اتر پردیش کا ضلع شراوستی بودھ مذہب کی دنیا میں بے پناہ روحانی اور تاریخی اہمیت رکھتا ہے۔ یہ ان مقامات میں سے ایک مانا جاتا ہے جہاں بھگوان بدھ نے کئی برسات کے موسم گزارے اور اپنی متعدد تعلیمات پیش کیں۔ شراوستی علمی ماہرین، روحانی متلاشیوں اور عالمی سیاحوں کو اپنی جانب متوجہ کرتا ہے جو ہندوستان کی بودھ وراثت میں دلچسپی رکھتے ہیں۔

اس عالمی سطح پر اہم مذہبی مقام تک بہتر رسائی فراہم کرنے کے لیے ایک بڑے قدم کے طور پر، مرکزی کابینہ نے قومی شاہراہ 927 کے تحت بارابنکی–بہرائچ سیکشن کو چار لین، کنٹرولڈ ایکسیس شاہراہ کے طور پر تعمیر کرنے کی منظوری دے دی ہے۔ اس منصوبے سے شراوستی ضلع تک سفر آسان ہوگا اور مشرقی اتر پردیش میں سیاحت پر مبنی معاشی ترقی کے نئے مواقع پیدا ہوں گے۔

عالمی اہمیت کے باوجود شراوستی طویل عرصے سے رابطہ سڑکوں کی کمی کا شکار رہا ہے، جس کی وجہ سے اس کی سیاحتی صلاحیت پوری طرح سامنے نہیں آ سکی۔ نیا منظور شدہ 101.5 کلومیٹر طویل بارابنکی–بہرائچ ہائی وے اس صورتحال کو بدلنے میں اہم کردار ادا کرے گا، کیونکہ اس سے تیز، محفوظ اور مؤثر سفری سہولت فراہم ہوگی۔

یہ کنٹرولڈ ایکسیس ہائی وے گاڑیوں کی اوسط رفتار کو 40 کلومیٹر فی گھنٹہ سے بڑھا کر 80 کلومیٹر فی گھنٹہ تک لے جائے گا اور بارابنکی سے بہرائچ کے درمیان سفر کا وقت تقریباً 150 منٹ سے کم ہو کر 75 منٹ رہ جائے گا، یعنی تقریباً 50 فیصد کمی ہوگی۔

 

بہتر رابطہ سڑکیں مقامی اور بین الاقوامی بودھ سیاحوں کو راغب کرنے میں انقلابی کردار ادا کریں گی۔ تھائی لینڈ، سری لنکا، جاپان اور میانماں جیسے ممالک کے بودھ مذہبی مقامات سے گہرے روحانی تعلقات ہیں، اور شراوستی تک بہتر رسائی ان ممالک سے مزید زائرین کی آمد کو فروغ دے گی۔ یہ ہائی وے خطے میں اہم شاہراہوں، ریلوے اسٹیشنوں، ہوائی اڈوں اور لاجسٹک مراکز کو جوڑ کر ملٹی موڈل کنیکٹیویٹی کو بھی بہتر بنائے گا، جس سے سفر مزید آسان اور قابلِ اعتماد ہوگا۔

شراوستی میں بودھ سیاحت کے فروغ سے مقامی برادریوں کے لیے نمایاں معاشی مواقع پیدا ہوں گے۔ بہتر سڑک رابطے سے ٹریفک کے دباؤ میں کمی آئے گی اور مسافروں کے لیے سفر زیادہ محفوظ اور آرام دہ ہو جائے گا۔

منصوبے کی اہم جھلکیاں

• منصوبہ: 4 لین کنٹرولڈ ایکسیس قومی شاہراہ 927 (بارابنکی–بہراچ سیکشن)
• لمبائی: 101.51 کلومیٹر
• کل لاگت: 6,969.04 کروڑ روپے
• عملدرآمد کا طریقہ: ہائبرڈ اینوٹی موڈ (ایچ اے ایم)

اہم شاہراہ رابطے:

• قومی شاہراہ 27، قومی شاہراہ 330 بی، قومی شاہراہ 730

ریاستی شاہراہ رابطے:

• اسٹیٹ ہائی وے 13، اسٹیٹ ہائی وے 30 بی

اہم کنیکٹیویٹی:

• ہوائی اڈے: لکھنؤ، شراوستی
• ریلوے اسٹیشنز: بارابنکی، رساؤلی، جنگیر آباد، رفی نگر، بندورا، برہوال، چوکاگھاٹ، گھاگھراگھاٹ، جرول اور بہراچ
• لینڈ پورٹ: روپئیڈیہا لینڈ پورٹ

منسلک نوڈز:

• 3 اقتصادی نوڈز (بشمول ایس ای زیڈ اور میگا فوڈ پارکس)
• 2 سماجی نوڈز (امید افزا اضلاع)
• 12 لاجسٹک نوڈز

اہم شہر:

بارابنکی، رام نگر، جرول، قیصر گنج، فخرپور، بہراچ

روزگار کے مواقع:

• براہِ راست: 36.54 لاکھ شخصی دن
• بالواسطہ: 43.04 لاکھ شخصی دن

یہ منصوبہ نہ صرف شراوستی کو عالمی بدھ سیاحتی نقشے پر مزید مضبوطی سے نمایاں کرے گا بلکہ مشرقی اتر پردیش کی مجموعی معاشی ترقی میں بھی اہم کردار ادا کرے گا۔

 

************

ش ح ۔   م  د ۔  م  ص

(U :4965)

(ریلیز آئی ڈی: 2245689) وزیٹر کاؤنٹر : 8