಕರಣವನ್ನು ಪ್ರತಿಬಿಂಬಿಸುತ್ತವೆ. ಮುಂದುವರಿಯುತ್ತಾ, ಅಭಿವೃದ್ಧಿ ಹೊಂದಿದ ಭಾರತದ ದೃಷ್ಟಿಕೋನಕ್ಕೆ ಅನುಗುಣವಾಗಿ ಹೆಚ್ಚು ಪರಿಣಾಮಕಾರಿ, ತಂತ್ರಜ್ಞಾನ-ಚಾಲಿತ ಮತ್ತು ಪ್ರಯಾಣಿಕ-ಕೇಂದ್ರಿತ ರೈಲು ಜಾಲವನ್ನು ನಿರ್ಮಿಸಲು ಸಂಸ್ಥೆ ಬದ್ಧವಾಗಿದೆ ಎಂಬುದನ್ನು ಕೂಡಾ ತೋರಿಸಿಕೊಡುತ್ತದೆ.

*****