محترمہ دیپتی گور مکھرجی، سکریٹری، وزارت کارپوریٹ امور، حکومت ہند نے 24 مارچ 2026 کو کرتویہ بھون–I، نئی دہلی میں کارپوریٹ لا اینڈ مینجمنٹ میں ایل ایل ایم کے دو سالہ مکمل رہائشی پروگرام کا باضابطہ افتتاح کیا۔ یہ پروگرام مشترکہ طور پر کارپوریٹ معاملات کے بھارتی انسٹی ٹیوٹ (آئی آئی سی اے) اور نیشنل لا یونیورسٹی اینڈ جوڈیشل اکیڈمی، آسام (این ایل یو جے اے) کی جانب سے پیش کیا جائے گا۔

افتتاحی تقریب میں متعدد معزز شخصیات نے شرکت کی، جن میں گیانیشور کمار سنگھ، ڈائریکٹر جنرل و سی ای او، آئی آئی سی اے؛ پروفیسر کے وی ایس شرما، وائس چانسلر، این ایل یو جے اے؛ شانتنو مترا، سینئر اکنامک ایڈوائزر، وزارت کارپوریٹ امور؛ شیکھر سریواستو، ڈپٹی سیکریٹری؛ گناجیت رائے چودھری، رجسٹرار، این ایل یو جے اے؛ کرنل امن دیپ سنگھ پوری، چیف ایڈمنسٹریٹو آفیسر؛ سدھاکر شکلا، ہیڈ سینٹر فار انسالونسی اینڈ بینکرپسی، آئی آئی سی اے؛ اور ڈاکٹر پیلا نارائن راؤ، ہیڈ اسکول آف کارپوریٹ لا، آئی آئی سی اے شامل تھے۔ اس موقع پر دونوں اداروں کے سینئر فیکلٹی ممبران اور دیگر افسران بھی موجود تھے۔

 تقریب سے خطاب کرتے ہوئے سکریٹری، وزارت کارپوریٹ امور نے آئی آئی سی اے اور این ایل یو جے اے آسام کی اس بات پر ستائش کی کہ انہوں نے انتہائی مختصر وقت میں کارپوریٹ قانون میں ایک اعلیٰ تخصصی ماسٹرز پروگرام کو تصور دے کر کامیابی سے شروع کیا۔ انہوں نے کہا کہ یہ اقدام مالیاتی وزیر کی جانب سے آئی آئی سی اے کے شمال مشرقی مرکز کے افتتاح کے بعد ایک سنگِ میل ثابت ہوگا۔

انہوں نے اس بات پر بھی روشنی ڈالی کہ اس پروگرام کا ڈھانچہ نہایت سوچ سمجھ کر تیار کیا گیا ہے، جو وزارت کارپوریٹ امور کے انضباطی نظام سے تقویت حاصل کرتا ہے اور طلبہ کو صنعت کے ماہرین، پالیسی سازوں اور ریگولیٹرز کے ساتھ عملی تجربہ حاصل کرنے کا موقع فراہم کرے گا۔

گیانیشور کمار سنگھ، ڈائریکٹر جنرل و سی ای او، آئی آئی سی اے نے کہا کہ یہ دو سالہ پروگرام کارپوریٹ لا، گورننس اور ریگولیٹری فریم ورک میں پیشہ ورانہ صلاحیتوں کو مضبوط بنانے کے لیے منفرد انداز میں ترتیب دیا گیا ہے۔ انہوں نے خاص طور پر شمال مشرقی خطے کے طلبہ کے لیے اس کی اہمیت کو اجاگر کرتے ہوئے کہا کہ یہ پروگرام تعلیمی معیار اور عملی بصیرت دونوں فراہم کرے گا، جو بدلتے ہوئے کارپوریٹ ماحول کے مطابق ہے۔

پروفیسر کے وی ایس شرما، وائس چانسلر، این ایل یو جے اے نے کہا کہ اس پروگرام کا مقصد قانونی تعلیم کو انتظامی اور ضابطہ جاتی نقطہ نظر کے ساتھ ہم آہنگ کرنا ہے۔ انہوں نے وزارت کارپوریٹ امور کے تعاون کو سراہا اور آئی آئی سی اے کی قیادت، فیکلٹی اور دیگر ادارہ جاتی شراکت داروں کی مشترکہ کاوشوں کو اس اہم اقدام کی تشکیل میں کلیدی قرار دیا۔

ایل ایل ایم پروگرام کو دو سالہ مکمل وقتی رہائشی کورس کے طور پر ترتیب دیا گیا ہے، جس میں 54 کریڈٹس شامل ہیں اور یہ چار سمسٹروں پر مشتمل ہوگا۔ تعلیمی سرگرمیاں آئی آئی سی اے اور این ایل یو جے اے آسام دونوں کے کیمپسز میں انجام پائیں گی۔ کورس کا پہلا سال این ایل یو جے اے آسام میں جبکہ دوسرا سال آئی آئی سی اے کیمپس، آئی ایم ٹی مانیسر میں منعقد ہوگا۔

اس پروگرام میں ابتدائی طور پر ہر بیچ کے لیے 60 نشستیں رکھی گئی ہیں۔ درخواست دینے کا عمل 24 مارچ 2026 سے شروع ہو چکا ہے اور 24 جون 2026 تک جاری رہے گا۔ تعلیمی سیشن کا آغاز 10 اگست 2026 کو این ایل یو جے اے آسام کیمپس میں ہوگا۔

دلچسپی رکھنے والے امیدوار اپنی درخواستیں آن لائن این ایل یو جے اے آسام کی سرکاری ویب سائٹ کے ذریعے جمع کرا سکتے ہیں۔

 

************

ش ح ۔   م  د ۔  م  ص

(U :4971)

(ریلیز آئی ڈی: 2245727) وزیٹر کاؤنٹر : 9