قبائلی امور کی وزارت، حکومت ہند کے تعاون سے ٹرائبل کوآپریٹو مارکیٹنگ ڈیولپمنٹ فیڈریشن آف انڈیا (ٹریفیڈ) 18 سے 30 مارچ 2026 تک سندر نرسری، نئی دہلی میں ’بھارت ٹرائبز فیسٹ 2026‘ کا انعقاد کر رہی ہے، جس میں ملک بھر سے قبائلی دستکار، صنعت کار اور ثقافتی فنکار شریک ہوں گے۔

اس میلے کا افتتاح 18 مارچ 2026 کو مرکزی وزیر برائے قبائلی امور جناب جوال اورام کریں گے، جبکہ اس موقع پر وزیر مملکت برائے قبائلی امور جناب درگاداس اوئیکے سمیت دیگر معزز شخصیات بھی موجود ہوں گی۔

یہ میلہ روزانہ صبح 11 بجے سے شام 8 بجے تک عوام کے لئے کھلا رہے گا، جس کا مقصد قبائلی ہندوستان کی متنوع روایات، تخلیقی صلاحیتوں اور کاروباری جذبے کو فنون لطیفہ، دستکاری، ہینڈلوم، روایتی کھانوں اور ثقافتی پروگراموں کے ذریعے پیش کرنا ہے۔

میلے میں 78 ون دھن وکاس کیندروں کی نمائندگی کرنے والے 200 سے زائد منتخب اسٹالز اور ملک بھر سے 310 ماہر دستکار شرکت کر رہے ہیں۔ زائرین 120 قبائلی کھانوں کے اسٹالز کے ذریعے "فارسٹ ٹو پلیٹ" تصور کا تجربہ کر سکیں گے، جبکہ 17 براہ راست مظاہروں کے ذریعے روایتی دستکاری کے پیچیدہ عمل کو بھی قریب سے دیکھ سکیں گے۔ اس کے علاوہ 400 سے زائد فنکار ہر شام روایتی رقص اور موسیقی پیش کریں گے، جو ایک مکمل ثقافتی تجربہ فراہم کریں گے۔

19 سے 27 مارچ 2026 کے درمیان منعقد ہونے والا بھارت ٹرائبز بزنس کانکلیو پالیسی سازوں، صنعتکاروں اور قبائلی کاروباری اداروں کے لئے ایک اہم پلیٹ فارم ہوگا، جہاں پائیدار ٹیکسٹائل، قبائلی غذائی نظام اور اخلاقی لگژری مارکیٹس جیسے موضوعات پر تبادلہ خیال کیا جائے گا۔ اس کے تحت اختراع، روایتی علم کے تحفظ اور قبائلی نوجوانوں و خواتین کی مہارت سازی جیسے اہم امور پر بھی غور کیا جائے گا۔

24 مارچ 2026 کو منعقد ہونے والا سی ایس آر کانکلیو اس پہل کا اہم حصہ ہوگا، جس کا مقصد کارپوریٹ اداروں اور قبائلی کاروباری افراد کے درمیان رابطہ قائم کرکے پائیدار روزگار اور شراکت داری کو فروغ دینا ہے۔

اس میلے کی ایک نمایاں خصوصیت ریسا اقدام ہے، جس کے تحت معروف ڈیزائنرز انجو مودی، منیش ترپاٹھی، گورو جے گپتا، سندیپ کھوسلا اور سمیرہ دلوئی قبائلی دستکاروں کے ساتھ مل کر کام کر رہے ہیں۔ اس اقدام کے ذریعے ایری ریشم، کوٹپڈ کاٹن اور ڈونگریا کڑھائی جیسے روایتی ہنر کو جدید ڈیزائن کے ساتھ ہم آہنگ کرکے عالمی فیشن میں شامل کیا جا رہا ہے۔

تفصیلاتِ تقریب

بھارت ٹرائبز فیسٹ 2026

مقام: سندر نرسری، نئی دہلی

تاریخیں: 18 تا 30 مارچ 2026

⏰ وقت: صبح 11:00 بجے تا شام 8:00 بجے

یہ میلہ ہندوستان کی قبائلی برادریوں کی تخلیقی صلاحیتوں، پائیداری اور کاروباری امکانات کو فروغ دینے کے ساتھ ساتھ قبائلی دستکاروں اور کاروباری اداروں کو زیادہ سے زیادہ شناخت اور مارکیٹ کے بہتر مواقع فراہم کرنے کا مقصد رکھتا ہے۔

 

************

ش ح ۔ ا    م     ۔  م  ص

(U :  4258  )

(ریلیز آئی ڈی: 2241446) وزیٹر کاؤنٹر : 7