ہندوستان کے کول گیسیفیکیشن روڈ میپ کو آگے بڑھانے میں ایک اہم قدم  کے طورپر اوڈیشہ کے لکھن پور میں مجوزہ کوئلہ سے امونیم نائٹریٹ پروجیکٹ کے لیے بھارت کول گیسیفیکیشن اینڈ کیمیکلز لمیٹڈ (بی سی جی سی ایل) اور مہاندی کول فیلڈز لمیٹڈ (ایم سی ایل) کے درمیان ایک تاریخی زمینی لیز معاہدے پر دستخط کیے گئے۔ دستخط کی تقریب آج نئی دہلی میں کوئلہ اور کانوں کے مرکزی وزیر جناب جی کشن ریڈی کی موجودگی میں منعقد ہوئی۔

یہ پروجیکٹ جس کا تصور ٹی پی ڈی  2000 امونیم نائٹریٹ کی سہولت کے طور پر کیا گیا ہے، ایک تاریخی کامیابی ہے، کیونکہ یہ بھارت کا پہلا کوئلہ گیسیفیکیشن پروجیکٹ ہے جس میں بھارت ہیوی الیکٹریکل لمیٹڈ ( بی ایچ ای ایل) کی طرف سے تیار کردہ مقامی گیسیفیکیشن ٹیکنالوجی کا استعمال کیا گیا ہے۔ یہ توانائی اور کیمیکل کے شعبہ میں مقامی اختراعات، تکنیکی ترقی اور درآمداتی ٹیکنالوجیز پر انحصار کم کرنے کی طرف ایک فیصلہ کن قدم کی نمائندگی کرتا ہے۔

ایم سی ایل کے تحت تقریباً 350 ایکڑ اراضی پر پھیلا ہوا یہ پروجیکٹ وزارت کوئلہ کی طرف سے حالیہ ترقی پسند پالیسی اصلاحات کے ذریعے ممکن ہوا ہے۔ یہ اصلاحات کول گیسیفیکیشن پروجیکٹس کے لیے کول بیئرنگ ایریا (سی بی اے) کی زمین کے استعمال کو قابل بناتی ہیں، ہندوستان کے کوئلے کے وافر وسائل کے ویلیو ایڈڈ استعمال کے لیے نئی راہیں کھولتی ہیں اور اس شعبے کے تنوع کو مضبوط کرتی ہیں۔

کوئلے کی گیس کو فروغ دینے کے اپنے عزم کو مضبوط کرتے ہوئے، وزارت کوئلہ نے اپنی مخصوص مالی ترغیباتی اسکیم کے تحت 1,350 کروڑ روپے کی مالی مدد فراہم کی ہے۔ پروجیکٹ پہلے سے ہی تیزی سے آگے بڑھ رہا ہے، جس میں بڑے ‘لمپ سم ٹرنکی(ایل ایس ٹی کے) پیکجز—1 اور LSTK ایل ایس ٹی کے ، بی ایچ ای ایل -2 کو دیئے گئے ہیں، جبکہ ایل ایس ٹی کے-3 اور ایل ایس ٹی کے-4 لارسن اینڈ ٹوبرو کو دیئے گئے ہیں۔ مزید برآں، سائٹ کے ترقیاتی کام،  جس میں باؤنڈری وال کی تعمیر اور درختوں کی مردم شماری، ساتھ ساتھ آگے بڑھ رہے ہیں، اس بات کو یقینی بناتے ہوئے کہ ٹائم لائنز کو پورا کیا جائے۔

زمین کے لیز کے معاہدے پر دستخط کی تقریب سے خطاب کرتے ہوئے کوئلہ اور کانوں کے مرکزی وزیر جناب جی کشن ریڈی نے کہا کہ حکومت خود انحصاری ہندوستان کے وزیر اعظم کے ویژن کے مطابق کوئلے کے شعبے کو تبدیل کرنے کے لیے توجہ مرکوز اقدامات کر رہی ہے۔ انہوں نے کہا کہ ہندوستان کو کوئلہ کے وافر ذخائر سے نوازا گیا ہے اور روایتی استعمال سے ہٹ کر کوئلہ کی گیسیفیکیشن کے ذریعے اس وسائل کو بڑے پیمانے پر استعمال کرنا ضروری ہے۔

انہوں نے بتایا کہ کابینہ نے کول گیسیفیکیشن کو فروغ دینے کے لیے 8,500 کروڑ روپے کی لاگت کو منظوری دی ہے، 7 پروجیکٹوں کو پہلے ہی حتمی شکل دی گئی ہے، جن میں سے 3 کے لیے سنگ بنیاد کی تقریبات مکمل ہو چکی ہیں۔ ایم سی ایل اوربی سی جی سی ایل کے درمیان ہونے والے معاہدے کو جس میں تقریباً 25,000 کروڑ روپے کی سرمایہ کاری شامل ہے کو ایک اہم قدم قرار دیتے ہوئے، انہوں نے کہا کہ یہ بی سی جی سی ایل کا پہلا مقامی پروجیکٹ ہے اور اس شعبے میں بڑھتی ہوئی رفتار کو ظاہر کرتا ہے۔

