రైతుల ఐడీలూ, ఎరువుల లభ్యత, వివిధ వ్యవసాయ పథకాల పురోగతి సంబంధిత అంశాలను సమీక్షించడానికి రాష్ట్రాల వ్యవసాయ మంత్రులతో కేంద్ర వ్యవసాయ, రైతు సంక్షేమ శాఖ మంత్రి శ్రీ శివ్‌రాజ్ సింగ్ చౌహాన్ ఈ రోజు దృశ్య మాధ్యమం ద్వారా సమావేశాన్ని నిర్వహించారు.
సమావేశంలో కేంద్ర మంత్రి మాట్లాడుతూ రైతులను వారి భూమితో, పంటలతో, పశుగణంతో, మత్స్యపాలన ప్రక్రియతో అనుసంధానించడానికి రైతు ఐడీ ఒక ముఖ్య సాధనమన్నారు. ఇంతవరకు 19 రాష్ట్రాల్లో మొత్తంమీద 9.25 కోట్ల రైతు ఐడీల్ని రూపొందించినట్లు తెలిపారు. రాష్ట్ర ప్రభుత్వాల వ్యవసాయ, రెవెన్యూ విభాగాలు కలిసి ఒక ప్రచార ఉద్యమాన్ని మొదలుపెట్టి, రాబోయే ఆరు నెలల లోపల 100 శాతం లక్ష్యాన్ని సాధించడానికి ప్రయత్నాలు చేయాలని ఆయన ఆదేశించారు. అదే సమయంలో, రైతు నమోదు ప్రక్రియను ఒక్క పీఎం‑కిసాన్ లబ్ధిదారులకు మాత్రమే పరిమితం చేయకుండా, అర్హులైన రెతులందరినీ ఇందులో చేర్చేలా చూడడానికి ప్రజాచైతన్య ప్రచార కార్యక్రమాన్ని పెద్ద ఎత్తున నిర్వహించాలని కూడా ఆయన అన్నారు.
ఎరువుల లభ్యత అంశాన్ని కేంద్ర మంత్రి ప్రస్తావిస్తూ, రైతులకు ఎరువుల అందుబాటులో ఎలాంటి లోటునూ రానీయకూడదన్నారు. ఎరువులను అక్రమంగా నిల్వ చేయడం, నల్లబజారులో విక్రయించడం వంటి ధోరణులను కఠినంగా అరికట్టాలని రాష్ట్రాలకు ఆయన ఆదేశాలు జారీ చేశారు. రైతుల అవసరాలకు తగినట్లుగా ఎరువులను అందించేలా చర్యలు తీసుకోవాలనీ, దీని కోసం సాంకేతికత ఆధారిత సమాన పంపిణీ వ్యవస్థను ఏర్పాటు చేయాలన్నారు. ఎరువుల అసమతౌల్య ఉపయోగాన్ని నివారించడానికి, సేంద్రియ సాగుని, ప్రాకృతిక వ్యవసాయాన్ని ప్రోత్సహించడానికి చైతన్యాన్ని పెంచడం ముఖ్యమని కూడా ఆయన అన్నారు.
సరిహద్దు ప్రాంతాల్లో ప్రత్యేక నిఘాను కొనసాగించాల్సిందిగా ఆయన ఆదేశాలిస్తూ, ఎరువులను చట్టవిరుద్ధంగా తరలించడాన్ని అడ్డుకోవాలని స్పష్టం చేశారు. హర్యానాలో అమలు చేస్తున్న ‘మేరీ ఫసల్, మేరా బ్యోరా’ కార్యక్రమాన్ని శ్రీ చౌహాన్ ప్రశంసించారు. ఈ నమూనాను ఇతర రాష్ట్రాలు అమలు చేయవచ్చని మంత్రి తెలిపారు.
పీఎం‑ఆశా పథకంలో భాగంగా పప్పుధాన్యాలనూ, నూనెగింజలనూ కనీస మద్దతు ధరకు (ఎమ్ఎస్‌పీ) కొనుగోలు చేసే అంశంపైనా సమీక్షను నిర్వహించారు. ఈ పథకంలో భాగంగా ప్రభుత్వం పప్పుధాన్యాలనూ, నూనెగింజలనూ ఎమ్ఎస్‌పీ‌పై కొనుగోలు చేస్తుందనీ, ఈ పథకం మార్గదర్శకాలకు అనుగుణంగా రాష్ట్రాలు పాలుపంచుకుంటాయనీ శ్రీ శివ్‌రాజ్ సింగ్ చౌహాన్ అన్నారు.