پوشن ٹریکر ایک ڈیجیٹل ایپلی کیشن ہے جسے خواتین اور بچوں کی ترقی کی وزارت نے شروع کیا تھا، جو مشن سکشم آنگن واڑی اور پوشن 2.0 (مشن پوشن 2.0) کے تحت بچوں کی غذائیت سے متعلق اشاریوں کا تقریباً حقیقی وقت میں ڈیٹا جمع کرتا ہے۔ پوشن ٹریکر کے ڈیٹا سے ظاہر ہوتا ہے کہ وقت کے ساتھ ملک میں بچوں کی غذائی کمی کے اشاریوں میں بہتری آئی ہے۔ ان اشاریوں کی پیش رفت پوشن ٹریکر ڈیش بورڈ پر دیکھی جا سکتی ہے: https://www.poshantracker.in/statistics

مشن پوشن 2.0 فرنٹ لائن کارکنوں کو اسمارٹ فون فراہم کر کے انہیں بااختیار بناتا ہے۔ تمام آنگن واڑی کارکنوں (اے ڈبلیو ڈبلیو) کو انٹرنیٹ کنیکٹیویٹی کے اخراجات کے لیے سالانہ 2000 روپے فراہم کیے جاتے ہیں۔ اس کے علاوہ، ہر آنگن واڑی مرکز (اے ڈبلیو سی) پر رجسٹرڈ مستفیدین کی باقاعدہ نشوونما کی نگرانی کے لیے گروتھ مانیٹرنگ آلات (جی ایم ڈی) فراہم کرنے کا انتظام ہے۔ پوشن ٹریکر تمام آنگن واڑی مراکز، آنگن واڑی کارکنوں اور مستفیدین کی نگرانی اور ٹریکنگ کو متعین اشاریوں کے مطابق ممکن بناتا ہے۔ اس کے تحت ٹیکنالوجی کا استعمال بچوں میں قد کی کمی، کمزوری اور کم وزنی کی صورتحال کی بروقت اور متحرک شناخت کے لیے بھی کیا جاتا ہے۔

مشن پوشن 2.0 کے تحت انجام دی جانے والی اہم سرگرمیوں میں سے ایک کمیونٹی موبلائزیشن اور بیداری پیدا کرنا ہے، جس کا مقصد لوگوں کو غذائیت کے مختلف پہلوؤں سے آگاہ کرنا ہے، کیونکہ اچھی غذائی عادات اپنانے کے لیے رویّوں میں تبدیلی کے لیے مسلسل کوششیں درکار ہوتی ہیں۔ ریاستیں اور مرکز زیر انتظام علاقے مارچ-اپریل اور ستمبر کے مہینوں میں منائے جانے والے پوشن پکھواڑا اور پوشن ماہ کے دوران جن آندولن کے تحت باقاعدہ آگاہی سرگرمیاں انجام دیتے ہیں۔ سال 2018 سے پوشن ابھیان کے تحت منعقدہ جن آندولن مہمات میں اب تک 150 کروڑ سے زائد سرگرمیاں رپورٹ کی جا چکی ہیں۔ اس کے علاوہ، آنگن واڑی کارکنان کی جانب سے ہر دو ماہ بعد کمیونٹی بیسڈ ایونٹ (سی بی ای) بھی منعقد کیے جاتے ہیں تاکہ ماں اور بچے کی غذائیت کو فروغ دیا جا سکے۔ سال 2021 سے فروری 2026 تک ملک بھر میں تقریباً 9.8 کروڑ سی بی ای رپورٹ ہوئے ہیں۔

حکومت کے جامع نقطۂ نظر کو اپناتے ہوئے، خواتین اور بچوں کی ترقی کی وزارت اور وزارتِ صحت و خاندانی بہبود دونوں مل کر بچوں کی صحت اور غذائیت کی صورتحال بہتر بنانے کے لیے ہدفی اقدامات کرتی ہیں۔ مشن پوشن 2.0 کے تحت چھ خدمات کا ایک پیکیج فراہم کیا جاتا ہے، جن میں اضافی غذائیت، پری اسکول غیر رسمی تعلیم، غذائیت اور صحت سے متعلق تعلیم، ٹیکہ کاری، طبی معائنہ اور ریفرل خدمات شامل ہیں۔ ان میں سے تین خدمات یعنی ٹیکہ کاری، طبی معائنہ اور ریفرل خدمات قومی صحت مشن اور عوامی صحت کے بنیادی ڈھانچے کے ذریعے فراہم کی جاتی ہیں۔ اس کے علاوہ، گاؤں کی صحت، صفائی اور غذائیت کے دن بھی ماں اور بچے کی صحت کی خدمات اور غذائیت سے متعلق بیداری میں معاون ثابت ہوتے ہیں، جنہیں زمینی سطح پر آشا کارکنان، آنگن واڑی کارکنان اور معاون نرس دایہ کی مشترکہ کاوشوں سے منظم کیا جاتا ہے۔

خواتین اور بچوں کی ترقی کی وزیر مملکت، محترمہ ساوتری ٹھاکر نے آج راجیہ سبھا میں ایک سوال کے جواب میں یہ معلومات فراہم کی۔

                                          **************

                                                                                            

 

ش ح۔ ف ش ع

18-03-2026

                                                                                                                                         U: 4378

 

(ریلیز آئی ڈی: 2242239) وزیٹر کاؤنٹر : 6