وزیر نے کہا کہ کوئلہ گیسیفیکیشن ایک تبدیلی کا اقدام ثابت ہو گا جو درآمداتی انحصار کو کم کرنے اور زرمبادلہ کی بچت میں کلیدی کردار ادا کرے گا۔ انہوں نے مقامی صلاحیتوں کو مضبوط بناتے ہوئے بہترین عالمی ٹیکنالوجی کو اپنانے کی ضرورت پر زور دیا اور حکومت کی جانب سے مکمل تعاون کا یقین دلایا۔ مکمل حکومتی نقطہ نظر پر زور دیتے ہوئے انہوں نے وزارت ماحولیات، جنگلات اور موسمیاتی تبدیلی ( ایم او ای ایف سی سی)، بھاری صنعتوں کی وزارت اور وزارت تجارت کے مربوط کردار کو اجاگر کیا اور صنعت، سرمایہ کاروں اور دیگر اسٹیک ہولڈرز سے فعال شرکت پر زور دیا۔ انہوں نے اس منصوبے کو مقررہ مدت سے پہلے مکمل کرنے کی ضرورت پر بھی زور دیا۔

اس موقع پر خطاب کرتے ہوئے کوئلہ کی وزارت کے سکریٹری  جناب وکرم دیو دت نے کہا کہ بی سی جی سی ایل اور ایم سی ایل کے درمیان زمین کے لیز کے معاہدے پر دستخط ملک میں کوئلے کی گیس کو آگے بڑھانے میں ایک اہم سنگ میل ہے۔ انہوں نے موجودہ عالمی منظر نامے میں خود انحصاری کے لیے کوششوں کو تیز کرنے اور ملکی صلاحیتوں کو مضبوط کرنے کی ضرورت پر زور دیا۔

 جناب دت نے کہا کہ تمام اہم تقاضے، جیسے کہ قانونی منظوری، لیٹر آف ایوارڈ (ایل او اے) اور ٹینڈر کے عمل، ایڈوانس مراحل میں ہیں، جس سے پروجیکٹ کے بروقت نفاذ کی راہ ہموار ہو رہی ہے۔ اسے مسابقتی لاگت کے ڈھانچے کے ساتھ مقامی ترقی کے لیے ایک ممکنہ ماڈل کے طور پر بیان کرتے ہوئے، انہوں نے تمام اسٹیک ہولڈرز پر زور دیا کہ وہ ملکیت کے احساس کے ساتھ کام کریں، بروقت مسائل کو اٹھائیں اور پبلک سیکٹر کے اداروں کے درمیان موثر ہم آہنگی کو یقینی بنائیں۔

اس موقع پر وزیر موصوف نے بی سی جی سی ایل کی آفیشل ویب سائٹ کا بھی افتتاح کیا، جو شفافیت، رسائی اور اسٹیک ہولڈر کی مصروفیت کو بڑھانے کی جانب ایک اہم قدم ہے۔ یہ پلیٹ فارم اہم معلومات کو پھیلانے کے لیے ایک مرکزی ذریعہ کے طور پر کام کرے گا،  جس میں پروجیکٹ اپ ڈیٹس اور ٹینڈرز شامل ہیں۔

زمین کے لیز کے اس معاہدے سے توقع ہے کہ اس منصوبے کے نفاذ میں تیزی آئے گی اور مقررہ مدت کے اندر اس کی تکمیل کو یقینی بنایا جائے گا۔ لکھن پور میں کوئلہ سے امونیم نائٹریٹ پروجیکٹ ایک اہم صنعتی اقدام ہے جو تکنیکی ترقی، پالیسی اصلاحات اور خود انحصاری کے لیے ہندوستان کی کوششوں کی عکاسی کرتا ہے اور طویل مدتی صنعتی ترقی اور اقتصادی لچک میں حصہ ڈالے گا۔

موجودہ عالمی منظر نامے میں، بدلتے ہوئے جغرافیائی سیاسی حالات اور سپلائی چین کی غیر یقینی صورتحال، اس طرح کے اقدامات اور بھی زیادہ اہمیت رکھتے ہیں۔ یہ پروجیکٹ ایک ترقی یافتہ ہندوستان کے ویژن سے مطابقت رکھتا ہے، جس میں اختراع، وسائل کی کارکردگی، اور پائیدار صنعتی ترقی پر زور دیا گیا ہے۔ یہ درآمداتی انحصار کو کم کرنے، قدرتی وسائل کی قدر میں اضافہ کرنے اور ایک مضبوط، مستقبل کے لیے تیار معیشت کی تعمیر کے لیے ہندوستان کے عزم کو تقویت دیتا ہے۔

 

*****

 

UR-5273

(ش ح-ظ الف-ع د)

 

(ریلیز آئی ڈی: 2248264) وزیٹر کاؤنٹر : 12