وزارت تجارت و صنعت کے صنعتی اور اندرونی تجارت فروغ کے شعبے (ڈی پی آئی آئی آئی ٹی) نے 24 مارچ 2026 کو ملک کے مینوفیکچرنگ اور جدت کے ماحولیاتی نظام کو مضبوط بنانے کی سمت میں ایک اہم قدم اٹھاتے ہوئے، ملک بھر کے اسٹارٹ اپس، اختراع کاروں اور کاروباریوں کو سہارا دینے کے لیے ایک معروف ایئر کنڈیشنگ کمپنی کے ساتھ مفاہمت نامے پر دستخط کیے ہیں۔

اس تعاون کا مقصد ایسے پروڈکٹ اسٹارٹ اپس کی ترقی کو فروغ دینا ہے جو ایچ وی اے سی ٹیکنالوجیز، ڈیجیٹل حل، جدید مینوفیکچرنگ عمل اور سپلائی چین سے متعلق جدت جیسے شعبوں میں کام کر رہے ہیں۔ اس کا ہدف یہ ہے کہ اسٹارٹ اپس کو منظم صنعتی شراکت کے ذریعے فروغ دیا جائے اور وہ صنعت سے متعلقہ حل تیار کرنے کے قابل بنیں۔

اس پہل کے تحت اسٹارٹ اپس کو صنعتی ماہرین کی رہنمائی، تحقیق و ترقی کی لیبارٹریاں اور ٹیسٹنگ سہولیات سمیت بنیادی ڈھانچے کی معاونت، عملی مواقع اور مارکیٹ رابطے فراہم کیے جائیں گے۔ یہ شراکت داری اسٹارٹ اپس کو پروڈکٹ کی تصدیق، پروف آف کانسپٹ (پی او سی) کی ترقی اور صنعتی ویلیو چینز میں انضمام جیسے اہم اہداف حاصل کرنے میں بھی مدد دے گی۔

ڈی پی آئی آئی آئی ٹی کے جوائنٹ سکریٹری جناب سنجیو نے بتایا کہ یہ تعاون مینوفیکچرنگ شعبے میں صنعت سے متاثر جدت کو فروغ دینے کی سمت میں ایک اہم قدم ہے۔ اس قسم کی شراکت داریاں اسٹارٹ اپس کو حقیقی دنیا کے مسائل سے منسلک ہونے اور ٹھوس نتائج کے ساتھ حل بڑے پیمانے پر نافذ کرنے کے قابل بناتی ہیں۔

اس تعاون کے تحت ڈی پی آئی آئی آئی ٹی، بلو اسٹار لمیٹڈ کے ساتھ مل کر بھارت اسٹارٹ اپ گرینڈ چیلنج کے تحت جدت کے چیلنجز کے انعقاد کے امکانات تلاش کرے گا، نیز ایچ وی اے سی، ڈیجیٹل ٹیکنالوجیز اور مینوفیکچرنگ شعبوں پر مرکوز ہیکاتھون کا اہتمام کرے گا۔ اسٹارٹ اپس کو منظم پروف آف کانسپٹ پروگراموں میں حصہ لینے کے مواقع ملیں گے، جن میں سے منتخب اداروں کو پائلٹ تعیناتی اور مزید شراکت کے لیے مدنظر رکھا جائے گا۔

اس تعاون سے اسٹارٹ اپس کو ٹیسٹنگ سہولیات، تحقیق و ترقی کے ڈھانچے اور تکنیکی معاونت کے ساتھ ساتھ منظم رہنمائی پروگراموں اور باقاعدہ شراکتی سیشنز تک رسائی حاصل ہوگی تاکہ جدت کو صنعت کی ضروریات کے مطابق ڈھالا جا سکے۔

ڈی پی آئی آئی آئی ٹی کے ڈپٹی سکریٹری جناب ٹی ایل کے سنگھ اور بلو اسٹار لمیٹڈ کے منیجنگ ڈائریکٹر جناب بی تھیاگرجن نے دونوں جانب کے سینئر افسران کی موجودگی میں مفاہمت نامے پر دستخط کیے۔

 

********

ش ح۔ ع ح۔ش ہ ب

U. No.4770

(ریلیز آئی ڈی: 2244410) وزیٹر کاؤنٹر : 12